KEJADIAN 15
15
Uisneno In fef bela nok Nai Abram
1Nalali onane te Nai Abram ansimo mnitas ma in nen Uisneno namolok neune nak, “Kaisa mumtau, Abram, Au of uneo ma uhafo ko na'ko amle'ut, ma a'fe upa' naek neu ko.”
2-3Mes Nai Abram nak, “Uisneno Anesit Afinit, au Uisneno, ho kam fe kau fa li'ana. Atoni le of ansimo au mu'ik nane alkun Nai Eliezer, au ate na'ko Damsyik. Es nane te in otan sa' ka Uisneno kalu Hom fe neu kau upa'?”
4Nalali onane te Nai Abram in nen Uisneno namolok anteni neune nak, “Ka ho ate fa es of ansimo ho mu'im, mes of ho anmone anmes kun.” 5Uisneno neki Nai Abram anpoi ma nak neune nak, “Mu aiti' ho matam ma amkiso neu neno tunan, ma aiti hom so'i afkun-afkun; ho sufam of namfau onle afkun-afkun nane.”
6Nai Abram in nafnek neu Uisneno, es nane te Uisneno ansimo in anfani atoni antom nek In.
7Namuni onane te Uisneno nak neune anteni nak, “Au le i Uisneno, le Au upoitan ulali ko na'ko pah Ur anbi Babilonia, he nati' Au fe ani pah le i neu ko anfani ho ini.”
8Mes Nai Abram natoti nak, “Koi, Uisneno Anesit Afinit, anmo'e onme ka he nati' Au uhin neu pah le i of anfani on au ini?”
9 Uisneno natae in nak, “Maiti ma mutulu neu Kau bijae ainaf mese, bibi ainaf mese ma bibi keso mese, es-es te ton tenu, ma kol otos mese amsa ma kol ot kase mese.” 10Oke te Nai Abram in naiti mu'it-mu'it nane ma natulu neu Uisneno. Bijae, bibi ma bibi kase nane in anka'an anbati no nua, ma in pisan nane in antao sin anmabaina es nok es anbi klalo nua. Mes kolo-kolo nane in kan bati fa sin. 11Kolo amnah sisi nane antok anbi sisi in tunan, mes Abram anli'u naaenab sin.
12Leka manas anmofu, Nai Abram antup anfini. Nok askeken in nahenu nok lasi amtaus le anaek. 13Uisneno namolok neune nak, “Mumnau nai ho sufam nane of anfani atoni anao amnemat anbi pah bian; sin of an aetnok anbine ma of anhamu'i sin anbi ton natun ha in nanan. 14Mes uf le an aten ho sufam nane of Au kas sin ma anbi tabu ho sufam sin nasaitan pah nane, sin of neki mu'if namfau. 15Ho of mupeni ua mnanu amsa; ma of hom fani aum nok nek tainine, ma sin of ansub ko. 16Nalali ho sufam le batan ha, ho anah ma ho upuf sin anfani nem neu pah le i, natuin Au of uskotun atoni Amori nahunun na'ko sin maufinu nane talantia sin ka napeni fa kasat.
17Leka neno antes nalali, nok askeken utunu' amasut ma nopo' apinat anbol, anao natuin sisi-sisi nane sin atnanan. 18Anbi leku nane amsa Uisneno anmo'e nani fef bela nok Nai Abram. Uisneno nak, “Au manta'en ale pah le i anfun natef of Au fe ani neu ho sufam, na'ubon na'ko nakat pah Mesir antia Noe Efrat, 19nok pah atoni Keni, Kenas, Kadmon, 20Het, Feris, Refaim, 21Amori, Kanaan, Girgasi ma Yebus.”
Selectat acum:
KEJADIAN 15: AOZ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te