Israelfɔ Ɩlʋ 25
25
Nana Bulu, Suna Mɩ Fʋ Ɔtsʋnkpa
Dawid ɩlʋ.
1Oo! Nana Bulu, fʋsʋ napʋ mɩ ɩklʋn dɩnka.
2Oo! mɩ Bulu, fʋsʋ mɩ ansɩ dɩn.
Máha pɛlɩ ɩkɩta mɩ.
Máha ansɩ igyi mɩ alupʋ mɩ sʋ.
3Lɛlɛ mʋ́ a, pɛlɩ mɛ́ɛkɩta aha ánɩ́ amʋ́ ansɩ dɩn fʋsʋ ɛkɛkɛɛkɛ.
Aha ánɩ́ bʋtamagyi amʋ́ asʋn blɩhɛsʋ mboun pɛlɩ bɛ́kɩta.
4Oo Nana Bulu, ha mɩ ambɩ fʋ ɩkpa.
Suna mɩ fʋ ɔtsʋnkpa.
5Kpa mɩ ambuo fʋ ɔnɔkwalɩ,
afʋsuna mɩ atɔ,
tsufɛ fʋgyi mɩ nkpa ɔhɔpʋ Bulu.
Fʋ ansɩtɔ ndɛkɩ ɔyɩkɛhɛ fɛ́ɛ́.
6Anɩ Wie Bulu, kaɩn fʋ nwewun pʋ́ fʋ ɔdwɛá ɩma ɔkasʋ,
tsufɛ ɩbʋ nʋ tsu bɩmbɩ ɔpá.
7Nana Bulu, mákaɩn mɩ nyebitɔ lakpan mʋ́a mɩ bwɛhɛ lalahɛ.
Mboun fʋ ɔdwɛá ɩma ɔka pʋ́ fʋ wanklaan sʋ kaɩn mɩsʋ.
8Ɔha wanklaan Nana Bulu gyi.
Mʋ asʋn da ɔkpa.
Mʋ́ sʋ otosuna lakpan abwɛpʋ ɔkpa.
9Ɔtɛkpa ɩwɩasɩ abapʋ, bʋtɔbwɛ yile.
Otosuna amʋ́ mʋ ɔkpa.
10Nana Bulu ɩkpa fɛ́ɛ́ igyi ɔdwɛá ɩma ɔka mʋ́a ɔnɔkwalɩ,
ha mʋ ntam pʋ́ ɔnɔá ɔlɛlɛsʋ agyipʋ.
11Oo Nana Bulu! Fʋ ɩda sʋ si mɩ lalahɛ kie mɩ.
Ɩbʋ mʋ́tɔá ilomoni dʋbɩ.
12Ma tenya Nana Bulu ifu?
Mʋgyi ɔha ánɩ́ Nana Bulu tosuna ɔtsʋnkpa.
13Mʋ obétsia ɔdwɛtɔ,
mʋ abi-aná bégyi ɔsʋlʋ amʋ.
14Nana Bulu tɛlɛ mʋ nwuntɔ asʋn suna mʋ ifu anyapʋ.
Ɔtɛha bʋtɛbɩ mʋ ntam.
15Mɩ ansɩ dɩn Nana Bulusʋ brɛ fɛ́ɛ́,
tsufɛ mʋ ɔbɛ́lɛ mɩ ayabi lɛ ayibitɔ.
16Damli ansɩ kɩ mɩ, afʋwun mɩ nwɛ.
Tsufɛ ɔbakʋlɛ ngyi.
Mɩ ɩla bʋ nwɛ.
17Nwɛla ɩtɔ mɩ klʋntɔ.
Lɛ mɩ tsu mɩ ɩkplantɔ.
18Kɩ mɩ ɩkplan pʋ́ mɩ asʋn wunhɛ,
afʋsi mɩ lalahɛ fɛ́ɛ́ kie mɩ.
19Kɩ alɩá mɩ alupʋ bʋhɩɛ bʋtsɔ,
bapʋ owuntɔlɩn bʋdɛ mɩ lu.
20Kpla mɩ ɔkla wa ɩwɩtɔ, afʋlɛ mɩ.
Máha pɛlɩ ɩkɩta mɩ, tsufɛ fʋ nasrɩ tanʋ.
21Fʋsʋ mɩ ansɩ dɩn, gyo mɩ ɩwɩ;
tsufɛ mɩ asʋn da ɔkpa, ɔlala ma mɩ ɩwɩ.
22Oo Bulu, lɛ Israelfɔ
lɛ amʋ́ ɩkplan fɛ́ɛ́tɔ.
Selectat acum:
Israelfɔ Ɩlʋ 25: nko
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation