Judit 9
9
Judit mi' pejkañ Lak Ch'ujutat
1Judit tsi' ñokchoko ibä ti lum, tsi' p'ujp'u täñil k'ajk ti ipam ijol yik'ot tsi' läpä jiñi jaykexambä ipislel, jiñäch che'bä ti yorajlel woli ipulbeñtel imajtañ jiñi Lak Yum ya' ti Jerusalén. Che' jiñi tsa' kaji ipejkañ Lak Ch'ujutat, tsi' yälä:
2«¡Kyum kcha'añ!
Ch'ujutatetbä cha'añ kñojte'el Simeón.
Jatet tsa'bä awäk'e ik'extañ joñtolil ti' itojlel
jiñi xjoñtolo'bä wiñikob
che'bä tsi' pajch'iyob jiñi xch'okbä x-ixik ik'aba' Dina.
Jiñob ma'añik tsi' ch'ujbiyob axik'ojel
ixku tsi' cha'leyob chuki joñtol ti' itojlel Dina
che' tsi' joch'beyob ipislel cha'añ mi ipajch'iñob.
3»Jiñob tsi' its'ots'piyob yik'ot tsi' ipajch'iyob jiñi Dina,
jiñ cha'añ ti ikaj imulil tsi' itajayob ichämel
ya' baki tsi' cha'leyob ijoñtolil.
Che' jiñi jatet Kyum tsa' awäk'äyob ti chämel
iyumälob jiñi ñajtbä tilemob.
»Jatet tsa' alaj jisa jiñi wiñikob x-ixikob,
temel yik'ot iyaj e'telob icha'añob,
¡Jiñi ñuko'bä tsa' chämiyob
ya' ti ibuchlib cha'añ yumäl!
4Jatet tsa' awu'bi ik'ajtiya iyerañob Dina;
jatet tsa' abi'le jiñi joñtolil tsa'bä iyilayob
che' tsi' k'eleyob che' pajch'ibil ichich.
Jatet tsa' awäk'ä ti majtañ e'tel
iyijñamob yik'ot iyalobilob jiñi xjoñtolilob,
yik'ot tsa' awäk'ä ti itojlel iyerañob xDina
pejtelel ichu'bä añäl jiñi xjoñtolo'bä wiñikob.
»¡Kyum kcha'añ, ñäch'tañ jk'ajtiya!
¡Jiñäch ik'ajtiya juñtikil xme'ba' ixik!
5Añäch ti ak'äb pejtelel chuki tsa'bä ujti wajali,
chuki woli iyujtel wäle yik'ot chuki maxto ujtemik.
Jatet awujil pejtelel chuki mi' kajel,
¡Ma'añik chuki mi' mejlel iyujtel
mi' ma'añik ma' wäk' at'añ!
6Kojach yom aña'tañ, che' jiñi ti isujm mi' yujtel.
Wäñ ña'täbilix acha'añ chuki ma' akaj amel.
7»¡Kyum kcha'añ,
k'ele bajche' mi' chañ-esañob ibä jiñi asiriojob!
Ñukob ipusik'al cha'añ ka'bäl jiñi xk'ächälo'bä jisayajob icha'añob,
mi' chañ-esañob ibä cha'añ ich'ejlel ijisayajob.
mi' xuk'chokoñob ipusik'al
cha'añ jasäljach iye'tijibtak cha'añ jisaya cha'añ mi' tuch'tañoñlaj.
»¡Ma'añik mi ña'tañob cha'añ jatetjach
ma' alaj mäl pejtelel jisaya!
8»Ak'aba' jiñäch Yumäl cha'añ pañämil;
¡Päsä añuklel yik'ot ju'säbeñ ip'ätälel asiriojob!
¡Mich'esañ abä yik'otob!
¡Laj jisañ iñuklel!
¡Jiñob ts'a' mi' k'elob it'ojlel awotot!
Woli iña'tañob ijisañob aCh'ujulbä ajñibäl
yik'ot yom ijemob jiñi ach'ujulbä we'te'.
9¡K'ele bajche' mi' chañ-esañob ibä!
¡Choko tilel jiñi tojmulil ti' itojlelob!
»Joñoñ xme'ba' x-ixikoñ jach,
¡Ak'eñoñ kp'ätälel
cha'añ mik cha'leñ chuki wolik kña'tañ!
10Ak'eñoñ kña'täbäl cha'añ mik lotiñob ti kt'añ
yik'ot cha'añ mi jkäk'eñ itoj mulil
jiñi yumäl temel yik'ot iyaj et'elob.
¡La' ajñikoñ che' bajche' jiñi ye'tijib
cha'añ mi kisabeñ iñuklel!
11»Mach ya'ik añ jiñi ap'ätälel
ya' baki much'ulob bajk'äl xjisayajob;
Mach ya'ik añ jiñi ap'ätälel
ti' itojlel jiñi ch'ejlbä xjisayajob.
Ich'ujutatet jiñi utso'bä ipusik'alob,
jiñi xkoltaya jiñi machbä ch'ejlobik,
iyaj käñtayajet jiñi machbä mejl ikoltañ ibä.
Jatet ma' chäñ käñtañ jiñi chokbilobixbä
yik'ot ma' chäñ koltañ jiñi ch'ijiyemo'bä ipusik'al.
12»¡iCh'ujutatet jiñi ktat yik'ot kpi'älob!
¡Ch'ujutatetbä cha'añ pañchañ yik'ot pañämil!
Jatet tsa' amele kolem ñajbtak
iyumet pejtelel chukitak añ,
¡U'biñ ili wokol kt'añ!
13Yom ma' wäk'eñoñ jiñi tsajbä t'añ
cha'añ mik lotiñob yik'ot cha'añ mik tuch'tañob
majki wolibä iña'tañob ijisañ jiñi tejklum Israel,
yik'ot majki yomob ijemob ach'ujulbä ajñibäl,
yik'ot yomob ilaj jisañob jiñi Jerusalén,
ilumal jiñi atejklum.
14Yom ma' päs ap'ätälel
ti' itojlel pejtelel yumäñtelob ti' joytälel pañämil,
la' ikäñetob cha'añ jatet jach jiñi kojachbä
yik'ot jiñi k'ax ñukbä Ch'ujutatäl.
¡Jatet jach jiñi xkäñtaya cha'añ israelitajob!»
Selectat acum:
Judit 9: CholDc
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Biblia Chol de estudio con DC- Derechos reservados por SBM