Yuxan 9
9
Iysanıń ishten soqır bolıp tuwılǵan adamǵa shıpa beriwi
1Iysa ótip baratırǵanda, ishten soqır bolıp tuwılǵan bir adamdı kórdi. 2Shákirtleri Iysadan:
– Ustaz! Bul adamnıń soqır bolıp tuwılıwı kimniń gúnası sebepli boldı, óziniń be yamasa ata-anasınıń ba? – dep soradı.
3Iysa bılay dep juwap berdi:
– Buǵan adamnıń óziniń de, ata-anasınıń da gúnası sebep bolǵan joq. Qudaydıń isleri onıń ómirinde kóriniwi ushın, ol soqır bolıp tuwıldı. 4Ele kúndiz eken, Meni Jibergenniń islerin islewimiz kerek. Tún keledi, sonda hesh kim isley almaydı. 5Men dúnyada ekenmen, dúnyanıń nurıman.
6Iysa bul sózlerdi aytıp bolıp, jerge túkirdi de, túkirikten ılay islep, onı soqırdıń kózlerine jaqtı 7hám oǵan:
– Barıp, Siloam háwizinde juwın, – dedi.
Siloam – «Jiberilgen» degen mánisti bildiredi. Ol barıp juwındı hám kózleri kóretuǵın bolıp, qaytıp keldi.
8Sonda qońsıları hám burın onıń tilenshilik etip otırǵanın kórgenler:
– Bul – tilenshilik etip otıratuǵın sol adam emes pe? – dedi.
9Birewleri: «Awa, sol», dese, basqaları: «Yaq, ol tek soǵan uqsaydı», dedi. Al onıń ózi: «Men sol adamman», dedi.
10– Olay bolsa, kózleriń qalay ashıldı? – dep soradı olar.
11Ol juwap berip:
– Iysa degen Adam ılay islep, kózlerime jaqtı hám maǵan: «Siloam háwizine barıp, juwın», – dedi. Sonda men barıp, juwındım hám kózlerim kóretuǵın boldı, – dedi.
12Olar:
– Ol qayaqta? – dep soradı.
– Bilmeymen, – dedi ol.
13Adamlar burın soqır bolǵan adamdı pariseylerdiń aldına alıp bardı. 14Iysanıń ılay islep, soqırdıń kózin ashqan kún Shabbat kúni edi. 15Sonda pariseyler de onnan kózleriniń qalay kóretuǵın bolǵanın soradı. Sol adam olarǵa:
– Iysa meniń kózlerime ılay jaqtı. Men juwındım hám endi kóretuǵın boldım, – dedi.
16Sonda geybir pariseyler:
– Bul Adam Qudaydan emes. Óytkeni Shabbat kúni jumıs islep atır, – dedi.
Biraq basqaları:
– Gúnakar adam bunday káramatlı belgilerdi qalay isley aladı? – dedi.
Solay etip, olardıń arasında bóliniw payda boldı.
17Olar jáne burın soqır bolǵan sol adamnan:
– Kózlerińdi ashqan sol Adam haqqında sen ne aytasań? – dep soradı.
– Ol payǵambar, – dedi ol.
18Biraq yahudiy basshıları kózleri ashılǵan adamnıń ata-anasın shaqırtpaǵansha, onıń burın soqır bolǵanına hám endi kózleriniń kóretuǵınına isenbedi. 19Olar onıń ata-anasınan:
– Ishten soqır bolıp tuwıldı, dep aytqan ulıńız usı ma? Endi ol qalay kóretuǵın boldı? – dep soradı.
20Onıń ata-anası juwap berip:
– Onıń bizlerdiń ulımız ekenin hám soqır bolıp tuwılǵanın bilemiz. 21Biraq, endi qalay onıń kóretuǵın bolǵanın hám onıń kózlerin kimniń ashqanın bilmeymiz. Ózinen sorań, ol erjetken, ózi ushın ózi sóylesin, – dedi.
22Soqır adamnıń ata-anası yahudiy basshılarınan qorqqanlıqtan usılay dedi. Sebebi yahudiy basshıları: «Kim Iysanıń Masiyx ekenin tán alsa, ol májilisxanadan quwılsın», – dep til biriktirgen edi. 23Sonlıqtan onıń ata-anası: «Ol erjetken, ózinen sorań», – degen edi.
24Solay etip, pariseyler soqır bolǵan adamdı ekinshi márte shaqırıp, oǵan:
– Haqıyqatın aytıp, Qudaydı maqta! Bizler bul Adamnıń gúnakar ekenin bilemiz, – dedi.
25– Ol gúnakar ma, gúnakar emes pe, bilmeymen. Men tek bir nárseni bilemen: soqır edim, endi kóretuǵın boldım, – dep juwap berdi ol.
26Olar jáne onnan:
– Ol saǵan ne isledi? Kózlerińdi qalay ashtı? – dep soradı.
27– Men sizlerge jańa ǵana ayttım-ǵo, biraq sizler tıńlamadıńlar. Jáne ne esitpekshisizler? Sizler de Onıń shákirtleri bolıwdı qáleysizler me? – dep juwap berdi ol.
28Sonda yahudiyler oǵan jekirinip:
– Sen Onıń shákirtiseń! Al bizler Muwsanıń shákirtlerimiz! 29Qudaydıń Muwsa menen sóyleskenin bilemiz. Biraq bul Adamnıń qayaqtan kelgenin bilmeymiz, – dedi.
30Kózi ashılǵan adam olarǵa:
– Tań qalarlıǵı sol-dá! Sizler Onıń qayaqtan kelgenin bilmeysizler, biraq Ol meniń kózlerimdi ashtı. 31Bizler Qudaydıń gúnakarlardı tıńlamaytuǵının bilemiz. Biraq kim de kim Qudaydı sıylap, Onıń erkin orınlasa, sonı tıńlaydı. 32Dúnya bar bolǵalı, ishten soqır bolıp tuwılǵan adamnıń kózin birewdiń ashıwı – hesh esitilmegen gáp. 33Eger bul Adam Qudaydan bolmaǵanda, hesh nárse isley almas edi, – dedi.
34Yahudiyler oǵan juwap berip:
– Óziń pútkilley gúnaǵa batıp tuwılǵansań, sen be bizlerdi úyretetuǵın? – dep, onı quwıp shıǵardı.
Ruwxıy soqırlıq
35Pariseylerdiń onı quwıp shıǵarǵanın esitken Iysa onı tawıp:
– Sen Adam Ulına#Yuxn 9:35 Adam Ulına – Bazı qoljazbalarda «Quday Ulına». iseneseń be? – dep onnan soradı.
36Ol juwap berip:
– Mırza, Ol kim? Maǵan ayt, men de Oǵan iseneyin, – dedi.
37Iysa oǵan:
– Sen Onı kórdiń. Mine, seniń menen sóylesip turǵan – Onıń Ózi, – dedi.
38Sonda ol:
– Iyem, isenemen, – dep, Iysaǵa sıyındı.
39Iysa:
– Soqırlar kórsin, kóretuǵınlar soqır bolsın dep, Men bul dúnyanı húkim etiwge keldim, – dedi.
40Iysanıń qasında bolǵan ayırım pariseyler bul sózlerdi esitip, Oǵan:
– Ne, bizler de soqırmız ba? – dedi.
41Iysa olarǵa:
– Eger sizler soqır bolǵanıńızda, gúnańız bolmas edi. Biraq: «Kózlerimiz kóredi» degenińiz ushın, gúnańız moynıńızda qaladı, – dedi.
Selectat acum:
Yuxan 9: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
