Matthew 7
7
Embo nei ta ari sapura urumbari avo Iesu na ahe poekena
(Luke 6:37-38,41-42)
1Iesu na ke einge ena, “Umo embo nei ta ari sapura mane urumbasoa 2eto ainge aisoa amo ainge dombo God na no degi ta aisuja. Eto embo nei ta ari urumbasoa amo God na ari no avo no urumbari ta hajire avo au kesoa. 3Eto ungota namei ta ari sapura isapa ji sirivo ainge tihi ta mihia avo ere kogova rate ungota ari sapura peni amo ji uhu ainge tihi ta mihia avo do eto kiae ere ove? 4Eto namei ta degi ‘no tihi ta ji sirivo mihia kondikano?’ ke ainge ijie ungota tihi ji uhu na peikehija avo eto daingeto avo? 5Ungo ari sapura ojiketo ke sokova ari embomeni eto ungo ta ari sapura ji uhu ainge tihi ta mihia avo kihi umbavo irae au javotoho na kon kon eto kogue namei ta sapura isapa ji sirivo ainge tihi ta mihia avo kojikevu.
6Eto God ta ke amo Otohu avo eto God ta ke ingito ke be ae embomeni ta ikavojo enana ino o ainge hotembari irae avoeto enda ta hatikaro sapura ururou jandireketo ikari embo kambuto hevasuja.”
God ta degi penunu ara Iesu na ahe poekena
(Luke 11:9-13)
7Eto Iesu na ke ijie einge ena, “Penunu ijiro ikau humbasoa, jombure ururo ikau kesoa, vahihiri ururo God na pe umo embo hirikasuja. 8Amita be amo embo amuna penunu aisuja amita degi God na ikasuja eto jombure aisuja embo amina hambasuja eto embo amuna vahihiri aisuja God na pe hirikau embo amo horasuja. 9Ungo nei nei meni hatira te ra. Eto no meni na no degi ta bread penunu aisuja amo koro amita degi mane ikasoa 10eto umo o penunu aisuja amo o koso o mane ikasoa.
11Ungo embo sasapura rate daingeto ungota meniundi ta degi hande javotoho ikasova avo ungo kiarira. Eto ungota mama uhu ta iraguja amo hande embo be avo eto embo na amita degi penunu au javotoho pere ikasuja. 12Eto Moses ta ke pepeni tapa te peroveta ta ahe poekari tapa te amita ke susu be amo erevira. ‘Eto inena embo na ari javotoho do ao kesi uje ere ua avo pere amita degi ejo kioi’.”
Eto embomeni na degi peni toto degi isapa ta pambasora avo Iesu na ahe poekena
(Luke 13:24)
13“Eto ari sapura embomeni ta evekari degi amita pambari degi ai ta embomeni isapamane pahuore mimiseko eaguja ai ta pambavojo 14rate degi pe isapa orare pe timbari avo jombure eto kito aita jeneki honeki ue pambuvujo. Amita tutumota irari datoho hambasova.
Embo ta ari amo ji ta ve aingera avo Iesu na ahe poekena
(Luke 6:43-44)
15Eto embo nei nei na God ta ke hande ue ahe poekari sokova aisora avo eto be kogue irivujo. Ungo God ta undurari o ‘Sheep’ aingera eto enana o sheep ta hamo asuketo puvuresora rate enana ta jota amo isoro o ra. 16Avo eto enana amunure avo enana ta ari na harikau kesova ke amita be amo eingera. Esi egama ai ta hombare be mane humbagora eto nei ji koririva ai ta oga mane imbagora. 17Ji javotoho na be javotoho eaguja eto ji sapura na be sapura eaguja. 18Eto nei indari ji ta indahu mane puvuresuja eto indahu ji ta indari javotoho mane puvuresuja 19rate indahu ji kito tapa andage eto jaro veto evekasuja. 20Eto ainge dombo enana God ta ke sokova tirari embomeni ta ari na harikau enana amunure avo ungo be kesova.
Bada na ‘Na umo kiaera’ aisuja
(Luke 13:25-27)
21Eto nau degi ta ‘Bada, Bada’ ijirari embomeni nei uhoho na God ta simba ari degi ta mane horasora rate God Mama uhu ta iraguja amita ke agi eagora embomeni amina pere horasora. 22Eto ari sirikari iji puvurou embo isapamane na nau degi ta ke einge aisora, ‘Bada, Bada dago javo no ta God ta ke hande eagora, eto ahihi sasapura ohimbagora eto sovera no na ari nei te nei te ere ovora.’ ke ainge aro ingito 23ke mine enana ta degi einge aisona, ‘Na ungo kiaera. Ungo ari sasapura embomeni avo eto ke nau agi ae ere ovova toto veto pambuvu,’ ke ainge aisona.
Bande heriso gerikari embo amita hihi
(Luke 6:47-49)
24Avo eto embo amuna ke nau ingito agi aisuja embo amo kiari embo bera eto embo amina bande karu hamo ta gerikenu 25ga veto umo vuenga puvutuhunu pisara pajire puvuto bande tena rate vurereketo veae amita be amo koro hamo ta avo eto. 26Eto ke nau ingito agi ae embo amo embo amita hotembari irae bande hora ta gerikenu 27ga veto umo vuenga puvutuhunu pisara pajire puvuto bande koheketo venu umo na humbuto pambuna.” ainge Iesu na ahe poekena.
Iesu amo kiari embo bera
28“Eto ke erevi tapa enu irae enu embomeni tapa tiri ta areto mihia amina ke avo ingito vani vini ea. 29Amita be amo Iesu ta ahe poekari amo enana ta ke pepeni kiari embomeni ta ke ainge mane kiari embo be na ahe poekihia ainge ea.
Selectat acum:
Matthew 7: OKVH
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 1988, Wycliffe Bible Translators, Inc. All rights reserved.
