Yuxan 13
13
Iysanıń Óz shákirtleriniń ayaǵın juwıwı
1Qutqarılıw bayramınıń aldınǵı kúni Iysa Óziniń bul dúnyadan Ákesiniń janına baratuǵın waqtı kelgenin bildi. Ol bul dúnyadaǵı Ózine tiyisli adamlardı súyetuǵın edi. Olardı aqırına deyin súydi.
2Iysa shákirtleri menen keshki awqatqa otırdı. Shaytan álle qashan Shimon ulı Yahuda Isqariottıń kewline Iysaǵa satqınlıq qılıw niyetin salǵan edi. 3Iysa Ákesiniń hámme nárseni Onıń qolına bergenin, Óziniń Qudaydan kelgenin hám Qudayǵa qaytıp baratırǵanın bilip, 4dasturxan basınan turdı. Sırtqı kiyimin sheshti de, bir súlgini alıp beline bayladı. 5Sońınan lágenge suw quyıp, shákirtleriniń ayaqların juwıp, belindegi súlgi menen súrte basladı.
6Iysa Shimon Petrdiń qasına kelgende, Petr Oǵan:
– Iyem, meniń ayaqlarımdı Sen juwajaqsań ba? – dedi.
7Iysa oǵan juwap berip:
– Meniń ne islep atırǵanımdı sen házir túsinbeyseń. Biraq sońınan túsinip alasań, – dedi.
8– Meniń ayaqlarımdı Sen hesh qashan juwmaysań! – dedi ol.
– Eger Men seniń ayaqlarıńdı juwmasam, Meniń menen qatnasta bolmaysań, – dedi Iysa.
9Shimon Petr Iysaǵa:
– Iyem, onda tek ayaqlarımdı emes, qollarımdı da, basımdı da juwa gór! – dedi.
10Iysa oǵan:
– Shomılǵan adam pútkilley taza. Onıń tek ayaqların ǵana juwıw kerek. Sizler de tazasızlar, biraq hámmeńiz emes, – dedi.
11Iysa Ózine kimniń satqınlıq qılatuǵının biletuǵın edi. Sonlıqtan: «Biraq hámmeńiz emes» degen edi.
12Shákirtleriniń ayaqların juwıp bolǵannan soń, Iysa kiyimlerin kiyip, jambaslap jattı da, olarǵa bılay dedi:
– Meniń sizlerge ne islegenimdi túsindińler me? 13Sizler Meni Ustaz hám Iyem dep ataysızlar. Durıs aytasızlar, sebebi Men Solman. 14Men sizlerdiń Iyeńiz hám Ustazıńız bola tura, ayaqlarıńızdı juwǵan bolsam, sizler de bir-birińizdiń ayaqlarıńızdı juwıwıńız tiyis. 15Men sizlerge ne islegen bolsam, sizler de sonı islewińiz ushın, Men sizlerge órnek kórsettim. 16Sizlerge shının, haqıyqatın aytaman: xızmetshi xojasınan ullı emes. Elshi de ózin jibergennen ullı emes. 17Eger sizler bulardı bilip orınlasańız, baxıtlı bolasızlar!
Iysaǵa satqınlıq
(Mat 26:20-25; Mrk 14:17-21; Luk 22:21-23)
18– Men hámmeńiz tuwralı aytıp atırǵan joqpan. Men Ózimniń tańlap alǵanlarımdı bilemen. Biraq Muxaddes Jazıwdaǵı: «Meniń nanımdı jegen Maǵan qarsı qol kóterdi»#13:18 Zab 40:10., – degen sózler orınlanıwı kerek.
19Bul júz bergende, Meniń Sol ekenime iseniwińiz ushın, Men sizlerge házir, bul bolmastan burın aytıp atırman. 20Sizlerge shının, haqıyqatın aytaman: kim de kim Men jibergen adamdı qabıl alsa, Meni qabıl alǵanı boladı. Kim de kim Meni qabıl alsa, Meni Jibergendi qabıl alǵanı boladı.
21Iysa bulardı aytqannan soń, ruwxıy qıynalıp, ashıq sóylep bılay dedi:
– Sizlerge shının, haqıyqatın aytaman: arańızdaǵı birińiz Maǵan satqınlıq isleydi.
22Shákirtleri Onıń kimdi názerde tutıp atırǵanın túsinbey, bir-birine qarastı. 23Shákirtlerden biri Onıń qasında jambaslap jatırǵan edi. Iysa onı súyetuǵın edi. 24Shimon Petr sol shákirtke: «Ol kim tuwralı aytıp atır, sora», – dep ımladı.
25Iysanıń kókiregine súyenip jatırǵan sol shákirt Onnan:
– Iyem, ol kim? – dep soradı.
26Iysa juwap berip:
– Men mına bir bólek nandı malıp, kimge bersem, ol – sol, – dedi de, bir bólek nandı malıp, Shimon ulı Yahuda Isqariotqa berdi. 27Yahuda nandı alıwdan-aq, onıń ishine shaytan kirdi. Iysa oǵan:
– Qılajaq isińdi tezirek qıl, – dedi.
28Dasturxan átirapında otırǵanlardıń hesh qaysısı Iysanıń bul sózlerdi Yahudaǵa ne ushın aytqanın túsinbedi. 29Aqsha qutısı Yahudada bolǵanlıqtan, Iysa oǵan: «Bayram ushın bizlerge kerekli zatlardı satıp al» yamasa «Jarlılarǵa bir nárse ber», – dep atırǵan shıǵar, dep oyladı geybirewleri. 30Al Yahuda bir bólek nandı alıwdan-aq, sırtqa shıǵıp ketti. Tún bolǵan edi.
Jańa buyrıq
31Yahuda sırtqa shıǵıp ketkennen soń, Iysa bılay dedi:
– Házir Adam Ulı ullılandı. Ol arqalı Quday da ullılandı. 32Quday Ol arqalı ullılanǵanlıqtan, Qudaydıń Ózi de Onı ullılaydı. Onı tez arada ullılaydı.
33Balalarım! Endi Men sizler menen birge uzaq waqıt bolmayman. Meni izleysizler, biraq yahudiy basshılarına aytqanımday, sizlerge de aytatuǵınım: Men baratuǵın jerge sizler jete almaysızlar.
34Sizlerge jańa buyrıq berip atırman: bir-birińizdi súyińler! Meniń sizlerdi súygenim sıyaqlı, sizler de bir-birińizdi súyińler. 35Eger bir-birińizdi súyseńler, hámme usı arqalı sizlerdiń Meniń shákirtlerim ekenińizdi bilip aladı.
Petrdiń Iysadan tanıwı haqqında
(Mat 26:31-35; Mrk 14:27-31; Luk 22:31-34)
36Shimon Petr Iysaǵa:
– Iyem, Sen qayaqqa baratırsań? – dedi.
Iysa:
– Men baratuǵın jerge sen házir izimnen erip bara almaysań. Biraq sońınan izimnen keleseń, – dep juwap berdi.
37Petr Oǵan:
– Iyem, ne ushın Seniń izińnen házir bara almayman? Men Sen ushın janımdı beremen! – dedi.
38Iysa oǵan bılay dep juwap berdi:
– Men ushın janıńdı bermekshimiseń? Saǵan shının, haqıyqatın aytaman: qoraz shaqırmastan burın sen Mennen úsh ret tanasań.
Selectat acum:
Yuxan 13: QrqMK22
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2022
