Yuxan 15
15
Júzim aǵashı hám onıń shaqaları
1– Men – haqıyqıy júzim aǵashıman, al Ákem baǵman. 2Mendegi jemis bermeytuǵın hár bir shaqanı Ol kesip taslaydı. Jemis beretuǵın hár bir shaqanı jáne de kóbirek jemis bersin dep, putap tazalaydı. 3Meniń sizlerge aytqan sózlerim arqalı sizler álle qashan tazasızlar. 4Mende bolıńlar, Men de sizlerde bolaman. Aǵashta bolmaǵan shaqa óz-ózinen jemis bere almaǵanı sıyaqlı, sizler de Mende bolmasańlar, jemis bere almaysızlar.
5Men – júzim aǵashıman, sizler – shaqalarsız. Kim Mende bolıp, Men onda bolsam, ol kóp jemis beredi. Sebebi Mensiz hesh nárse isley almaysızlar. 6Kim de kim Mende bolmasa, shaqa sıyaqlı sırtqa taslanıp, quwrap qaladı. Bunday shaqalar jıynalıp, otqa taslanıp jandırıladı. 7Eger sizler Mende bolıp, Meniń sózlerim sizlerde bolsa, qálegenińizdi sorańlar, sizlerge beriledi. 8Sizler kóp jemis berseńler, Ákem ullılanadı. Sonda Meniń shákirtlerim bolasızlar.
9Ákeniń Meni súygeni sıyaqlı, Men de sizlerdi súydim. Meniń súyispenshiligime sadıq bolıńlar. 10Men Ákemniń buyrıqların orınlap, Onıń súyispenshiligine sadıq bolǵanımday, sizler de eger Meniń buyrıqlarımdı orınlasańlar, Meniń súyispenshiligime sadıq bolasızlar. 11Bulardı sizlerge Meniń quwanıshım sizlerde bolıwı ushın hám quwanıshıńız tolı bolıwı ushın ayttım. 12Meniń buyrıǵım mınaw: Men sizlerdi qalay súygen bolsam, sizler de bir-birińizdi solay súyińler. 13Dosları ushın óz janın bergen adamnıń súyispenshiliginen artıq súyispenshilik joq. 14Eger sizler buyırǵanlarımdı orınlasańlar, Meniń doslarım bolasızlar. 15Bunnan bılay, sizlerdi «qul» dep atamayman. Óytkeni qul xojayınınıń ne isleytuǵının bilmeydi. Sizlerdi «doslarım» dep atayman. Sebebi Ákemnen esitkenlerimniń hámmesin sizlerge bildirdim. 16Sizler Meni emes, Men sizlerdi tańladım. Barıp jemis bersin hám jemisi turaqlı bolsın dep, sizlerdi tayınladım. Solay etip, Meniń atım menen Ákemnen ne sorasańlar da, Ol sizlerge beredi. 17Sizlerge buyrıǵım sol: bir-birińizdi súyińler!
Dúnyanıń jek kóriwi
18– Eger dúnya sizlerdi jek kórse, sizlerden aldın onıń Meni jek kórgenin bilińler. 19Sizler bul dúnyaniki bolǵanıńızda, dúnya ózine tiyislilerdi súyer edi. Biraq, sizler bul dúnyaniki emessizler. Óytkeni Men sizlerdi dúnyadan tańlap aldım. Sonlıqtan dúnya sizlerdi jek kóredi. 20Meniń: «Xızmetshi xojasınan ullı emes», – degen sózlerimdi eslerińizge túsirińler. Eger adamlar Meni quwdalasa, sizlerdi de quwdalaydı. Eger Meniń sózimdi tıńlasa, sizlerdiń sózlerińizdi de tıńlaydı. 21Bul islerdiń hámmesin sizlerge Meniń atım sebepli isleydi. Sebebi olar Meni Jibergendi bilmeydi. 22Eger Men kelmegenimde hám olarǵa aytpaǵanımda, olardıń gúnaları bolmas edi. Biraq endi gúnalarına keshirim joq. 23Meni jek kórgen adam Meniń Ákemdi de jek kórgen boladı. 24Eger Men olar arasında hesh kim islemegen islerdi islemegenimde, olarda gúna bolmas edi. Endi bolsa, olar islerimdi kórse de, Meni de, Ákemdi de jek kórdi. 25Biraq bul olardıń Muxaddes Nızamındaǵı: «Meni biykarǵa jek kórdi»#15:25 Zab 34:19; 68:5., – degen sózlerdiń orınlanıwı ushın boldı.
26Ákemnen sizlerge Men jiberetuǵın Jaqlawshı, yaǵnıy Ákemnen shıǵatuǵın Haqıyqat Ruwx kelgende, Ol Men tuwralı gúwalıq beredi. 27Sizler de gúwalıq beresizler. Óytkeni áwelden-aq Meniń menen birgesizler.
Selectat acum:
Yuxan 15: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
