Yohan 1
1
Tas Wort woo leewe pringt
1Am aanfank, hot tee woo tas Wort kenënt is xon eksisteyert. Tas Wort waar pay Kot un waar Kot. 2Fom aanfank aan, waar tas Wort pay Kot. 3Torich tas Wort, hot Hërkot tas kanse tings kemach, un niks woo es kept is kemach kep oone tas Wort. 4Tas Wort waar tas leewe, un tas leewe hot licht keprung fer ti kanse layt. 5Tas licht xaynt in te tunkelheet, un ti tunkelheet hot te xayn net aus kemach.
6Waar en man, woo Kot kexikt hat, woo Yohan keheest hot.#Mt 3.1; Mk 1.4; Lk 3.1-2 7Tee is khom fer ausxpreche iwich tas licht, tas, torich tëm ti kanse mënxe ti mensaaj heere khënte un traan klaawe. 8Yohan waar net tas licht, awer is khom als tsayer fom licht, 9tas echte licht woo khom is un laycht ti kanse mënxe.
10Tas Wort waar noch imer uf te welt, un torich tas hot Kot ti welt kemach, awer ti welt hot tas Wort net kekhënt. 11Tee woo tas Wort is, is in sayn aychne natsioon khom, awer tas folek hot em net uf kenom. 12Awer phaar hon an em keklaapt un hon em uf kenom, un fer tii hot eyer ti recht kep fer Kot sayn khiner sin. 13Ti sin net Kot sayn khiner torich natierliche mitel: sin net kepoer waar wii en mënxliche fater sayn khiner; te aychne Hërkot waar tëne sayne fater.
14Tas Wort hot sich mënx kemach un hot tswixich uns keleept, fol liipe un woerheet. Un sayn kloor is uns ketsaycht kep waar, kloor woo eyer kriit hot fom Fater als sayne eensichste Soon.
15Yohan hot fer ti layt iwich Yeesus soo kesaat:
— Tas is tee fon weem ich kesaat hon: “Tee khomt noo mich, is awer importanter wii ich, wayl eep ich uf ti welt khom sin hot eyer xon eksisteyert.”
16Wayl meyer al sin noch imer ferxënkt waar mit te raychtum fon sayne liipe, mit fiile un fiile kaape. 17Tas kesets is kep waar torich Mooses, awer ti liipe un ti woerheet sin khom torich Yeesus Kristus. 18Khee mënx hot Kot mool kesiin. Ploos te eensichste Soon, woo Kot is un is paym Fater, is weyer uns ketsaycht hot weyer Kot is.
Ti mensaaj fom Yohan Te Taafer
19Ti yute fiirer hon fon Yeruusalëm phaar priister un lewite kexikt fer em Yohan se frooe weyer eyer weyer. 20Yohan hot taytlich kesaat:
— Ich sin net te Kristus.
21Tii hon noch mool kefroot:
— Weyer pist tuu tan? Pist tuu te Eliias?
Eyer hot keantwort:
— Nee, ich sin net!
Tan, hon se kefroot:
— Pist tuu te Profët woo meyer am waarte sin?#Ml 4.5a; Dt 18.15,18b
Eyer hot keantwort:
— Nee, ich sin net!
22Too hon se fer Yohan kesaat:
— Saa uns weyer tuu pist tas meyer en antwort nëme khëne fer tii woo uns kexikt hon. Was saast tuu fon teyer selwer?
23Yohan hot keantwort mit em profët Isaiias sayn wërter:
— “Ich sin tee woo im tesërt soo ruuft: Macht en eewe weech fer te Hër torich keen”.
24Tii woo kexikt kep waare, waare fariseyer. 25Tii hon fer Yohan kefroot:
— Wenst tuu net te Kristus pist, un net Eliias, un net te Profët woo meyer am waarte sin, warom tuust tuu taafe?
26Yohan hot keantwort:
— Ich taafe mit waser, awer tswixich aych is yemant woo teyer net khënt. 27Tee khomt noo mich, awer ich sin net ti eere weyert tëm sayn santaale uf pine.
28Tas is in Petanye paseyert, uf te anersayt fom Jortan flus, woo Yohan am taafe waar.
Te Kotes Xoof
29Am neekste taach, hot Yohan Yeesus kesiin in sayn richtung am khome un saat:
— Too is te Kotes Xoof, woo ti sinte fon te welt wech nëmt! 30Ich waar iwich tëm am xpreche wii ich saat: “Noo meyer khomt en man woo importanter is wii ich, wayl eep ich uf ti welt khom sin hot es tee xon kep.” 31Ich wust selwer net weyer tee waar, awer ich sin khom, un hon ketaaft mit waser tas tas folek fon Israël se wise kreecht weyer eyer is.
32Yohan saat wayter:
— Ich hon te Hayliche Kayst kesiin fom himel runer khome wii en taup un is pay em keplip. 33Ich wust net weyer eyer waar, awer Hërkot, woo mich kexikt hot mit waser taafe, saat fer mich: “Tuu siist te Hayliche Kayst runer khome un pay en man playwe. Tee is weyer taaft mit em Hayliche Kayst.” 34Ich hon tas kesiin un tesweche saan ich tas tee em Hërkot sayne Soon is.
Yeesus sayn eyerxte tisiple
35Am neekste taach, waar Yohann noch mool tort mit tswaay fon sayn tisiple. 36Wii eyer Yeesus kesiin hot torich keen, saat eyer:
— Too is em Hërkot sayn Xoof!
37Wii Yohan sayn tswaay tisiple tas keheyert hon, sin se em Yeesus noo kang. 38Too hot Yeesus hinersich kekukt, hot kesiin tas tii tëm noo am khome waare un hot kefroot:
— Was sayt teyer am suuche?
Tii hon kefroot:
— Woo woonst tuu, Rapii? (“Rapii” petayt “mayster”.)
39Yeesus saat:
— Khomt kuke!
Too sin se kang, hon kesiin woo Yeesus am woone waar un sin te rest fom taach pay tëm keplip. Tas is unkefeyer mitachs um fier uer paseyert.
40Antrëas, Simon Pheeter sayne pruuter, waar eene fon te tswaay mëner woo Yohan keheyert hate iwich Yeesus xpreche un tesweche waare se tëm noo kang. 41Tas eyerxte woo Antrëas kemach hot waar sayn pruuter Simon uf suuche un tëm saan:
— Meyer hon te Messias kefun. (“Messias” petayt “Kristus”.)
42Too hot Antrëas sayn pruuter tsu Yeesus kenom. Yeesus hot noo Simon kekukt un saat:
— Tuu pist Simon, Yohan sayn soon, awer fon yets an fort is tayn naame Khefas. (“Khefas” is tas selwiche wii “Pheetrus”, woo “xteen” petayt.)
Yeesus ruuft Filip un Natanaël
43Taachs truf, wolt Yeesus noo Kalilëya reese. Eep er fort is, is er Filip suuche kang un saat:
— Khom mit meyer!
44Filip waar fon Petsayta, fon woo Antrëas un Pheeter aach heyer waare. 45Filip is Natanaël suuche kang un saat:
— Meyer hon tee kefun fon weem Mooses kexrip hot in sayn Kesëtse Puch un fon weem tii profëte aach kexrip hon. Is Yeesus, Yoosef sayne soon, fon te xtat Nasarëë.
46Natanaël hot kefroot:
— Un khan too was kuutes fon Nasarëë khome?
Filip hot keantwort:
— Khom kuke!
47Wii Yeesus te Natanaël kesiin hot khome, saat eyer fon tëm:
— Too is en echte israelite, en man woo wërklich ufrichtich is.
48Too hot Natanaël fer Yeesus kefroot:
— Fon woo khënst tuu mich?
Yeesus hot keantwort:
— Eep Filip tich keruuf hat, hat ich tich xon kesiin huke unich tëm fayche paam.
49Too hot Natanaël aus keruuf:
— Mayster, tuu pist te Kotes Soon! Tuu pist te Kheenich fon Israël!
50Yeesus hot keantwort:
— Klaapst tuu an mich wayl ich kesaat hon ich het tich unich em fayche paam kesiin? Tuu wërst noch fiil kreeser tings erleewe. 51Ich fersichere aych tas tas woer is: teyer siit te himel uf un siit ti Kotes Ëngle ruf un runer keen iwich em Soon fom Man.#Gn 28.12
Selectat acum:
Yohan 1: NTHunsrik
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
2022 Sociedade Bíblica do Brasil
