Akte 21
21
Phaulus keet noo Yeruusalëm
1Meyer hon apxiit kemach fon tëne un sin fort kang, hon en poot kenom tirekt noo Khoos. Am neekste taach sin mer in Rootes aan khom un tan in Patara. 2Tort hon mer en poot aan ketrof woo noo Fenisia reese teet. Tan sin meyer inkextii un sin wayter kereest. 3Wan meyer xon ti insel Xipre siin khonte, sin meyer noo siit kereest fon tee insel un sin wayter in te richtung fon te prowins Siiria. Tan sin mer in Tiiro aan khom, wayl te poot too aplaate must, un meyer sin auskextii uf es lant. 4In tee xtat hon mer phaar kriste aanketrof un sin en woch pay tëne keplip. Tan, fom Hayliche Kayst awiseyert kep, hon tii fer Phaulus kesaat tas eyer solt net noo Yeruusalëm keen. 5Awer, wii te taach khom is, sin mer wayter kereest. Tan sin tii priiter, mit sayn fraae un khiner, mit uns kang pis aus ti xtat; un meyer al hon uns kekniit too an te xtrant un hon kepeet. 6Noo unser apxiit, sin mer uf te poot kextii un tii sin tsurik hëm kang.
7Meyer sin wayter kereest, fon Tiiro noo Ptolemays. Too hon mer ti priiter pekriist un sin en taach pay tëne keplip. 8Am anere taach sin mer ap kefaar un sin aankhom an ti xtat Sesarëya. Too sin mer pis ans haus fom ewankelist Filip kang un sin pay tëm keplip. Filip waar ëne fon te siwe mëner woo in Yeruusalëm raus kesuucht kep waare. 9Tee hat fier letiche meet kehat woo profetiseyert hon. 10Phaar taache noo unser aankhom, is en profët Akapus kenënt aankhom fon te rechioon fon Yutëya. 11Tee is ticht pay uns khom, hot Phaulus sayne këtel kehool, hot sayn aychne fiis un hënt aan kepun un saat:
— Te Hayliche Kayst saat tas: in Yeruusalëm tuun ti yute soo aan pine tee weem te këtel keheyert un wërt ap kep in te hënt fon tëne woo khee yute sin.
12Wan meyer tas keheyert hate, hon meyer un ti priiter fon Sesarëya tringlich aankehal tas Phaulus net noo Yeruusalëm këngt. 13Awer, eyer antwort uns:
— Warom tuut teyer soo prile un tuut mich soo traurich lose? Ich sin fërtich net ploos fer aankepun se kewe, awer sokaar fer se xtërwe in Yeruusalëm im naame fom Hër Yeesus.
14Un meyer khonte iim net rom xpreche fer net se keen. Tan hon meyer uf kep un saate:
— Tas em Hër sayne wile kemach kept!
15Noo phaar taache in Sesarëya, hon mer unser tings kesamelt un sin noo Yeruusalëm kang. 16Phaar priiter fon Sesarëya sin mit uns kang un hon uns hiin kefiert pis ans haus woo mer playwe teere. Tas haus waar em Menasom kewees, kepoer uf te insel Xipre. Xon lang tsayt waar te en krist kewees.
Phaulus pesuucht Tiaako
17Wan meyer in Yeruusalëm aankhom sin, hon ti priiter uns mit fiil frayt uf kenom. 18Am neekste taach, is Phaulus mit uns kang pis an Tiaako sayn haus fer iim se trefe. Un al ti eltre fon te khërich waare tort kewees. 19Tan hot Phaulus se pekriist un hot tëne en komplët pexraypung kemach fon ales was Hërkot torich iim kemach hat unich tee woo khee yute sin. 20Wii se tas ales keheyrt hate, hon se Hërkot keloopt un hon fer Phaulus kesaat:
— Tuu siist, liipe pruuter! Es kept tausente yute woo Yeesus aan kenom hon als Hër un al playwe xtrëng an Mooses sayn Kesets. 21Tii hon keheyert saan tas tuu fer ti yute woo in auslant woone unterichte teest tas se solte Mooses sayn kesets neewe lose un net mee sayn khiner pexnayte un praychte net mee te yute sayn kewoonheete rexpekteere. 22Was sole meyer mache? Kans sicher hon se xon keheyert tas tuu aankhom pist. 23Tesweche, mach was meyer tich saan: hier unich uns sin fier mëner woo en ferxprechung fer Hërkot inhale mise. 24Tan kee, hal teel mit tëne in te raynichung seremonii un petsaal tëne sayn xpeese tas tii te khop ap raseere khëne. Soo kriin al se wise tas es net woer is was fon tich kexproch kept. Kraat es keeche teel, kriin se wise tas, wërklich, tuu tëm noo Mooses sayn Kesets leepst. 25Awer, was ti woo khee yute sin aan keet, woo kriste kep sin, hon meyer xon en priif kexikt, woo soo saat: “Est khee flayx fon fii woo keopfert kep waare fer ti iitole, net pluut, net mool flayx fon khee xtik fii woo ap kextrost kep waar. Un praktisiert khee seksual imoraliteet.”
26Tan hot Phaulus mit te fier mëner kexproch un, am neekste taach, hot eyer teel kehal mit tëne in te raynichung seremonii. Tëm noo is eyer uf te hoof fom Thëmpel kang fer awiseere wan ti taache fon te raynichung ans ën këngte, wan tan yeete ëne fon te fier mëner sayn opfer mache solt.
Phaulus kept kefang im Thëmpel
27Wan ti siwe taache fon te raynichung xon ticht am ën waare, hon phaar yute fon te prowins fon Aasia Phaulus kesiin uf em hoof fom Thëmpel. Tan hon se tas folek uf kehetst, hon Phaulus kefang 28un hon aankefang se xraaye:
— Israelite, heleft uns! Tas is te man woo ti welt torich keet am xpreche un liye am saan keeche es israelite folek, keeche Mooses sayn Kesets un tee Thëmpel. Un yets pringt eyer tii frëmte uf te hoof fom Thëmpel un tuut soo tas hayliche plats profaneere.
29Tii hon tas kesaat wayl se Trofimus, aus Ëfesus, in te xtat kesiin hate mit Phaulus. Un hon ketënkt tas Phaulus tee mit uf te hoof fom Thëmpel kenom het. 30Tas kexpreech hot sich ferxtraut in te kans xtat un tas folek hot sich kesamelt fon ale sayte. Tii hon Phaulus kekrif, hon em aus em hoof fom Thëmpel kexlept, in hon ti toore tsuu kemach. 31Wan tas folek Phaulus xon umpringe wolt, hot te komantant fon te reemixe trupe ti ote kriit tas ti kans xtat Yeruusalëm in rewolte waar. 32Tan hot eyer xnel phaar ofitseyer un soltaate kesamelt un is tswixe es folek kexprung. Wii tas folek te komatant un ti soltaate kesiin hot, hon se klaych uf keheyert Phaulus se ferxlaan. 33Too is te komantant ticht pay Phaulus khom, hot en kefang un hot kexikt solte em aan pine mit tswaay khete. Tëm noo hot eyer kefroot:
— Weyer is te man? Was hot tee kemach?
34Awer, unich em folek, hon phaar was kexraayt, anere hon was aneres kexraayt. Ti unortnung waar soo kroos, tas te komantant net auskluuche khont was paseyert waar. Tan hot eyer kexikt tas soltaate Phaulus in te fort nëme solte. 35Wan se ticht an ti trep khom sin, muste ti soltaate Phaulus traan weche em folek sayn kewaltichkheet, 36woo noo khom is, am xraaye:
— Tuut em umpringe! Tuut em umpringe!
Phaulus tuut sich tefenteere
37Wan se Phaulus in te fort am fiire waare, hot eyer fer te komantant kesaat:
— Tëref ich en wort mit aych xpreche?
Te komantant hot kefroot:
— Weest tuu kreekix xpreche? 38Pist tuu, filaycht, tee ejipte woo en tsayt tsurik en rewolutsioon aankefang hot un fier tausent teroriste mit keweere noo em tesërt kefiert hot?
39Phaulus hot keantwort:
— Ich sin en yut, in Tarsus kepoer, en aarich important xtat fon te rechioon fon Silisia. Ich pite, los mich mit em folek xpreche.
40Tan hot te komantant erlaupnis kep. Phaulus hot sich uf kextelt uf te trep un hot en sinaal kemach mit te hant tas es folek sich peruiche solt. Wan se al ruich keplip sin, hot Phaulus aankefang se xpreche in hepreyx. Eyer saat:
Selectat acum:
Akte 21: NTHunsrik
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
2022 Sociedade Bíblica do Brasil
