Lukas 19
19
Yeesus un Sakeu
1Yeesus is in Jerikoo khom un waar ti xtat torich am keen. 2Tort hot en rayche man kewoont, woo Sakeu keheest hot, un waar te xëf fon te xtayer kaseerer. 3Tee hot fersuucht siin weyer Yeesus waar, awer khont net, wayl Sakeu waar tsu kleen. 4Too is eyer em folek foer kexprung un is uf en wilte fayche paam kekrawelt fer Yeesus siin, woo tort torich këngt. 5Wii Yeesus tort an tas plats hiin khom is, hot eyer in ti hee kekukt un saat fer Sakeu:
— Sakeu, khom xnel runer, wayl hayt mus ich in tayn haus playwe.
6Sakeu is xnel runer kang un hot em mit frayt an sayn haus uf kenom. 7Al tii woo tas kesiin hon, hon aa kefang se krinse:
— Tee man playpt pay en sinter!
8Sakeu hot sich uf kextelt un saat fer te Hër:
— Heyer, Hër, ich kewe ti heleft fon mayn sache fer tii aarme. Un, wën ich yemant pextool hon, kewe ich fier mool mee tsurik.
9Too saat Yeesus:
— Hayt is ti retung in tas haus rin khom, wayl tee man is aach en Aaprahams nookhomer. 10Wayl te Soon fom Man is hoole khom un rete khom weyer ferloer is.
Ti tseen koltne nikle
Mateus 25.14-30
11Yeesus hot en paraapel fertseelt fer tii woo keheyert hon was eyer kesaat hat. Yets waar eyer ticht an Yeruusalëm, un tesweche hon se kemënt te Kotes Raych teet klaych tsum foerxayn khome. 12Too saat Yeesus:
— En man fon en important familye is noo en wayt lant kereest, fer tsu kheenich kemach kewe un tan tsurik khome. 13Eep eyer kereest is, hot eyer tseen fon sayn knechte keruuf, hot fer yeete en koltne nikel kep un saat: “Siit was teyer too temit fertiine khënt, pis ich tsurik khome.”
14— Awer ti layt fon sayn lant khonte em net layte un tesweche hon se en komisyoon noo kexikt fer saan tas se net wolte hon tas tee man tsu kheenich kemach kewe solt.
15— Te man is tsu kheenich kemach kep un is tsurik khom. Too hot eyer ti knechte khome kexikt, tii weem eyer tas kelt kep hat, fer wise wii fiil se fertiint hete. 16Te eyerxte is khom un saat: “Hër, mit tëm koltne nikel woos tuu mich kep hast, hon ich tseen fertiint.”
17Te hër hot keantwort:
— “Mechtich kuut! Tuu pist en kuute knecht! Un, wayl mer sich uf tich ferlose khan mit kleenichkheete, mache ich tich tsu hër iwer tseen xtet.”
18— Te tswete knecht is khom un saat: “Hër, mit tëm koltne nikel woos tu mich kep hast, hon ich finef fertiint.”
19Te hër saat:
— “Tuu wërst kowerneyer iwer finef xtet!”
20— Te anere knecht is khom un saat: “Hër, too is tayne nikel. Ich hon em in kephakt in en tuuch un hon em ferxtekelt. 21Ich hat pang, wayl ich wees tas tuu en xtrënge man pist, woo fon te anere wech hoolst was net tayn is un ërnst was tuu net keplanst host.”
22Te hër hot keantwort:
— “Tuu pist en xlechte knecht! Ich penutse tayn aychne wërter fer tich se xulkeere. Tuu wust tas ich en xtrënge man sin, tas ich te anere wech hoole was net mayn is un tas ich ërnte was net mayn is. 23Warom host tuu tan net mayn kelt uf ti pank kextelt? Soo, wën ich tsurik kheemt, het ich tas tsurik kriit mit tsinse.”
24Un saat fer tii woo tort waare: “Hoolt tëm te nikel wech un kept em fer tee woo tseen hot.”
25Tii hon keantwort:
— “Awer tee hot xon tseen nikle, hër!”
26Un te hër saat:
— “Ich fersichre es aych tas tee woo fiil hot, kriit noch mee; awer tee woo niks hot, pis tas weeniche woo eyer hot kept em wech kehool.#Mt 13.12; Mk 4.25; Lk 8.18 27Un yets, pringt mayn faynte too heyer, woo net wolte hon tas ich tëne sayn kheenich sin solt, un tuut se too foer mich umpringe.”
Yeesus khomt in Yeruusalëm
Mateus 21.1-11; Markus 11.1-11; Yohan 12.12-19
28Wii Yeesus tas kesaat hat, is eyer foer tëne kang noo Yeruusalëm. 29Wii se an ti wile Petfajë un Petanye am khome waare, ticht am Oliiwe Përich, hot Yeesus tswaay tisiple foer kexikt, 30un saat tëne:
— Keet tort triwe in ti wile. Klaych wën teyer hiin khomt, fint teyer en eeselche aan kepun, woo noch nii kerit kep waar. Pint em ap un pringt em too heyer. 31Wën yemant aych froot warom teyer tas am mache sayt, saat tas te Mayster em hon mus.
32Tii sin hiin, un hon ales kefun wii Yeesus kesaat hat. 33Wii se te eeselche loos am pine waare, hon ti hëre kefroot:
— Warom pint teyer te eesel loos?
34Tii hon keantwort:
— Te Mayster mus em hon.
35Too hon se te eeselche pay Yeesus keprung, hon sayn tsaych iwer tas tier keleet un hon Yeesus keholef truf xtaye. 36Soo wii eyer am torich keen waar, hot tas folek sayn mantle iwer te weech ketekt. 37Wii Yeesus te Oliiwe Përich runer am rayte waar, ticht an Yeruusalëm, waar en kroos folek fon aanhënger tëm noo am keen. Un tii, fol frayt, hon Hërkot in hart xtim keloopt weche ales was se kesiin hate. 38Tii waare am saan:
— Tas te Hër seechent te Kheenich woo in Kotes naame khomt! Friite im himel un kloor tsu Kot!#Sl 118.26
39Too hon phaar fariseyer, woo tswixich te mënxe waare, fer Yeesus kesaat:
— Mayster, xik tayn tisiple tes maul tsuu hale!
40Yeesus hot keantwort:
— Ich fersichere aych tas, wën tii sich ruych hale, tan xraaye ti xteen!
Yeesus prilt un tauert Yeruusalëm
41Wan Yeesus ticht an Yeruusalëm khom is un hot ti xtat kesiin, hot eyer keprilt un hot se ketauert 42un saat:
— Ooh! Yeruusalëm! Wëns tuu hayt wist was nootwënich is fer friite se hon! Awer yets khanst tuu tas net siin. 43Wayl ti tsayte khome woo tayn faynte tich umkrayse mit rampe fer tich atakeere, un tuun tich fon ale sayte fertrike. 44Tii tuun tich un tayn kanse pewooner kans fernichte. Playpt noch net mool eene xteen uf em anere, wayl tuu host net ti tsayt erkhënt woo Hërkot khom is fer tich se rete.
Yeesus im Thëmpel
Mateus 21.12-17; Markus 11.15-19; Yohan 2.13-22
45Yeesus is uf te hoof fom Thëmpel kang un hot aankefang ti hantler raus se yaan. 46Tee saat iwer tii:
— In te Hayliche Xrifte xteet kexrip tas Hërkot soo kesaat hot: “Mayn haus sol en plats sin woo se al tsu mich peete khëne.” Awer teyer hot tefun en xpitspuuwe hool kemach.#Is 56.7; Jr 7.11
47Yeesus hot yeete taach uf em hoof fom Thëmpel keuntericht. Ti xëfe fon te priister, ti Kesets mayster un ti foleks fiirer wolte em umpringe.#Lk 21.37 48Awer tii hon khee weech kefun fer tas se tuun, wayl al hon fiil acht kehal uf was eyer am saan waar.
Selectat acum:
Lukas 19: NTHunsrik
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
2022 Sociedade Bíblica do Brasil
