Marg 12

Kɨradi-kɔl gɨ ojɨ cay yagedi suru

(Matɨyo 21:33-46; Lug 20:9-19)

1Kardi nee ɨni na, Jesu ay te yoge kɔl dan̰ kɨradi-kɔl hɨn̰: «Gɨlmi gɨ pɨna wo̰ orɨn̰ dan̰ yagedi suru. Ban ay jaŋ gɨ ni gun̰u nɨwrɨn̰ caa daa bɨ, pay umboŋ gɨ ni oyɨn̰ wɔɔdi suru boy nee bɨ, gaɗɨ ƴaa gɨ sɨngɨɗɨ daa gɨ ni gamɨn̰ kɨbi boy nee bɨ,#12:1 Sɨlagɨŋ: Esaïe 5:1-2. say bɨn̰ ka-yage ga ɗaŋ agɨrge pa dɨm ma, ɗen̰ gusi orɨn̰ tɨrga ƴee. 2Kɨɗɨn̰ ga kɨdɨrɛ gɨ ni arɨn̰ suru le bugoŋ ɨni na, ban gɨy guyɔŋ koyi gɨ pɨna wo̰ gusi ka-yage suru le, ay na ƴeen̰ wɔɔdi suru toy di ojɨ cayi le kobɨge. 3Ama ka-yage suru le, ƴomiige teeyige bɨ, tayige coŋ ɗeyge jogɨ kobi kalɨn̰ bɨ. 4Ba-gulɔŋ yagedi suru le, say gɨy guyɔŋ koyi gɨ ɗaŋ coŋ gusɨge. Ama ban gɨ nee le kalɨn̰ ma, kan teege cayi bɨ, yagɨdiige bɨ. 5Ban jogɨ gɨye guyɔŋ koyi gɨ ni cay-sɨbɨdɨge gusɨge coŋ, ama kan dɨɗiige. Kardi nee ban jogɨ gɨye gɔyɔŋ kayi ga ɗaŋ coŋ dan̰ kondiige nee kalɨn̰ ma, kan teege ga pɨna bɨ dɨɗɨge ga pɨna bɨ. 6Bayi na ungo pɨna ƴɔbɨ gusi, na kurondi gɨ ban lee-toyi tɔgɨ. Lee gɨ kɨɗɨn̰ ga kan kagage nɔm coŋ ɨni na, na ban ma ban gɨygii gusɨge. Kɨya wa ban ye hɨn̰: “Kan kɨya bogɨn̰ kuronɨ kɔl nee.” 7Ama ka-yage suru le yen̰ge gusɨge hɨn̰: “Ban gɨ kɛ le, na ba bɨle ba-gulɔŋ yagedi suru le wɔlɛ gɨ ɗaŋ gɨŋ! Ɨregɨŋ ana dɨɗiigɨŋ coŋ ɗe hɨnga ga ni ban̰di-gulɔŋ le baa bɨna.” 8Ɨni na, kan ƴomiige dɨɗiige coŋ bɨ, dɨbɨge gundi kɨbɨ yagedi suru gɨŋ doŋ.» 9Jesu ɨngɨrge yege hɨn̰: «Kɛ na wa ma ba-gulondi yagedi suru le kɨya lɔɔ ga? Ban kɨya sɔ dan̰ gusi koyi ɔrɛ duroy yagedi suru gɨŋ le dɨɗe ka-yage suru le coŋ. Ban kɨya bɔgɛ gɨye yagedi suru le kobɨ kalaŋ ga ɗaŋ gaŋ. 10Kɔl gɨ kan walge duroy Magtubu di da Kumu dɨŋ yege hɨn̰:

“Oru gɨ tumɔ ka-gaɗe ƴaa dɨbɨge pɨrɨŋ coŋ le,

Say bɨle na oru gɨ kuɗa tɔgɨ, ɗɨn̰ kamdi,

Gɨ kan ɗege tɨbɨn̰ ƴaa dɨŋ.

11Hɨnga ga nee le na gɨye-lɔɔ gɨ da Ba-gulɔŋ.

Lee gɨ say bɨle hɨnga ga ɗɨn̰ cɨn̰-kɨɗɨn̰ cɨndɨnagɨŋ.”»#12:11 Ayge na duroy: Psaumes 118:22-23.

12Ka-cay ka-bɔgɛ kɨbar bɨ, ka-gɨlɨn̰ kalaŋ gasɨn̰-kɔl bɨ, malge gɨyəŋ gɨ ni ƴɔmɛ Jesu, ama kan hɨndarge na dɨmdɨrdi kalaŋ. Kɨya wa kan sol gɨ kɨradi-kɔl gɨ Jesu ba dor le, na ojɨ naa cayge ke. Lee gɨ kan ɗeyge bɨ orge kɨɗɨn̰ kage.

Kɔl gɨ ojɨ cay hɔgɛ lambo

(Matɨyo 22:15-22; Lug 20:20-26)

13Ɨni na, ka-cay ka-bɔgɛ kɨbar bɨ, ka-cay ka-gɨlɨn̰ kalaŋ gasɨn̰-kɔl bɨ, gɨygɨge kalaŋ ga pɨna wo̰ gusi Jesu, ga saygage na duroy Parɨsɨn̰an̰əŋ bɨ, duroy kalaŋ ga da Ɛrɔd bɨ, ɗe na orge gɨybii dan̰ kɔl gɨ ni ɨngɨre. 14Bugoŋge gusi ɨni na, kan yeyige hɨn̰: «Ba-gɨlɨn̰ kalaŋ hɨnga, ni sol gɨ ji na ungo ba yɔɔ kɔl gɨ cɨndi bɨ, ji hɨndara cɨn̰ ungo naŋ bɨ, kɨya wa ji dɨra cɨn̰ ungo naŋ. Ama ji gɨlɨn̰ kɔl kalaŋ na te gɨyəŋ gɨ da Kumu dan̰ gɨyəŋ gɨ da kɔl gɨ cɨndi. Yani ƴee bɨ, kɛ gasɨn̰-kɔl bɨn̰ ungo gɨyəŋ gɨ ni bɨn̰ kɨlma gɨ gumu Sejar lambo wala, narii ga? Kɛ ojɨ gɨ ni gɨ bee wala bee naŋ ga?» 15Ama Jesu sol jɨba toge di nee le, lee gɨ ban yege hɨn̰: «Na kɨya wa ma magɨŋ gɨybəŋ wo̰ ga? Bəŋ gɨŋ dan̰ sɨle di ɓal cay kobɨ ba-lɔɔ gɨye gɨ ni wɔlɛ pɨna aŋ sol.» 16Kan ɨrgan̰ge dan̰ sɨle le bii. Ɨni na, Jesu ɨngɨrge hɨn̰: «Na cay waŋ bɨ na waŋ gusondi bɨ, ma kan ɗege duroy sɨle dɨŋ le ga?» Kan dɨbiige cay nee yeyge hɨn̰: «Na gɨ da Sejar.» 17Ɨni na, Jesu yege hɨn̰: «Naa hɨn̰ wo̰ na, bɨn̰gɨŋ Sejar hɨnga ga ojɨ cay Sejar bɨ, bɨn̰gɨŋ Kumu hɨnga ga ojɨ cay Kumu bɨ.» Lee gɨ kɔl kayge yɔd cay kɔl gɨ ban ba dɨbɨge cay nee le.

Ɨngɨre kɔl gɨ ojɨ cay bɔyɛ lɨbe

(Matɨyo 22:23-33; Lug 20:27-38)

18Kalaŋ ga ni Sadusɨn̰ɛ ga pɨna wo̰ ga yege gɨ kalaŋ ga madɨraŋ na kɨya bɔyɛge lɨbe naŋ le, ɨrgage gusi Jesu, ɨngɨriige hɨn̰: 19«Ba-gɨlɨn̰ kalaŋ hɨnga, Moyis wal duroy magtubu gasɨn̰-kɔl dɨŋ ojɨn̰ cayna ye hɨn̰: “Hɨn̰ gɨ ungo na ɨran̰ dan̰ kurɨndi gɨ ƴee tama, ma ban na mara dɨle wɔɔ kɨye danaa na, naa wa wa kalɨn̰ ma na kuɗa gɨ kurɨndi gɨ na baa le, na ƴaa tama di nee le woon̰ kɨye dɨbɨ ban̰di kurɨndi gɨ ma le.”#12:19 Sɨlagɨŋ: Deutéronome 25:5-6.» 20Ɨni na, kalaŋ ga pɨna wo̰ won̰ge jurgum a te karme toge dɨŋ. Gɨ cay wase ƴee tama bɨ, say ma dɨle wɔɔ kɨye danaa. 21Ɨni na, ban gɨ cay sɔɔdɨge say ƴee tama le, ama ban say ma dɨle wɔɔ kɨye danaa bɨ. Ban gɨ cay sɨbɨdɨge lee hɨn̰ wo̰ bɨ. 22Ama kan ga jurgum le, pɨna gɨ wɔɔ kɨye danaa dɨbɨ ban̰di kurɨndɨge le unɔ. Kardi nee gɛs na, tama le kalɨn̰ ma say ma orɨn̰ toyge bɨ. 23Hɨn̰ wo̰ na wɔlɛ gɨ kalaŋ ga madɨrdaŋ kɨya bɔyɛ lɨbe na, kan kɨya bɔyɛ lɨbe bɨ. Ama kɛ hɨndi le, hɨndi kɨya wɔyɛ bɨn̰ na waŋ gɨ pɨna duroyge ga? Kɨya wa kan jurgum toge dɨŋ nɔm ƴooge. 24Jesu dɨbɨge cay nee yege hɨn̰: «Ɨrɨmedɨgɨŋ ɨra dan̰ gɨyəŋdi naŋ na kɨya wa ga? Kɨya wa kɨŋ sɨla duroy Magtubu di da Kumu naŋ bɨ, dɔnɔ di da Kumu naŋ bɨ. 25Kɨya wa wɔlɛ gɨ kalaŋ ga madɨrdaŋ kɨya bɔyɛ lɨbe le, ban̰aŋ kɨya ƴɔɔge kandɨ naŋ bɨ, kandɨ kɨya ƴɔɔge ban̰aŋ naŋ bɨ. Kan kɨya wɔyɛ gɨlɨn̰a na hɨn̰ ka-ƴɔbɛ ga daa nii wo̰. 26Kɔl gɨ ojɨ cay kalaŋ ga kɨya bɔyɛ lɨbe le, kɛ kɨŋ hal gɨybəŋ a cay kɔl gɨ kɨŋ ɗongɨsɨ a duroy magtubu di da Moyis dɨŋ le ga? Ɨrɨmgɨŋ a cay kɔl gɨ ojɨ cay hɨya gɨ gɔju gɨ ƴee tɨwa le. A kɨɗɨn̰ ga nee gaŋ le, Kumu yeyi hɨn̰: “Ɨŋ-bandi ɨŋ na Kumu gɨ da Abɨraham bɨ, Kumu gɨ da Isag bɨ, Kumu gɨ da Jagob bɨ.”#12:26 Ayge na duroy: Exode 3:6. 27Hɨn̰ wo̰ na Kumu na, Kumu gɨ da kalaŋ ga madɨrdaŋ naŋ, ama na Kumu gɨ da kalaŋ ga somge-bɨra. Ɨrɨmedɨgɨŋ ɨra dan̰ gɨyəŋdi naŋ.»

Te tumɔ di gumu ɗɨn̰ kamdo nɔm

(Matɨyo 22:34-40; Lug 10:25-28; 20:39-40)

28Ba-gɨlɨn̰ kalaŋ gasɨn̰-kɔl gɨ da Moyis gɨ pɨna wo̰ je kɔl gɨ kalaŋ ga ni Sadusɨn̰ɛ bɨ, Jesu bɨ, ba man̰ge cay nee le. Kɨɗɨn̰ ga ban sol gɨ Jesu dɨbɨge nee dan̰ gɨyəŋdi na, ban sɨygɨ gusi bɨ ɨngɨrii hɨn̰: «A duroy te tumɔ nɔm le, di ani ma na di cay wase ga?» 29Jesu dɨbii cay nee yeyi hɨn̰: «Di cay wase ba kɛ:

“Ay, te wɨn̰je gɨ da Ɨsɨrayɛl jagɨŋ, na Ba-gulɔŋ Kumu kona ma na Ba-gulɔŋ pɨna hayi kəɗ kəɗ,

30Ba-gulondɨn̰ Kumu le, ji kɨya ɗoyi jam cɨndɨn̰ gaŋ dan̰ ɗugon̰ pɨna bɨ,

Dan̰ kuyoŋdi-gusɨn̰ nɔm bɨ, dan̰ ɨrɨmedɨn̰ nɔm bɨ,

Dan̰ togɨn̰ nɔm nee bɨ.”#12:30 Ayge na duroy: Deutéronome 6:4-5.

31Bɨ di ni sɔɔdo ba kɛ:

“Ji kɨya geye mɨgan̰ hɨn̰ gɨ ji ba geyɨn̰ gusɨn̰ kon̰ wo̰ bɨ.”#12:31 Ayge na duroy: Lévitique 19:18.

Te tumɔ di ɗaŋ di gumu ɗɨn̰ kan ga nee le unɔ.»

32Ba-gɨlɨn̰ kalaŋ gasɨn̰-kɔl le yeyi hɨn̰: «Kɔl kon̰ kuɗa ba-gɨlɨn̰ kalaŋ hɨnga. Kɔl kon̰ na cɨndi, kɨya wa Kumu na pɨna hayi kəɗ kəɗ gɨ ɗaŋ unɔ, na ban ƴɔbɨ. 33Bɨ ojɨ gɨ ungo na ɗayi jam cɨndi gaŋ dan̰ ɗugoy nɔm bɨ, dan̰ ɨrɨmedi nɔm bɨ, dan̰ togi nɔm bɨ, ɗe ban si mɨgay jam cɨndi gaŋ hɨn̰ gɨ ban ba sɨn̰ gusi koyi jam cɨndi gaŋ le bɨ. Hɨnga ga nee le ɗɨn̰ bɔgɛ kɨbar gɨ ulge coŋ dan̰ hɨnga ga ni bɔgɛ kɨbar nɔm.» 34Bɨ kɨɗɨn̰ ga Jesu sol gɨ gɨlmi le dibii cay nee dan̰ cɨn̰-muɗɔlɛ ɨni na, ban yeyi hɨn̰: «Ji hen̰ dan̰ dɔɔ-ƴaa di da Kumu naŋ.» Kardi kɔl gɨ nee le na, ungo mala gɨ ni ɨngɨrɨn̰ Jesu kɔl naŋ bɨrɨŋ ɨni.

Kɨris bɨ Dabid bɨ

(Matɨyo 22:41-46; Lug 20:41-44)

35Jesu gɨlɨn̰ kalaŋ kɔl a duroy gulɔŋ ƴaa-di-da-Kumu dɨŋ ɨni na, ban ɨngɨr hɨn̰: «Kɛ na mɨna ma ka-gɨlɨn̰ kalaŋ gasɨn̰-kɔl gɨ da Moyis yege hɨn̰ Kɨris ban gɨ Kumu dorii le naa kungay Dabid ga? 36Kɨya wa Dabid gusi koyi kalɨn̰ ma ye dan̰ gɨyəŋ gɨ da Turnɔ ɗe-kuduroy-bɛrɛ hɨn̰:

“Ba-gulɔŋ Kumu yen̰ Ba-gulonɨ hɨn̰:

Ɨre sɨma a cay kɔbɔŋ gɨ bara gɨŋ,

Bɨrɨŋ gɨsɨn̰ gɨ ɨŋ kɨya bɨle ka-baadɨn̰

Leen̰ hɨnga ga ji kɨya bogɨn̰ gondɨn̰ cay nee.”#12:36 Sɨlagɨŋ: Psaumes 110:1.

37Kɨlma Dabid gusi koyi kalɨn̰ ma na tɨga ban gɨ Kumu dorii “Ba-gulɔŋ” na, na mɨna ma ban gɨ bɨle kurɨn̰ kɨlma Dabid coŋ ga?»

Ɨni na, dɨmdɨrdi kalaŋ dan̰ kondiige somge jege kɔl koyi le dan̰ gusi-mɔwa.

Ɗagɨŋ muɗɔlɛ cay gusɨgɨŋ

(Matɨyo 23:1-12; Lug 20:45-47)

38A boy gɨle hɨnga ga da Jesu gaŋ le ban ye hɨn̰: «Ɗagɨŋ muɗɔlɛ a cay gusɨgɨŋ gɨŋ, kɨya cay ka-gɨlɨn̰ kalaŋ gasɨn̰-kɔl gɨ da Moyis. Kɨya wa kan na ka-tɔbɛ gumɔjɨ ga sɨngɨɗɨdəŋ ga jɨran̰de gorɨn̰ gɨlɨn̰ gusɨge bɨ, geyge gɨ kalaŋ na laage lapɨya dan̰ hurɔmɔ a gɛgɛr gɨŋ bɨ. 39Kan geyge sɔmɛ na kɨɗɨn̰ ga ni gusoŋ-tɔgɛ gaŋ a duroy ƴaa-daye-di-da-Jubɨn̰əŋ gaŋ bɨ, a kɨɗɨn̰ dɔɔ ga ni gusi-mɔwa ga gumu gaŋ bɨ. 40Kan na ka-lɔbdɛ hɨnga ga da kandɨ ga kodɨn̰ige ma bɨ, ka-ɔlɛ Kumu kardɨge sɨngɨɗɨ tumoy kalaŋ bɨ, kɨɗɨn̰ ga kan na ɨr tumoy kalaŋ na, kan lee gusɨge leen̰ hɨn̰ kalaŋ ga dan̰ durɔ ɗɨngar wo̰ bɨ. Kɔl gɨ kan ba kɨya bɔyɛ cayge le kɨya dɨmbɨrwa tɔgɨ.»

Hɨnga bee ga da tama di kudurɔ ma

(Lug 21:1-4)

41Jesu som bɨle cɨndi bɨn̰ kɨɗɨn̰ ga kan been̰ nare nee gaŋ a duroy ƴaa-di-da-Kumu dɨŋ, kɨya solɨn̰ gɨyəŋ gɨ dɨmdɨrdi kalaŋ kɨya bogɨn̰ gursu boy nee. Ka-wɔɔ hɨnga beege gursu kondɨ nee. 42Tama di pɨna wo̰ di kudurɔ ma di ɗe n̰age ɨrga bɨ. Hɨndi bee sisi sɔɔ di ɓala gursu pɨna naŋ boy nee. 43Kardi nee ɨni na, Jesu say te ka-aye-cay-tɨbayi bɨ yege hɨn̰: «Aŋ yəgɨŋ daa waŋ na cɨndi: Tama di kudurɔ ma ɗe n̰age di kɛ le, bee hɨnga ɗɨn̰ kan ga ɗaŋ nɔm ga beege hɨnga a boy kɨɗɨn̰ ga ni bogɨn̰ hɨnga gaŋ le. 44Kɨya wa kalaŋ ga nee le nɔm ayge na kɨbɨ gursu toge di kondi beege. Ama hɨndi na, hɨndi ay na kagadi hɨnga wɔɔdo ga hɨndi orɨn̰ kɨya amɨn̰ guso bee.»

Selectat acum:

Marg 12: gab

Evidențiere

Partajează

Copiază