মথি 17
17
আস্যাং যীশুমা তেংখুং রকরি
(মার্ক ৯:২-১৩; লূক ৯:২৮-৩৬)
1য়াং খ্রকরাক নক যীশুচা পিতর, যাকোব অর যাকোব ঞিং যোহন দিঃ সুংয়ককো য়ুউরো আম্রাং তং তদংদুঃ তাকখারি। 2-3য়াংসুউরো হ্রিইথাকমা যীশু ম্যাকন্হাচা অরতেজে ফ্রইরি। যীশু ম্যাকন্হাচা নিংপুয়েং অরং অর যীশু অাওয়েচা অরংপুয়েং পুপ্রু ফ্রই লাঃখারি। য়াংসুউরোচা মোশিনা এলিয়গো যীশুনা চাঃগা প্রচাগো ম্রাংগেলিইরি।
4য়াংখা পিতরচা যীশুগো প্রলিইরি, “আস্যাং, কংগং কংরি, যাফুলিছুগি ঙুরোচা দিঃমা হিকরি। কুবাং চিই সায়ারিছুগি ঙা দিঃমা তাংগুক সুংছং ছকফু-তছং কুবাংগো, তছং মোশিগো অর তছং এলিয়গো।”
5যাখা পিতর চাঃগা প্ররি য়াংখা মুরিই তিখিচা য়াংসুউরোগো খ্যুকলিইরি। য়াং মুরিইগা দিঃ চাঃগাগো ক্রালিইরি, “দিঃ লুঃউচা ঙামা আখ্য সাঃ, দিঃ সাঃ আপমা ঙা কংগং ওয়েং সারি। নাংরো দিঃ সাঃ চাঃগাগো নাথংগে।”
6দিঃ চাঃগাগো ক্রালো তিবিরোচা কংগং ক্রকরো কেইংফামা ওয়েকেলিইরি। 7য়াংখা যীশু য়াংসুউরো কেইংথামা আলাক তঃরো প্রলিইরি, “থাঃগে, মক্রককেকি।” 8য়াংখা য়াংসুউরো আথাকতু মঃ ক্রিগেরিখা যীশু আপি তয়ককোলি মাম্রাংলিইগে।
9য়াংসুউরো যাখা তংগা ছাং লাঃখা, যীশু য়াংসুউরোগো দিঃ আনা পিইলিইরি, “নাংরো যা ম্রাংগেরি, য়াংচাগো মুুনুসাওয়া সাঃ আসিইগা আহ্রাং ফ্রইলো মাতাকসাগ্রা-তয়ককোলি মপ্রগেকি।”
10তিবিরোচা যীশুগো মিংগেলিইরি, “য়াংপুয়েংছুগি কেইং ছারারো যাফু দিঃচা প্রগেতিলি, পাথামা এলিয়চা লাঃফু তেংরি?”
11যীশু য়াংসুউরোগো প্রলিইরি, “আমেইং এলিয় লাঃফু অর হিকচা আলুংগো হ্রিইগাঞ্যং প্যাংফু। 12য়িগিলি ঙা নাংরোগো প্ররি, এলিয় লাঃলিইরি ছুগি লুঃউরোচা য়াংসুউগো মিসিকগেলিই। লুঃউরোচা য়াংসুউগো চিইতুদুওয়ক প্যাংখ্যাংচা প্যাংগেরি। দিঃপুয়েং মুনুসাওয়া সাঃগোলি লুঃউরো আলাকমা ওয়িদানা খেংরাফু।” 13য়াংখা তিবিরোচা নাঃলিগেরিচাগা, যীশুচা য়াংসুউরোবামা রিঃঙুক মাঙ্গালা পিইসুউ যোহন চাঃগাগো প্ররি।
নেঃছু কৈংহিকচা আশ্যিচা কেংমালিইরি
(মার্ক ৯:১৪-২৯; লূক ৯:৩৭-৪৩)
14যীশুনা তিবিরোচা যাখা লুঃউম্যারোদুঃ প্রেংলাঃরি য়াংখা লুঃউ তয়কচা যীশু হ্রিইগা পঃছতুক থকলো প্রলিইরি, 15“কুবাং ঙামা সাঃগো মিত্তা পিই। ঙামা সাঃচা ওয়কনা কেঃলো কংগং দুঃখাওয়া রাঃরি। সাঃচা খ্যাংখামুছু মিংনা রিইমা ক্যা লাঃরি। 16ঙামা সাঃগো ঙা কুবাং তিবিরোদুঃ য়ুউখালিইরি য়িগিলি কুবাং তিবিরোচা সাঃগো আকং মাপ্যাংনৈংলিই।”
17আফ্রিমা যীশু প্রলিইরি, “চিই মুক্যুংনা মকং লুঃউরো! অর মনৈইরাক ঙা নাংরোনা হিকফুলিঃ? মনৈইরাক ঙা নাংরোগো সিখেংফুলিঃ? সাঃগো ঙাবাদুঃ য়ুউখা।”
18যীশুচা য়াং মকং নেঃকো হকপ্রিইনক-য়াং আশ্যিগা নেঃছুওচা থুওয়ক লাঃখারি অর সাঃচা খ্যাংখ্যাং কংলিইরি।
19য়াংনক তিবিরোচা স্যুও লাঃলো যীশুগো মিংগেলিইরি, “ঙুরো য়াংসুউগো আকং মাপ্যাংনৈংলি যাফুলিঃ?”
20যীশু তিবিরোগো প্রলিইরি, নাংরোমা আক্যুং আনৈই আতুওয়ক মাপ্যাংনৈংলিই। ঙা নাংরোগো আমেইং প্রফুচাগা, রিঃ আচিই পুয়েং মিগিলি নাংরোমা আক্যুং হিকগি, নাংরো দিঃ তংলুংগো প্রগে, ‘দিঃগা রুয়িই লাঃলিই,’ য়াংখা তংচা রুয়িই লাঃমি। নাংরোবামা তুখুউলি মফ্রছুলো মিহিক মুহুকপ্যা। 21ছুউক আতংনা ওয়িপাসানা আপি দিঃপুয়েং মকং নেঃছুওরোচা তাখালি থুওয়ক মাঃলা।
22নক্কা গালীল প্রিনিগা ফ্রে লাঃখা যীশু তিবিরোগো প্রলিইরি, “মুনুসাওয়া সাঃগো লুঃউরো আলাকমা তি পিইগেফু। 23লুঃউরোচা য়াংসুউগো সেঃবলৈফু, অর সুংরাকমা য়াংসুউচা আসিইগা হ্রাং থাঃফু।” য়াংচাগো ক্রালো তিবিরোচা কংগং চিই ছুওগেরি।
ওয়িপাসানা ক্যংমা ফেংদা
24নক্কা যীশুনা তিবিরোচা যাখা কফরনাহুম ম্রুদুঃ লাঃখাগেতি য়াংখা ওয়িপাসানা ক্যংমা ফেংদা ককসারোচা পিতরদুঃ লাঃলো প্রগেলিইরি, “কুবাংরোমা ছারাচা ওয়িপাসানা ক্যংগো ফেংদা মিপিই লঃ?”
25পিতরচা প্রলিইরি, “ইং পিইরি।”
য়াংনক পিতর ইংদুঃ লাঃলো তুখুউলি মফ্রখাং হ্রিইগা যীশুচা য়াংসুউগো প্রলিইরি, “শিমোন, নাক চিইমা যা তুওয়কতিলিঃ? দিঃ কাবামা মাংরো যাসুউগা ফেংদা কককেতিলিঃ? কুওদৈং প্রি লুঃউগা মুহুককিলি প্রিনিখ্রা লুঃউগা?”
26পিতরচা প্রলিইরি, “প্রিনিখ্রা লুঃউগা।”
য়াংখা যীশু য়াংসুউগো প্রলিইরি, “য়াংপুয়েং ছুগিগা কুঃপ্রি লুঃউরোচা ফেংদাগা রুওয়েফুব্যা। 27ছুগি ঙুরো আপ্রমা ফেংদা ককসারো তাখ্যাকলি চিই মুছুওরাঅং। য়াং আতুওয়ক নাং ম্রমা লাঃলো কুওয়েং বঃ, অর পাথামা যা ঙা রাঃফুলি য়াং ঙা খুনাং ফ্রিক্রিগি খুনাংমা মুয়িং তেখে রাঃমি। য়াংচাগো য়ুউ লাঃলো নাংচানা ঙাচা ফেংদাগো পিই লাঃলে।”
Selectat acum:
মথি 17: BBSRMZ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
