Luuka 12

Ʉlʉpavɨlo pa kulongwi jya vʉnuasi

(Mataayo 10:26-27)

1Ʉnsɨkɨ ʉgwa, avaanu avaelufu na vaelufu vaalʉndamiine kukʉmpʉlɨhɨtsa ʉYɨɨsʉ. Vaale vongosu ʉkʉsikila pa kʉkadana wʉ vihegelela kʉ mwene. Pwʉ ʉYɨɨsʉ akatsova taasi kʉ vakongi va mwene akata, “Mwɨlolelage nʉ vʉnuasi wa Vafalisayo, ʉlwakʉva wikola ʉta kɨlʉve.#12:1 Kɨlʉve Apa ɨlimenyu ɨlɨ lyɨmile pa kʉvonia ɨlisongo ɨliviivi ɨlya Vafalisayo ɨlyʉ vaale nalyo. Avo navaamwɨdɨkage ʉYɨɨsʉ ikange vaakwɨtsiitse ɨlisongo ɨlyo kʉ vaanu avange. 2Ʉnsɨkɨ gukwitsa, ʉpwʉ gooni agalɨ kʉvʉtiitu galaava pavʉvalasu, ikange gooni ʉgwʉ gasihamiike, galamanyikika. 3Lɨno, gooni ʉgwʉ mwitsova kʉvʉtiitu, galapʉlɨkɨka pavʉvalasu. Ikange, gooni ʉgwʉ munongʼona mu sijumba sya kʉgati, galalʉmbɨlɨlwagwa pavʉlongolo pa vaanu vongosu.”

ɄNgʉlʉve mwene vɨ anogye ʉkʉdwadwa

(Mataayo 10:28-31)

4ɄYɨɨsʉ akagendelela ʉkʉtsova akata, “Ʉnyie nyɨ vamanyaani vango, ndikʉvavʉʉla ʉkʉta, muleke ʉkʉvadwada avibuda ʉmmana gwene. Ikange wʉ vabudile, nakɨkʉli ɨkɨnge ɨkyʉ viweesa ʉkʉvomba. 5Apeene, ndɨvavʉʉle ʉvɨ munogye ʉkʉnʼdwada. Munʼdwadage ʉNgʉlʉve ʉvɨ alɨ nago amaka ga kʉntaaga kʉ mwoto gwa sikutsooni#12:5 Mwoto gwa sikutsooni kwʉ kʉta apoonu pa vʉpala wa sikutsooni, apakʉtaagwa avaanu ʉwʉ vikʉmʼbeela ʉYɨɨsʉ ni manyiiso tsa mwene. najyʉ muunu ʉvɨ abudilwe. Tsa jɨlweli! Ndikʉvavʉʉla ʉkʉta, ʉjwa vɨ mwene munʼdwadage!

6“Ndeeti, isidege sihaano nasigʉtsiwa kʉ ndalama ndebe vʉvʉle? Nʉpwʉ jɨngave wʉ jɨlɨwo, ʉNgʉlʉve nikʉkɨsaamwa nɨkɨpamato. 7Lɨno kʉ lʉvasu lwanyie, ʉNgʉlʉve avalile natsi nzwɨlɨ tsa mitwe giinyo. Pwʉ lɨno mulekage ʉkʉdwada ʉlwakʉva ʉnyie mulɨ nawo ʉwɨɨmɨkiwa ʉkʉlʉtɨɨlɨla isidege.

Ʉkwɨpaala pavʉvalasu ʉlwɨdɨko

(Mataayo 10:32-33; 12:32; 10:19-20)

8“Ndikʉvavʉʉla ʉkʉta, ʉmuunu ʉvaveetsaga ʉvɨ ikɨpaala kʉ vaanu ʉkʉta ikʉngʼonga ʉne, najyʉne ndɨ Mwana va Muunu ndɨlambʉʉla ʉNgʉlʉve na vasuungʼwa va mwene ʉkʉta, ʉjwa inkongi vango. 9Lɨno ʉmuunu ʉvaveetsaga ʉvɨ ikʉmbeela pavʉlongolo pa vaanu, najyʉne ndɨlamʼbeela pavʉlongolo pa Ngʉlʉve na vasuungʼwa va mwene. 10Ʉmuunu ʉvaveetsaga ʉvɨ ikʉnʼdʉka ʉMwana va Muunu, alasyɨkɨlwa. Lɨno, ʉvɨ ikʉnʼdʉka ʉMepo ʉMbalatse, ʉjwa nalasyɨkɨlwe.

11“Ʉpwʉ valaava vikʉvahɨlɨka pa vʉhɨgi, pa vakʉlʉdeeva na pa vanya vʉtavʉlɨlwa, mwitse mulekage ʉkʉdwada ʉkʉta jʉmwitsova kɨki evo jʉmukwanda kɨki, 12manya ʉnsɨkɨ gʉʉgwa, ʉMepo ʉMbalatse alavamanyiisa ʉwɨgane wa Ngʉlʉve ʉwʉ mulatsovaga.”

Ɨkɨhwananitso kya muunu ʉmmosu ʉmpelwa

13Ʉmuunu mpamato mu kɨpʉga kɨlya akambʉʉla ʉYɨɨsʉ akata, “IMmanyisi, ndidoova ʉmbʉʉle ʉlʉkololwango ʉkʉta angavɨle isiinu sya vʉhaale, isyʉ aatʉlekye ʉdadajiitu.” 14ɄYɨɨsʉ akamwanda akata, “Veeni ʉvɨ ambɨɨkile ʉne ʉkʉva mmɨgi viinyo, evo ʉkʉva muunu va kʉgavania ʉvʉhaale wiinyo?” 15Pwʉ akavavʉʉla avaanu vooni akata, “Mwɨlolelage! Mwɨlekelwe ʉkʉva nʉ mwojo gwa kɨɨnu ɨkɨveetsaga, ʉlwakʉva ʉwʉʉmi wa muunu nawɨtotiiki mu wongosu wa siinu sya mwene isyʉ alɨ nasyo.”

16Pwʉ akavavʉʉla ɨkɨhwananitso ɨkɨ akata, “Aalepwo ʉmmosu mpamato, ʉvɨ isiinu syamotiike siitso mu kɨlɨmɨla kya mwene. 17Akɨvʉʉtsa mu numbula jya mwene akata, ‘Isiinu syango isi napapali apoonu pa kʉvɨɨka! Ndɨgahe ndeeti?’ 18Pwʉ akata, ‘Ndɨpivomba ndee: Ndɨpimamula isibaana syango, nʉ kʉtsenga isibaana isinge isivaha siitso. Ʉmwa mwʉ mwene jʉndihwanga ʉvʉbeni wango wooni ni singe isinonu isyʉ ndɨlɨ nasyo. 19Apo pwʉ jʉndiita, “Gwe numbula jyango, ʉlɨ nasyo isiinu syongosu isinonu sya kʉkʉtanga ɨmyaka myongosu. Lɨno, gatalʉka, ʉlitsage nʉ kʉnywa, ʉhovoke.” ’ 20Pwʉ ʉNgʉlʉve akambʉʉla akata, ‘Vɨ mpelwa ʉve! Ɨkɨlo ɨjɨ wiiswa! Isiinu syoni isyʉ ʉhwangile, jʉsiveetsaga syani?’

21“Ɨlyo wʉ lɨlaava, kʉ muunu ʉvaveetsaga ʉvɨ ikɨlʉndamanihitsa isiinu mu kɨlʉnga ʉmʉ, kɨtsila kʉvomba itsʉ ʉNgʉlʉve ikeela.”

Ʉkʉmmʉʉvɨla ʉNgʉlʉve

(Mataayo 6:25-34)

22Pwʉ ʉYɨɨsʉ akavavʉʉla avakongi va mwene akata, “Lɨno, mwɨlekelwe ʉkʉtʉngʉtsiima, pa kulongwi tsa wʉʉmi wiinyo ʉkʉta mulitsaga kɨki, evo ʉkʉta ɨmihana giinyo muswalaga kɨki. 23Ndeeti, ʉwʉʉmi nawʉ vʉlʉti pa kyakʉlya, nʉ mmana nagwene nagwʉ ndʉti pa misabwa? 24Lolelagi kʉ mahoove, nagivyala pange kʉbena isiinu nʉ kʉvɨɨka mu sibaana. Ʉmwene ʉNgʉlʉve ikʉgaliisa. Lɨno ʉnyie musaagɨlɨlwa siitso nʉ Ngʉlʉve ʉkʉlʉtɨɨlɨla isidege!

25“Veeni pagati paanyie ʉvɨ iweesa atʉngʉtsiime oongeletse ʉwʉʉmi wa mwene ndajɨve akavalɨlo kapamato? 26Lɨno, mungave mulemwa ʉkʉvomba ɨkɨɨnu ɨkɨdebe ndɨɨkyo, kɨki mutʉngʉtsiima na gange?

27“Lolelagi kʉ vʉlʉva ʉmwʉ vukʉlɨla. Navuvomba ɨmbombo pange kʉhona ɨmisabwa gya weene gya kʉswala. Pwʉ ndikʉvavʉʉla ʉkʉta, najyʉ Solomoni mu wɨɨmɨkiwa wa mwene wooni, naagele ʉkʉswala ɨmisabwa nʉ kʉnogela ndʉ vʉlʉva vʉpamato mwʉvʉ! 28Ɨngave ʉNgʉlʉve ikʉlʉswɨka ewo ʉlʉhamba ʉvʉlʉva, nʉpwʉ jɨngave lunogela kʉ nsɨkɨ nʼdebe vʉvʉle, akasɨkɨ akikonga lukwʉma nʉ kʉnyianywa, ndeeti, ʉNgʉlʉve nakalʉtɨɨlɨle ʉkʉvaswɨka ʉnyie, mwe vaanu va lwɨdɨko lʉdebe?

29“Lɨno, mwɨlekelwe ʉkʉtʉngʉtsiima ʉkʉta jʉmulitsaga kɨki, evo jʉmunywetsaga kɨki, ikange mwɨlekelwe ʉkʉnyanyamala. 30Isiinu isyo syʉ vitʉngʉtsiima nasyo avaanu ʉwʉ navammanyili ʉNgʉlʉve, nʉ Dadajiinyo alʉmanyile vʉnonu ʉkʉta najyʉnyie mulonda ʉkʉva ni siinu isyo. 31Londagi taasi ʉLʉdeeva lwa Ngʉlʉve,#12:31 Londagi taasi ʉLʉdeeva lwa Ngʉlʉve Ɨkɨtsovo ɨkɨ nakilotsa kwita ʉLʉdeeva lwa Ngʉlʉve lʉjagile evo lʉsihamiike pakʉta tʉlʉlonde, apeene kwʉ kʉta tʉnogye ʉkwɨhʉmya nʉ kʉmwɨdɨkɨla ʉNgʉlʉve ʉnsɨkɨ gwoni mu wʉʉmi wiitu. Ʉvʉlʉvʉlʉ ʉvʉnge kwʉ kʉta ʉYɨɨsʉ ikʉtʉmanyiisa ʉmwʉ tʉnogye ʉkʉtaama twɨ vɨɨdɨki va Ngʉlʉve. pwʉ isyo syoni mukwongeletsiwaagwa.

Ʉvʉmosu wa kʉkyanya kwa Ngʉlʉve

(Mataayo 6:19-21)

32“Mwɨlekelwe ʉkʉdwada, ʉnyie nyɨ kɨpʉga ɨkɨdebe ʉlwakʉva ʉDadajiinyo va kʉkyanya, inogwa ʉkʉvapa ʉLʉdeeva lwa mwene. 33Mugʉtse isiinu siinyo, nʉ kʉvapa avagatsu indalama itso. Ʉkwa kwʉ kʉvɨɨka ɨkɨbaana kʉkyanya ʉkwʉ isiinu nasikeepa. Ɨmipako gya kʉvɨɨkɨla gya kwene ʉkwa naginyakasʉka. Ikange nakʉli ʉmmɨɨtsi ʉvɨ ihegelela kuhɨɨtsa pange ʉmehe ʉkʉlya isiinu, 34manya ʉpwʉ kɨlɨpwo ɨkɨbaana kiinyo, pwʉ peene natsi numbula tsiinyo tsilaava.

Avaanu vataamage vɨsaawe pa kwitsa kwa Ntwa

35“Isigono syoni mutaamage mwɨsaawe pa kʉvomba ɨmbombo jya Ngʉlʉve, natsi nyaale tsiinyo tsitaamage tsiviika. 36Muveetsage nda vavombi ʉwʉ vikʉmpʉlɨkɨla ʉmbaha va veene akilivuke ʉkʉhʉma kʉ vʉtegʉlanie, pakʉta ʉnsɨkɨ ʉgwʉ jiikwitsa nʉ kʉkongʼoona ʉndyango, vanʼdɨndʉlɨle ʉnsɨkɨ gʉʉgwa. 37Vagatalʉsu avavombi ʉwʉ ʉmbaha va veene angiitse, jiikʉvavona valɨ miiho. Tsa jɨlweli ndikʉvavʉʉla ʉkʉta, jiikɨnotsa pakʉta avavombele, jiikʉvɨɨlanga pa kʉlya nʉ kʉvapa ɨkyakʉlya. 38Vagatalʉsu avavombi avo, ʉwʉ ʉmbaha va veene angiitse mu kɨlogati evo wʉ kutandaalʉka, avavone valɨ miiho.

39“Lɨno mulʉmanye vʉnonu ʉkʉta ɨkaale jɨve ʉmwenenyumba agʉmanyile ʉnsɨkɨ ʉgwʉ ʉndyasi ikwitsa, akaale ikʉnsiga ʉndyasi aleke ʉkʉmamula ɨnyumba jya mwene. 40Lɨno najyʉnyie, mutaamage mwɨsaawe, manya ʉMwana va Muunu, aliitsa ʉnsɨkɨ ʉgwʉ namuhʉʉvɨla.”

Ɨkɨhwananitso kya mbanda ʉmmʉʉgʉ nʉ mbiivi

(Mataayo 24:45-51)

41Pwʉ ʉPetulo akavʉʉtsa akata, “Gwe Ntwa, ɨkɨhwananitso ɨkɨ, vukʉtʉvʉʉla ʉwe twɨ veene evo vukʉvavʉʉla avaanu vooni?” 42ɄNtwa akamwanda akata, “Ʉmbanda ʉmmʉʉgʉ, ʉnya lʉhala vyalɨku? Vyʉla ʉvɨ ʉmbaha va mwene ambɨɨkile ave mwɨmɨɨlɨtsi va vavanda avange mu nyumba jya mwene pakʉta ave ikʉvapa ɨkyakʉlya kʉ nsɨkɨ ʉgʉnogelanie. 43Inʼgatalʉsu ʉmbanda ʉlya ʉvɨ ɨngave ʉmbaha va mwene ikilivuka ʉkwʉ aalʉtile, ivona ivomba ndʉwʉ aandagye. 44Tsa jɨlweli ndikʉvavʉʉla ʉkʉta, ʉmbaha va mwene jiikʉmbɨɨka ʉmbanda ʉjwa ɨɨmɨɨlɨlage isiinu sya mwene syoni. 45Lɨno, ʉmbanda ʉjwa angasaage mu numbula jya mwene ate, ‘Ʉmbaha vango itsilɨndɨla ʉkʉkilivuka,’ apo itengʉla ʉkʉvatova avavandavanine, avagoosi na vadala, ikange ilitsaga nʉ kʉnywa paninie na vagaatsi. 46Lola, ʉmbaha va mwene ʉjwa jiikilivuka mu kɨgono na mu nsɨkɨ ʉgwʉ ʉmbanda va mwene nakahʉʉvɨle. Pwʉ ʉmbaha ʉjwa jiikʉmpa ʉlʉvʉngʉ ʉlʉlʉti, pa kʉvomba ewo iiva amanziitse kʉ vatava vɨɨdɨki.

47“Ʉmbanda ʉjwa ʉvɨ avʉmanyile ʉvʉnogwe wa mbaha va mwene, napeene ikɨlekelwa ʉkwɨsaavʉla amwʉpɨlɨle, nʉ kʉvomba ndʉwʉ inogwa ʉmbaha va mwene, ʉjwa jiitowa siitso. 48Apeene ʉmbanda ʉvɨ navʉmanyili ʉvʉnogwe wa mbaha va mwene, angavombe sivi, ʉjwa jiitowa padebe. Ʉmuunu ʉvaveetsaga ʉvɨ apeevilwe syongosu, ʉjwa alatsigilwa syongosu, ʉvɨ apeevilwe ɨmbombo ɨmbaha, alatsigilwa ʉkʉhʉmya ɨkulongwi jya vʉvombi wa mbombo ɨmbaha.

Ʉvʉsʉʉlani pa kulongwi jya lwɨdɨko

(Mataayo 10:34-36)

49“Nditsile mu kɨlʉnga ʉmʉ kukotsa ʉmwoto. Hʉba gʉkaale gʉve gʉtengwe ʉkʉviika! 50Nʉʉne ndɨlɨ nʉ vʉkʉvɨlwa ʉwʉ pannogye ʉkwʉpɨlɨla, ikange ndigendelelaga ʉkʉlemala mu numbula jyango ʉkʉsikila ʉpwʉ vuvombeka. 51Ndeeti, musaaga mwita ndɨvagegye ʉlʉnotsehetso mu kɨlʉnga? Baako! Ndikʉvavʉʉla ʉkʉta, ndɨvagegye ʉlʉsʉʉtɨngʼano. 52Ʉkʉhʉma lɨno, mu nyumba ʉmwʉ mwʉvale avaanu vahaano jʉvisʉtɨngʼanaga, vadatu jʉvikɨpandʉla kʉ vavɨlɨ. Naveene vavɨlɨ avo jʉvikɨpandʉla kʉ vadatu. 53Ʉdadaaje jiisʉtɨngʼanaga nʉ nswambe, namwene ʉnswambe jiisʉtɨngʼanaga nʉ dadaaje. Ʉvanyina jiisʉtɨngʼanaga nʉ mwalɨve, namwene ʉmwalɨve jiisʉtɨngʼanaga nʉ vanyina. Ʉkɨjyʉva jiisʉtɨngʼanaga nʉ nʼdala va nswambe, namwene ʉnʼdala va nswambe jiivombaga lɨɨlyo.”

Ʉkʉlʉmanya itsikwitsa kʉvʉlongolo

(Mataayo 16:2-3)

54ɄYɨɨsʉ akavavʉʉla ikange avaanu va kɨpʉga kɨlya akata, “Wʉ mukʉgavona amavɨngo gilʉndamana mwita, ‘Ɨsula jilonda ʉkʉtima,’ lweli jitima. 55Ikange wʉ mukʉjɨvona ɨmepo jikula, jihʉma ʉlʉvasu lwa Kʉsika#12:55 Ɨmepo jikula, jihʉma ʉlʉvasu lwa Kʉsika Mu kɨlʉnga kya Isilahɨli, ɨmepo ʉkʉhʉma Kʉsika na Kʉnena jyapelaga kʉve masuke. mwita, ‘Kulonda ʉkʉva masuke,’ lweli wʉ kwiva. 56Ʉnyie nyɨ vanuasi, mulʉmanyile ʉkʉtsaagʉlɨla vʉnonu ɨmisɨkɨ! Lɨno, kɨki mulemwa ʉkʉtsaagʉlɨla ɨkɨhoto kya tsilya itsivombeka isigono isi?

Ʉkʉsajana nʉ ndʉgʉ

(Mataayo 5:25-26)

57“Kɨki ʉnyie namukɨhɨga jyʉnyie pa kulongwi tsa vʉgolosu? 58Wʉ mulɨ mu nzɨla, ʉndʉgʉ vaako ibɨha kukʉkʉhɨlɨka kʉ mmɨgi, wɨkupilage ʉkʉnsiima ʉkʉta musajane. Ʉngɨlekelwe ʉkʉvomba ɨlyo, wʉ musiike pa vʉhɨgi, apo vuhɨgwa nʉ kʉtaagwa mu kɨkʉngwa. 59Ndikʉkʉvʉʉla ʉkʉta, nʉkahʉme mu nʼgati ʉmwa ʉkʉsikila ʉpwʉ wimala ʉkʉhomba ʉntsigilo gwoni!”

Selectat acum:

Luuka 12: zga

Evidențiere

Partajează

Copiază