KEJADIAN 22
22
Uisneno naplenat Nai Abraham he nati' natulu Nai Ishak
1Anbi tabu fauk namuni na'kone, Uisneno ansu' Nai Abraham in nek palsait. Uisneno no'en nak, “Abraham!” Oke te Nai Abraham natae nak, “Koi, Usi.”
2Uisneno namolok nak, “Amnao nai neu pah Moria mok Nai Ishak, ho anmone fua mese, le hom nek mani. Anbi nane, anbi tubu mese of Au lek ma lulu ani neu ko, he ho mutulu ho anah anfani fua mnotu neu Kau.”
3Anbi nokfa nok-noka, Nai Abraham anpol hau neu fua mnotu ma in nasaeb hau nane neu bikase luke mnanu in tunan. In anfen ma nao nok Nai Ishak ma in ate sin nua neu bale le Uisneno naton nalali neu in. 4Leka sin nao nan neno tenu in nanan Nai Abraham ankiso nit bale nane na'ko lo. 5Oke te in nak neu in ate nua sin nak, “Hi mimaika ambi i mok bikase luke mnanu i. Au ma au anah of haim nao neu bale nane he miluli ma mibes neu Uisneno, ma of haim fani aim neu ki.”
6Nai Abraham in antao hau neu fua mnotu nane neu Nai Ishak in hanun, mes in anmes es neki besi ma ai flae neu he notu hau nane. Leka sin nao nabua onane, 7Nai Ishak namolok nak, “Ama!”
Nai Abraham natae nak, “Sa', au anah?”
Nai Ishak natoti nak, “Hit teki talali ai ma hau, mes bibi kase le he ta'tulu nane es me ka?”
8Nai Abraham natae nak, “Uisneno anmes kun es of naloitan bibi kase nane.” Oke te sin nua sin anao piut.
9Leka sin antia bale le Uisneno naton nalali neu Nai Abraham, in nahakeb baki tulu mese ma in antao hau mnotu sin nane anbi in fafon. Ma nalali te in anfutu in anah ma natupa in anbi baki tulu in tunan, anbi hau mnotu nane sin fafon. 10Nalali onane te, in naiti in besi hen lolo in anah. 11Mes ahake Uisneno nak neune na'ko neno tunan nak, “Abraham, Abraham!”
Nai Abraham natae nak, “Koi, Uisneno!”
12“Kaisa ho mumenab li'ana le nane, ai ho mo'e sa'-sa' neu in,” Uisneno nakua a'an nao natuin ahake neno tunan nane. “Tabu le i Au uhin neu ho mubes ma mu'ki neu Kau, natuin ho kam tite fa he mutulu ho anah fua mese nane neu Kau.”
13Oke te Nai Abraham na'aiti in matan ma in ankiso ma in nit bibi kase keso mese le in sunan nakai'on anbi nasi in nanan. Nai Abraham naiti bibi kase nane ma in natulu neu Uisneno anfani fua tulu mnotu anseka in anah. 14Nai Abraham nakanab bale nane nak “Uisneno naloitan ma nabalab sa' le he mamnaiti.” Ma talantia tabu le i amsa atoni sin nak “Anbi In tubu Uisneno naloitan ma nabalab sa' le he mamnaiti.”
15Ahake Uisneno namolok anteni haefes neu Nai Abraham nak, 16“Uisneno nak Au sup natuin Auz: kanak anmes, natuin ho mo'e mulali lasi nane ma ho kam tite fa neu he nati' mutulu ho anmone mese nane neu Kau, 17of Au fe neu ko tetus ma athoen neno ma Au umfauba ho sufam onle afkun anbi neno tnanan ma onle snaen anbi tasi in ninen. Ho anah ma ho upuf sin of anli'u naaenab ale' sin musu-musu sin. 18Ale uf anbi pah pinan of antoti neu Kau he nati' Au fe neu sin tetus onle Au fe ulali tetus ma athoen neno neu ho sufam – natuin hom panat ale Au plenat sin.” 19Nalali onane te Nai Abraham anfani neu in ate sin nua sin, oke te sin alsin anfani ok-oke neu Bersyeba, ma Nai Abraham namaika anbine.
Nai Nahor in sufan
20Nai Abraham in tataf kanan Nai Nahor. Namuni na'ko lasi le anbol nalali anbi Tubu Moria nane, Nai Abraham in nen nak bi Milka, Nai Nahor in fenai in anmone sin fanu esle': 21Nai Us, es anae; in olif es, nai Bus; Nai Kemuel, le anfani amaf neu Nai Aram; 22Nai Kesed, Nai Hazo, Nai Pildas, Nai Yidlaf, ma Nai Betuel, 23le namuni te anfani amaf neu bi Ribka. Nane li'anmone fanu le bi Milka nahonis sin neu Nai Nahor, Nai Abraham in tataf. 24Nai Nahor in fenai kliko kanan bi Reuma ma bife kliko nane nahonis Nai Tebah, Nai Gaham, Nai Tahas ma Nai Maakha.
Selectat acum:
KEJADIAN 22: AOZ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te