Luka 14
14
Mombi ʉ ndʉtʉ yɛɛ imotoke
1Ɓisi ɓʉ humuo mʉngana ɓʉ Ɓayuda, Yeso a꞉sa kʉdyakaka ɔɔ ngama mʉngana wʉ Ɓafalisayɔ. Ɓombi ngiɓa ɓi꞉nye ananɨ, ɓi꞉nye nayɔ kʉkanga ɓʉ gbɛ. 2Mombi mʉngana i꞉nye nʉ kweso ndʉtʉ nayɔ imotoke nʉ mepo, nʉ i꞉nye ɓʉmaɨ kʉ na apɛɛ ʉ Yeso. 3Kija Yeso a꞉ɓukuo ɓapananakɨa ɓʉ mapanʉ nʉ Ɓafalisayɔ ɓɔ: « Ajʉ mapanʉ ngikʉndɛsʉ kaabaya bayanɨ kuhiiso mombi akʉ ɓisi ɓʉ humuo, gʉ chʉkɔmʉ? »
4Ɨkyɛmɨngana, ɓa꞉kata tʉkʉ ɓʉ nyɛ. Kija Yeso a꞉ɓoto mombi ʉ kweso ngiinanɨ, ambumuhiiso, ambumutitio ɓɔ: « Sa andɔɔ! » 5Ambuɓusigio ɓɔ: « Anɨ ati ʉndɛnʉ iya ndʉ mwana angɔ yɛmɔ ngɔmbɛ angɔ, ʉkweni amati ʉ ʉpɨa wʉ mepo, ambukumiso kʉ nɨma ngiinanɨ, abana yɨkyɨanɨa akʉ ɓisi ɓʉ humuo? »
6Moni ngikʉnanɨ kambʉɓʉkyɨaka kutisio.
Kuɓio nʉ 'ʉtʉma wɔɔ ijisinise nɨsɨ
7Ɓombi ngiɓa ɓa꞉ɓusoko akʉ ʉmbɔ ɓi꞉nye kʉhata kuwulo tʉkʉ akʉ muweikie kʉ ɨbɨba. Iya Yeso a꞉na ɓɔ ɓakʉkyɨa ɓwanɨ, kija a꞉ɓʉngakɨa ɛɓɔ kʉ ɓuɓomu isisinio ngia: 8« Ndʉ mombi anasoko kʉdyakaka akʉ ʉmbɔ wʉ chɨkana, wɔɔhatakɔmʉ kuwulo tʉkʉ akʉ ɓuwei ɓʉ ɨbɨba. Yaɓio yɛmɔ ɓɔ ɓu꞉sokeni mombi wʉ ɨbɨba nɔwɛ kʉɓaa ɔwɛ kʉ ananɨ. 9Mambɨnyɨ ʉ ʉmbɔ ngia aɓio unisokeni inu ɓapɨnɨ kʉ ɓuɓomu, a꞊ka nɔwɛ kusigio ɓɔ: ‹ Ʉngwɨa mombi ngia akʉ ɓuwei ngiɓʉnanɨ! › Tiga nanɨ, wakwa soni kʉsa kuwulo akʉ ɓuwei ngiɓa ɓa ambise. 10Ɨkyɛmɨngana, ati ngia ɓʉnasoko‑ɔɔ akʉ ʉmbɔ ndʉ uʉnanɨ, sa kuwulo tʉkʉ ambise, ambʉ mombi ngia ʉ꞉nasoko ʉkeni, a꞊nasigio ɓɔ: ‹ Adii, ʉngwa nanɨ, ɨka kuwulo yeni akʉ ɓuwei ngiɓa ɓa apɛɛ! › Nanɨ waɓio tiga nʉ ɨbɨba apɛɛ ʉ ɓombi kʉ ɓuɓomu ngiɓa naɓio naɓɔ kʉdyakaka. 11Jʉ mombi ngia a꞊zonono nɨkʉʉ, Asʉɓɨɨ a꞊mijiso tiga nɨsɨ. Nʉ mombi ngia a꞊ijisiniso nɨsɨ, Asʉɓɨɨ a꞊muzono tiga nɨkʉʉ. »
12Yeso ambusigio tiga mombi ngia i꞉nye umusokeni ɓɔ: « Wusokeni ɓombi kʉdyakaka andɔɔ kʉɓa yɛmɔ nɨpasɨ, ɔɔsokokɔmʉ ɓadii ɓʉsɔɔ, gʉkʉ ɓamananʉ, gʉkʉ anza asɔɔ, gʉkʉ ɓombi ɓʉ lɨkyɛmɛ ngiɓa nanabanakɨa naɓɔ. Jʉ ɛɓɔ ɓa kʉ ikanzi ngia ɓa꞊nasoko ɔwɛ aɓandaɓʉ kʉ sokoo. Nʉ iinanɨ ya ndʉ ɓʉ꞉natuisio ɨkyɛmɛ ngia waɓio wʉɓʉkyɨeni ɛɓɔ. 13Ɨkyɛmɨngana, wusokeni ɓombi akʉ ʉmbɔ, soko ɓombi ɓʉ ɓanangyɨa, ɓombi ɓɔɔ ɓʉjʉnganakɛ, ɓajakɛsɨ nʉ ɓombi ngiɓa ɓambakana. 14Wukyieni ɓwanɨ, waɓio nʉ ɨgyagya, jʉ ɛɓɔ ɓambʉkɔmʉ ikanzi ngia ɓa꞊natuisio ɔwɛ ɨkyɛmɛ. Tiga kʉ ɓwanɨ, Asʉɓɨɨ a꞊natuisio sina ʉkʉa wɔngɔ ati ngia ɓombi ɓɔɔ ngbingbii ɓa꞊jʉkana sina‑ɔɔ akʉ ingyo. »
Isisinio yɨ ɓombi ngiɓa ɓa꞉ɓusoko akʉ ʉmbɔ
(Mat 22:1-10)
15Mombi mʉngana ati ʉ ɓombi ngiɓa ɓi꞉nye kʉdyakaka ɨzɔ nʉ ɔɔ Yeso a꞉kɔ moni ngika Yeso a꞉sigo tʉkʉ kɔɔ. Mbise ɔngɔ ambumusigio ɓɔ: « Ya ɨgyagya nʉ mombi ngia a꞊dyakaka ɓisi ongo akʉ ʉmbɔ ngua wʉ Ɓʉngama ɓʉ Asʉɓɨɨ. »
16Iya Yeso a꞉kɔ nayɔ moni ngikʉnanɨ, kija a꞉mʉngakɨa isisinio ngia: « Mombi mʉngana a꞉tiniso ʉmbɔ wɔɔ 'ʉja, ambusoko ɓombi ɓaja andɔngɔ. 17Iya idyo ya꞉pɨa nayɔ, ambʉtʉma mombi ʉ kuu angɔ kʉɓɨakɨa ɓombi ngiɓa a꞉ɓusoko ɓɔ: ‹ Ikeni, idyo yɨ꞉pɨa pɨaa. › 18Ɨkyɛmɨngana, ɛɓɔ kʉ ɓuɓomu kʉ nangana nangana ɓambufaniso tʉkʉ zunikio ɓakai. Mombi ngia wʉ pɛɛ a꞉musigio ɓɔ: ‹ Ma꞉kʉa pongo watɨnɨ, yɨta mʉsa‑zʉ kʉna engo, napɨa‑zʉ tʉkʉ pɨanɨ. › 19Iya kɔmɔ ambusigo ɓɔ: ‹ Ma꞉kʉa pongo ɓangɔmbɛ kumi,#14:19 Ɓi꞉nye nangyo ɓugue ɓʉ ɓangɔmbɛ ʉnɔtɔ ambʉ ɓuɓio naɓɔ kʉkyɨa kuu. ma‑zʉ kʉsa kukanyo naɓɔ kʉkyiiso kuu akʉ watɨnɨ, napɨa‑zʉ tʉkʉ pɨanɨ. › 20Iya kɔmɔ ɓata, ambusigo tiga ɓɔ: ‹ Ma꞉chɨka bɛ moi kʉ ɨtakɨ‑takɨ, yambʉkɔmʉ‑zʉ akʉ maka‑ɔɔ. › 21Mombi ʉ kuu a꞉tʉa aka, ambʉɓɨa makʉʉ angɔ moni ngikʉnanɨ. Iya makʉʉ ʉ ɨkáa a꞉kɔ ɓwanɨ, kija a꞉puno ɓɨɓɨ, ambusigio mombi ʉ kuu ngiinanɨ ɓɔ: ‹ Jo mɨngyɛndʉ gagaa, nʉ lɨngbaa lʉ gʉlʉ, wambʉka aka nʉ ɓombi ɓʉ ɓanangyɨa, ɓombi ɓɔɔ ɓʉjʉnganakɛ, ɓombi ngiɓa ɓambakaana nʉ ɓombi ɓʉ mɨdɛɛ. › 22Iya mombi ʉ kuu a꞉tʉa nayɔ, ambʉɓɨa makʉʉ angɔ ɓɔ: ‹ Makʉasɛmɛ, moni kʉ muɓomu ngika wutitio, mʉkʉkyɨa kyɨaa, nʉ mʉa wa‑zʉ tʉkʉ ɨsʉkʉɓwanɨ. › 23Makʉʉ ʉ ɨkáa ambusigio mombi ʉ kuu ɓɔ: ‹ Jo lɨngbaa nʉ ɓambamba ɓʉ ɓaga ɓʉ lɨkʉmbʉ, ɓombi ngiɓa wa꞊ɓʉgbʉka, ɓutitio ɓɔ ɓʉka kukumunio, ambʉ ɨkáa ngiisɛmɛ yihuo tʉkʉ ɓʉ ngu. 24Jʉ maninu kʉɓɨa ɓɔ ati ʉ ɓombi ngiɓa ɓi꞉nye ɓuɓusokeni, gʉkʉ mʉngana ɔngɔ ambʉkʉdyakaka sina akʉ ʉmbɔ nguʉsɛmɛ! › »
Kuɓio 'ʉkpataka wʉ Yeso
(Mat 10:37-38)
25Ungbutu wʉ ɓombi wɔɔ ʉja wi꞉nye wʉnganɨeni ɨngbaa ɨzɔ nʉ‑ɔɔ Yeso. Kija a꞉nɨtana, ambuɓusigio ɓɔ: 26« Mombi inye kʉka andɛmɛ, aɓio 'ʉkpataka wʉsɛmɛ tʉkʉ ambʉ ʉnakʉnda ɛmɛ kʉɓaa ɨsɛ, inye, moi angɔ, ɓana ɓangɔ, ɓamanye ɓɔɔ gue nʉ ɓɔɔ ɓoi, abana kʉndʉ ʉɓɨɨ nguangɔ makʉɔngɔ. 27Mombi ngia ambukufuɓuo mʉsalaba#14:27 I꞉nye nʉ ɨgyagya kʉdya ikoko ngbanga ngbanga ndʉ Yeso. nguangɔ, nʉ kʉkɨndaka ɨzɔ nɛmɛ, ambʉkʉkwanana kuɓio 'ʉkpataka wʉsɛmɛ. 28Ndʉ mombi mʉngana ati ʉndɛnʉ aɓio‑zʉ kʉkʉnda kʉtɨa aga ɔɔ ikongo, mɛɛ‑zʉ akpanga nʉ wulo, ambupimiso‑zʉ nʉ poo ɓɔ kumbo 'ʉpitanɨ iya yakʉta akʉ kuu ngiinanɨ. Ambʉmbɨa ɓɔ ajʉ anʉ kumbo ikanzi ngia apipo nayɔ kuu ngiinanɨ. 29Ndʉ amba tʉkʉ ʉpɨa nʉ tɨa 'ʉkʉpa wʉ mukopi amati, chʉkɔmʉ ambuupipo, ɓombi kʉ ɓuɓomu ngiɓa ɓaɓio kʉna idungbu yɨ aga ngiinanɨ ɓaɓio tiga nayɔ kʉnʉa. 30Ɓaɓio tiga kusigo ɓɔ: ‹ Gue ngiakɛ a꞉napio kʉtɨa aga, ɨkyɛmɨngana a꞉mʉɓaa angu kupipo engo ɓaa! › 31Ya ɓata ngbanga kʉndʉ ngama mʉngana ɔɔ 'ʉja ngia anʉ ɓasʉda ɛlɛfʉ kumi, inyeni kʉkʉnda kʉsa kʉmana ɗite nʉ ngama ɔɔ 'ʉja nga kɔmɔ, iya anʉ ɓasʉda ɛlɛfʉ makumi kapɨnɨ. Akpanga‑zʉ tʉkʉ nʉ wulo, kija akanganɨa ɓɔ ajʉ a ikanzi ngia ɓamana nʉ makwa nguʉnanɨ wangɔ wanʉ ɓasʉda ɓaja, ɛyɔ inye naɓɔ ɗɛkɛkɛ! 32Ndʉ ana ɓɔ ambʉkɔmʉ ikanzi ngia ɓamana nayɔ, a꞊tʉmɨa tiga abangɔ ngama ngiinanɨ ɓatitima i꞉nye‑zʉ tʉkʉ danga nayɔ, kuɓukuo ɓɔ ɓa꞊kyɨa tanɨ aka ekoo ngia ɓɔ ɗite lɔɔɓiokɔmʉ. » 33Tiga kʉ ɓwanɨ, Yeso ambʉmatɨa ɓɔ: « Ati ʉndɛnʉ, mombi gʉkʉ mʉngana ambʉkʉkwanana kuɓio 'ʉkpataka wʉsɛmɛ, ndʉ ambʉkʉsɨa kumbo ngia anayɔ kʉ 'uɓomu. »
'Ukwe kɔɔ ndapa ndapa
(Mat 5:13; Mak 9:50)
34« 'Ukwe ka ɨkyɛmɛ yɛɛ tɨpɨ, ɨkyɛmɨngana kʉkweni ndapa ndapa, ɓakukiso ɓata tɨpɨ nɨngbaa tɨmanɨ? 35Kambʉkʉkwanana ɓata kuɓio muɗo gʉkʉ ɓɔ kanzo ɨtaka ʉdɔɓɔ, abana tʉkʉ ɨkaka. Ɓakugiso tii tʉkʉ giso. Mombi ngia anʉ muchwei kɔɔ mʉkɛ, ʉkɔ moni ngikʉnanɨ tʉkʉ kɔɔ. »
Selectat acum:
Luka 14: BudKoya
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2021, Wycliffe Bible Translators, Inc.
