Lukas 17
17
Ti sinte un ti fertsayung
Mateus 18.6-7,21-35; Markus 9.42
1Yeesus saat fer sayn tisiple:
— Imer wërt tings paseere woo ti layt in sinte fale mache, awer ay fon weyer xult too traan hot! 2Weyer peser fer tee persoon wën eyer ins meer kexmis keept mit en kroose miil xteen am hals kepun als mache tas eene fon tëne kleene sinte macht. 3Past uf! Wën tayne pruuter sinte macht, tuu en xteere; wën eyer sich roye tuut, fertsay en. 4Wën eyer siwe mool te taach sinte keeche tich macht un yeetes mool tee sich unxultiche tuut, tan fertsay en.
Te klaawe
5Ti aphostle hon fer te Hër ferlangt:
— Mach unser klaawe kreeser.
6Un te Hër antwort:
— Wën ayre klaawe soo kroos weyer wii en mustart soomche, khënt teyer saan fer tee wilte fayche paam: “Rop tayn wortsle aus te eyert un plans tich ins meer!” Un tee teet heere.
Em tiiner sayn flicht
7Yeesus saat:
— Xtelt aych mool foer wën teyer en knecht het woo in te plantaaj xaft ore tuut ti xeef uf pase. Wën tee tsurik khomt fom khamp, meechst tuu tëm saan: “Khom xnel un sets tich an te tix”? 8Kewis net. Kraat es keeche teel, wils tuu iim saan: “Prepareyer mayn nachts ese, pin tayn xërts um un petiin mich am tix. Tëm noo khanst tuu ese keen.” 9Meechte meyer tëm knecht filaycht tanke mise wayl tee ketuun hot was tëm kexikt kep waar? 10Soo mus tas aach mit aych sin. Wën teyer ales kemach hot was kexikt waar, saat: “Meyer sin tiiner, sonst niks, hon ploos unser flicht ketuun.”
Tseen lëpra kranke kewe keheelt
11Uf em weech noo Yeruusalëm, is Yeesus iwich ti krëns tswixich Samariia un Kalilëya kang. 12Wii eyer uf en kleen plats aan khom is, hon tseen lëpra kranke sich kemelt. Sin pisye wayter wech keplip 13un hon in hat xtim kexraayt:
— Yeesus, Mayster, petauer uns!
14Wii Yeesus se kesiin hot, saat eyer:
— Keet un ferlangt fer ti priister sole aych unersuuche.
Soo lang wii se am keen waare, sin se sauwer fon sayn weye kep. 15Eene fon tëne, wii eyer kesiin hot tas eyer kesunt waar, is tsurik khom, Hërkot am loope in hat xtim. 16Hot sich foer Yeesus kekniit un hot em ketankt. Tee waar en samaritaaner. 17Yeesus hot kefroot:
— Sin net ti tseen al keheelt kep? Woo sin ti anere noyn? 18Fint mer khëne woo tsurik khom is sonst tee auslëner?
19Tan saat Yeesus tëm:
— Xtay uf un kee; tayne klaawe hot tich keret.
Te aankhom fom Raych
Mateus 24.23-28,36-44
20Phaar fariseyer hon fer Yeesus kefroot wan em Hërkot sayne Raych khome teet. Eyer antwort:
— Wën Hërkots Raych khome tuut, is es khee tings woo mer siin khan. 21Nimant wil saan: “Kuuk mool! Hier is es” ore “Too is es”. Wayl te Khotes Raych is in aych trin.
22Tan saat Yeesus fer sayn tisiple:
— Khomt ti tsayt woo teyer ëne fon te taache siin wolt woo te Soon fom Man xon aan khom is, awer kriit em net se siin. 23Phaar wole fer aych saan: “Kukt mool heyer” ore “Kukt mool tort”; awer keet net aus fer em se suuche. 24Wayl, soo wii te plits fon eene phunkt fom himel tsum anere xaynt, soo wil es sin am taach woo te Soon fom Man khome tuut. 25Awer, eyerxt mus Eyer layte un ap kextoost kewe fom folek fon hayt tsu taach. 26Wii es im Noah sayn tsayte waar, soo aach wil es sin in tee taache foer te Soon fom Man khomnis. 27Al hon kes un ketrunk, un ti mëner un ti fraae hon kehayrat, pis an te taach woo Noah in te xif kang is. Tëm noo is te sintfluut khom un hot se al umkeprung. 28Tas selwiche is paseyert im Lot sayn tsayt. Al hon kes un ketrunk, khaaft un ferkhaaft, keplanst un kepaut. 29Am taach woo Lot aus Sotoma kang is, hot es fayer un xweefel fom himel kereent un hot se al umkeprung. 30Soo wils sin am taach woo te Soon fom Man tsum foerxayn khomt. 31Tan, weyer uf em haus is, uf em teras, sol runer khome, un sol klaych ausrayse, un sol khee tsayt ferleere fer rin se keen sayn tings hoole. Un weyer in te plantaax is, sol net hëm keen. 32Erinert aych an Lot sayn fraa. 33Te persoon woo sayn aychne interese suucht, wil nii es echte leewe hon, awer, weyer sich selwer ferkest, kriit es echte leewe. 34In tee nacht wole tswaay persoone im selwiche pet xloofe. Ich pehaupte aych tas eens kehool kept un es anere kept kelos. 35Tswaay fraae tuun mitsamer weets maale: een kept kehool, un ti aner, kelos. 36[In tëm taach, tswaay mëner wole in te plantaax am xafe sin: eene kept kehool, un te anere, kelos.]
37Tan hon ti tisiple kefroot:
— Hër, woo wërt tas paseere?
Yeesus antwort:
— Woo te khërwer fon en toote is, too tuun sich ti oots feel samle.
Selectat acum:
Lukas 17: NTHunsrik
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
2022 Sociedade Bíblica do Brasil
