Luka 1
1
Alǵı sóz
1Aramızda bolıp ótken belgili waqıyalardı kóplerdiń álle qashan bayan etpekshi bolǵanı bizlerge málim. 2Olar bul waqıyalarǵa bastan-aq gúwa bolǵanlardıń hám Xosh Xabardı járiyalawshılardıń bizlerge jetkizgen nárselerin jazǵan edi. 3-4Solay etip, húrmetli Teofil, ózińizge úyretilgen bul tálimattıń haqıyqıy ekenin siz de biliwińiz ushın, men de bastan-ayaq hámmesin muqıyatlap úyrenip shıǵıp, barlıq waqıyalardı izbe-izlik penen sizge jazıwdı maqul taptım.
Shomıldırıwshı Yaqıyanıń tuwılıwı haqqında xabar
5Yahudiya elinde, patsha Hirod zamanında, Abiya toparınan Zexariya atlı bir ruwxaniy bar edi. Onıń hayalı Xaron áwladınan shıqqan bolıp, atı Elizabeta edi. 6Olardıń ekewi de Quday aldında haq adamlar bolıp, Jaratqan Iyeniń barlıq buyrıq hám qaǵıydaların buljıtpay orınlap jasaytuǵın edi. 7Elizabeta násilsiz bolǵanlıqtan, olar biyperzent edi. Jáne ekewi de biraz jasqa barıp qalǵan edi.
8Kúnlerdiń birinde óz toparınıń gezegi kelip, Zexariya Quday aldında ruwxaniylik xızmetin atqarıp turǵanda, 9ruwxaniylerdiń ádeti boyınsha tútetki tútetiw ushın, Jaratqan Iyeniń Ibadatxanasındaǵı Muxaddesxanaǵa kiriw shegi oǵan tústi. 10Tútetki tútetiw waqtında jıynalǵan xalıqtıń hámmesi sırtta duwa etip tur edi.
11Sonda Jaratqan Iyeniń bir perishtesi tútetki tútetiletuǵın orınnıń oń tárepinde payda bolıp, Zexariyaǵa kórindi. 12Onı kórgen Zexariya qorqıp, albırap qaldı. 13Biraq perishte oǵan bılay dedi:
– Qorqpa, Zexariya! Seniń etken duwań qabıl boldı. Hayalıń Elizabeta saǵan ul tuwıp beredi, onıń atın Yaqıya dep qoyasań. 14Ol saǵan quwanısh hám shadlıq alıp keledi. Onıń dúnyaǵa kelgenine kóp adamlar quwanadı. 15Sebebi ol Jaratqan Iyeniń názerinde ullı adam bolıp, sharap ta, basqa ótkir ishimlikler de ishpeydi. Anasınıń qursaǵında jatırǵannan baslap, Muxaddes Ruwxqa toladı. 16Ol Izrail perzentleriniń kóbisin olardıń Qudayı Jaratqan Iyege qaytaradı. 17Ákelerdi balaları menen jarastırıp, boysınbaytuǵınlardı haq adamlardıń danalıq jolına túsiredi. Xalıqtı Iyemizdiń keliwine tayarlaw ushın, ol Iliyastıń#1:17 Iliyas – Iysa Masiyx tuwılmastan burın IX ásirde jasaǵan payǵambar. 3Pat 18:1-46; Mal 4:5-6. ruwxı hám qúdireti menen Iyemizdiń aldında júrip keledi.
18Sonda Zexariya perishtege:
– Bulardıń ıras ekenin men qayaqtan bilemen? Óytkeni men ǵarrıman, hayalım da biraz jasqa barıp qalǵan, – dedi.
19Perishte oǵan juwap berip:
– Men Quday aldında turıwshı Jabrayılman. Seniń menen sóylesip, saǵan usı xosh xabardı jetkiziw ushın jiberilgenmen. 20Biraq, waqtı kelgende orınlanatuǵın sózlerime isenbegeniń ushın, usılar ámelge aspaǵansha sóyley almay, gúń bolıp qalasań, – dedi.
21Sol waqıtta Zexariyanı kútip turǵan xalıq onıń Muxaddesxanada irkilip atırǵanına hayran boldı. 22Zexariya sırtqa shıqqanda, xalıqqa sóyley almay qaldı. Sonda xalıq onıń Muxaddesxanada ayan kórgenin túsindi. Zexariya tilden qaldı hám xalıq penen ımlap sóylesti.
23Óziniń xızmet etetuǵın kúnleri tamam bolǵannan keyin, Zexariya úyine qayttı.
24Aradan kúnler ótkennen soń, onıń hayalı Elizabeta hámiledar bolıp, bes ay jasırınıp júrdi. 25«Jaratqan Iye maǵan názer awdarǵan kúnlerde bul isti islep, adamlar aldındaǵı masqarashılıqtı mennen alıp tasladı», – dedi ol.
Iysanıń tuwılıwı haqqında Xosh Xabar
26Elizabetanıń hámiledar bolǵanına altı ay tolǵanda, Quday Jabrayıl perishteni Galila úlkesiniń Nasıra dep atalatuǵın qalasına, 27Dawıt áwladınan shıqqan Yusup degen jigitke atastırılǵan bir qızǵa jiberdi. Qızdıń atı Máriyam edi. 28Perishte úyge kirip, oǵan:
– Sálem saǵan, Quday jarılqaǵan! Jaratqan Iye seniń menen birge#Luk 1:28 Bazı qoljazbalarda mına sózler de bar: «Hayallar arasında sen jarılqanǵansań»., – dedi.
29Máriyam perishteniń sózlerine ań-tań boldı hám bul qanday sálemlesiw boldı eken dep, oylanıp qaldı. 30Perishte oǵan bılay dedi:
– Qorqpa, Máriyam, sen Qudaydıń miyrimine eristiń! 31Mine, sen hámiledar bolıp, Ul tuwasań hám Onıń atın Iysa dep qoyasań. 32Ol ullı bolıp, Quday Taalanıń Ulı dep ataladı. Quday Iye Oǵan babası Dawıttıń taxtın beredi. 33Ol Yaqıptıń xalqınıń ústinen máńgige patshalıq etedi hám Onıń patshalıǵınıń shegi bolmaydı.
34Máriyam perishteden:
– Men er adamǵa jaqınlamaǵan bolsam, bul qalay boladı? – dep soradı.
35Perishte oǵan juwap berip:
– Seniń ústińe Muxaddes Ruwx túsedi hám Quday Taalanıń kúshi saǵan sayasın saladı. Sonlıqtan da, sennen tuwılajaq Muxaddes Bala Qudaydıń Ulı dep ataladı. 36Mine, násilsiz dep sanalǵan seniń aǵayin apań Elizabeta da qartayǵanda ul balaǵa hámiledar boldı. Onıń hámiledar bolǵanına altı ay toldı. 37Sebebi Qudaydıń qolınan kelmeytuǵın nárse joq, – dedi.
38Sonda Máriyam:
– Men – Jaratqan Iyeniń bendesimen, aytqanıńday bolsın, – dedi.
Sonnan soń, perishte onıń janınan ketti.
Máriyamnıń Elizabetaǵa barıwı
39Sol kúnlerde Máriyam jolǵa shıǵıp, tezlik penen Yahudiyanıń tawlı úlkesindegi bir qalaǵa ketti. 40Ol Zexariyanıń úyine kirip, Elizabetaǵa sálem berdi. 41Elizabeta Máriyamnıń sálemin esitkende, onıń ishindegi náreste tıpırlap ketti. Elizabeta Muxaddes Ruwxqa tolıp, 42dawıslap bılay dedi:
– Hayallar arasında sen jarılqanǵansań, seniń ishińdegi Náreste de jarılqanǵan! 43Iyemniń anası keletuǵınday, men kimmen? 44Mine, seniń sálem bergen dawısıń qulaǵıma jetkende, ishimdegi náreste quwanıshtan tıpırlap qoya berdi. 45Isengen hayal qanday baxıtlı! Óytkeni Jaratqan Iyeniń oǵan aytqanları orınlanadı. 46Sonda Máriyam bılay dedi:
«Janım Jaratqan Iyeni ullılaydı.
47Qutqarıwshım Qudayda ruwxım shadlanadı.
48Sebebi Ol Óziniń arzımas bendesine názerin awdardı.
Endi meni barlıq áwladlar „baxıtlı“ dep ataydı.
49Óytkeni Qúdiretli Quday maǵan ullı isler isledi.
Onıń atı muxaddes.
50Ol áwladtan-áwladqa,
Ózinen qorqqanlarǵa miyrim-shápáátin beredi.
51Óz qolı menen qúdiretin kórsetip,
Kewillerinde menmen oyları bar adamlardı pıtırattı.
52Húkimdarlardı taxttan túsirip,
Ǵárip-qáserlerdi joqarı kóterdi.
53Ash bolǵanlardı iygilik berip toydırıp,
Bay bolǵanlardı qurı qol qaytardı.
54-55Ata-babamızǵa bergen wádesi boyınsha,
Ibrayımǵa hám onıń urpaǵına miyrim-shápáát etiwdi máńgi este tutıp,
Xızmetshisi Izrailǵa járdem etti».
56Máriyam Elizabeta menen úsh ayday birge bolıp, sońınan úyine qaytıp ketti.
Shomıldırıwshı Yaqıyanıń dúnyaǵa keliwi
57Elizabetanıń bosanatuǵın waqtı kelip, ol ul tuwdı. 58Qońsıları menen aǵayinleri Jaratqan Iyeniń oǵan úlken miyrim-shápáát kórsetkenin esitip, onıń quwanıshın bólisti.
59Olar segizinshi kúni balanı súnnetlewge#1:59 Jar 17:9-14. alıp bardı hám oǵan Zexariya dep, ákesiniń atın qoymaqshı boldı. 60Biraq balanıń anası:
– Yaq, onıń atı Yaqıya bolsın, – dedi.
61Olar Elizabetaǵa:
– Aǵayin-tuwǵanlarıńnıń arasında bunday at hesh kimde joq-ǵo, – dep, 62ákesinen balaǵa qanday at qoymaqshı ekenin ımlap soradı.
63Zexariya jazıw taxtayshasın talap qıldı da: «Onıń atı Yaqıya bolsın», – dep jazdı. Buǵan hámme ań-tań bolıstı. 64Sol waqıtta-aq Zexariya tilge kirip, Qudaydı alǵıslap sóyley basladı. 65Átirapında jasawshılardı qorqınısh biyledi hám Yahudiyanıń pútkil tawlı úlkesi boylap usılar haqqında sóz tarqadı. 66Esitkenlerdiń hámmesi oyǵa shúmip: «Bul náreste kim bolar eken?» – deytuǵın edi. Sebebi Jaratqan Iyeniń qúdireti onıń menen birge edi.
Zexariyanıń payǵambarshılıq jırı
67Náresteniń ákesi Zexariya Muxaddes Ruwxqa tolıp, payǵambarshılıq etip bılay dedi:
68«Izraildıń Qudayı Jaratqan Iyege alǵıslar bolsın!
Óytkeni Ol kelip, Óz xalqı ushın tólem tólep, onı qutqardı.
69-70Óziniń muxaddes payǵambarları arqalı áyyemnen aytqanınday,
Ol bizler ushın Óz xızmetshisi Dawıttıń urpaǵınan shıqqan qúdiretli Qutqarıwshını berdi.
71Quday bizlerdi dushpanlarımızdan hám bizlerdi jek kóriwshilerdiń qolınan qutqardı.
72Bizlerdiń ata-babalarımızǵa wáde etken miyrimliligin kórsetip,
Óz muxaddes kelisimin,
73Babamız Ibrayımǵa bergen antın eske aldı.
74-75Ol bizlerdi dushpanlarımızdıń qolınan qutqarıp,
Ómir boyı Onıń aldında muxaddes hám haq bolıp,
Qorqpastan, Oǵan xızmet qılıwımızǵa múmkinshilik berdi.
76Al sen, balam, Quday Taalanıń payǵambarı dep atalasań.
Sebebi sen Iyemizdiń aldınan júrip, Onıń jolın tayarlaysań.
77Onıń xalqına gúnalarınıń keshirilip, qutqarılatuǵının járiyalaysań.
78-79Qarańǵıda hám ólim sayasında jasap atırǵanlarǵa nur túsiriw ushın,
Sonday-aq bizlerge tınıshlıqqa qaray jol kórsetiw ushın,
Qudaydıń ullı miyrim-shápááti aspannan tań bolıp atadı».
80Náreste bolsa ósip, ruwxıy kúshke tolıp bardı hám Izrail xalqınıń aldında kórinetuǵın kúnge deyin shól dalada jasadı.
Selectat acum:
Luka 1: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
