Matthew 24

Imbyegan Jesus Chi Mayam-alan Chi Templo

(Mrk. 13:1-2; Luk. 21:5-6)

1Lummawa pun si Jesus si templo, kummatam cha disipulusla ot intuchucha kan siya chi kilabiɏun chi templo ya byebbyeɏoy un lampalikwos. 2Ot kalan Jesus, “Ha mailayu losan cha allaya? Ngim ibyegak kan chikayu katuttuwaan, un chumtong chi timpu un maamin mikusob cha laoy ked lappun akit matelan si byetu si sigud un igewla.”

Chumtong Chi Ligligat Lu Sumin-eɏgew

(Mrk. 13:3-37; Luk. 21:7-19)

3Lapalos pun, ummoy cha Jesus ud Bilig Olivo ot ummamuy siya. Ummoy cha disipulusla kan siya un lappun uchum ot ilimuscha kan siya, “Ibyegam u kan chikami lu kam-amman chi makwaan chi hachiʼn imbyegam, ked simma mangilasilanmi si umaliyam ya alungus chi lubung?”

4Kalan Jesus kan chicha, “Man-alled kayu ta achi kayu maallilaw. 5Ti achu cha umaliʼn us-useɏoncha ngachenku un kalancha, ‘Sakon si Kristu,’ ked achu cha allilawoncha. 6Ked lu chongɏonyu cha manggugubyat ya chameg un langgugubyat si cha uchum un ili. Ngim achi kayu machalagen ti masapuɏʼn makwa cha laoy, ngim chaampun chi alungus chi lubung. 7Ti manggugubyat cha nasyun, ya manggugubyat bo cha iturayan cha ari. Ked lumoswa cha uɏat ya cha chita si cha kaili-ili. 8Ngim cha laoy siya mallugiyan cha ligligat un isun chi mallugiyan chi sumigabyen chi buwang chi byebyaiʼn allaʼn umalak.

9“Ked manchopapcha kan chikayu ya paligatan chikayu ked otoyon chikayu. Sangaon chikayu kan cha losan un nasyun gapu kan sakon. 10Ked gapu si hachi, achu kan chikayu man-awichela pammatila ya man-asi-ibitcha kan man-asilawingcha. 11Ked achu cha lumoswa un silan propeta un mangallilaw kan cha achun tagu. 12Ked gapu ta michecheay cha lawwik un makmakwa, tumunglin chi man-aayat cha achuʼn tagu. 13Ngim lu silu mangipapati si pammatila inggalà alungusla, chicha matatagu ing-inggala. 14Ked ha allaʼn Bibiɏuʼn Chameg mipanggop si Mampangatan Apudyus, mibyegbyega si losan un ilid chi lubung ta mangngeɏan cha tagu asiyot chumtong chi alungus chi timpu.”

Ha Mayam-alalaʼd Jerusalem

(Mrk. 13:14-23; Luk. 21:20-24)

15Intuɏuy Jesus un kalala, “Lu mailayu chi kaog-ogyat un manyam-an un sumisiked si lasantuwan un lugeɏ si templo un impadtun Daniel un propeta si awi.#24:15 Daniel 9:27; 11:31; 12:11 (Chikayuʼn mamasa si alla, maawatanyu otyan). 16Ked cha inggew ud Judea masapuɏʼn umawidcha si bibbilig. 17Ha taguʼn awed si otop chi byeɏoyla masapuɏʼn achipun lumoksed un mangaɏa kan cha alikamla. 18Ha taguʼn inggew si tattaɏun, masapuɏʼn achipun mangulin umoy mangaɏa si takpin chi silupla. 19Kadchegu cha mabugi ya cha mantagibi si hachiʼn timpu! 20Iluwaluyu kan Apudyus ta chakampun otyan si timpun chi agilid willu eɏgew un man-illongan. 21Ti patunged chi ligat si hachiʼn timpu, un lappun miyisuwala malipud si luglugin chi lubung inggala si sala. Ked lappun katchi un kasin mipachas utla pita lu sumin-eɏgew. 22Ked lu achipun Apudyus pilaagobbya cha hachiʼn eɏgew, lappun lin latagu kan cha tagu. Ngim gapu si kachegula kan cha losan un chilutukala, pilaagobbyala cha hachiʼn eɏgew.

23“Si hachiʼn timpu lu awed mangibyega kan chikayu, ‘Ilanyu, allaya si Kristu!’ willu ‘Awed udchi!’ achiyu patiyon. 24Ti lummoswa cha silan Kristu ya cha silan propeta, un singkalan un chicha kalu cha pililiyan Apudyus. Ked mangwacha si lakaskaschaaw ya sinyeɏʼn mangallilawcha kan cha tagu, ulay cha pililiyan Apudyus. 25Ammanyu somsomkon, ti inchachàanku imbyegbyega kan chikayu sakbyey un makwa.

26“Ked lu awed mangibyega kan chikayu, ‘Awed si lugeɏʼn lappun ummili,’ achi kayu umoy. Ked lu kalancha boʼn ‘Alliya, mantataɏud chi kuwetu,’ achiyu patiyon. 27Ti Sakon un Alak chi Tagu, umaliyak un isun chi kilat un sumlit si sumileɏan ilit inggalad chi mipisukala. 28Ya lu chilu awechen chi latoy, hachi mauppulan cha gayang un mangan si lecheg.”

Ha Mangulilan Chi Alak Chi Tagu

29“Lu magamput cha ligligat si hachiʼn timpu, gumikbot chi ilit, achipun sumeɏeg, man-odcheg cha bituwon un lampeɏpuʼd langit ya mikilug cha losan un pallakabyelin ud langit. 30Ked si hachiʼn timpu, lumoswa ud langit cha sinyeɏn chi umaliyan chi Alak chi Tagu. Ked sin-iibin cha losan un tagu utla pita lu mailacha Sakon un Alak chi Tagu si lap-at chi libuuʼd langit un umali un alla pallakabyelinku ya lumilalilang un kila-Apudyusku.#24:30 Zechariah 12:10-14 31Ked guminga tangguyub un mantobyeg ked ibuunku cha anghelesku ta umoycha chagupon cha taguʼn chilutukan Apudyus si losan un sulsulin chi lubung.”

Ha Maacheɏ Si Kayuʼn Igus

(Mrk. 13:28-31; Luk. 21:29-33)

32Ot kalan Jesus, “Itullongyu ked chi kayuʼn Igus ta man-achaɏanyu. Lu lugiyalaʼn sumimit cha pingila ya utela, tagammuyu un chanchali chegun. 33Isula bo, lu mailayu un makwa cha allaʼn ilugudku, ammuyu un chanchali mangulilak kasin utla pita. 34Tuttuwa ibyegak kan chikayu, sissiyaʼn matattagu cha uchum un tagu si salaʼn lolap ked makwa losan cha laoy. 35Maumas losan cha awed langit ya utla pita ngim ha ugudku achipun pulus maumas.”

Lappun Makaammu Si Mangulilan Chi Alak Chi Tagu

(Mrk. 13:32-37; Luk. 17:26-30)

36Kalan bo Jesus, “Lappun mangagammu si hachiʼn eɏgew ya uras, ulay cha angheles ud langit ya ulay sakon un Alak Apudyus, ngim abus si Ama sintagammu. 37Sakon un Alak chi Tagui, mangulilak utla pita un isun chi lakwa si timpun Noah.#24:37 Genesis 6:5-8 38Ti si hachiʼn timpu sakbyey chi litap, lallin-ot cha taguʼn langa-langan ya ummilu-ilum ya langas-asawa inggalad chi eɏgew un lilumlok cha Noah si bapur. 39Ot lappun ammun cha tagu lu silu makwa inggalad gummatong chi litap ot laamincha laalud.#24:39 Genesis 7:6-24 Kamatchi bo makwa lu umali Alak chi Tagu.

40“Si hachiʼn timpu, awed cha chuwaʼn leɏakiʼn mangkawachi si taɏun, maaɏa osa ya matelan chi osa. 41Awed cha chuwaʼn byebyaiʼn mambyayu, maaɏa osa, ya matelan chi osa. 42Ked sasaggalaonyu, ti achipunyu ammu lu himma eɏgew un umaliyan chi Apuyu.

43“Somsomkonyu alla, lu ammun chi simbyeɏoy chi uras un gumatngan chi man-aakaw lu labi, kapilitan un achipun masuyop ta achipun lumlok chi man-aakaw si byeɏoyla. 44Masapuɏʼn mansasaggala kayu, ti Sakon un Alak chi Tagu, umaliyak si timpuʼn achipunyu lamlamaon.”

Ha Mapiyeɏan Ya Achipun Mapiyeɏan Un Bubùulon

(Luk. 12:41-48)

45Ot kalan Jesus, “Silu chi mapiyeɏ ya lasilib un bubùulon? Siya chilutukan chi ap-apulaʼn mangayyuwan kan cha uchum un bubùulon si byeɏoyla ta idchela chicha si makan si ustuʼn timpu. 46Pian chi bubùulon un ochesan chi ap-apula un pin-ala koon cha lipiyeɏ kan siyaʼn kawachila. 47Tuttuwa ibyegak kan chikayu, gapu ta mapiyeɏan ipiyeɏn bo chi ap-apula cha losan un kukkuwala. 48Ngim lu lawwik un bubùulon, kalala si somsomokla, ‘Mabyeyeg chi gumatngan chi apuk.’ 49Ked lilugiyalaʼn mallambok kan cha chogalaʼn bubùulon ked ummoy lakakkakan ya lakain-ilum kan cha kabubuuk. 50Ked lu gumatong chi apula si eɏgew un achipunla lilamlama siya ya si uras un achipunla ammu. 51Ked chusaon chi apula siya ya ipatila siya si igew un machusaan cha aginpapati. Udchi sin-iibin cha tagu ya singngingillot chi ngiponcha.”

Selectat acum:

Matthew 24: HUA

Evidențiere

Partajează

Copiază