MATIUS 7
7
Kawey dosa atakam basakamtiw
(Luk. 6:37-38,41-42)
1“Caram ow e adosa atakam basakamtiw arapok. Allah e cadosa atakam basakamtiwasin. 2Car ow e adosa atakam asakamtiwcokom, Allah e cadosaam inim cowok asakamtiwcema. Car ow e adosa atakam awut aotawcokom, Allaham e cadosa atakam awut aotawcema. 3Car ponowas kanimnakap, e cajowow ipic manmok aman apormokom. E nat, e camanmok aman balok awap. Caram e balok bapor opok aemamokom. Ucim inimasaram? 4E camanmok aman balok awap. E nat, car atakam e cajowow ipic aotawmokom, ‘Dor e omanmok ponowas bwerewosomtam.’ Car inim atakam botaw ucimaram? 5Car pir bwe ow ara. E camanmok aman balok batakamerewosomey. Wunam e cajowow ipic manmok ponowas kanimnakap bwerewosomtam, manmok akat atiwcemem.”
6“E akat pok, juwur batetam aropok. E camanikmanik akatipicam o bipu biwititam arapok. Ar, e pok, bwey desen ajipirjarcema, wunam sis car aofiratamceman.”
Janim e onam op oricipic aanimey
(Luk. 11:9-13)
7“Janim manimey. Allah masirin, e janim aanimcokomas aemtamceman. Eras bapowporey. Car masirin, e apowporcokomas apowtewcomokom. Jimasap bakakajumey. Allah masirin, e jimasap car apayimtamceman. 8E janim aanimames ow takas e janim aanimamesas atewmes. E apowpormes ow, e apowpormesas apowtewmes. Allah e jimasap bakakajum ow, e jimasap apayimtamama. 9Car jiwi epcom ow, e cajiwi amos janim car aanimcannew, car ek e jiwi batetam open? 10Ar enam janim car aanimcannew, car amer e jiwi batetam open? 11Bare, car takas dosa ow ara. Ca nat, e catiperes akat pok batetam camsom ara. Bare, caricipic onam op awap. Aramat ipicam atakas e janim aanimces ow atetamcema araman.”
12“Car, ow, asan akat, ca bom akat aemamokomnew, caram asan akat e ow mamomey. E Musa tulis aeapomef Jirmec atakam fweam, e Allah atakam botaw ow tulis aeapomfes atakam fweam, bare inim atakam ara.”
E sat jimasap
(Luk. 13:24)
13“Car e sat jimasap bafiwey. E neraka bokotpu jimasap, bare afo ara. E bokotpuam umuw ara. E bokotpu acowojarmes ow, bare arke ara. 14E jiwne batamemapawar asan bokotpu jimasap, bare sat ara. E bokotpu ajarmes owam ajurusemames. E bokotpu apowtewmes ow, bare arke opok ara.”
Car e suw ow pimicima
(Luk. 6:43-44)
15“Car e Allah atakam botaw suw ow pimicima. Ar domba inim cimin car aenawomceman. E nat, e ajak aman ar jokmennakut wasan juwur inim cimin ara. 16Ca nat, e ow aemamesas aporcokom, car ar suw ow aporcomokom. Ow, anggur eke, fa epcom os kari bakomtew open? Ar, os eke juwas “arā,” fa epcom os kari bakomtew open? 17E akat os akan takas, eke akat apema. E sakuwe os akan nat, eke pwicak apema. 18Bare, akat os akan, eke pwicak bwempetep asan opok. Sakuwe os akanam, eke akat bwempetep asan opok. 19Ow, os, akat eke bape opok aporces, ar e os amatiwcemes. Ar masirin, e os jismak asapimapomcemes. 20Inimas ara, car e ow e aemamesas aporcokom, ar Allah atakam botaw suw ow aporcomokom.”
“Car nomsom opok cowok”
(Luk. 13:25-27)
21“Wun ow atakam dor aotawmenes, ‘Tuhan. Tuhan.’ Inim aemes. E nat, e ow takas, e Onam Op Pemerintah Asan, bwemfiw asan opok. E onam op daricipic atakam ji bwe ow cowok, erasan afiwcemes. 22E jofay aenawcow, ow arkeam atakam dor aotawcemenes, Tuhan. Tuhan. Da e ojuwas ajitewfom, wunam dar oratakam kawey ow aotawfomam, ow ajak aman dat aotewerisimfomam, junum bweas aemfomam, inima. Inim aecemes. 23Dor masirin, atakam e ow aotawcimin. ‘Car nomsom opok cowok. Car dosa bwemawar ow ara. Caram a do awemcey asan memem arapok. Caram baysosey!’ ” Inim aecimin.
Cem bweapom ipic jamnuk
(Luk. 6:47-49)
24“Wun ow doratakam jen ajimes, wunam e atakam ji aemes. E ow, bi binip umuton ipic cowok inim cimin ara. E ipic cem aeapomef, ar e fasis e se komkom ajiwar aneyjirimapomefen. 25Te masirin, aneyefen. Wapu bwi awutnakut aemseefen. Fo awutam e cem aapommenamefen. E cem nat, baneyjumtiw opoken. Bare, e cem fasis se komkom aman aememef arawen. 26Wun owam dor atakam jen ajimes. E ow nat, e atakam ji bwe opok aemes. E ow, bi binip opok ipic cowok inim cimin ara. E ipic e acem bisin ton desen aeapomefen. 27Te masirin, aneyefen. Wapu bwiam awutnakut aemseefen. Fo awutam e cem ajujumefen. E cem masirin, aneyjuseefen. Ar daniwisnakut aemamesefen.” Yesus inim aeefen.
Yesus atakam fak aotawef
28Barem Yesus e atakam aotawkurumefen. E ow arkeam e amememtamef atakam, junum awut aefesen. 29E Yesus atakam amememtamef ara, aram atakam faknakut aotawefen. E owam inimas aporfesen. Ar Yesus e ow arAllah Jirmec mamememtam ow inim cimin atakam mamememtam opok aporfesen.
Selectat acum:
MATIUS 7: LAICNS
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
LAI 1985
