Markus 13
13
Isus Nafoyung sabaliwa at Fakatabuan fag ngay Menit
Mt 24:1-14; Lk 21:5-11
1Gina Isus nalo wan siginans Dius at bale, at sadi at tagadal nalong anya te, “Takamoyung, damai. At kasine in fag ngay gang at fangawat Dius at bale.”
2Ay Isus glong anya te, “O glag o kafag ngay bale ayu daul? Abandi ban we gang ya gtudtungudan. Fagayu ban umrasras wan.”
3Gina Isus malunggung sis Buksul Ulibu sis aturunan Dius at bale, ay gina yud sanya tibak taw, Pedru, Santiagu, Uan ay Andres ginto sas Isus te, 4“Foyungi emi, seduge ban nu kafasludan takatanya, ay setain ban nu saful ami te, gakafasludanun wan.”
5Ay Isus gfasigad gfoyung te, “Mataganani tua laman diam gadayan nusnga sinu. 6Aroro ngayu bank taw kadasug ay glong te, ‘Au wan Dius at nafili fag Fun’#13:6 Dius at nafili fag Fun: sas Griegu, Au wan. ay gdaya ban ngayuk taw. 7Ay dewa ban am nadungug ngay awayan at munakbang si ayu, ay e dungganan am te, e gawayan ngayayu, lag kalimu. Matuyan, umfasludan ban takatanya, dewa katanya, bunya kanya at fakatabuan fag ngay menit. 8Aroro tibak talun ban at ngay taw at fagfawayanun tiba yangayk talun at ngay taw. Ay sik fun at ngay taw gfawayan yangay ban sik fun at ngay taw, ay sa ban tibak talun e faleleg ay maksvn nu malunus. Takatanya fagayu famasigad takadasug fag ngay fagidapun, kata sik mangena nu gidapan gina gafasalugun.
9“Mataganani ay sadili, aroro e tumaban ban ayu sas taw Udyu at ngay fagtainan ay e namalang ban ayu sa sangay bale fakafulan, ay nanalubang ban am ngay afud talun at ngay fun sirut ay sat ngay fun at daga salubangan aroro gafanud am sa angku. Ay ginanya ban mafafamoyung am sabaliwa angku. 10Ay nu gakafasludanun wan takatanya, famoyungi yap at Masine fag Barita sas fagayu talun. 11Ay e namasalubang ban ayu sa sangay fun laman nanginsaful te, o e asalanan am. Ay ginanya ban fag menit, lag am gafanawa sabaliwa ay fagnanlongun. Aroro ginanya ban e gfamatanganan ayu sik longan at masine, laman mafafoyung tuam sanya fag ngay taw. Aroro bunwa ban am tagaringang, nu bunway at Masine tua fag Falad. 12Ay sik taw ban nantaban at faduksay sa tibak taw laman namabul. Ay katanya yangay ban sik mama at fakamulun sat sisian. Ay sik sisian ban kamabo at fagtainan laman namabul. 13Ay ginanya ban fag ngay menit, fagayu ban taw kauri ayu, aroro gafanud am sa angku. Ay dewa katanya at namabakvd sat fagafanudun sitsigons fakatabuan umlangfe tua ban.
Tagfayud e Masuad Dius at Bale
Mt 24:15-28; Lk 21:20-24
14“Ay lumag ban am at maksvn fag mauri tagfayud e masuad Dius at bale, ay kanya ban malindug sat yud matuyan fag faglindugan. (Nusnga sinu tagtap tuy fag longan, atogdungugi.) Ginanya ban, fagayu taw tagsis talun Udea lagyui wan sa sangay buksul. 15Sik taw tagsit tungud bale, nu natustus, lag gsakbo ya sat bale laman namul nusnge wain. 16Ay sik taw tagsit gamasun, lag guli ya sat bale laman namul at lanbung. 17Ay ginanya ban fag ngay menit, afanyuan ngay tagfafion ay anggan at ke fagfasusuun. 18Darangini te, kafag ngay menit bunwa sis abagat, 19aroro ginanya ban fag ngay menit, maksvn takadasug fag faurianan, gtungud yay fagayu faurianan siginan Dius nu kawat fagdaul daga dasug katsi, ay wa ban e gtungud ya. 20Ay tam Fun nu dway ban nafagud kanya fag buknga, wa ban e gleleg ya. Ay dewa katanya, aroro kesug tua at nafili fag ngay taw, gfagud way ban ginanya fag buknga.
21“Ay ginanya ban, dewa e nalong ayu te, ‘Iste wan, Dius at nafili fag Fun,’#13:21 Dius at nafili fag Fun: sas Griegu, Kristu. Anggan t.22. ay dewa e nalong te, ‘Sanya wan,’ lag gafanud. 22E kadasug ban ay kamuag te, ‘Au wan Dius at nafili fag Fun,’ ay ‘Au wan at sadi Dius at taglong.’ Ay kanya ban namalag at madulo ay at mabalyanan fag ngay fakamulun, laman nanfamaskudan nanfandaya anggan Dius at nafili fag ngay taw. 23Ay mataganani tua, katsi nafararang kwan sa ayu takadasug ban fagayu.
Taw at Baguama nu Kadasug Ban
Mt 24:29-31; Lk 21:25-28
24“Ginanya ban fag ngay menit, nu nlangfe wan kafag faurianan,
‘menit ban umdulum,
ay magdanun wa gyamag ya,
25ay anggan ban ngay galeme katong siginans banwa,
ay fagayu ke fagmabalyananun sis banwa muigan.’#13:25 Isayas 13:10.
26Ay nu ntabu wan takatanya, fagayu taw lumag angku, Taw at Baguama, nu kadasug siginan sad linyabu, e fagmabalyananun au, ay e fagmasineun. 27Ay gsugu kban ku ngay tagbarita laman namaful ku nafili fag ngay taw siginans fagayu talun, ay dewa ndaginan fag fungfung daga.
Isus at Faydayuanan sabaliwas Malagu
Mt 24:32-35; Lk 21:29-33
28“Amatangani ku faydayuanan sabaliwas malagu. At sanga nu maragbuk wan, ay at don nu karabas wan, saful wam te, gakamanguneun wan. 29Katanya yangay nu lumag ban am ku longan aro nu kafasludan, sumaful wam te, au, Taw at Baguama, munakbang wan nu kadasug au. 30Matuyan nu glong au ayu te, katsi fag ngay taw tiba ya kabul yakmay ban anfasludan fagayu ku longan. 31Banwa ay daga kalyam way ban, dewa katanya, ku longan ban sanya tua gugat kabavn.
We Taw Saful te, Ginain Ban Taw at Baguama nu Kadasug
Mt 24:36,42-44, 25:13; Lk 12:35-40
32“We taw nasaful te, ginanya ban fag menit ay fag buknga nu kafoli au. Anggan Dius at ngay tagbarita sis banwa wa yangay nasaful. Ay au oma, Dius at Baguama, kwa nasaful. Ku Mama way lang tagsaful. 33Mataganani tua gugat ay mafuloani, aroro wam nasaful te, ginanya nu kadasug au. 34Kata sik taw tagaloun sa tangayayu fag talun. Kanya naubun at bale ay nafaalaga at ramraman ay nafae fakamulun at ngay fagsuguan. Ay kanya nasugu at tagulit sakbawan bale, laman gulit tua fia. 35Nu katanya, mafalganani tua gugat, aroro wam nasaful te, ginain ban tagbilug bale nu guli. Malgau kanya nu kadasug sas fafun, ay swabilug yabi, ay gakamenitun, ay mannga sbalabag. 36Mataganani, laman dewa ndasug masakit, nu glag ayu diam gtiug. 37Nu katanya, glong au sa ayu ay sas fagayu te, mafalganani.”
Selectat acum:
Markus 13: OCCT
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Copyright © 2021 by OMF International, Philippines
