ማ̈ቶ̈ሳ 10

ዬሱ̈ሲ ኪ̈ቲ̇ ሚሺኖ ታጶ̇ ናምኢ ሃዋ̈ራታን

ማ̈ርቆ̈ሳ 3፡13-19፤ ሉቃ̈ሳ 6፡12-16

1ዬሱ̈ሲ ፌ ታማ̈ራን ታጶ̇ ናምኣን ጼይጋሪ፥ ኢ̈ታ ኣያ̇ናን ኬሳ̇ምፔ̈ኒ፥ ዱማ ዱማ ዓርጋባር ማዛን ፋምፔ̈ኒ ኢንታ̇ብ ሲልጣ̈ና ኢሚ̇ዴ። 2ታጶ̇ ናምኢ ሃዋ̈ራታን ሱምንዳ̇፦ ቲ̈ኖ̈ዲ ጴ̈ጥሮ̈ሳ ጌዪ ጼይጊንቲ̇ኖ ሲሞ̈ናኬ ኢ ኢሻ ኢንድራ̈ሳ፣ ዛብዶ̈ሳ ናኣ ዓይቆ̈ባኬ ኢ ኢሻ ዋ̈ኒ̇ሳ፣ 3ፊልጶ̈ሳኬ ባርታሎሞ̈ሳ፣ ቶ̈ማ̈ሳኬ ቃራጻ ቃጺሲዛ ማ̈ቶ̈ሳ፣ ኢልፎ̈ሳ ናኣ ኣይቆ̈ባኬ ታ̈ዶ̈ሳ፣ 4ፌ ጋዲምቦ̇ ሚጪንቲ̇ዛ ሲሞ̈ናኬ ዎሃ ዬሱ̈ሳ ኢ ጻላ̈ታንቦ ኣ̈ ኢሚ̇ዛ ዪሁዳ ኣስቆሮ̈ቶ̈ዳ።

5ዬሱ̈ሲ ዪን ታጶ̇ ናምኣን ኪ̈ቲ̇ ሚሺ̈ርዶሪ “ዪንቲ̇ ኣይሁድ ዜር ማ̈ቃ̇ካ̇ዮ ኣሳንኮ ሉካፒ̇ቴ፤ ማ ሳማ̈ራ ካታማ ጋርታ̇ ጌላፒ̇ቴ። 6ዪ̈ፖ̇ ዶሪፌ̈ን ዪኖ ኢስሬ̈ል ዎርዣ̈ኮ ሉኪ̇ብቴ̇። 7ሉካ̇ሪ “ጾ̈ሳ̇̇ ካ̈ቲቲን ኡኪ̇ኔ!” ጌዪሙታ̇ ሳባ̇ኪብቴ̇። 8ማኖን ፋብቴ̇፤ ዓይቂ̇ኖን ዓይቃ ጋርታ̇ፖ̇ ዲንብቴ̇፤ ሹያ ዓርጋባራ ኤ̈ንቲ̇ኖ ኣሳን ፋብቴ̇፤ ኢ̈ታ ኣያ̇ናን ኣሳ ጋልዳፖ̇ ኬሲ̇ብቴ̇፤ ዪኖ̇ ዪንቲ̇ ሜላ̇ ኤኪ̇ኖኮታ̇ቦ ኣሳብ ሜላ̇ ኢሚ̇ብቴ̇። 9ኣባካር ሚ̈ሺ̇ ዪንታ̇ ኪ̈ሳ ጋርታ̇ ኤ̈ፒ̇ቴ። 10ኦ̈ሳ ኦ̈ዝ ና̈ሳ̈ቦ ኢ ሞ̈ዚን ኢማ̇ንዳብ ኮሺ̈ዛኮታ̇ቦ፥ ዪንቲ̇ ሉኪ̇̈ርዶሪ ጎይቦ ጋ̈ሪ ቃርጺሪ̈ታ፣ ኣፊላ ናምኢ፣ ጫ̈ማ̇ ናምኢ፣ ጉፋር ማ̈ቂ̇ን ዪንታ̇ ኩሽታ̇ ኤ̈ፒ̇ቴ።

11ዪንቲ̇ ፔቲ̇ ካታማ ጌላምባ̇ራ ዪንታ̇ ሞካ̇ንዳብ ዶሲዝ ኣሲ ዎኮ ኮያሪ ኢ ኣ̈ል ጌላሪ ካታሚን ኢዞ ኣሻ̇ር ሉኪ̇ዝ ዲራ̈ስ ኢና ዶኢብቴ̇። 12ዪንቲ̇ ኣሳ ኣ̈ል ጌሊ̈ርዶሪ ሳ̈ሮ ጋ̈ር ግርሊብቴ̇፤ 13ኢና ኣ̈ሎ ኣሳ ዪንታ̇ ሞኪ̇ ኤኪ̇ዶኮ፥ ዪንታ̇ ሳሪቲን ኢንታ̇ ዬሎ̇ ጋ̈ቤ፤ ሞኪ̇ ኤካካ̇ይ ኣቴ̇ጌይንዶ ጾ̈ሲ̇ ኣ̈ሊን ኢዞ ኣንጂባ̈ሴ። 14ኦ̈ናካር ዪንታ̇ ሞኪ̇ ኤካ̇ንዳብ ኢጼ̇ጌይንዶ ዎይ ዪንቲ̇ ሶ̈ላዚን ሲስካ̇ብዳ ጌዬጌይንዶ̇፥ ዪንቲ̇ ኣ̈ሊን ኢዝፖ ዎይ ካታሚን ኢዝ ጋርታ̇ፖ̇ ኬስካ̇ምባራ ዪንታ̇ ቶሂን ጋልዶ̇ ቡልኢን ኢና ፊታ̇ሪ ኬስኪ̇ብቴ̇። 15ቴ ዪንታ̇ክ ኪን ጋ̈ሬ፥ ጾ̈ሳ̇̇ ፊርዲዝ ጋላሲ̇ ሶዶ̈ማኬ ጎሞ̈ራ ካታማን ጋልዳ ዬ̈ዝ ፊርዲን ጋልዳፖ̇ ዪና̇ ካታሚን ጋልዳ̇ ዬ̈ዝ ጎይሊን ሺ̈ሬ።

ዬሱ̈ሲ ዬ̈ናፖ̇ ቲ̈ን ሜታኬ ዳስ̇ኬ ዬይሬ

ማ̈ርቆ̈ሳ 13፡3-13፤ ሉቃ̈ሳ 21፡12-17

16“ቴ ዪንታ̇ ዶራንፌ̈ኒ ዬያን ጊዳ̇ ሚሻ̈ሬ፥ ዪ̈ኮታ̇ቦ ዪንቲ̇ ሾ̈ሽፌ̈ኒ ኤጫ ዶላፌ̈ኒ ኣሽካ ማ̈ቂ̇ብቴ̇። 17ኣሳን ዪንታ̇ ኤ̈̇ሪ ፊርዳ ኣ̈ላብ ኣ̈ ኢሚ̇̈ሬ፥ ፌ ዎ̈ሳ ኬ̈ ጋርታ̇ሬ ዪንታ̇ ቡኪ̇̈ሬ፤ ዪ̈ኮታ̇ቦ ዪንቲ̇ ኢንታ̇ ጋልዳፖ̇ ና̈ጊንቲ̇ብቴ። 18ቴኮታ̇ቦ ኣሳን ዪንታ̇ ጋዣን ቲ̈ንኬ ካ̈ቲንታ̇ን ቲ̈ን ፊርዳብ ሺ̈ሺ̈ሬ። ዪኒ̇ባራ ዪንቲ̇ ኢንታ̇ ቲ̈ንኬ ኣይሁዳ ማ̈ቃካ̇ዮ ኣሳን ቲ̈ን ዎይ ታባዝ ማርኪ̇ቲ̈ሬ። 19ዪንቲ̇ ኤ̈ንቲ̇ኖ ጋላሲ̇ “ኑ ኣብዝ ጋ̈ር ሶ̈ላኔ? ኣብዝ ጋ̈ር ማሃኔ?” ጋ̈ሪ ቲ̈ራፒ̇ቴ፤ ዪና̇ ኢዝ ጋላሲ̇ን ዪንቲ̇ ሶ̈ላንዳ̇ብ ኮሻ̇ዚን ዪንታ̇ብ ኢሚ̇ንታ̇ሬ፥ 20ዪንታ̇ባር ማ̈ቃ̇ር ሶ̈ሊዛ̈ዲ ኣፎ ዪንታ̇ ባ̈ባ̈ ኣያ̇ና̈ዲዶኬ ዪንቲ̇ ጊዳካ̇ዬ። 21ኢሻ̈ዳኬ ጌ̈ዳ̈ዳክ ዎልዎልኣ ዓይቃብ ኣ̈ ኢሚ̇̈ሬ፤ ባ̈ባ̈ ፌ ናኣ ዓይቃብ ኣ̈ ኢሚ̇̈ሬ፤ ናኣንሬ ፌ ባ̈ባ̈ ጋልዳኬ ፌ ኢንዲ̇ ጋልዳ̇ ዉጪቲ̈ሬ፥ ማ ኢንታ̇ ዎሲ̈ሬ። 22ዪንቲ̇ ታ̈ና ኣማ̇ናዚንኮታ̇ ኣሲ ዎይ ዪንታ̇ ኢጺ̇̈ሬ፤ ዎቲናካሬ ዉርሲ ዬሊ̇ዝ ዲራ̈ስ ሚ̈ጛር ኤቂ̇ዝ ኣሲ ኢ ፋጺ̈ሬ። 23ዪንታ̇ ፔቲ̇ ካታማ ጋርታፖ ዳካ̇ምባራ ሜላ ካታማ ጋርታ̇ ሉኪ̇ብቴ። ቴ ዪንታ̇ክ ኪን ጋ̈ሬ፥ ቴ ኣሳ ናኣ̈ዲ ማ̈ቃ̇ ዬ̈ዝ ዲራ̈ስ ዪንቲ̇ ኢስሬ̈ላ ጋዶ̇ ካታማን ቢሪንቲ̇ ዉርሲባ̈ሴ። 24ታማ̈ሪዛ̈ዲ ፌ ኣስታማ̈ራፖ̇ ሺባ̈ሴ፤ ኣሽካ̇ራ̈ዲ ፌ ላ̈ፖ̇ ሺባ̈ሴ። 25ታማ̈ራ̈ዲ ፌ ኣስታማራ̈ፌ̈ኒ፥ ኣሽካራ̈ዲ ፌ ላ̈̈ዲፌ̈ኒ ማ̈ቄ̇ጌይንዶ̇ ጊዲ̈ሬ። ኣ̈ል ባ̈ባ “ቡኤ̈ልዜቡ̈ላ” ጌይዶኮ፥ ኢ ኣ̈ሎ ኣሳን ዎዛርፌ̈ኒ ዪ̈ፖ̇ ኢ̈ቲኖ ሱምባር ጼይጊባ̈ሳ!

ኦ̈ብ ኢ̈ጫ̇ንዳብ ኮሺ̈ርኮ

ሉቃ̈ሳ 12፡4-7

26“ዪ̈ኮታ̇ቦ ኢንታ̇ብ ኢ̈ጫፒ̇ቴ፤ ካጚንቲ̇ኖ ባዚ ቃ̈ሪንታ̇ካ̇ይ ኣቲ̇ባ̈ሴ፤ ኣ̈ቺንቲ̇ኖ ባዚ ፋላ̇ ጋልዳ̇ ኬስካካ̇ይ ኣቲ̇ባ̈ሴ። 27ቴ ዪንታ̇ብ ም ጋርታ̇ ሶ̈ሊኖንዶ̇ ዪንቲ̇ ፎኢን ጋልዳ̇ ሶ̈ሊብቴ̇፤ ቴ ዪንታ̇ብ ሳ̈ሲጛር ሶ̈ሊኖንዶ̇ ዪንቲ̇ ሾካ̇ ቤስ̇ ጋል ኤቃ̇ሪ ጴች ሶ̈ሊብቴ̇። 28ኣሳብ ኢ̈ጫፒ̇ቴ። ዎ̈ርኮ ዪንታ̇ ኣይሺ̇ን ዎ̈ርዶኬ ዪንታ̇ ሼምፒ̇ን ዎንዳ̇ብ ዳንዳኢባ̈ሴ፤ ዪንቲ̇ ኢ̈ጫንዳ̇ብ ኮሻ̇ዚንዳ ዎሪ ሼምፒ̇ን ጋ̈ና̇ማ ሚሻንዳ̇ብ ዳንዳኢዛ ጾ̈ሳ̇̇ ሙታ̇። 29ናምኢ ሱ̈ና̇ን ፔቲ̇ ባካ̇ናብ ዎ̈ጚንቲ̇̈ርባያ? ማ̈ቂ̇ናካሬ ኣፋ ዎ ዪንታ̇ ባ̈ባ̈ ጋ̈ካ̇ይ ኣቴ̇ጌይን ሜላ ኣቲ̇ን ኢንታ̇ ጋርታ̇ፖ̇ ፔታ̇ኒንዳ̇ ሜላ̇ ሳ̈ዳ̇ ቶጚንታ̇ ኣታ̇ባሴ። 30ዪንታ̇ ቆሚ̇ን ኢሲንንዳሬ ሜላ ኣቲ̇ን ፔታ̇ን ኣታ̇ካ̇ይዶር ፋይዲንቲ̇ኔ። 31ዪ̈ኮታ̇ቦ ዪንቲ̇ ኢ̈ጫፒ̇ቴ፤ ዎይሊን ሱ̈ናንፖ̇ ዪንቲ̇ ሺ̈ሬ። 32ኣሳ ቲን “ቴ ዬሱ̈ሳዬ” ጋ̈ሪ ማርኪ̇ቲዛ̈ቦ ታ̈ናሬ ኣፋ ዎ ቴ ባ̈ባ̈ ቲ̈ን “ኢ ቴዬ̇” ጋ̈ራ ማርኪታ̈ሬ። 33ኣሳ ቲ̈ን “ቴ ኢያ ኤራባሴ” ጌይዛ ታ̈ናር ኣፋ ዎ ቴ ባ̈ባ̈ ቲ̈ን “ቴ ኢያ ኤራባሴ” ጋ̈ሬ።

34“ቴ ዬይኖንዳ ሳ̈ዝ ጋልዳ ሳሪቲ ኤሄ̈ንዳ̇ብ ጊዳካ̇ዬ ኦል ኤሄ̈ንዳ̇ብዶኬ ሳራቲ ሶ̈ቢሳንዳብ ዬ̈ካ̇ዬ። 35ቴ ዬይኖንዳ “ናኣ ፌ ባ̈ባ̈ ጋልዳፖ፣ ናኢን ፌ ኢንዲ̇ን ጋልዳፖ፣ ማጪ̇ንዶ̇ ኣስና ኢንዲ̈ን ጋልዳፖ̇ ፋጋንዳ̇ቦ። 36ኣሳብ ጻላ̈ቶ ኣ̈ሎ ዳባ̇ ጌ̈ታን ማ̈ቂ̇̈ሬ። 37ታ̈ፖ̇ ሺ ፌ ኢንዲንዶ ዎይ ፌ ባ̈ባ̈ ካዝ ኣሲ ታ̈ብ ማ̈ቃ̇ንዳብ ኮሺ̇ባ̈ሴ፤ ታ̈ፖ̇ ሺ ፌ ናኣ̈ዳ ዎይ ፌ ናኢንዶ ካዝ ኣሲ ታ̈ብ ማ̈ቃ̇ንዳብ ኮሺ̇ባ̈ሴ። 38ታ̈ና ኣማ̇ኒኖኮታ̇ቦ ኢያ ዬሊ̇ዝ ሜታን ቶ̈ካ̇ንዳብ ኮዪባ̈ሶ ኣሲ ቴዪ ማ̈ቃ̇ንዳብ ኮሺ̇ባ̈ሴ። 39ፌ ሼምፒ̇ን ፋንዳብ ኮዪዛ̈ዲ ኢዞ ይሲ̈ሬ፤ ቴ ኮታ̇ብ ፌ ሼምፒ̇ን ኣ̈ ኢሚ̇ዛ̈ዲ ኢዞ ዲጚ̈ሬ። 40“ዪንታ̇ ሞኪ̇ዝ ኣሲ ታ̈ና ሞኪ̇̈ሬ፤ ታ̈ና ሞኪ̇ዝ ኣሲ ማ ታ̈ና ኪታ̇ር ሚሺኖ ታ ባ̈ባ̈ ሞኪ̇̈ሬ። 41ናባ̈ዲ ጾ̈ሳ̇̇ ቃ̈ላ ሶ̈ሊዝ ኣስ ማ̈ቂ̇ኖኮታ̇ቦ ኢያ ሞኪ̇ዝ ኣሲ ጾ̈ሳ̇̇̈ዲ ናባ̈ቦ ጪጋ̇ዝ ዋ̈ጊን ኢ̈ባር ጪጊ̇̈ሬ። ና̈ሳ ጺላ̇̈ዳ ኢ ጾ̈ሳ̇̇ ኣስ ማ̈ቂ̇ኖኮታ̇ቦ ኢያ ፌ ኣ̈ል ሞኪ̇ዝ ኣሳቦ ጾ̈ሲ̇ ና̈ሳ ጺላ̇ቦ ጪጋ̇ዝ ዋ̈ጊን ኢ̈ባር ጭጊ̇̈ሬ። 42ዪ̈ኮታ̇ቦ ቴ ዪንታ̇ክ ኪን ጋ̈ሬ ኦ̈ና̈ካር ኣሲ ዓን ቴ ታማ̈ራን ጊላ̇ን ጋርታ̇ፖ̇ ፔታ̇ና̈ቦ ኢ ቴ ታማ̈ሪ ማ̈ቂ̇ኖኮታ̇ቦ ሜላ ኣቲ̇ን ፔቲ̇ ቡርጩ̇ካ̇ ኢርጻ ዋ̈ ኡሺ̇ኖ ኣሳቦ ጾ̈ሲ̇ ኢ ዋጊን ኢ̈ብ ኢማ̇ካ̇ይ ኣቲ̇ባ̈ሴ።

Selectat acum:

ማ̈ቶ̈ሳ 10: ኦጫ̈ቃማ

Evidențiere

Partajează

Copiază