मत्ति 2

ग्यानि लोकुरक हेरोदेस राजाना हेरे

1हेरोदेस राजाना काळदे यहुदियाता बेतलहेम सहेरतिगा येसुना जनमा आतु असके पूरव दिशातिकेडाल हुकोंगता बारेता सोबाय पुन्तोरक हुचुलोर ग्यानि लोकुरक येरुसलेमतिगा वातुरक, 2“यहुदियातोर राजाल आस जनम आतोर बगा मन्तोर? माक ओर जनम आतुर इदाम तोहान्ता ओद हुको पूरव दिसाते हुळस ओन आरादना कियालाय वातोरोम” इन्जोर पुच्चेमातुर। 3हेरोदेस राजाल इद केन्जुन ओनासंग येरुसलेमतोर सबोय लोकुरक पकाय चिन्ता आतुरक। 4असके ओर लोकुरा सबोय मुक्याल याजक अनि मूसाना नियमतुन करिहवालोरकुन उन्दि जागा केयस, “मसिना जनम बगा आयिला पहाजे?” इन्जोर ओरकुन पुच्चेमातुर। 5ओरक ओन इतुर, “यहुदियाता बेतलहेम सहेरतिगाय मन्ता” इन्जोर इतुर। 6बाक्याकि परमेस्वरना पोल्लो वेहवालोरा द्वारा,

“हे यहुदि प्रदेशता बेतलहेम, यहुदि प्रदेशता दुसरो सहेरताल निमा बाताले हुडलोर हिलवि,

नियागाडाल वरोर राजाल पसियानुर, ओर नावोर इस्रायेल लोकुरकुन केपानुर#मीखा ५:२”

इन्जोर कोटता मन्ता।

7असके हेरोदेस राजाल पूरव देशताल वातोर ओर ग्यानि लोकुरकुन मकस केयसुन ओद हुको बोद बेरा दिसतु इन्जोर ओरकुन पुच्चेमास समजेमातुर। 8असके ओरकुन बेतलहेम सहेरतिगा इदाम इन्ज लोहतुर, “हन्ट, ओर नोनाना बारेते सोबाय मालुम किम्ट, अनि ओन हापळेमायनुर ते नाकुन समाचार हिम्ट बाक्याकि नना वने हन्ज ओन नमस्कार कियाका” इन्जोर ओरकुन इतुर।

9राजाना पोल्लो केन्जुन ओरक हतुरक; अनि ओरक पूरव दिशातिके हुळस मतोर ओद हुको नोनाल बगा मतोर ओद जागातिगा अवस रोमनावनाह ओरा मुने मुने हन्जोर मता, 10ओद हुको रोमतु इन्जोर हुळस ओरक पकाय गिरदा आतुरक। 11ओरक ओद लोन अवस ओर नोनान ओना अवहारि मरियमनासंगे हुळतुरक अनि ओरक नोनाना काल अरस ओना आरादना कितुरक, अनि ओरक आप-आपुना पकायि किमति चिज इराना डब्बा तरियस ओन सोनो, लोबान अनि दयमुर नियता भेट हितुरक#२:११ सोनो, लोबान अनि दयमुर नियता भेट केवल राजा लोकुरकुन हिन्तोर।। 12मति ओरक मल्स हेरोदेसना हेरे हन्माकिर इन्जोर परमेस्वर उन्दि कनिष्कानते ओरकुन सावदान कितुर असके ओरक दुसरो हरिते आपुना देशते हतुरक।

यूसुफिन लोतोरक मिस्रि देशतिगा मकस वितिन्तोरक

13पूरव दिसाताल वातोरक ओर ग्यानि लोकुरक हतुरक असके पजा प्रबुनोर वरोर दूत यूसुफिन कनिष्कानबेरा दिस ओन इतुर, “तेदा, ओर नोनान अनि ओना अवहारिन पयस मिस्रि देशतिगा मकस हन अनि अगा मन्ट, अनि नना वेहवाय निमाट मलस वायमाट बाक्याकि हेरोदेस ओर नोनान हव्कान साटि पळकानुर।”

14असके ओर नरकाय तेदच नोनान अनि ओना अवहारिन पयस मिस्रि देशतिगा हतुर। 15अनि हेरोदेसना हायानवनाह अगाय मतुरक। “नना आपुना मरिन मिस्रि देशताल केयस ततान#होशे ११:१” इदाम प्रबु परमेस्वरना पोल्लो वेहवालोरा द्वारा इन्ज मतोर ओद पोल्लो पुरा आयि इन्जोर इदाम आत।

16अनि ग्यानि लोकुरक ओनासंग दोखा कितोर इदाम हेरोदेस राजाल समजेमास ओर पकाय होंग आतुर, अनि ग्यानि लोकुरकुन पुच्चेमास समजेमातोर ओद बेराता अनुसार रन्ड वरसातोर या रन्ड वरसाताल हुडलोर मतोर सबोय नोनान बेतलहेम अनि अदेना हेरे गुरेटांग सबोय नाटेनिगा लोकुरकुन लोहच हव्कस वाटतुर।

17“रामाहतिगा उन्दि लेंग केन्जतुरक,

दुःख अनि पकाय जोरदा किलाना लेंग,

राहेल आपुना पेकोरक साटि किलिन्द,

अनि अदेना सबोय पेकोरक हास मतोरक इन्जोर

अदेन शान्ततुन येताना इच्चा हिले आसि#यिर ३१:१५”

18इदाम परमेस्वरना पोल्लो वेहवाल यिर्मयाहना द्वारा इन्ज मतोर ओद पोल्लो पुरा आत।

यूसुफना लोतोरक मिस्रदेसताल मल्स वान्तोरक

19मति हेरोदेस हातपा पजा, प्रबुनोर दूत मिस्रि देशतिगा यूसुफिन कनिष्कानते दिसतुर, 20“नोनान हव्काना इच्चा किन्दुर ओर हातुर इन्जोर निमा तेदा, नोनान अनि ओना अवहारिन पयस इस्रायेल देशतिगा हन” इन्जोर इतुर। 21ओर तेदितुर नोनाल अनि ओना अवहारिनसंग इस्रायेल देशतिगा मलस वातुर। 22मति यहुदिया प्रदेशतिगा अरखिलावुस आपुनोर बाबो हेरोदेसना जागा राज कियाला आतोर इन्जोर केन्जुन अगा हन्दान साटि वरियतुर, कनिष्कानते परमेस्वरताल चेतावनि पुटिहिच गलील प्रदेशतिगा हतुर। 23अनि “ओन नासरि इन्दानुर” इदाम परमेस्वरना पोल्लो वेहवालोरा पोल्लो पुरा आयि इन्जोर ओरक नासरत पोरोयता प्रदेशतिगा हन्ज मन्दिला लागतुरक#मर १:२४; लूका २:३९; युह १:४५।

Selectat acum:

मत्ति 2: fmu

Evidențiere

Partajează

Copiază