Luka 21

Jesir hayaldıń sadaqası

(Mrk 12:41-44)

1Iysa názer salıp, Ibadatxananıń sadaqa qutısına Qudayǵa arnalǵan sıyların salıp atırǵan baylardı kórdi. 2Ol bir ǵárip jesir hayaldıń da eki tiyin salǵanın kórip:

3– Sizlerge haqıyqatın aytaman: bul jarlı jesir hayal hámmeden kóp saldı. 4Óytkeni bulardıń hámmesi óz baylıqlarınan awısqanın saldı. Al bul hayal jarlı bolsa da, kún kórisine kerekli barlıq aqshasın saldı, – dedi.

Aqırzamannıń belgileri

(Mat 24:1-14; Mrk 13:1-13)

5Geybirewler Ibadatxananıń sulıw taslar hám Qudayǵa arnalǵan sıylar menen bezetilgenin aytıp turǵanda, Iysa:

6– Sizler usı jerde kórip turǵanlarıńızdan tas ústinde tas qalmay, hámmesi qıyratılatuǵın kúnler keledi, – dedi.

7Olar Iysadan:

– Ustaz, bular qashan boladı? Bulardıń bolatuǵının aldın ala qanday belgi bildiredi? – dep soradı.

8Iysa olarǵa:

– Aldanıwdan saq bolıńlar! Sebebi kópler Meniń atım menen kelip: «Men – Masiyxpan» yamasa «Waqıt jaqın» deydi. Olardıń izlerine ermeńler. 9Urıslar hám kóterilisler haqqında esitkenińizde, qorqpańlar. Óytkeni dáslep usılar bolıwı tiyis. Biraq aqırı dárhal kelmeydi, – dedi.

10Sońınan Iysa olarǵa bılay dedi:

– Millet milletke qarsı, patshalıq patshalıqqa qarsı kóteriledi. 11Kúshli jer silkiniwler, kóp jerlerde asharshılıqlar hám qırǵınlar boladı. Aspanda qorqınıshlı qubılıslar hám ullı káramatlı belgiler júz beredi. 12Biraq bulardıń hámmesinen burın adamlar sizlerdi uslap alıp quwǵın qıladı, májilisxanalarǵa tapsırıp, qamaqqa saladı. Meniń atım ushın sizlerdi patshalar menen hákimlerdiń aldına alıp baradı. 13Sonda sizlerge Men tuwralı gúwalıq beriwge múmkinshilik tuwıladı. 14Sonlıqtan ózlerińizdi qalay qorǵawdı aldın ala oylamawdı kewillerińizge túyip alıńlar. 15Sebebi Men sizlerge sonday sheshenlik penen danalıq beremen, sizlerge qarsı shıqqanlardıń hesh qaysısı da qarsı sóyley de, sózlerińizdi biykarlay da almay qaladı. 16Hátte, ata-ana, aǵa-ini, aǵayin-tuwǵan hám doslarıńız da sizlerge satqınlıq isleydi. Al geybirewlerińizdi óltiredi. 17Meniń atım sebepli, sizlerdi hámme jek kóredi. 18Biraq baslarıńızdaǵı bir tal shash ta nabıt bolmaydı. 19Sabırlılıǵıńız benen óz janıńızdı qutqarasızlar.

Erusalimniń qıyratılıwı

(Mat 24:15-21; Mrk 13:14-19)

20– Erusalimdi áskerlerdiń qorshap alǵanın kórgenińizde, onıń wayran bolatuǵın waqtınıń jaqınlaǵanın bilińler. 21Sonda Yahudiyadaǵılar tawlarǵa qashsın. Qalanıń ishindegiler tez sırtqa shıqsın, átiraptaǵılar qalaǵa kirmesin. 22Óytkeni sol kúnler Muxaddes Jazıwda aytılǵanlardıń hámmesi orınlanatuǵın jaza kúnleri boladı. 23Sol kúnleri júkli hám emiziwli hayallarǵa qanday qıyın boladı! Sebebi jer júzinde úlken apatshılıq bolıp, bul xalıq Qudaydıń ǵázebine ushıraydı. 24Olar qılısh júzinen ótkerilip, barlıq ellerge tutqın etip alıp ketiledi. Basqa milletlerdiń dáwranı tamam bolmaǵansha, Erusalim olar tárepinen ayaq astı qılınadı.

Adam Ulınıń qayta keliwi

(Mat 24:29-31; Mrk 13:24-27)

25– Quyash, ay hám juldızlarda káramatlı belgiler payda boladı. Jer júzinde xalıqlar teńizdiń shuwlap tolqınlanǵanınan úmitsizlikke túsip albıraydı. 26Adamlar dúnyaǵa kiyatırǵan apatshılıqtı kútip, qorqıwdan hálsizlenedi. Óytkeni aspan kúshleri silkinedi. 27Sonda adamlar Adam Ulınıń ullı qúdiret hám saltanat penen bultta kiyatırǵanın#21:27 Dan 7:13. kóredi. 28Bul waqıyalar bola baslaǵanda turıp, baslarıńızdı kóterińler. Sebebi qutqarılıwıńız jaqın.

Sergek bolıp, duwa etińler!

(Mat 24:32-35; Mrk 13:28-31)

29Iysa olarǵa mına tımsaldı aytıp berdi:

– Ánjir aǵashına hám basqa barlıq tereklerge qarańlar. 30Olardıń japıraq shıǵara baslaǵanın kórgenińizde, jazdıń jaqınlaǵanın ózlerińiz bilesizler. 31Sol sıyaqlı, sizler bul waqıyalardıń bolıp atırǵanın kórgenińizde, Qudaydıń Patshalıǵınıń jaqın ekenin bilińler.

32Sizlerge shının aytıp turman: bul áwlad joq bolıp ketpesinen burın bulardıń hámmesi boladı. 33Aspan menen jer joyıladı, biraq Meniń sózlerim hesh qashan joyılmaydı.

34Saq bolıńlar! Shaǵal-máslik qılıp, más bolıp, turmıs táshiwishleri astında júreklerińizdi awır júk baspasın. Jáne sol kún sizlerge tor sıyaqlı tosattan túspesin. 35Óytkeni sol kún pútkil jer júzinde jasawshılardıń basına túsedi. 36Sol sebepten bolajaq bul islerden qutılıp, Adam Ulı aldında tura alıw ushın hámme waqıt sergek bolıp, duwa etińler.

37Iysa kúndiz Ibadatxanada tálim berip, al túnlerin bolsa qaladan shıǵıp, Záytún tawında ótkizetuǵın edi. 38Tań atıwdan pútkil xalıq Iysanı tıńlaw ushın Ibadatxanaǵa keletuǵın edi.

Selectat acum:

Luka 21: QrqMK22

Evidențiere

Partajează

Copiază