MATIYO 4
4
Sutana bɛ Yezu nigɛ ka dɛsɛ
(Mar 1.12-13; Luka 4.1-13)
1O kɔ, Nii Senuman y'a to Yezu taara kongo kɔnɔ janko Sutana k'a nigɛ. 2Yezu ye tile bi naani ni suu bi naani kɛ a ma dumuni kɛ, kɔngɔ y'a minɛ. 3Sutana gwɛrɛla a la k'a fɔ a ye ko: “N'i ye Ala Deen ye, a fɔ ko kabakuru nunu ka yɛlɛma ka kɛ buru ye.” 4Yezu y'a jaabi ko: “A fɔra Ala ka kuma na ko: ‘Mɔgɔ tɛna balo ni dumunifɛn dama ye, a bɛ balo ni Ala ka kuma fana ye.’ ” 5O kɔ, Zeruzalɛmu min ye dugu senuman ye, Sutana taara n'a ye o kɔnɔ k'a bila Alabatosoba kuun na 6k'a fɔ a ye ko: “N'i ye Ala Dencɛ ye, pan ka cun bari a fɔra Ala ka kuma na ko: ‘Ala bɛn'a fɔ a ka mɛlɛkɛw ye ko u k'i ta u bolo la janko i seen kana mandimi kabakuru la.’ ” 7Yezu y'a fɔ a ye ko: “A fɔra Ala ka kuma na fana ko: ‘I kana i Matigi Ala kɔrɔbɔ.’ ” 8O kɔ, Sutana taara n'a ye kulu jamanjan dɔ kan ka dinyɛ n'a kɔnɔnafɛnw bɛɛ yira a la, 9k'a fɔ a ye ko: “N'i y'i kunbiri gwan ne kɔrɔ ka ne bato, ne bɛna nunu bɛɛ d'i ma.” 10Yezu y'a fɔ a ye ko: “Taa ka bɔ yan Sutana, bari a fɔra Ala ka kuma na ko: ‘E k'i Matigi Ala bato k'ale kelenpe sago kɛ.’ ” 11O tuma na, Sutana taara k'a to yen. Mɛlɛkɛ dɔw nan'a mako nya.
Yezu b'a ka waajuli daminɛ Galile mara la
(Mar 1.14-15; Luka 4.14-15)
12Yezu y'a mɛn tuma min na ko Zan donna kaso la, a taara Galile mara la. 13Nga a ma sigi Nazarɛti, a taara sigi Kafaranamu Galile baa daa la Zabulɔn ni Nɛfutali mara la. 14A taara sigi o yɔrɔ la janko kira Ezayi ye min fɔ, o ka kɛ. A tun ko:
15“Zabulɔn ni Nɛfutali mara mɔgɔw,
kɔgɔji faan mara mɔgɔw,
Zurudɛn baa kɔfɛ mara mɔgɔw
Galile mara lonanw,
16jama min siginin bɛ dibi la,
yeelenba bɔra u ye.
Alalɔnbali minw siginin bɛ dibiba la
yeelen bɔra u ye.”
17Kabini o tuma, Yezu y'a daminɛ ka waajuli kɛ. A tun b'a fɔ mɔgɔw ye ko: “Aw ye nimisa ka faran aw ka kojuguw la bari Sankolo tigi ka masaya waati surunyana.”
Yezu kɔnna ka kalanden naani minw wele
(Mar 1.16-20; Luka 5.1-11)
18Yezu yaalayaalatɔ Galile baa daa la, a ye balimacɛ fila dɔ ye. Simɔn min tɔgɔ ko Piyɛri fana, a n'a dɔgɔcɛ Andere tun lo. U tun bɛ jɔɔ filila baji la bari u tun ye mɔnikɛlaw ye. 19Yezu y'a fɔ u ye ko: “Aw ka tugu ne kɔ. Aw bɛ baa mɔ cogo min na, ne bɛna aw kɛ dinyɛ mɔlaw ye ten ka mɔgɔw sɔrɔ Ala ye.” 20O yɔrɔnin kelen, u y'u ka jɔɔw to yen ka tugu a kɔ. 21A taara nyafɛ tugu, a ye balimacɛ fila wɛrɛ ye, olu tun ye Zebede ka deenw ye, Zaki n'a dɔgɔcɛ Zan. U tun b'u ka jɔɔw lalagara kurun kɔnɔ n'u facɛ Zebede ye. Yezu y'u wele. 22O yɔrɔnin bɛ, u ye kurun n'u facɛ to yen ka tugu Yezu kɔ.
Yezu bɛ mɔgɔw kalan ka banabagatɔw kɛnɛya
(Mar 1.39; Luka 4.44; 6.17-18)
23Yezu tun bɛ Galile mara bɛɛ yaala ka mɔgɔw kalan u ka Alabatosow kɔnɔ. A tun bɛ sankolo tigi ka masaya kibaru diman fɔ u ye. A tun bɛ banabagatɔ sifa bɛɛ kɛnɛya. 24Yezu tɔgɔ bɔra u ka mara bɛɛ la fɔɔ ka taa se Siri jamana na. O la, mɔgɔw tun bɛ ta'a sɛgɛrɛ n'u ka banabagatɔw bɛɛ ye: jinatɔw, ni kirikirimasinyɛtɔw ani nanbaranw tun bɛ yen, Yezu tun b'u kɛnɛya. 25Jamaba tugura Yezu nɔɔ fɛ. U dɔw bɔra Galile mara la, dɔw bɔra Dugu Tan mara la, dɔw fana bɔra Zude mara la. Zurudɛn baa kɔfɛ mɔgɔw ni Zeruzalɛmukaw tun bɛ yen fana.
Selectat acum:
MATIYO 4: JULNT94
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Jula New Testament © Bible Society of Burkina Faso, 1994.
