NINGPAWT NINGHPANG 12
12
Abram Hpe Karai Kasang Shaga La Ai
1Dai Madu gaw Abram hpe, “Na a mungdan, na a jinghku jingyu ni hte na kawa a buga kaw nna pru wa nhtawm ngai nang hpe madun na de ai mung de sa wa su. #Kas 7:2-3; Heb 11:8. 2Ngai nang hpe law law mayat maya shangun nna amyu kaba shatai na nngai. Ngai nang hpe shaman ya nna na a mying hpe gumhkawng shangun na nngai; shing rai nang gaw chyeju daju tai na rin dai.
3Nang hpe shaman ya ai wa hpe ngai shaman ya na nngai,
Rai ti mung nang hpe dagam ai wa hpe ngai dagam kau na nngai.
Na a marang e, amyu baw yawng hte hpe ngai shaman ya na nngai,” ngu nna tsun wu ai. #Gal 3:8.
4Abram a asak 75 ning du ai shaloi, dai Madu shi hpe tsun da sai hte maren, Lawt hte rau Haran mare kaw nna shi pru wa wu ai. 5Abram gaw shi a madu jang Sarai hte shi a kanau a kasha Lawt hpe mung, shi a sut gan yawng mayawng hte Haran mare e shanhte lu la ai mayam ni yawng hte hpawn Hkanan mung de shanhte pru sa wa ma ai.
6Shanhte dai Hkanan mung de du ai shaloi, Shehkem ginwang, More shara na chyoi pra ai hpun tu ai shara de du hkra, dai mung de Abram ga sa wa wu ai. (Dai aten hta Hkanan masha ni dai mung hta naw nga nga ma ai.) 7Dai Madu gaw Abram kaw dan pru nna shi hpe, “Na a amyu matu mara ni hpe ngai jaw na ngu ai mungdan gaw ndai rai nga ai,” ngu nna tsun wu ai. Dai rai nna, shi kaw dan pru ai dai Madu a matu dai shara hta tawn hkungri hpe Abram galaw wu ai. #Kas 7:5; Gal 3:16. 8Dai hpang dingda maga de yu wa nhtawm Behtela a sinpraw maga na kawng de shi htawt sa let shi a sum hpe Behtela a sinna maga hte Ai mare a sinpraw maga na lapran e gap wu ai. Dai yang e, tawn hkungri hpe mung shi gap nna dai Madu hpe nawku wu ai. 9Dai hpang shi gaw shara mi kaw nna shara mi de htawt hkawm nhtawm Hkanan mung a dingda maga de du hkra hkawm sa mat wa wu ai.
Egutu Mung De Du Hkawm Ai Abram
10Rai ti mung Hkanan mung hta grai nga n manu ai hte hku hku wa ai rai nna, dingda maga Egutu mung e tawng marang mi sa shingbyi nga na matu Abram pru sa wa wu ai. 11Egutu mung a lamu ga jarit de lai bang wa nga yang, shi a madu jan Sarai hpe, “Nang gaw ahpraw tsawm ai num rai nga ndai. 12Egutu masha ni nang hpe mu ai shaloi, nang gaw nye a madu jan rai nga ai nga nna shanhte myit la na mara ai, shaloi shanhte ngai hpe sat kau nna nang hpe jahkrung da na mara ai. 13Nang gaw nye a kajan she re ngu nna shanhte hpe tsun dan u; shing rai na a majaw shanhte ngai hpe jahkrung da ai hte atsawm sha hku la na mara ai,” ngu nna tsun wu ai. #Nin 20:2; 26:7. 14Ya Egutu mung de shi lai bang mat wa ai shaloi shi a madu jan tsawm htap nga ai hpe Egutu masha ni mu ma ai. 15Hkawhkam wang na du salang nkau mi mung dai numsha hpe mu ma ai rai nna, shi kade daram tsawm htap nga ai lam hkawhkam wa hpe tsun dan mu ai; dai rai nna shi gaw hkawhkam htingnu de shaga la ai hkrum wu ai. 16Dai numsha a majaw hkawhkam wa gaw Abram hpe atsawm sha hku la nhtawm shi hpe sagu, bainam, dumsu, lawze, mayam ni hte gawla-uk ni hpe hpung hte hpung jaw ya wu ai.
17Rai ti mung hkawhkam wa Sarai hpe shaga la kau wu ai majaw shi a ntsa e mung, hkawhkam wang na masha ni a ntsa e mung, hkrit hpa ana zinli hpe dai Madu dat dat wu ai. 18Dai hpang hkawhkam wa gaw Abram hpe shaga la nna, “Nang ngai hpe hpa galaw kau nit ni? Ndai numsha na a madu jan rai nga ai gaw nang ngai hpe hpa majaw n tsun dan n ni? 19Nye a madu jan tai u ga, shi hpe na a kajan she re ngu nna hpa rai tsun n ta? Yu u, ndai gaw na a madu jan rai nga lit dai, shi hpe woi la nna pru mat wa u!,” ngu nna shi hpe tsun wu ai. 20Hkawhkam wa gaw shi a masha ni hpe hkang dat wu ai; shing rai shanhte gaw Abram hte rau shi a madu jan hpe mung shi madu da ai arai yawng mayawng hte nawng mungdan kaw nna shapraw dat mu ai.
Selectat acum:
NINGPAWT NINGHPANG 12: JCLB
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Jinghpaw Common Language Bible © Bible Society of Myanmar, 2009.