Matiye 14

Muutti Yaaya ma batasayya giimi

(Elloŋ Mark 6.14-29, Lik 9.7-9, 3.19-20)

1Oko wikinne kaaka pa ga Erod#14.1 Erod pa, gu kolaa goo Erod Antipas., ma hekemeyyica kiɗa ta Galilee, giyye kadar gu giimi beneyya ma gaartee Iisa. 2Gaa beneyyiyyoo oko gimtee ku karaayiti gaa: «Gimu keeke ay Yaaya ma batasayya giimi. Gata naɗe min muuti, ay ɗakko appe ga lekkiɗo gudirane ta liyaawi gaari ku ajjibiti.»

3-4A gata pa Erod beneyyiya keeke asan ga moyaa baŋ ga deyya Yaaya gaa me. Mutti Yaaya pa deero aleŋ keeke: Erod cawwica Erodiyad ma ay daatti sinti kee Pilip. Gaa Yaaya beneyyiyyee oko Erod gaa: «Ki lekka ɗa botol maa ki cawwicca daate teete.» Ay kaaka appe ga Erod beneyyiɗe gaa gu baamiya Yaaya, guu onniyya ma jinzirre, guu nuuƴiyya daŋayi. 5Erod pa aŋakke diyawti Yaaya, gaa ɓayaɗɗo soopa giimi ku maani, asan gu bakammiki aleŋ nabiinice.

6Gaa meene ta laalane ta wiyawti Erod, gi runtí Erodiyad asiyyee waara unti Erod ma gimtee maa ga kolee laalanti. Gii waarití taata deeɗiyee daanee oko Erod, 7namma ga halpiyɗe gaa ga beraatiiga latta maa gi enaa. 8Gii yaatí pa issittiica oko runtí gee gi innu gee: «Birawca iŋee saa supirati kayaati Yaaya ma batasayya giimi.» 9Maa gi beneyyiyyee pa, gaa sultan Erod zorontiyɗe. A mileŋ ga halpayye pa unco giimi maa ga kolee laalanti, ga beneyye gaa gu biraatiica kayaati Yaaya. 10Gaa n̰aamiɗe daŋayi gu deeɗica reepa kayaati Yaaya. 11Guu asikkiti supirati, guu birittiica oko gomosso taata. Gita pa iccica gi itirittiica oko yaatí. 12Gaa maa gu jobookeetee giyyicca kabarre ta muutti, guu asiɗe gu asiyya icca ziiti, guu deeɗiya saaya. Guu kaatiɗe gu deeɗiyee taasa oko Iisa.

Iisa beraayo tiyaw oko alpaŋgee beeƴa miɗi

(Elloŋ Mark 6.30-44, Lik 9.10-17, Yaaya 6.1-13)

13Maa ga Iisa giyyiɗe kadar ga Erod beneyya ma gaartee, ga wace, gaa kalpiɗe markaba gaa tirriyɗe min iŋaa kayti ka. Gaa katawɗo kayni were ma lekka ɗa giimi. Maa gu giimi ku maani giyyikki, guu oomiɗe min gawaagargeyyo, guu jobbiyya ma asinco. 14Maa ga beeriɗe min markabati, gaa elliɗe giimi maani. Gaa elliɗe saamuwco, gaa rayyidiɗiy gimco ma parayya.

15Gaa maa ga pootimooko asiɗe, guu jobookeetee asiyyee saripti, guu beneyyiyyee goo: «Gita paato galaa o kee aaye kayni arro min helelgeyyo, kaaka pa ki beneyyayo oko giimi ku maani kooko gu kaatiɗo diyargeyyo gu deeɗo giɗa lawwi ku tiyaawi.» 16Gaa Iisa soopa tiiliyyoo gaa: «Kaatico gayee ɗa maatiki. Kuŋ saa biraaniyo tiyaw!» 17Guu yookiyyee goo: «Ni lekka iŋee mappa beeƴa ka, o buusi seera.» 18Gaa Iisa beneyyiyyoo gaa: «Itirnawgu iŋee.» 19Gaa maa gu itiriyyeegu, gaa beneyyiyyoo oko giimi ku maani kotti gaa gu nuntu n̰aali. Maa gu nuntiɗe, gaa icciyya mappa ka beeƴa kee o buusi ku seera koo, gaa cukilɗe ta uwwa samaani gaa leeɗiyee barkinti oko Mellayi. Gaa erriyya mappa ka beeƴa kaaka ga biriyyooga oko jobookeetee. Guu guta pa ɗeddiyyooga oko giimi ku maani kotti. 20Guu teeɗe paracco gu ayyiɗe. Guu jobookeetee Iisa onniɗe laŋgee orro o seera ma kollee ku mappa ma mare. 21Giimi ma teero kotti pa, gu koo ku alpaŋgee beeƴa ay miɗi. Daati o miici soopa gemmenta ɗa.

Iisa tan̰aa kayaaco ammo

(Elloŋ Mark 6.45-52, Yaaya 6.16-21)

22Gaa maa gu timmiyya mappa ma mare, gaa koɗokka saa ga Iisa beneyyiyyoo oko jobookeetee gaa gu kalpu markabati gu ommiɗo ta nussanti katik oko baharre ta yaata, kadar kee ga gata pa marakka ga beneyyiyyo oko giimi ku maani kotti gu tacilɗo. 23Maa ga beneyyiyyoo oko giimi kotti gu tacilɗe, gaa gata pa kalpiɗe jappiti ku maa ga deeɗo inna Mella. Maa gi paato galɗe, gaa alɗo missa iŋaa jappiti kayti ka. 24Markaba maa gu jobookeetee kalappe tee pa aaye paaɗe arro min goŋgomni. Mileŋ ga ussu azakka ga gaabalɗica pa, gu lokkomco ammo torooroyyaca. 25Gaa ƴekker ka ma walawti wiri ga min jappiti ga Iisa beeriɗe baharriti. Gaa tan̰awɗo kayaaco ammo, gaa katawɗiyo oko jobookeetee. 26Gaa maa gu elliyya ga tan̰aa kayaaco ammo, guu kellemco oomiɗe. Guu beneyyiɗe goo: «Ay kir̰mu!» Gii ɓayaw icciyooca, guu waciɗe kawwikiti. 27Gaa Iisa beneyyiyyoo saa koɗok gaa: «Asarroŋgu galbigeetoŋ gata ay naa ka. Aɗoŋ ɓaya ɗa.»

28Gaa Piyer tiiliyyee gaa: «Miltini, gaa ay seene ga ay kii, ki oyyaw ɗee na tan̰n̰iɗo kayaaco ammo na kaatiyam.» 29Gaa Iisa tiiliyyee gaa: «Asu!», gaa Piyer beeriɗe min markabati, gaa tan̰awɗo kayaaco ammo ga aanayɗiya Iisa. 30Maa ga aawiɗe kadar ga ussu azakka maani pa, gaa ɓayaw galiyyee, gaa diiliɗe ga desewɗo, gaa cayyikiɗe gaa: «Miltini, moogino!» 31Gaa koɗok ga Iisa taariyya pitti ga baamiyya. Gaa beneyyiyyee gaa: «Kii keeke gi amannicum paalta ka missa, ayme ki bamaɗɗica seera seera?» 32Gaa maa ga Iisa ma giiti Piyer kalpiɗe markabati, gaa ussu ƴaapiɗe yil min azaawi. 33Guu jobookeetee ma aaye markabati darsiɗe unti Iisa. Guu beneyyiyyee goo: «Ma tirta pe ga ki keeke ay Runti Mellayi.»

Iisa rayyadday giimi ma parayya

(Elloŋ Mark 6.53-56)

34Gaa Iisa ma jobookeetee tappicca baharre ta yaata, guu sarɗe kiɗa ta Zenezaret. 35Maa gu giimi ma aaye iŋaakite pa elliɗiy gu asaa, guu ibiniyya Iisa. Guu iyyiyyoogu deyco oko giimi ku kiɗa taata parattí kadar ga Iisa ase. Guu itiriyyeegu giimi paracco ma parayya. 36Guu malmiliyya goo ga ban̰n̰u ga duwiyoo gu esewɗica balti kaɗiyyiti ka kulla. Guu ma eesica kotti paracco rayyidiɗe.

Selectat acum:

Matiye 14: mmy

Evidențiere

Partajează

Copiază