Luka 23
23
Iysanıń Pilatqa aparılıwı
(Mat 27:1-2, 11-14; Mrk 15:1-5; Yuxn 18:28-38)
1Sonda jıynalǵanlardıń hámmesi orınlarınan turıp, Iysanı Pilatqa alıp bardı da, 2Onı bılay dep ayıplay basladı:
– Bizler bul adamnıń xalqımızdı joldan azǵırıp júrgenin anıqladıq. Ol Rim imperatorına salıq tólewge qarsı shıǵıp, Ózin Masiyxpan, yaǵnıy Patshaman dep ataydı.
3Pilat Iysadan:
– Sen Yahudiylerdiń Patshasımısań? – dep soradı.
Iysa oǵan:
– Sol ekenimdi óziń aytıp tursań, – dep juwap berdi.
4Pilat bas ruwxaniyler menen xalıqqa:
– Men bul adamnan hesh bir ayıp tappay turman, – dedi.
5Biraq olar aytqanınan qaytpay:
– Ol Galila úlkesinen baslap, hátte, usı jerge deyin pútkil Yahudiyada Óz tálimatın tarqatıp, xalıqqa qozǵalań salıp júr, – dedi.
Iysa Hirod aldında
6Pilat bunı esitkende:
– Bul adam galilalı ma? – dep soradı.
7Iysanıń Hirodqa qaraslı úlkeden ekenin bilgende, Pilat Onı Hirodqa jiberdi. Sol kúnleri Hirodtıń ózi de Erusalimde edi. 8Hirod Iysanı kórgende qattı quwandı. Óytkeni ol tuwralı kóp esitkenlikten, onı burınnan kórgisi keletuǵın hám bir káramatlı belgi kórseter dep úmitlenetuǵın edi. 9Ol Iysaǵa kóp sorawlar berdi, biraq Iysa hesh juwap bermedi. 10Al bas ruwxaniyler menen diniy muǵallimler sol jerde turıp, Iysanı qattı ayıpladı. 11Hirod ta óz áskerleri menen birge onı kemsitip masqaraladı da, oǵan patshalıq lipas kiygizip, Pilatqa qaytarıp jiberdi. 12Bul waqıyadan burın bir-birine dushpan bolıp kelgen Hirod penen Pilat sol kúni dos bolıp qaldı.
Ólim húkimi
(Mat 27:15-26; Mrk 15:6-15; Yuxn 18:39-40; 19:1-16)
13Pilat bas ruwxaniylerdi, basshılardı hám xalıqtı shaqırtıp alıp, 14olarǵa:
– Sizler maǵan bul adamdı xalıqtı joldan azǵırıp júr dep, alıp keldińler. Mine, men sizlerdiń kóz aldıńızda Onı tergesem de, sizlerdiń qoyǵan ayıplarıńızdıń birewin de onnan tappadım. 15Hirod ta hesh nárse tappay, onı bizlerge qaytarıp jiberdi. Kórip turǵanıńızday, ol ólim jazasına ılayıq hesh nárse islemegen. 16Sonlıqtan onı jazalap, bosatıp jiberemen, – dedi. [17#Luk 23:17 Bazı qoljazbalarda 17-ayat ta bar: «Pilat hár Qutqarılıw bayramında olar ushın bir tutqındı bosatıp jiberiwi kerek edi».]
18Biraq xalıqtıń hámmesi bir awızdan:
– Bul adamdı joq qıl! Bizlerge Barabbanı bosatıp ber! – dep baqırıstı.
19Barabba qalada júz bergen qozǵalańǵa qatnasıp, adam óltirgeni ushın qamalǵan edi.
20Pilat Iysanı bosatıp jibermekshi bolıp, olarǵa qarata jáne sóyledi.
21Biraq olar:
– Onı atanaq aǵashqa shegelet! Shegelet! – dep baqırıstı.
22Pilat úshinshi ret olarǵa:
– Ol qanday jamanlıq isledi? Men onnan ólimge ılayıqlı hesh ayıp tappadım. Solay eken, Onı jazalap, bosatıp jibereyin, – dedi.
23Biraq olar dawıslarınıń barınsha baqırıwdı dawam etip, Iysanı atanaq aǵashqa shegeletiwdi talap qıldı hám aqırında óz degenlerine eristi. 24Solay etip, Pilat olardıń talapların orınlawǵa qarar etti. 25Olardıń soraǵan adamın, qozǵalań kótergeni hám adam óltirgeni ushın qamaqta otırǵan adamdı bosatıp, Iysanı olardıń erkine tapsırdı.
Iysanıń atanaq aǵashqa shegeleniwi
(Mat 27:32-44; Mrk 15:21-32; Yuxn 19:17-27)
26Áskerler Iysanı alıp baratırǵanda, awıldan kiyatırǵan Shimon degen kireneli bir adamdı uslap alıp, oǵan atanaq aǵashtı arqalatıp, Iysanıń izinen júriwge májbúrledi.
27Iysanıń izine júdá kóp xalıq erip júrdi. Arasında Ol ushın zarlap jılasqan hayallar da bar edi. 28Iysa olarǵa burılıp bılay dedi:
– Erusalim qızları! Men ushın jılamańlar. Biraq ózlerińiz hám balalarıńız ushın jılańlar. 29Sebebi: «Násilsiz hayallar, hesh qashan tuwmaǵan qursaqlar hám bala emizbegen kókirekler baxıtlı!» – dep aytatuǵın kúnler keledi. 30Sonda tawlarǵa: «Ústimizge qulańlar!», tóbeshiklerge: «Bizlerdi jerleńler!»#23:30 Hosh 10:8. – desedi. 31Óytkeni jap-jasıl aǵashqa usılay islese, quwraǵan aǵashqa ne qıladı eken?
32Iysa menen birge eki jınayatshını da ólimge alıp bardı. 33«Bas súyegi» degen jerge kelgende, olar Iysanı eki jınayatshı menen birge atanaq aǵashqa shegeledi. Jınayatshılardıń birewi Onıń oń tárepinde, ekinshisi shep tárepinde edi. 34Iysa:
– Áke, olardı keshire gór! Olar ne islep atırǵanın bilmeydi, – dedi.
Áskerler shek taslap, Iysanıń kiyimlerin bólisti#23:34 Zab 21:19..
35Xalıq sol jerde qarap turdı. Al basshılar Iysanıń ústinen kúlip:
– Ol basqalardı qutqarǵan edi-ǵo. Eger Ol Qudaydıń jibergen Masiyxı, Qudaydıń Tańlaǵanı bolsa, Ózin Ózi qutqarsın, – dedi.
36Áskerler de Oǵan jaqınlasıp, Onı masqaraladı hám sirke suwın berip:
37– Eger Sen Yahudiylerdiń Patshası bolsań, Ózińdi Óziń qutqar, – desti.
38Iysanıń bas betinde: «BUL – YAHUDIYLERDIŃ PATSHASÍ» degen#Luk 23:38 Bazı qoljazbalarda «…grek, latın hám evrey tillerinde» degen sózler de bar. jazıw bar edi.
39Atanaq aǵashqa shegelengen jınayatshılardıń biri:
– Sen Masiyx emesseń be? Qáne, onda Ózińdi de, bizlerdi de qutqar, – dep mazaq etti.
40Al ekinshisi oǵan keyip:
– Óziń de birdey jazaǵa húkim etilip turıp, Qudaydan qorqpaysań ba? 41Bizler islerimizge ılayıq ádil jaza aldıq. Al Ol hesh qanday jamanlıq qılǵan joq-ǵo, – dedi. 42Soń Iysaǵa: – Iysa, Óz Patshalıǵıńa kirgenińde, meni esińe al! – dedi.
43Iysa oǵan:
– Saǵan shının aytaman: sen búgin Meniń menen birge jánnette bolasań, – dedi.
Iysanıń jan tapsırıwı
(Mat 27:45-56; Mrk 15:33-41; Yuxn 19:28-30)
44-45Túski saat on ekiler shamasında kún jaqtısın túsirmey, saat úshlerge deyin pútkil jerdi qarańǵılıq qaplap turdı. Ibadatxanadaǵı Muxaddesxananıń perdesi ortasınan ekige bólinip, jırtılıp ketti. 46Iysa bálent dawıs penen baqırıp:
– Áke! Ruwxımdı qollarıńa tapsıraman#23:46 Zab 30:6., – dedi.
Usını aytıp boldı da, jan tapsırdı.
47Bolǵan waqıyalardı kórgen júzbası Qudaydı alǵıslap:
– Haqıyqattan da, bul haq adam eken, – dedi.
48Tamashaǵa jıynalǵan pútkil xalıq bolǵan waqıyalardı kórip, júrek-bawırları ezilip, izlerine qayttı. 49Biraq Iysanı bilgenlerdiń hámmesi hám Galiladan Onıń izine erip kelgen hayallar bularǵa uzaqtan qarap turdı.
Iysanıń qábirge qoyılıwı
(Mat 27:57-61; Mrk 15:42-47; Yuxn 19:38-42)
50-51Keńestiń qararı menen isinde qatnaspaǵan, keńes aǵzası bolǵan Yusup atlı jaqsı hám haq bir adam bar edi. Ol Yahudiyanıń Arimatiya qalasınan bolıp, Qudaydıń Patshalıǵın kútip júrgen edi. 52Yusup Pilatqa barıp, Iysanıń denesin soradı. 53Onı atanaq aǵashtan túsirip alıp, zıǵır kepinge oradı hám ele hesh kim qoyılmaǵan jartasta oyılǵan bir qábirge qoydı. 54Bul yahudiylerdiń tayarlıq kúni#23:54 Tayarlıq kúni – juma kúni. bolıp, Shabbat kúni kirip kiyatırǵan edi.
55Iysa menen birge Galiladan kelgen hayallar da Yusupke erip barıp, qábirdi hám Iysanıń denesiniń qalay qoyılǵanın kórdi. 56Olar úylerine qaytıp kelip, xosh iyisli maylar hám átirler tayarlap qoydı.
Al Shabbat kúni Qudaydıń buyrıǵı boyınsha dem aldı.
Selectat acum:
Luka 23: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
