Matayo 5
5
1Dre dia lezolepi diiki nora’a adi dre mbazo kira drina: dra adi dre lirizo vudri di, dia akodi tayilepi dii aliki i vuna: 2adi dre ai ti njizo dre ta tadazo aiidre, dre tazo, ki di,
3Ari adre dia lemerero teri na diiki o ni: mataya bu adea dre adrele aiikia dise.
4Ari adre dia tiza balepi diiki o ni: i dre aiiki tindrile dise.
5Ari adre dia amaliro diiki o ni: aii dre vo dole dise.
6Ari adre dia adrelepi tebiri be dii o ni, dre lovo tai piri adea ozo: aii dre pile dise.
7Ari adre dia ta kini olepi diiki o ni: aii dre ta kini dole dise.
8Ari adre dia adrelepi togo taratara be diiki o ni: aii dre Nzambeni nole dise.
9Ari adre dia larurulepi diiki o ni: i dre aiiki zile Nzambeni mva dise.
10Ari adre dia o ni a fo aiiki mi dre ta piri ole dise: mataya bu adea dre adrele aiikia dise. 11Ari adre amiki o ni mundia kolawa amidre di, dre amiki mi fozo di, dre takonji toa o̱ei diiki tazo amiru kinzose, mase. 12Mi kolenze, ari kadre amiki o ambani: amiki nga buna di dre adrele murungu dise: ngoro nitini aii dre nabi adrelepi ami dridri diiki mi fole dise.
13Mi adre te’i vo adea: te’ini kini koti asa dre di, a koba ado nga ya di lana kogoro adrele te’iro? Ñanomvano velero a di be te’i nidi adre tani ngase tejia ko, mundia be vudri dre tozo pase. 14Mi ngadra vo adea. A kicoa ba murungu adrelepi rovo dri di zu ko. 15Mundia turu tala bale kanji nduna ko, ba aiiki tala fadri, dre kozo mundia o̱ei adrelepi jona diise. 16Ngoro nitini mi ko’o amiki ngadra kole dia mise, aii konoro amiki tai tani ole dii, dre utukufu fezo amiki Ata buna di dre.
17Mi kotusu tai ko, ma ali torati e, ta nabikia dii be tiza: ma ali tai nii tiza ko, ma ali tai nii o akele. 18Ma dre tale amidre pati dise, Ta camva tisile di kolavu torati ase tejia ko, a o tai o̱ei akele ka, vo e bu be, lavu ndo. 19Tai nidise, dia angodiya togi alo camva di galepi re di, dre mundia tadazo ole nitini, a kozi akodi cadi mataya bu adea na: dia angodi ya togi olepi di, togi tadalepi di be, a kozi akodi murungu mataya bu adea a. 20Ma dre tale amidre dise, amiki ta ole piri di lavu ta ole piri di dia ta‐tisilepi dii adea, Farusii be ko di, mi kosi teji mataya bu adea lena ko.
21Mi yidre a ta dia kiono dii e dre, ki di, Mi kofu dia drale ko; dia angodi ya dia fulepi drale di, kako ta tale dia tavo talepi di dre: 22ma dre tazo amidre, dia angodi ya adrelepi kumba o ai adrupiru di ako ta dia tavo talepi di dre: dia angodi ya “Raca” talepi ai adrupidre di, ako ta dia rukebelepi vura ta diidre; dia angodi ya Mi azaza, talepi di, a kicoa be akodi Geyena na. 23Kadre nitini di mi adre ami nga fele di fe drakira kandra, tai dre agazo ami lena nale ami adrupi adre tai be i lena miru, 24mi kota’i ami nga fele drakira kandra di nale, mi dre ami lati dozo, dridri mi go adrele adrupiro ami adrupi be, velero mi kali ami nga fele di fe. 25Mi koka’i ami kariba ni tai dre mbelembele, mi dre lira’a lati ase akodi be di; ngale ami kariba kofe mi dia tavo talepi di dre, dia tavo talepi di kofe mi poroto dreka, i dre mi bazo bagojona. 26Ma ta amidre pati Mi kafo nalese tejia ko, mi fe senge o̱ei ka.
27Mi yidre a tadre, ki di, Mi kokamvo dia ko. 28Ma ta amidre, Dia angodi ya toko nolepi lovo konjise di, are kamvo tai ole akodi be ai togona dre. 29Ami mikisia drigulese dre mi ozo dele di, mi kongi, mi kobe mi vulese; amba ta tani midre mikisia alo di ami ruba adea tiza, ta i dre ami ruba bezo titi Geyenana di ruse. 30Ami dreka drigulese dre mi ozo dele di, mi koga, dre bezo mi vulese; amba ta tani midre dreka alo di ami ruba adea tiza, ta i dre ami ruba bezo titi Geyenana di ruse. 31A tadre indi, Dia angodi ya ai toko ta’ilepi di, kofe waraga toko ta’izo di adidre: 32ma ta amidre dia alo ai toko ta’ilepi ta dia mo ako di kamvole dise alokodia, o akodi gole adrele dia momo kamvoni: dia angodi ya akodi molepi di, a kota’i akodi di, o ta dia momo kamvozo di.
33Mi yidre a ta dia kiono dii dre, ki di, Mi kakiña mi kinzose ko, mi ko’o tai midre ami akiñazo di Nzambedre: 34ma dre tazo amidre, Mi kakiña mi tejia ko: mi kakiña mi buse ko, bu dre adrele kiti‐mokonzi Nzambe adea dise. 35Mi kakiña mi vose ko indi, vo dre adrele akodi pandu dise; mi kakiña mi Yerusalemise ko, adi dre adrele ba murungu Mokonzi murungu adea dise. 36Mi kakiña mi ami drise ko indi, mi dre kicoale dribi alo di ole adrele kemve ko dise, kini ko dise. 37Mi ko’o ami kuli adre, Ai’i, Ai’i; Koko, koko; tai azina angodi ya lavu tai nii afo teri konji di ase.
38Mi yidre, a tadre, ki di, Mi si ama mi dre, ma kosiro ami mi ma ti, mi si ama si dre, ma kosiro ami si ma ti: 39ma ta amidre, ki di, Mi kofuro dia konji di be ko: dia angodi ya ami kobojo drigulese di salepi di, mi kala kobojo azi di akodiadre. 40Dia alo di le lile mi be vura taise, dre ami koti dozo, mi koka’i akodi kodoro ami bongo azi di be. 41Dia angodi ya o mi lumbase mi koliro lati ase yi alo di ase, mi koli lati ase yi iri dii ase akodi be. 42Mi kofe nga dia ami ti zilepi didre, mundia lelepi nga dole mi drekase marise di, mi dre ami amvo alazo akodi vulese ko.
43Mi yidre, a tadre, ki di, Mi kole ami bapi, mi kole ami kariba ko. 44Ma dre tazo amidre, ki di, Mi kole amiki kariba, mi kongo Nzambe kandra mundia amiki mi folepi diise; 45Mi kadrero mva amiki Ata buna di adea; akodi dre ai kitu ole afole dia konji diidre, dia tani diidre be dise, dre kozia muzo dia ta olepi piri dii, dia ta olepi piri ko dii be dre. 46Mi dre mundia amiki lelepi dii lele dise di, amiki nga angua ya? Atelonii o tai nidi teji ko ya? 47Mi dre amiki adrupii kamuzo drekase alokodia, amiki tai lavu dia arukabakia ta angini ya? Suru o tai nidi tejia ko ya? 48Tandu nidise, mi kogo avele aveave di tini ngoro amiki Ata buna di dre avele di tini.
Selectat acum:
Matayo 5: LOG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
first printed by the British and Foreign Bible Society in 1924 and 1927.
