Matìyò 5
5
Yeso kɔʼ ikaŋ iwum chwìti inug abə ìmbi mə̀mə̀nənùg
1Anyumə̀ ne Yeso ya bàri inɔ̰ bəd we, wì ya kɔʼ ghò ikaŋ iwum mɔ̀ʼɔ pè chùghi aseg. Mə̀mə̀nənùg məd ya ghò fète iban məd.
Inug imbə̀ʼ àbɔrɔ̀bɔd
(Lug 6:20-23)
2Ane, wì ya ko ni chwiti inug inɔb.
Wì ya ghà inɔb gha:
3“Ŋwiye zì àbɔrɔ̀bɔd igun bəd mbe ne saŋi ìmbɔb inug ijìm ibo ikye abo,
imbə̀ʼ icheg ne mbɔb biri jəg anug ìfɔ̀n ikaŋ.
4Ŋwiye zì àbɔrɔ̀bɔd igun bəd mbe ne sɔ̀mnɔ̀,
imbə̀ʼ icheg ne məd biri nəri awɔb kwàʼ zìye zìye.
5Ŋwiye zì àbɔrɔ̀bɔd igun bəd mbe ne swi ìwɔb nyɔd aseg,
imbə̀ʼ icheg ne mbɔb biri jəg ighi igun isəg.
6Ŋwiye zì àbɔrɔ̀bɔd igun bəd mbe ne zi atog ni ghì inug ne təmi kòʼ,
imbə̀ʼ icheg ne məd biri nàʼ aghi ne mbɔb mbe kə̀bə̀ inɔb.
7Ŋwiye zì àbɔrɔ̀bɔd igun bəd mbe ne dìgrè igun mə̀mbin,
imbə̀ʼ icheg ne məd biri dìgrì igun inɔb.
8Ŋwiye zì àbɔrɔ̀bɔd igun bəd mbe ne ìtɔb fìŋ zḛ,
imbə̀ʼ icheg ne mbɔb biri bàd aməd.
9Ŋwiye zì àbɔrɔ̀bɔd igun bəd mbe ne ghìyə̀ gha bəd chughi ane àbɔrɔ̀bɔd,
imbə̀ʼ icheg ne Ŋwiye biri kàrì awɔb ane ìmbi bɔn.
10Ŋwiye zì àbɔrɔ̀bɔd igun bəd mbe ne bəd mbe chɔ̀ʼɔ ìmbɔb ibɔʼì ighog anjìm icheg ne mbɔb mbe ghìyə̀ inug ne təmi kòʼ,
imbə̀ʼ icheg ne mbɔb biri jəg anug ìfɔ̀n ikaŋ.
11Ŋwiye zì àbɔrɔ̀bɔd igun inən, anyumə̀ ne bəd mbe chàpà awən, chɔ̀ʼɔ ìmbən ibɔʼì ighog, bə̀ ghà tiku inug izəg ijìm ne ya inug ako igun inən imbə̀ʼ amə. 12Mbə̀ taŋ gyèndi imbə̀ʼ icheg ne Ŋwiye biri nàʼ ineʼi kyen inən ikaŋ àbɔ̀ŋɔ. À ya bə̀ icheg ne bəd ya bə chɔʼ ibɔʼì ighog abə bədkə̀n Ŋwiye mbe ne ya bi yaʼ bɔŋ awən.”
Mə̀mə̀nənùg Yeso ya icheg fìngwaŋ tì ìzḛzḛ
(Mag 9:50; Lug 14:34-35)
13Yeso ya chè imbìghè gha, “Mbə̰ ya icheg fìngwaŋ abə bəd ne yaʼi igun isəg. Si ya gha, fìngwaŋ kə mə̀ fə tu, mbi kə ywìri ghənə ni ghì gha fe ywirì nə̀m? Chəyi aghi ne tì mbi ywìrì ghì tì fìngwaŋ fe chèyi ni tù aseg, bəd se chè tə̀ʼə̀ yḛ̀ igun.
14Mbə̰ ya ìzḛzḛ abə bəd ne yaʼi inga isəg. Chəyi tì wə̀d nəm aben ne mbi kɔri ikaŋ iwum. 15Chəyi wə̀d we che anam nɔ̀ŋɔ̀ yaʼ aton akwighe. Wì ya che anam nɔ̀ŋɔ̀ igun asiŋi ne mbe nɔ̀ŋɔ̀ anam igun. Wì biri nɔ̀ŋì ane ni gha anam ya zùʼə abə wə̀d ijìm ne yaʼi inga nəb. 16Ane, mbə̰ bə ghì gha ìwən ìzḛzḛ ya zùʼə bəd məjìm ya bàrà. Bəd biri se bàrà ìmbən inug chɔm se nàʼà ighumni abə ìwən Mbaʼ we ne yaʼi ikaŋ àbɔ̀ŋɔ.”
Inug imbə̀ʼ Mə̀nɔ̀ʼɔ̀ Muse
17Yeso ya chè imbìghè gha, “Imbə̀ʼ mbə̰ kɔndɔ awən gha mə fə yeʼe ni nimni Mə̀nɔ̀ʼɔ̀ Muse bə̀ nimni inug mbe ne bədkə̀n Ŋwiye ya ŋwàʼri. Chəyi mə̀ yeʼe ni nimni inug mbo̰ ka. Mə yèʼe ni ghì gha inug mbo̰ ijìm mbe duwə ane tesiʼ. 18Mə gha tesiʼ inən gha, ghò pè ane nyumə̀ ne ikaŋ fɔrɔ isəg biri chè nim, chəyi iki achəpi ane ighə àŋwàʼrì ifibì inga inug mbo̰ ne mbi ŋwàʼri inga mə̀nɔ̀ʼɔ̀ Muse biri chè ako witì inug mbo̰ ijìm dù ane tesiʼ. 19Ane, wə̀d mɔ̀ʼɔ mə̀ gùg ka bèyi nɔ̀ʼɔ̀ we ne taŋ kə chè mə̀nɔ̀ʼɔ̀ mbo̰ məjìm, bə̀ ywìrì ghì bəd ndəŋ gùg nɔ̀ʼɔ̀ we, mbi biri kàrì tengàŋ ane wə̀d ne kə chè bəd məjìm inga anug ìfɔ̀n ikaŋ. Àsi wə̀d ne nɔ̀ŋɔ̀ mə̀nɔ̀ʼɔ̀ mbo̰ bə̀ ghìyə̀ bəd ndəŋ nɔ̀ŋɔ̀ mə̀nɔ̀ʼɔ̀ mbo̰, mbi biri kàrì aməd ane wə̀d kyen inga anug ìfɔ̀n ikaŋ. 20Mə gha tesiʼ inən gha, àmə chəyi ìmbən inug chɔm bɔŋi chè inug chɔm ìmbi mə̀Farìsi tì mə̀chwitì mə̀nɔ̀ʼɔ̀, nji chəyi mbə̀ biri nyi inga anug ìfɔ̀n ikaŋ.”
Anug imbə̀ʼ agaŋ
(Lug 12:57-59)
21Yeso ya chè imbìghè gha, “Mbə̰ ya fə zug gha mbi ya ghà abə ìmbən mə̀mbaʼ aneg gha, ‹Imbə̀ʼ wə̀d zwète yi wə̀d. Wə̀d mə zwèti wə̀d, mbi biri saʼ aməd.› 22Anug ne mə ghà inən amad anìŋ ya gha: Wə̀d mɔ̀ʼɔ mə̀ gaŋ tì ìwi ifi, mbi biri saʼ aməd. Wə̀d mɔ̀ʼɔ mə̀ zɔ̀mbì ìwi ifi, itog bəd ne sàʼa aben biri saʼ aməd. Wə̀d mə ghà abə ìwi ifi gha, ‹Àghò ya anen!› Wə̀d we ne gha ane kyeri gha mbi biri màʼ aməd inga iywid nɔʼ mèg, ne ya asiŋi ichə. 23Àghò mə niŋ aghi àfàtì ghò ikwijə̀ŋ Ŋwiye, pè angu wèndi gha ìwe ifi bèrì anug tì ine, 24nɔ̀ŋɔ aghi àfàtì ze imbìghè ikwijə̀ŋ we bì ghò mànì anug ze ne àghò beri tì ìwe ifi bɔŋ si ghò nàʼ àze aghi àfàtì abə Ŋwiye.
25Wə̀d mə bèrì isaʼi tì ine, zàmba mànì anug ze tì məd anyumə̀ ne tengàŋ kiri biri inɔnjì ni ghò a nəb isaʼi, nji wì biri nàʼ awe abə wə̀d ne sɔ̀bɔ tisaʼi, wì si nàʼ awe abə pùrusì, mbi si zì awe inga nəb ndəŋ. 26Mə ghà tesiʼ ine, chəyi àghò biri dù inga nəb ndəŋ angu witì àghò nàʼ ikab, tu anug ze mànì.”
Anug ni fànì
27Yeso ya chè imbìghè gha, “Mbə̰ ya fə zug gha mbi ya ghà gha, ‹Imbə̀ʼ wə̀d nɔkɔ yi tì inɔm kə̀ iweg wə̀d ndəŋ.› 28Anug ne mə ghà inən amad anìŋ ya gha, wə̀d mə nèn àyi ghə̀ʼrì, tengàŋ fə fànì tì àyi we ibo inga fìŋ. 29Ìwe ighə aba abo jəghi mə̀ ya ghìyə̀ gha àghò ya gùghə̀ inug, chìye ighə we waʼ. Ze bɔ̀ŋ ine ni gha àze asiŋi nyɔd amɔʼ ze nim, chè icheg ne Ŋwiye biri màʼ ìze nyàmnyɔd ijìm inga asiŋi ichə. 30Àze aba abo jəghi mə̀ ya ghìyə gha àghò ya gùghə̀ inug, sɔb waʼ. Ze bɔ̀ŋ ine ni gha àze asiŋi nyɔd amɔʼ ze nim, chè icheg ne Ŋwiye biri màʼ ìze nyàmnyɔd ijìm inga asiŋi ichə.”
Anug ni sàkì inam
(Mat 19:9; Mag 10:11-12; Lug 16:18)
31Yeso ya chè imbìghè gha, “Mbi ya bə̀ ŋwàʼrì gha, ‹Mbaŋà ze ne sàki inam tì ìwi iweg mənyìʼ nàʼ àŋwàʼrì ibo ni chwi gha zìye fə sàkì ìwɔb inam.› 32Anug ne mə ghà inən amad anìŋ ya gha, mbaŋà ne sàki inam tì ìwi iweg ne kayi anjìm anug ni gha àyi we nɔ̀kì tì mbaŋà ndəŋ, tengàŋ fə ghì gha iweg məd we si yaʼ àyi ne fànà. Mbaŋà ne nami àyi ne du inam fə bə̀ fànà.”
Anug ni zɔ̀m anug
33Yeso ya chè imbìghè gha, “Mbə̰ ya fə bə̀ zug gha, mbi ya ghà abə ìmbən mə̀mbaʼ aneg gha, ‹Imbə̀ʼ àghò zɔmɔ awe anug abə Anɔŋisəg ywìrì nɔ̀ʼ chɔ̀ʼri. Fàʼa anug ne àghò zɔ̀mi ni fàʼ abə Anɔŋisəg.› 34Anug ne mə ghà inən amad anìŋ ya gha, imbə̀ʼ wə̀d zɔmɔ yi anug mɔ̀ʼɔ ka. Imbə̀ʼ wə̀d zɔmɔ yi anug kàrì ikaŋ àbɔ̀ŋɔ imbə̀ʼ icheg ne ikaŋ àbɔ̀ŋɔ ya atən ifɔn Ŋwiye. 35Imbə̀ʼ wə̀d zɔmɔ yi anug kàrì ìseg imbə̀ʼ icheg ne ìseg ya aghi ne Ŋwiye ya nɔ̀ŋɔ̀ ìmbi ighog igun. Imbə̀ʼ wə̀d zɔmɔ yi anug kàrì Jèrusalèm imbə̀ʼ icheg ne Jèrusalèm ya aben àzi Ifɔn kyen. 36Imbə̀ʼ wə̀d zɔmɔ yi anug kàrì àzi atog imbə̀ʼ icheg ne chəyi wə̀d ne tì wì ghi gha nyɔ̀ŋ atog imɔʼ zè fin kə̀ gha zè fu. 37Mbə̀ gha məyi gha, ‹E› kə̀ ‹Indèʼ› Anug ndəŋ ne wə̀d ywirì si ghà à ya se àze ne nɔʼi abə Wə̀d Tibɔ̀ŋ.”
Anug ni ywìtì àpɔ̀n
(Lug 6:29-30)
38Yeso ya chè imbìghè gha, “Mbə̰ ya fə zug gha, ‹Wə̀d mə tòʼ ìwe ighə, mbi bə tòʼ ìwi məd tì ighə; bə̀ ywìrì zug gha, wə̀d mə chɔʼ isɔŋ ichug abə wə̀d, mbi bə chɔʼ isɔŋ ibo ichug.› 39Anug ne mə ghà inən amad anìŋ ya gha, imbə̀ʼ mbə̰ ywite awən àpɔ̀n abə wə̀d ne ghi anug tibɔ̀ŋ. Wə̀d mə twi ìze ndə̀ʼ aba abo jəghi, bə̀ŋə ìzin tì ndə̀ʼ chwi ibo wì bə twi. 40Wə̀d mə pùti awe ni niŋ ìze ndwi ibəm, sàŋa wì niŋ fɔrɔ bèyi ìze ndwigun. 41Wə̀d mə jwiʼ awe gha àghò mənyìʼ bèʼì ighi məd yḛ̀ kìlometà ifibì, bèʼe ighi mbe yḛ̀ mə̀kìlometà məbe. 42Wə̀d mə̀ nɔn aghi ine, nàʼa ibo. Wə̀d mə kə̀b ni chɔʼ aghi ine, imbə̀ʼ àghò to̰ awe.”
Anug ni kɔ̀ŋ ìmbe bəd ìpàb
(Lug 6:27-28; Lug 6:32-36)
43Yeso ya chè imbìghè gha, “Mbə̰ ya fə zug icheg ne mbi ya gha gha, ‹Kɔ̀ŋɔ ìwe ìfi, bàn ìwe wə̀d ìpàb.› 44Anug ne mə ghà inən amad anìŋ ya gha, mbə̀ kɔŋɔ ìmbən bəd ìpàb bə̀ chàʼra Ŋwiye abə bəd mbe ne chɔ̀ʼɔ ìmbən ibɔʼì ighog. 45Ane, mbə̰ biri yaʼ bɔn ìmbi ìwən Mbaʼ we ne yaʼi ikaŋ àbɔ̀ŋɔ. Mbə̀ ghiyə ane imbə̀ʼ icheg ne məd we ghìyə̀ gha nyùmə̀ zuʼ igun bəd ne ghìyə̀ inug tibɔ̀ŋ fɔrɔ igun bəd ne ghìyə̀ inug chɔm. Məd we bə̀ ghìyə̀ gha mbə̀ŋ no igun bəd ne ghìyə̀ inug ne koʼi fɔrɔ igun bəd ne ghìyə̀ inug ne chəyi mbi koʼi. 46Mbə̰ mə̀ ya kɔ̀ŋɔ̀ məyi bəd mbe ne bə̀ kɔ̀ŋɔ̀ awən, Ŋwiye kə si nàʼ chùd ane àzən àfàʼì iye? Imbə̀ʼ aŋa ya icheg ne bədtag mbe bə̀ ghìyə̀? 47Mbə̰ mə̀ ya chàʼrà məyi ìmbən məfi, anug ne mbə̰ mbe ghìyə̀ ne che àze ne bəd ndəŋ mbe ghìyə̀ àkə azeg? Imbə̀ʼ à ya icheg ne bəd mbe ne kayi mə̀Ju mbe ghìyə̀? 48Ane, mbə̰ bèrì ni bɔ̀ŋ mànì kwàʼ icheg ne ìwən Mbaʼ ikaŋ àbɔ̀ŋɔ bə bɔ̀ŋ mànì.”
Selectat acum:
Matìyò 5: MBTP
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2019 CABTAL
