ଜୋହନ 6
6
ଜିସୁ ୫,୦୦୦ ହାଜାର୍ ଲୋକାଙ୍ଗ୍ ଉଣ୍ତେଙ୍ଗ୍ ସିତାନ୍
(ମାତିଉ ୧୪:୧୩-୨୧; ମାର୍କ ୬:୩୦-୪୪; ଲୁକ ୯:୧୦-୧୭)
1ତାନେୱେନ୍କା ଜିସୁ ଗାଲିଲି ବା ତିବିରିୟା ଗାଡା ଆୟାପାଡ଼୍କା ସର୍ହାନ୍ । 2ମାରି, ୱାନ୍ ରୋଗ୍ଆତିଲୋକା ଉଣ୍ତିଙ୍ଗ୍ ଏମେ ଏମେ କାବାଆନି ପାଣି କିଜିମାର୍ହାର୍, ଆୟାୱିଜୁ ସୁଡ଼ୁଜି ନାଣ୍ତ ଲୋକୁ ୱାନି ୱେନ୍କା ୱେନ୍କା ସନ୍ଡ୍ରେ ଆସ୍ତାର୍ । 3ଆବେଟ୍ ଜିସୁ ଗରନ୍ ମୁସ୍କୁ ସଲ୍ସି ନିଜେଦି ସିସୁରି ୱାଲେ ଆବେନୁ ବାସ୍ତାର୍ । 4ନାସ୍ତିୱାଲେ ଜିହୁଦିର୍ ନିସ୍ତାର୍ ପଣ୍ତୟ୍ ଲାକ୍ତୁୱାଜି ୱାଜିମାର୍ହାତ୍ । 5ମାରି, ଜିସୁ ନାଣ୍ତ ଲୋକାଙ୍ଗ୍ ନିଜେଦି ଲାକ୍ତୁ ୱାନିକା ସୁଡ଼ୁଜି ପିଲିପ୍ତିଙ୍ଗ୍ ଇର୍ହାନ୍, “ଇୟାୱେରିଙ୍ଗ୍ ଉଣ୍ତେଙ୍ଗ୍ ଇଜି ମାଡ୍ ଏମେଣ୍କୁ ନାଣ୍ତ ରୁଟି କଣାଟ୍ ?” 6ମାତର୍ ୱାନ୍ ପିଲିପ୍ତିଙ୍ଗ୍ ପରିକା କିନି ଇସାବ୍ତାନ୍ ଇକା ଇର୍ହାନ୍, ଇରିଙ୍ଗ୍ ୱାନ୍ ଇନିକା କିଦେଙ୍ଗ୍ ସଲ୍ସିନାନ୍, ଆକା ୱାନ୍ ନିଜେ ନେସ୍ତାମାର୍ହାନ୍ ।
7ପିଲିପ୍ ୱାନିଙ୍ଗ୍ ଇର୍ହାନ୍, “ୱିଜେରେ ଲୋକୁ କାଣ୍ତେକ୍ ପୟ୍ଦେଙ୍ଗ୍ ୱେରି ଉଣ୍ତିଙ୍ଗ୍ ଦୁଇସଦାନ୍ ନାଣ୍ତ ୱେଣ୍ତିଅଦୁଲି ଡାବୁଙ୍ଗୁଁ #୬:୭ ୱେଣ୍ତିଅଦୁଲି ଉଣ୍ତ୍ରି ଦିନ୍ତି କୁଲିଡାବୁଙ୍ଗ୍ ଦାରାଦି ରୁଟି କଣ୍ତେଙ୍ଗ୍ ଆନାତ୍ ।”
8ସିମୋନ୍ ପିତର୍ତି ତଡ଼ାନ୍ ଆନ୍ଦ୍ରିୟ ଦର୍ତି ୱାନି ସିସୁରି ମାଣ୍କୁ ଅରେନ୍ ୱାନିଙ୍ଗ୍ ଇର୍ହାନ୍, 9ଇବେନୁ ଅରେନ୍ କଡ଼ ମାନାନ୍, ୱାନି ମାନୁ ଗଦ୍ମୁଦି ପାସ୍ଗୋଟା ରୁଟିଙ୍ଗ୍ ମାରି ରୁଣ୍ତି ମିନ୍କୁ ମାନେ, ମାତର୍ ନିସା ଲୋକା ଉଣ୍ତିଙ୍ଗ୍ ଆକା ନାଣ୍ତ ଆଏତ୍ ।
10ଜିସୁ ସିସୁରିଙ୍ଗ୍ ଇର୍ହାନ୍, “ଲୋକାଙ୍ଗ୍ ବାସାକିଦୁ ।” ଆୟା ବାଡିଦୁ ନାଣ୍ତ ଲାଟା ମାର୍ହାତ୍ । ଆୟା ଲାଟା ମୁସ୍କୁ ୱିଜେରେ ବାସ୍ତାର୍, ଆବେନ୍ ଇସାବ୍ତାନ୍ ପୁରା ୫,୦୦୦ ହାଜାର୍ ମେମାରୁଙ୍ଗୁଁ ମାର୍ହାର୍ । 11ଆବେଟ୍ ଜିସୁ ଆୟା ରୁଟି ଆସ୍ତାନ୍ନୋ ମାପୁରୁଙ୍ଗୁଁ ଦନ୍ୟବାଦ୍ ସିଜି ବାସ୍ତିମାର୍ଇ ଲୋକାଙ୍ଗ୍ ଆକା ବାଟାକିତାସିତାନ୍, ଆୟାୱାଜା ମିନ୍କୁ ବା ବାଟାକିତାସିତାନ୍, ୱାର୍ ଏସ ଲସ୍ତିଙ୍ଗ୍, ନାସ ସିତାର୍ । 12ମାରି, ୱାର୍ ପଟାପାଜିତି ୱେନ୍କା, ଜିସୁ ନିଜେଦି ସିସୁରିଙ୍ଗ୍ ଇର୍ହାନ୍, “ଏଣ୍ତେସ୍ ଇନିକା ନାସ୍ଟୁ ଆଏତ୍, ଇୟାଉଣ୍ତିଙ୍ଗ୍ ଏଜିତିମାନି ରୁକ୍ତି ମକେଙ୍ଗ୍ ଉନ୍ଡ୍ରେମାନୁ କିଦୁ ।” 13ଆବେଟ୍ ୱାର୍ ଆୟାୱିଜୁ ଉନ୍ଡ୍ରେମାନୁ କିତାର୍, ମାରି ଲୋକୁ ଉଟି ୱେନ୍କା ଗଦ୍ମୁଦି ଆୟା ପାସ୍ଗୋଟା ରୁଟିଣିକୁ ଏମେ ରୁକ୍ତି ମକେଙ୍ଗ୍ ରୁଟିଙ୍ଗ୍ ଏଜିତେମାର୍ଏ, ଆବେଟ୍ ୱାର୍ ବାରଗୋଟା ଡାଡ଼ିଆଙ୍ଗାଁ ବର୍ତି କିତାର୍ ।
14ଆବେଟ୍ ଜିସୁ କିତିମାନି କାବାଦି ପାଣି ସୁଡ଼ୁଜି ଆବେମାନି ଲୋକୁ ଇର୍ହାର୍, ଦୁନିଆଦୁ ଏମେ ବାବବାଦି ୱାନିକା ମାର୍ହାତ୍, ଇକାନ୍ ପୁରା ୱାନ୍ନେ । 15ମାରି, ଲୋକୁ ୱାଜି ରାଜା କିନି ଉଣ୍ତିଙ୍ଗ୍ ଜେ ୱାନିଙ୍ଗ୍ ଡାଟ୍ତାନ୍ ଆସ୍ତେଙ୍ଗ୍ ବଦା କିଜିନାର୍, ଜିସୁ ଇକା ନେସ୍ସି ୱାନ୍ ମାରିଡ଼େସି ଆୟା ବାଡି ଡ଼ିସ୍ସି ଅରେନ୍ନେ ଗରନ୍ତୁ ସତାସର୍ହାନ୍ ।
ଜିସୁ ଏରୁ ମୁସ୍କୁ ବୁଲାତାନ୍
(ମାତିଉ ୧୪:୨୨-୩୩; ମାର୍କ ୬:୪୫-୫୨)
16ଆୟାନାଣ୍ତିଙ୍ଗ୍ ମିଲ୍ମିଲିକା ଆତାତ୍ ଜିସୁଦି ସିସୁର୍ ଗାଡା ପାଡ଼ି ସର୍ହାର୍ 17ମାରି ଡଙ୍ଗାଁଦୁ ଏକ୍ତାର୍ରୋ ଗାଡାଦି ଆୟାପାଡ଼ି କପର୍ନାହୁମ୍ ତରିନ୍ ସନ୍ଡ଼୍ରେଙ୍ଗ୍ ଆସ୍ତାର୍ । ସିକାଟି ଆଜି ୱାଜି ମାର୍ହାତ୍, ମାରି ଜିସୁ ଆୟାସାନ୍ଧି ୱାରି ଲାକ୍ତୁ ରେଏନ୍ ମାର୍ହାନ୍, 18ମାରି ନାଣ୍ତ ଗାଲି ଆଜିମାରିଙ୍ଗ୍ ଏର୍ତୁ ଉଲ୍କା ନିଙ୍ଗ୍ଜିମାର୍ଏ । 19ଆୟାଦାପ୍ରେ ସିସୁର୍ ପୁରା ପାସ୍ ନୋ ସଅ କିଲୋମିଟର୍ ସାଟ୍ୱା ଡାକ୍ସି ସର୍ଇ ୱେନ୍କା ଜିସୁଙ୍ଗୁଁ ଏର୍ ମୁସ୍କୁ ବୁଲାଜି ଡଙ୍ଗାଁ ଲାକ୍ତୁ ୱାନିକା ସୁଡ଼ୁଜି, ଆବେଟ୍ ୱାର୍ ତିଲାତାର୍ । 20ମାତର୍ ଜିସୁ ୱାରିଙ୍ଗ୍ ଇର୍ହାନ୍, “ଇକାନ୍ତ ନାନୁ, ତିଲାମାଟ୍ ?” 21ଆଦେଙ୍ଗ୍ ୱାର୍ ଜିସୁଙ୍ଗୁଁ ଡଙ୍ଗାଁଦୁ ଅତେଙ୍ଗ୍ ବଦା କିତାର୍, ମାରି ୱାର୍ ଏମେ ବାଡିଦୁ ସଲ୍ସିମାର୍ହାର୍, ଡଙ୍ଗାଁ ଆୟାଦାପ୍ରେ ଆୟା ବାଡିଦୁ ଇତାତ୍ ।
ଲୋକୁ ଜିସୁଙ୍ଗୁଁ ପୟ୍ତାର୍
22ଆୟା ବାଡିଦୁ କେବଲ୍ ଉନ୍ଡ୍ରି ଡଙ୍ଗାଁ ମାର୍ଆତ୍, ମାରି ଆବେଟ୍ ଜେ ଜିସୁ ନିଜେଦି ସିସୁରି ୱାଲେ ସଲ୍ଏନ୍ ମାର୍ହାନ୍, ମାତର୍ କେବଲ୍ ୱାନି ସିସୁର୍ ସର୍ଆମାର୍ହାର୍, ଇକା ଏମେ ଲୋକୁ ଆୟା ମାର୍ନାଣ୍ଡିଙ୍ଗ୍ ଗାଡାଦି ଆୟାପାଡ଼ି ନିର୍ଆ ମାର୍ହାର୍, ୱାର୍ ସୁଡ଼ୁତା ମାର୍ହାର୍ । 23ପ୍ରବୁ ଦନ୍ୟବାଦ୍ ସିତି ୱେନ୍କା ଲୋକୁ ଏମେ ବାଡିଦୁ ରୁଟି ତିର୍ଆମାର୍ହାର୍, ଆୟା ବାଡି ଲାକ୍ତୁ ତିବିରିୟାଦାନ୍ ମାରି ଏସ ଡଙ୍ଗେଙ୍ଗ୍ଁ ୱାଜି ଇତେ; 24ମାତର୍ ଜିସୁ ମାରି ୱାନି ସିସୁର୍ ଜେ ଆବେନୁ ସିଲେର୍, ଇକା ଏସ୍ତିୱାଲେ ଲୋକୁ ୱିଜେରେ ସୁଡ଼ୁତାର୍, ନାସ୍ତିୱାଲେ ୱାର୍ ୱିଜେରେ ଡଙ୍ଗେଆଙ୍ଗାଁ ଏକ୍ସି ଜିସୁଙ୍ଗୁଁ ପୟ୍ଜି ପୟ୍ଜି କପର୍ନାହୁମ୍ତୁ ୱାତାର୍ ।
ଜିସୁ ଜିବନ୍ ସିନି କାଦି
25ମାରି, ଲୋକୁ ଗାଡା ଆୟାପାଡ଼ି ଜିସୁଙ୍ଗୁଁ ସୁଡ଼ୁଜି ୱାନିଙ୍ଗ୍ ୱେନ୍ବାତାର୍, “ଏ ଗୁରୁ, ନିନ୍ ଏସ୍ତିୱାଲେ ଇବେନୁ ୱାତି ?”
26ଜିସୁ ୱାରିଙ୍ଗ୍ ଇର୍ହାନ୍, ସତ୍ ସତ୍ନେ ନାନ୍ ମିଙ୍ଗିଁ ଇଜିନା, କାବାଆନି ପାଣି ସୁଡ଼ୁତିଙ୍ଗ୍ନୋ ଜେ ମିର୍ ନାଙ୍ଗିଁ ପୟ୍ଜିନିଦେର୍, ଆକା ସିଲେ, ମାତର୍ ରୁଟି ତିନ୍ଜ ପାଜିତିଦେର୍ନୋ ନାଙ୍ଗିଁ ପୟ୍ଜିନିଦେର୍ । 27ଆମା କାଦି ସେଏଣ୍ତ୍ ଆନାତ୍ ଆୟାଉଣ୍ତିଙ୍ଗ୍ ପାଣି କିମାଟ୍ ମାରି ଆମାକା ଏସ୍କାଙ୍ଗ୍ୱିଜ୍ଇ ଜିବନ୍ ସିନାତ୍, ଆୟାଉଣ୍ତିଙ୍ଗ୍ ପାଣି କିଦୁ; ଆୟା କାଦି ମନୁସ୍ୟପୁତ୍ର ମିଙ୍ଗିଁ ସିନାନ୍, ଇରିଙ୍ଗ୍ ବୁବା ମାପୁରୁ ଇୟାଉଣ୍ତିଙ୍ଗ୍ ୱାନିଙ୍ଗ୍ ଅଦିକାର୍ ସିତାମାନାନ୍ ।
28ଆବେଟ୍ ୱାର୍ ୱାନିଙ୍ଗ୍ ୱେନ୍ବାତାନ୍, “ମାପୁରୁ ଆମାକା ବଦାକିଜିନାନ୍ ଆକା ମାପ୍ କିଦେଙ୍ଗ୍ ମାଙ୍ଗିଁ ଇନିକା କିଦେଙ୍ଗ୍ ଆନାତ୍ ?”
29ଜିସୁ ୱାରିଙ୍ଗ୍ ଇର୍ହାନ୍, “ମାପୁରୁ ଆମାୱାନିଙ୍ଗ୍ ପୋକ୍ତାମାନ୍ନାନ୍, ୱାନିମାନୁ ବିସ୍ବାସ୍ କିନି ଉଣ୍ତିଙ୍ଗ୍ ମିର୍ ଆକା କିଦେଙ୍ଗ୍ ଆଟ୍ନିଦେର୍ ।”
30ଆବେଟ୍ ୱାର୍ ୱାନିଙ୍ଗ୍ ୱେନ୍ବାତାର୍, “ଆରିଙ୍ଗ୍ ନିନ୍ ସିନାଦିୱାଜା ଇନିକା କିଜିନି ଜେ, ଆକା ସୁଡ଼ୁଜି ମାପ୍ ନିଙ୍ଗିଁ ବିସ୍ବାସ୍ କିଦେଙ୍ଗ୍ ଆଟ୍ନାପ୍ ? ନିନ୍ ଇନିକା ପୁଜା କିଜିନି ? 31ମା ପୁର୍ବେଦିଡକ୍ରାଦାଦାର୍ ସୁନ୍ସାନ୍ବାଡିଦୁ ମାନ୍ନା ଉଣୁଜି ମାର୍ହାର୍, ଏଣ୍ତେସ୍ ଦର୍ମସାସ୍ତ୍ରଦୁ ରାସ୍ତାମାନ୍ତା, ଉଣ୍ତେଙ୍ଗ୍ ଇଜି ୱାନ୍ ୱାରିଙ୍ଗ୍ ମୁସ୍କୁପୁର୍ତାନ୍ କାଦି ସିତାମାର୍ହାନ୍ ।”
32ଆବେଟ୍ ଜିସୁ ୱାରିଙ୍ଗ୍ ଇର୍ହାନ୍, “ସତ୍ ସତ୍ନେ ନାନ୍ ମିଙ୍ଗିଁ ଇଜିନା,” ଆମାକା ମିଙ୍ଗିଁ ମୋସା ସିତାମାର୍ହାନ୍ ଆକା ମୁସ୍କୁପୁର୍ତାନ୍ ୱାତିମାନି କାଦି ସିଲେ, ମାତର୍ ନା ବୁବା ମିଙ୍ଗିଁ ମୁସ୍କୁପୁର୍ତାନ୍ ସତ୍ତେନେ କାଦି ସିନାନ୍; 33ଆମା କାଦି ମୁସ୍କୁପୁର୍ତାନ୍ ରେତାଜିୱାଜି ଦୁନିଆଦିଙ୍ଗ୍ ଜିବନ୍ ସିନାନ୍, ୱାନ୍ ଆଜିନାନ୍ ଆୟା ମାପୁରୁ ସିତିମାନି କାଦି ।
34ୱାର୍ ୱାନିଙ୍ଗ୍ ଇର୍ହାର୍, ଆଜ୍ଞା, “ୱିଜୁଦିନ୍ ମାଙ୍ଗିଁ ଇୟା କାଦି ସିଦା ।”
35ଆବେଟ୍ ଜିସୁ ୱାରିଙ୍ଗ୍ ଇର୍ହାନ୍, “ନାନ୍ ଆୟା ଜିବନ୍ ସିନି କାଦି, ଏନ୍ ନା ଲାକ୍ତୁ ୱାନ୍ନାନ୍, ୱାନ୍ ମୁଡ଼ୁକେ ବାଙ୍ଗାଁ ସାଏନ୍, ମାରି ଏନ୍ ନା ମାନୁ ବିସ୍ବାସ୍ କିନାନ୍, ୱାନ୍ ମୁଡ଼ୁକେ ଏର୍କିସାଏନ୍ । 36ମାତର୍ ମିର୍ ନାଙ୍ଗିଁ ସୁଡ଼ୁତିଙ୍ଗ୍ ବା ବିସ୍ବାସ୍ କିଇଜିନିଦେର୍, ଇକା ନାନ୍ ମିଙ୍ଗିଁ ୱେର୍ତାମାନା । 37ବୁବା ଜେ ୱିଜେରିଙ୍ଗ୍ ନାଙ୍ଗିଁ ଦାନ୍ କିନାନ୍, ୱାର୍ ନା ଲାକ୍ତୁ ୱାନାର୍; ମାରି, ଏନ୍ ନା ଲାକ୍ତୁ ୱାନାନ୍, ୱାନିଙ୍ଗ୍ ନାନ୍ ଇନି ୱାଜାବା ସୋପ୍ତେଙ୍ଗ୍ ଆଟ୍ଏ; 38ଇରିଙ୍ଗ୍ ନା ନିଜେଦି ବଦାଦାନ୍ଦିଙ୍ଗ୍ ପୁରା କିଦେଙ୍ଗ୍ ସିଲେ, ମାତର୍ ନା ପୋକ୍ତିୱାନି ବଦା ପୁରା କିଦେଙ୍ଗ୍ ନାନ୍ ମୁସ୍କୁପୁର୍ତାନ୍ ୱାତାମାନା । 39ମାରି, ନା ପୋକ୍ତିକାନ୍ ଜେ ୱିଜେରିଙ୍ଗ୍ ନାଙ୍ଗିଁ ସିତାମାନାନ୍, ନାନ୍ ୱାରି ମାଣୁକୁ ଅରେନ୍ୱାନିଙ୍ଗ୍ ବା ଆରାକିଏ, ନାନ୍ ୱିଜିନି ନାଣ୍ତିଙ୍ଗ୍ ଆୟା ୱିଜେରିଙ୍ଗ୍ ମାରିଡ଼େସି ଜିବନ୍ କିନା, ଇକା ୱାନି ବଦା । 40ଇରିଙ୍ଗ୍ ଏନ୍ ମାରିସିଙ୍ଗ୍ ସୁଡ଼୍ଜି ୱାନିମାନୁ ବିସ୍ବାସ୍ କିନାନ୍, ୱାନ୍ ଏଣ୍ତେସ୍ ଏସ୍କାଙ୍ଗ୍ୱିଜ୍ଇ ଜିବନ୍ ପୟ୍ନାନ୍, ଇକାନେ ନା ବୁବାଦି ବଦା; ଇୟାଉଣ୍ତିଙ୍ଗ୍ ନାନ୍ ୱିଜିନି ନାଣ୍ତିଙ୍ଗ୍ ଆୟା ୱିଜେରିଙ୍ଗ୍ ମାରିଡ଼େସି ଜିବନ୍ କିନା ।”
41ନାନ୍ ମୁସ୍କୁପୁର୍ତାନ୍ ରେତାତିମାନି କାଦି, ୱାନ୍ ଇକା ଇର୍ହାନ୍ଆକା ଜିହୁଦିର୍ ଜିସୁଦି ବିରଦ୍ତାନ୍ ନିଦା କିଦେଙ୍ଗ୍ ଆସ୍ତାର୍ । 42ମାରି ୱାର୍ ଇର୍ହାର୍ “ଇକାନ୍ ଇନିକା ଜୋସେପତି ମାରିନ୍ ଜିସୁ ଆଏନ୍ ? ମାରି ମାପ୍ ୱେନି ବୁବାୟାୟାଙ୍ଗ୍ ନେସ୍ନାପ୍ ଆରିଙ୍ଗ୍ ନାନ୍ ମୁସ୍କୁପୁର୍ତାନ୍ ରେତାତାମାନା ଇଜି ୱାନ୍ ଇଲେ ଏଣ୍ତେସ୍ ଇଜିନାନ୍ ?”
43ଜିସୁ ୱାରିଙ୍ଗ୍ ଇର୍ହାନ୍, “ନିଜେ ନିଜେଦି ମାନୁ ନିଦା କିମାଟ୍ । 44ନାଙ୍ଗିଁ ପୋକ୍ତାତିମାନି ବୁବା ଏମେୱାନିଙ୍ଗ୍ ଆସ୍ କିନାନ୍, କେବଲ୍ ୱାନ୍ ନା ଲାକ୍ତୁ ୱାଦେଙ୍ଗ୍ ଆଟ୍ନାନ୍, ମାରି ନାନ୍ ୱିଜିନି ନାଣ୍ତିଙ୍ଗ୍ ଆୟା ୱିଜେରିଙ୍ଗ୍ ମାରିଡ଼େସି ଜିବନ୍କିଜି କିନା । 45ବାବବାଦିର୍ ଦାର୍ମୁସାସ୍ତ୍ରଦୁ ରାସ୍ତା ମାନାର୍, ୱିଜେରେ କେବଲ୍ ମାପୁରୁଦି ମାଣାନ୍ ସିକିୟା ପୟ୍ନାର୍ । ଏନ୍ଆପିନ୍ ବୁବାଦିମାଣ୍ନା ୱେନ୍ଜି ସିକିୟା ପୟ୍ନାନ୍, ୱାନ୍ ନା ଲାକ୍ତୁ ୱାନାନ୍ । 46ତେନି ଅର୍ତ ଆଏତ୍ ଜେ, ୱାନ୍ ବୁବେଙ୍ଗ୍ ସୁଡ଼ୁତା ମାନ୍ନାନ୍, ଏନ୍ ମାପୁରୁଦିମାଣ୍ନା ୱାତାମାନ୍ନାନ୍, କେବଲ୍ ୱାନ୍ନେ ବୁବେଙ୍ଗ୍ ସୁଡ଼ୁତାମାନ୍ନାନ୍ । 47ସତେ ସତେନେ ନାନ୍ ମିଙ୍ଗିଁ ଇଜିନା, ଏନ୍ ବିସ୍ବାସ୍ କିନାନ୍, ୱାନ୍ ଏସ୍କାଙ୍ଗ୍ୱିଜ୍ଇ ଜିବନ୍ ପୟ୍ତାମାନାନ୍ । 48ନାନ୍ ଜିବନ୍ ସିନି କାଦି । 49ମି ପୁର୍ବେଦିଡକ୍ରାଦାଦାର୍ ସୁନ୍ସାନ୍ବାଡିଦୁ ମାନ୍ନା ଉଟାର୍ ଆରିଙ୍ଗ୍ବା ସାତାସର୍ହାର୍ । 50ମାତର୍ ଏମେ କାଦି ମୁସ୍କୁପୁରୁତାନ୍ ୱାନାତ୍, ତାନିଙ୍ଗ୍ ଏନ୍ ଉଣାନ୍ ୱାନ୍ ଏସ୍କାଙ୍ଗ୍ୱିଜ୍ଇ ଜିବନ୍ ପୋୟ୍ନାନ୍ । 51ନାନ୍ ମୁସ୍କୁପୁରୁତାନ୍ ୱାତିମାନି ଆୟା ଜିବନ୍ତି କାଦି, ଏନ୍ ଜଦି ଇୟା କାଦି ଉଣୁନାନ୍, ୱାନ୍ ଏସାଙ୍ଗ୍ୱିଜ୍ଇଦିନ୍ ସାନ୍ଧି ଜିବନ୍ ମାନାନ୍; ହୁଁ, ନାନ୍ ଏମେ କାଦି ସିନା, ଆକା ନା କାଣ୍ତା, ନାନ୍ ଆକା ଦୁନିଆଦିଙ୍ଗ୍ ଜିପିସ୍ନି ଉଣ୍ତିଙ୍ଗ୍ ସିନା ।”
52ଆବେଟ୍ ଜିହୁଦିର୍ ନିଜେନିଜେଦିମାନୁ ଗିଦ୍ରିଆଜି ଜାଟି କିଦେଙ୍ଗ୍ ଆସ୍ତାର୍, “ଇକାନ୍ ଏଣ୍ତେସ୍ ମାଙ୍ଗିଁ ନିଜେଦି କାଣ୍ତା ତିନ୍ଡ୍ରେଙ୍ଗ୍ ସିଦେଙ୍ଗ୍ ଆଟ୍ନାନ୍ ?”
53ଆବେଟ୍ ଜିସୁ ୱାରିଙ୍ଗ୍ ଇର୍ହାନ୍, “ସତ୍ ସତ୍ ନାନ୍ ମିଙ୍ଗିଁ ଇଜିନା, ମନୁସ୍ୟପୁତ୍ରଦି କାଣ୍ତା ତିନ୍ଏତିଙ୍ଗ୍ ମାରି ୱାନି ନେତେର୍ ଉଣୁଏତିଙ୍ଗ୍, ମିର୍ ଜିବନ୍ ପୋୟ୍ଦେଙ୍ଗ୍ ଆଟ୍ଇଦେର୍ । 54ଏନ୍ ନା କାଣ୍ତା ତିନ୍ନାନ୍ ମାରି ନା ନେତେର୍ ଉଣୁନାନ୍, ୱାନ୍ ଏସ୍କାଙ୍ଗ୍ୱିଜ୍ଇ ଜିବନ୍ ପୟ୍ନାନ୍, ମାରି ନାନ୍ ୱିଜିନି ନାଣ୍ତିଙ୍ଗ୍ ୱାନିଙ୍ଗ୍ ନିକ୍ନା । 55ଇରିଙ୍ଗ୍ ନା କାଣ୍ତା ସତେନେ କାଦି ମାରି ନା ନେତେର୍ ସତେନେ ଏରୁ । 56ଏନ୍ ନା କାଣ୍ତା ତିନ୍ନାନ୍ ମାରି ନା ନେତେର୍ ଉଣୁନାନ୍, ୱାନ୍ ନା ମାନୁ ତେବାନାନ୍ ମାରି ନାନ୍ ୱାନିମାନୁ ତେବାନା । 57ଜିବନ୍ମାନି ବୁବା ନାଙ୍ଗିଁ ପୋକ୍ତାମାନାନ୍ ମାରି ନାନ୍ ୱାନି ଉଣ୍ତିଙ୍ଗ୍ ଜିବନ୍ ମାନା, ଆୟାୱାଜା ଏନ୍ ନାଙ୍ଗିଁ ଉଣୁନାନ୍, ୱାନ୍ ବା ନା ଉଣ୍ତିଙ୍ଗ୍ ଜିବନ୍ ତେବାନାନ୍ । 58ଏମେ କାଦି ମୁସ୍କୁପୁରୁତାନ୍ ୱାତାମାନାତ୍, ଆୟାକା ଇକା; ପୁର୍ବେଦିଡକ୍ରାଦାଦାର୍ ଏଣ୍ତେସ୍ ଉଟାର୍ ସାତାସର୍ହାର୍, ଇକା ଆୟାୱାଜା ସିଲେ; ଏନ୍ ଇୟା କାଦି ଉଣୁନାନ୍, ୱାନ୍ ଏସାଙ୍ଗ୍ୱିଜ୍ଇଦିନ୍ ସାନ୍ଧି ଜିବନ୍ ତେବାନାନ୍ ।”
59ଜିସୁ କପର୍ନାହୁମ୍ତି ଉନ୍ଡ୍ରି ପାର୍ତନା ଇଲୁତୁ ସିକିୟା ସିନିୱାଲେ ଇୟାୱିଜୁ ମାଟା ୱେର୍ତାନ୍ ।
ଏସ୍କାଙ୍ଗ୍ୱିଜିଇ ଜିବନ୍ତି ବାକ୍ୟ
60ମାରି, ଜିସୁଦି ସିସୁରି ମାଣ୍କୁ ଏସଲୋକ୍ ଇକା ୱେନ୍ଜି ଇର୍ହାର୍, “ଇୟା ସିକିୟା ବୁଜାଦେଙ୍ଗ୍ ବଡ଼େ କାସ୍ଟୁ, ଏନ୍ ଇକା ୱେନ୍ଡ୍ରେଙ୍ଗ୍ ଆଟ୍ନାନ୍ ?”
61ଇୟା ବିସୟ୍ତାନ୍ ଜିସୁଙ୍ଗୁଁ ଏନ୍ ଇନିକା ଇନ୍ଏତି ମାରିଙ୍ଗ୍ ବା ସିସୁର୍ ୱାରି ଲୋଇ ନିଦା କିଜିନାର୍ ଇଜି ନେସ୍ସି ଜିସୁ ୱାରିଙ୍ଗ୍ ଇର୍ହାନ୍, “ଇକା ଇନିକା ମିଙ୍ଗିଁ ବାଦା ଆଜିନାତ୍ ? 62ମନୁସ୍ୟପୁତ୍ର ଆଗ୍ଡ଼ି ଏମେ ବାଡିଦୁ ମାର୍ହାନ୍, ଆୟା ବାଡିଦୁ ଏସ୍କାଙ୍ଗ୍ ୱାନିଙ୍ଗ୍ ସନିକା ସୁଣିଦେର୍, ଆରିଙ୍ଗ୍ ମିର୍ ଇନିକା କିନିଦେର୍ ? 63କେବଲ୍ ମାପୁରୁଦି ଆତ୍ମା ଜିବନ୍ ସିନାତ୍; ଲୋକା ସାକ୍ତି ଇନି ପାଣିକିଦେଙ୍ଗ୍ ଆଟ୍ଏତ୍; ମାପୁରୁଦି ଆୟା ଜିବନ୍ ସିନି ଆତ୍ମାଦିଙ୍ଗ୍ ମିର୍ ଏଣ୍ତେସ୍ ନେସ୍ନିଦେର୍, ଆୟାଉଣ୍ତିଙ୍ଗ୍ ନାନ୍ ଇୟାୱିଜୁ ମାଟା ଇର୍ଆ । 64ଆତିଙ୍ଗ୍ବା ମି ମାଣ୍କୁ ଏନ୍ ଏନ୍ ବିସ୍ବାସ୍ କିଏଜିନାର୍ । ଇରିଙ୍ଗ୍ ଜିସୁଙ୍ଗୁଁ ଏର୍ ବିସ୍ବାସ୍ କିଏର୍ ମାରି ଏନ୍ ୱାନିଙ୍ଗ୍ ସାତ୍ରୁରି କିୟୁଦୁ ସର୍ପେ କିନ୍ନାନ୍, ଆକା ଜିସୁ ଆଗ୍ଡ଼ିରାନ୍ନେ ନେସ୍ତା ମାର୍ହାନ୍ । 65ମାରି ୱାନ୍ ଇର୍ହାନ୍, ଇୟାଉଣ୍ତିଙ୍ଗ୍ ନାନ୍ ମିଙ୍ଗିଁ ଇର୍ଆମାନା, ବୁବାସିମାଣାନ୍ ପକ୍ଏତିଙ୍ଗ୍ ଏନ୍ ନା ଲାକ୍ତୁ ୱାଦେଙ୍ଗ୍ ଆଟ୍ଏନ୍ ।”
66ଆୟାୱାଲେରାନ୍ ଜିସୁଦି ସିସୁରି ମାଣ୍କୁ ଏସଲୋକ୍ ୱେର୍ଏ ଏର୍ଜି ସତାସର୍ହାର୍, ମାରି ୱାନି ୱାଲେ ମାରି ବୁଲାସାଲା କିଏତାର୍ନି । 67ଆବେଟ୍ ଜିସୁ ବାରଲୋକ୍ ସିସୁରିଙ୍ଗ୍ ୱେନ୍ବାତାନ୍, “ମିର୍ ବା ଇନିକା ନାଙ୍ଗିଁ ଡ଼ିସ୍ସି ସନ୍ଡ଼୍ରେଙ୍ଗ୍ ବଦା କିଜିନିଦେର୍ ?”
68 #
ମାତିଉ ୧୬:୧୬; ମାର୍କ ୮:୨୯; ଲୁକ ୯:୨୦. ସିମୋନ ପିତର୍ ଜିସୁଙ୍ଗୁଁ ଇର୍ହାନ୍, “ପ୍ରବୁ, ଏ ଲାକ୍ତୁ ସନାଟ୍ ? ନି ଲାକ୍ତୁ ଏସ୍କାଙ୍ଗ୍ୱିଜିଇ ଜିବନ୍ତି ବାକ୍ୟ ମାନାତ୍; 69ମାରି, ନିନ୍ ଜେ ମାପୁରୁଦି ମାଣାନ୍ ୱାତିମାନି ଆୟା ପବିତ୍ର ଲୋକୁ, ଇକା ମାପ୍ ବିସ୍ବାସ୍ କିତାମାନାପ୍ ମାରି ନେସ୍ତାମାନାପ୍ ।”
70ଜିସୁ ୱାରିଙ୍ଗ୍ ଇର୍ହାନ୍, “ନାନ୍ ଇନିକା ମି ବାରଲୋକାଙ୍ଗ୍ ଆସ୍କିଏ ନୋ ? ମାରି, ମି ମାଣ୍କୁ ଅରେନ୍ ସୟତାନ୍ ।” 71ଜିସୁ ଇସ୍କାରିୟୋତିୟ ସିମୋନତି ମାରିନ୍ ଜିହୁଦାଦିଙ୍ଗ୍ ସୁଡ଼ୁଜି ଇକା ଇର୍ହାନ୍, ଇରିଙ୍ଗ୍ ୱାନ୍ ବାରଲୋକ ସିସୁରି ମାଣ୍କୁ ଅରେନ୍, ମାରି ୱାନ୍ ୱାନିଙ୍ଗ୍ ସାତ୍ରୁରି କିୟୁଦୁ ସର୍ପେ କିଦେଙ୍ଗ୍ ସଲ୍ସି ମାର୍ହାନ୍ ।
Selectat acum:
ଜୋହନ 6: NTKoo20
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
