Luka 23

Yesu pa kuta thza Pilatu

(Mat 27.1-2,11-14; Mar 15.1-5; Joh 18.28-38)

1Mbunga thzothzihe thzemanine no ku twara Yesu kwa Pilatu nguvuru o Muroma. 2A tatekire ku mu capa eamba ci: “Kuma na tu wana oyu munu o ku pambanithsa ditunga dyetu. Aa kanithsa anu ku tera mutero kwa Sesare, karo aa cithsa ci Mesiya o fumu.”

3Pilatu ngou a mwipurire ci: “Ene yowe o fumu o Majuda?”

Yesu wa tawire ci: “Ii, o na amba.”

4Pilatu wa thsiurukerire kwakuru o mapurisita no ku mbunga no ku wa ambera ci: “Ka ni mu wanenine murandu oyu munu.”

5Unone a thsimbekerire ku amba ci: “Aa reta mikwangarakanyi mu kaci kanu mukaci kerongithsa yenthzi. Kuma naa tatekera ku Galilea no ku nengena mu Judea yomuhe, rero pano ngono muno mu Yerusalema.”

Yesu pa kuta thza Heroda

6Pilatu ou a i yuvire eyi wepurire ci: “Epo oyu munu po Mugalilea?” 7Ou a dimukire ci Yesu po aa tunda mu ndau ethzi thzi di mukoro wa Heroda, wa mu tumithsire ku kwenthzi o ku di naye mu Yerusalema kethsiya thsikati.

8Heroda wa nyanyukire nene ou a monine Yesu, inene wa shimbire thsikati thsothsire o ku cikumbwethzanga ci nga na mu mono. Inene wa yuvire keyi yenthzi, wa kuruperire ku mu mona o ku kwama thsimonithso. 9Heroda wepurire Yesu mangudi oangi, unone aye ka a mu tawire thsimweya. 10Akuru o mapurisita narongithsi o murao a henyenineko no ku capa Yesu eamba yoingi. 11Heroda no mashwarare enthzi a varaerire Yesu no ku mu teurura. A mu shupekire thsikoveyo thso thsifumu, a mu huthserire karo kwa Pilatu. 12Ku tunda edyo diyuwa Pilatu na Heroda a tatekire ku ciyuva no ku piruka anu na mbushe, kukare po kuma cithzimbire.

Yesu aa ratweriwa kufa

(Mat 27.15-26; Mar 15.6-15; Joh 18.39—19.16)

13Pilatu wethsire akuru o mapurisita no manduna nanu wahe. 14Wa wa amberire ci: “Mu na ni retera oyu munu ci kuma naa pambanithsa anu. Ni na mwipura o ku mu na ciyuvera mwaheno, ame ka ni wanine murandu peyi eamba mu na mu capa. 15No Heroda ka a ka mu wanenine murandu ngeyi a na ka mu huthsera ku kwetu. Kwithsa ethsi a na kwama ethsi nga epaiwera. 16Kenge ni mu fura pohuma wangu ni mu rukurure.” 17[Ko thsikati no thsikati thso Paseka, Pilatu kuma a wa punithserangire thsinthzinda.]

18Unone mbunga thzothzihe thza yoomokire ku amba ci: “O mwipae oyo munu oyo! O tu punithsere Barabasi!” 19Barabasi kuma a pakiwire mu kamenga ko murandu o mukwangaranyi o mu mbongi neamba yo kwipaa munu.

20Pakuninga ci Pilatu kuma a fotire ku thsia Yesu, wepurire anu karo. 21Unone a twarererire ku kumba ci: “Ambiwe pa mbinda! Ambiwe pa mbinda!”

22Pilatu wa hukerire ku wepura ro muthsihatu ci: “Ene ine a nepithsa? Ka ni monine murandu o ku mwipaera. Kenge ni mu fura pohuma wangu ni mu thsie.”

23Unone wahe a yoomokire nene ku amba ci ambiwe pa mbinda. Ku hura muyoyo wo wa othzire Pilatu. 24Pilatu ngou a ratwerire Yesu kokuthza komu thza foterire mbunga. 25Wa punithsire munu oyu a fotire, oya wa pakiwire mu kamenga ko mukwangaranyi neamba yo kwipaa munu, no ku wa pa Yesu ci a ka mu kwame omu a foterire.

Yesu aa ambiwa pa mbinda

(Mat 27.32-44; Mar 15.21-32; Joh 19.17-27)

26 O kwa mu twara kengeyo, a hanganine mukwerume o dithzina dyo Simoni o ku diumbo edi di nethsiwa Sirene, o ku ka tunda ku dikanda dyenthzi. A mu ooterire ku shimba mbinda munyima thza Yesu o kwa ka thza. 27Mbunga thzothzikuru thza mu shupwerire nambuyama awa a thzire o mu dira no ku kuana. 28Yesu wa cithsetukire no ku amba ci: “Amwe mwambuyama o mu Yerusalema, mwa direra ame, unone mu cidirerere amwe no ku direrera anenu. 29Inene thsikati thsaa keya, anu kenge a ku amba ci: ‘Akwa thsiyauthzi ambuyama wamvumi, awa a kana kwereka nowa a kana ku yamwithsa.’ 30Kethsiya thsikati,

“ ‘anu kenge a ku ambera mikinya ci:

“Mu tu were!”

Karo kenge a ku ambera ehumba ci:

“Mu tu thsike!” ’#Hos 10.8.

31“Inene ngeci anu aa kwama eyi ku thsitondo thsothsiyu, ngepi ya kwikara honi ku thsitondo thsothsikukutu?”

32A shimbire akwerume aidi wekeremi ci a ka wepaere pofoci na Yesu. 33Ou a kumine pa ndau ethzi thzi nethsiwa katendere, podiyo a ka mwamberire mu kaci kekeremi idi, thsimweya ku rudyo, thsimweya ku rumoho. 34Yesu wa ambire ci: “Tata, o wa tetere, inene ka dimukire eyi a tenda.” Karo a cieraerire evata yenthzi ko ku pepa ñera.

35Mbunga athzo thza tanekerire eyi ya tendaharire, naendithsi a mu teururire. A ambire ci: “Kuma naa yoyithsanga amweya, a ciyoyithse naye ngeci yodiyo shemwa Mesiya wa Nyambi, aye O Kuhanguriwa.”

36Mashwarare nawo a mu teururire, a keyire ku na mu pa waine o kuwawata. 37A ambire ci: “Ngeci yowe o fumu o Majuda o ciyoyithse.”

38Peuru thzo mutwi wenthzi a pamarerirepo thsidimukithso ethsi thsa ñoriwire ci: “Oyu po Fumu o Majuda.”

39Yumweya wekeremi oyu a pamarerire pa mbinda ku mbadi thzenthzi, wa mu yengwerire kuninga ci: “Ene kadi yowe o Krisitu? O ciyoyithse no ku yoyithsa natwe kengeyo.”

40Unone thsiya thsikeremi thsimweya thsa mu kutururire ci: “Ine yo kukana ku yapa Nyambi? A na tu ratwera raturo thzofoci nenthzi. 41Unone atwe raturo thzetu thzaa tu roera, inene atwe po na tu waniwa no murandu weyi na tu kwama yoimango. Aye po kwithsa thsothsimango ethsi naa kwama.”

42Ngou a rombire Yesu ci: “Yesu, wa ku ni vuruke ou wa ku keya mu Kutumina koe.” 43Yesu wa mu tawire ci: “Naa ku tongwera yoshemwa ci rero kenge o kekara nange mu paradaisi.”

Kufa kwa Yesu

(Mat 27.45-56; Mar 15.33-41; Joh 19.28-30)

44Ku tunda diyuwa o ku di di pa kaci ko mutwi mirema thza thsikire ditunga dyodihe mwitunde ihatu. 45Diyuwa dya nyorire, no dimbatu dyo mu Tembere dya yaturiwire pa kaci. 46Yesu wa karumukire ko diywi dyodikuru ci: “Tata, naa paka mwoyo wange mu moko oe.”#Mem 31.5. Ou a manine ku amba kengeyo wa minine mwoyo no ku fa.

47Muendithsi o mashwarare o Maroma ou a monine eyi ya tendaharire wa shangarire Nyambi no ku amba ci: “Yoshemwa oyu munu nedi munu o muwawa ka a di no murandu.” 48Anu wahe awa a keyire ku na kengerera ou a monine eyi ya tendaharire, a hukire ku maumbo o kwa ka thza o nyunga mitwi ko thsinyengo. 49Unone wahe awa a dimukire nawa Yesu no waya ambuyama a mu shupwerire ku tunda mu Galilea, emanine koshore o kwa tanekera eyi ya tendaharire yoihe.

Yesu aa vumbekiwa

(Mat 27.57-61; Mar 15.42-47; Joh 19.38-42)

50Kwekarire mukwerume o dithzina dyo Josefa o ku mbongi thza Arimatea. Nedi yumweya o mu Nthzango thzo Majuda, karo wekarire munu o muwawa, 51oyu wa tatererire Kutumina kwa Nyambi. Unone shaanga ci wekarire yumweya o manduna o mu Nthzango thzo Majuda, ka a vandire kwianekera netenda yaenthzenthzi. 52Wa thzire kwa Pilatu ku ka romba thsithzimbi thsa Yesu. 53Wa ka tururire thsithzimbi pa mbinda no ku thsi vungera pa dimbatu dyo lineni. Wa thsi shimbire no ku ka thsi paka mu thsidi thsothsipe omu mwa kana ku pakiwa munu, ethsi a cakurire mu diwe. 54Eyi yoihe ya tendaharire mu Diyuwa dyOciroithsero, o ku di fota ku tateka diyuwa dyo Savata.

55Ambuyama waya shupwerire Yesu ku tunda mu Galilea, a thzire na Josefa ku mararo ci a ka mone edi a ka paka thsithzimbi. 56Munyima thzeyo, a hukire ku diumbo ku ka ciroithserera ehefu no thsende yo ku ka wethsa thsithzimbi. Unone kuma a turumwithsire dyo Savata ko shupwera thsiraerera.

Selectat acum:

Luka 23: mho

Evidențiere

Partajează

Copiază