Judit 2
2
Jiñi Nabucodonosor mi' ts'äktesañ it'añ
1-2Che' ti kajibal jiñi waxäklujump'ejl ja'b cha'añbä iyumäñtel, jiñi yumäl Nabucodonosor tsi' päyä tilel jiñi ñukbä iyaj e'telob icha'añ. Tsi' su'beyob cha'añ bajche' yom ijisañ jiñi tejklum machbä añik tsi' kolta che' bakibä k'iñ tsa' ujti jiñi jisaya. Jiñi yumäl tsi' tsiktesa ja'el chuki chajpäbilbä icha'añ, cha'añ mi' ijisäñob jiñi tejklumtak. 3Che' jiñi, pejtelel jiñi ñukbä x-e'telob tsi' laj jak'beyob it'añ jiñi yumäl.
4Che'bä tsa' ujti jiñi tempabä, jiñi yumäl Nabucodonosor tsi' päyä tilel iyum xjisayajob ik'aba' Holofernes, jiñäch juñtikil wiñik ñukbä ik'äjñibal ya' ti yumäñtel. Che'bä tsa' k'oti jiñi Holofernes, jiñi yumäl tsi' isu'be:
5«Joñoñäch jiñi ñukbä yumäl, iyumoñ ipejtelel pañämil, yik'ot iliyi jiñäch xik'oñel kcha'añ. Kom cha'añ ma' se'b sajkañ jo'lujunpijk (120,000) xjisayajob año'bä ka'bäl ip'ätälel yik'ot cha'pijk (16,000) wiñikob yujilo'bä k'ächtäñtel kawayu'. 6Yom ma' majlel cha'añ ma' jisañob jiñi wiñikob año'bä ti' bäjlibal k'iñ, jiñäch machbä añik tsi' ikoltayoñob. 7Ka'bäl kmich'ajel ti' tojlelob. Yom ma' wersa su'beñob cha'añ mi' iyäktañob che' yomob ikoltañob ibä, mi' mach yomob ijak'ob jiñi kt'añ, mi kaj laj jisañob. Päsbeñob cha'añ mi' ik'elob ti' iwut che' ka'bäläch kcha'añ jiñi xjisayajob. ¡Ka'bälob cha'añ mux imejlel ilaj but' jiñi pañämil ti xjisayajob, yik'ot muk'ix ich'ämob ti' itojlelob! 8Mi' mach yomobik iyäk'ob ibä, mi' kaj ti bujt'el ti chämeño'bixbä jiñi joktältak, yik'ot mi' kaj iyäk'ob ti pajmel jiñi kolem jajpa' yik'ot alä jajpa'. 9Jiñi mu'tobä ikäytälob mi kaj ichojkelob lok'el ti' iyotot yik'ot mi kaj ikäjchelob majlel ti ñajtbä lum.
10»Yom ma' lok'el majlel wäle ti se'b cha'añ ma' laj ch'ämbeñob jiñi tejklumtak ti jk'aba'. Mi uts'at tsi' yäk'äyob ibä ti ktojlel, ma'añik chuki ma' atumbeñob. Pijtañoñ jiñto mij k'otel cha'añ joñoñ mij käk'ob ti toj mulil. 11Ixku mi mach yomob iyäk'ob ibä, mi juñtikil yom mi' ap'uñtañ. tsäñsañob yik'ot yom ma' laj chilbeñob pejtelel chukitak añ icha'añob, mach amel awutslel ti' tojlelob. 12¡Ti isujm mik su'beñet, ti' kaj jkuxtälel yik'ot yumäñtel cha'añ mi kaj klaj jisañob ti jk'äb!
13»¡Jatet yom ma' cha'leñ pejtelel chuki tsa'bä ksu'beyet, yik'ot yom se' ma' ajak' ili kt'añ!»
14Jiñi Holofernes tsa' lok'i majlel ya' ti iyotot jiñi yumäl yik'ot tsi' bäk' tempayob iyumob xjisayajob. 15Che'äch bajche' tsi xik'i ti' tojlel jiñi yumäl, tsi' iyajka jo'lujunpijk (120,000) jiñi wiñikob cha'añ tsäñsaya yik'ot uxpijk (16,000) jiñi wiñikob k'ächälo'bä ti kawayu' yujilo'bä ik'äñol jiñi jaläjptak. 16Tsa' kaji ichajpañob cha'añ mi' majlelob ti tsäñsaya. 17Jiñi Holofernes tsa' kaji itempañ majlel ka'bäl kameyotak yik'ot jiñi burrotak yik'ot jiñi mulatak cha'añ mu'bä ikuch majlel kuchijel. Che' ja'el tsi' mäñä ka'bäl täñäme', yik'ot wakaxtak cha'añ mi' k'uxob xtsäñsayajob icha'añ. 18Ti jujuñtikil jiñi wiñikob tsa' ch'ämbeñtiyob majlel ka'bäl chuki mi' k'uxob yik'ot tsi' lok'o ka'bäl k'äñlemañbä yik'ot säklemañbä tak'iñ ya' ti kolembä iyajñib itak'iñ icha'añ jiñi yumäl, cha'añ mi' k'äjñel ya' baki woli imajlelob.
19-21Che' ya'to añ jiñi yumäl Nabucodonosor ya' ti Nínive, ñaxañ tsa' lok'i majlel jiñi Holofernes. Tsi' ña'ta yik'ot iyaj jisayajob ilaj mäktañob jiñi lum ya'bä añ ti' bäjlibal. Ti' ipat jiñi xjisayajob tsa' majliyob ja'el bajk'äl wiñikob x-ixikob, lajal che' bajche' ka'bäl jiñi xk'ajbalsajk' yik'ot jiñi jajtak. Mach tsikilik jaytikilob ya' majlelob, kome lajalo'bäch che' bajche' ji'il ambä ti iti' kolem ñajb machbä mejlik ti tsijkel.
Che' ñumeñix uxp'ejl k'iñ ilok'elob majlel ya' ti Nínive, tsa' k'otiyob ti kolem joktäl ik'aba' Bectilet. Ya'i tsa' majliyob ya' ti wits ambä ti' itojlel Cicilia ti chañelal, baki tsa' imeleyob ilejchempat. 22Ya'i jiñi Holofernes tsi' chäkä k'ele jiñi ñukbä xjisayajob k'äläl ya' ti witstak. 23Tsi' laj jemeyob jiñi tejklum ik'aba' Fud yik'ot Lud, che' ja'el tsi' jisayob jiñi chumulo'bä ya' ti Rasís. Yik'ot tsi' ilaj chilbeyob ichu'bä añäl jiñi ismaelitajob, año'bä ya' ti iye'bal Queleón, ya' ti ti' tikiñbä lum.
24Ti wi'il Holofernes temel yik'ot ijisayajob tsa' k'axiyob majlel ya' ti ñoj ja' ik'aba' Eufrates, yik'ot tsi' xäñäyob jiñi lumal ik'aba Mesopotamia. Tsi' laj jemeyob jiñi ts'ajkäbilbä tejklumtak ambä ya' ti Abrona ja' k'äläl ya' ti jiñi kolem ñajb ik'aba' Mediterráneo. 25Che' jiñi tsi' laj ch'ämäyob jiñi ilumal Cilicia, yik'ot tsi' laj jisayob jiñi tsa'bä iloñ chañ-esayob ibä ti' itojlel. Che' jiñi tsa' k'axiyob ti ti' jiñi ilumal Jafet, ya' ti lok'ibal ik', ti' itojlel jiñi Arabia, 26tsi' joy mäktayob jiñi madianitajob yik'ot tsi' laj pulbeyob ipäk'äbältak yik'ot tsi' ilaj ch'ämbeyob iwakaxtak.
27Che' jiñi tsa' ju'biyob majlel ti joktäl icha'añbä Damasco, che' ti ik'iñilelix itempäñtel iwut trigo. Tsi' laj pulbeyob jiñi päk'äbältak yik'ot tsi' ilaj tsäñsäbeyob itäñäme'tak yik'ot iwakaxtak. Tsi' xujch'iyob chuki añ icha'añ tejklumtak yik'ot tsi' laj tsäñsayob pejtelel ch'itoñob.
28Che'bä tsi' yu'biyob pejtelel iliyi, jiñi xchumtälob ya' ti iti' kolem ñajb ik'aba' Mediterráneo, jiñi tejklumtak ik'aba' Sidón, Tiro, Oquiná, Jabnia, Asdod, Ascalón yik'ot Sur, tsa' kajiyob ti weñ bäk'eñ.
Selectat acum:
Judit 2: CholDc
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Biblia Chol de estudio con DC- Derechos reservados por SBM