ЛукӀа 16

Аллагьдизни пулуниз сад хьиз къуллугъиз жедач

1 Исади Вичин тилмизриз лагьана:

– Са инсандихъ девлет авай, адахъни кӀвалин кӀвалахар идара ийизвайди авай; ада кӀвалин эменни вара-зара ийизва лугьуз са ни ятӀани и девлет авайдаз хабарнай.

2Девлет авайда адаз эверна, лагьана: «Заз вакай къвезвайбур вуч ванер я? Жуван кӀвалахдин гьахъ-гьисаб авуна, зи патав гъваш. За вун къуллугъдилай алудзава».

3КӀвалин-йикъан кьилел алайдани вичи вичикди лагьана: «Гила за вуч ийида? Зи агъади зун къуллугъдилай алудзава. Залан кӀвалахдихъ галаз зун кьунвач, це лугьуз физни заз регъуьда. 4КӀвалахдилай алудайла, масадбуру зун чпин кӀвалера кьабулун патал, за вуч ийида? Агьан, заз чир хьана!»

5Ада вичин агъадин буржар алайбуруз са-садаз кьилди-кьилди эвериз хьана. «Вал зи агъадин гьикьван бурж ала?» – сад лагьайдавай хабар кьуна. 6«ЧӀемдин виш бат алама», – жаваб гана ада. «Жуван буржунин куьгьне чар къахчуна, тадиз яхцӀурни цӀуд уьлчме лагьана цӀийи чар кхьихь», – лагьана кӀвалин-йикъан кьилел алайда.

7Ахпа муькуьдаз эверна, лагьана: «Вал гьикьван бурж ала?» «ЦӀуд агъзур укӀур къуьл», – жаваб гана ада. Адазни лагьана: «Жуван буржунин куьгьне чар къахчуна муьжуьд агъзур лагьана цӀийиди кхьихь».

8Агъади, крар бажарагъ гваз авуна лугьуз, кӀвалин-йикъан кьилел алай ламатӀдин тариф авуна. РикӀивайни, Аллагьдин экуьнин веледри чпин крарай кьил акъудзавайдалай и дуьньядин инсанри а крарай кьил акьул гваз акъудзава. 9За квез лугьузва: и гьахъ авачир дуьньяда кӀватӀай девлетрин куьмекдалди куьне квез дустар жагъура. Куьне гьакӀ ийиз хьайитӀа, пул виляй аватайла, куьн хушвилелди даим дуьньядин кӀвалера кьабулда.

10ГъвечӀи карда вафа тирди чӀехи крарани вафа жеда, гъвечӀи карда вафа туширди чӀехи крарани вафа жедач. 11Квел чилин девлетар ихтибариз жезвачтӀа, халисан девлетар квел ни ихтибарда? 12Квевай чарадан девлет намус гваз хуьз хьаначтӀа, куь девлет квез ни гуда? 13Гьич са нуькердивайни кьве агъадиз къуллугъ ийиз жедач: абурукай сад кӀан хьайитӀа, муькуьди такӀан жеда; садаз вафавал хвейитӀа, муькуьдаз – жедач. Аллагьдизни пулуниз квевай сад хьиз къуллугъ ийиз жедач.

Лазаракай кьиса

(МатӀай 5:18, 31-32; 11:12-13)

14И вири гафар пулунал рикӀ алай фарисейризни ван хьана, абур Исадал хъуьрезвай.

15Ада абуруз лагьана:

– Куьне куьн инсанрин вилик гьахъ-михьи ксар хьиз къалурзава, амма Аллагьдиз куь рикӀера авайдакай хабар ава: инсанри къимет ава лугьузвай затӀ Аллагьдин вилерай муртад затӀ я. 16Ягьядилай вилик Къанунни авай, пайгъамбарарни. Адалай кьулухъ Аллагьдин пачагьвиликай Шад Хабар гуз хьана. Гзафбур, чпин вири къуватар эцигна, Аллагьдин Пачагьлугъдиз гьахьиз алахъзава. 17Цавни чил фад квахьун мумкин я, Къанундин лап гъвечӀи са цӀарни къуватдай аватдач. 18Вичин папахъ галаз чара хьана маса паб гъизвай гьар сада зинавал ийизва; масада рахкурнавай паб гъизвайдани зинавал ийизва.

19Девлет авай са инсан хьана. Ада, вичел пачагьдин хьтин чӀагай пекер алукӀиз, гьар юкъуз кӀандайвал кефер чӀугвазвай. 20Михьиз пихери кьунвай Лазар лугьудай са къекъвераг адан варарин кӀане аваз хьана. 21Девлет авайдан суфрадилай амукьай кӀусар вичел мус гьалтдатӀа лугьуз, ам вил алаз жедай. КицӀерини къвез адан пихериз мез гудай. 22Ам кьейила, малаикри къачуна, ам Ибрагьиман патав тухвана. Девлет авайдини кьена, ам кучукна. 23Агъа дуьньяда азабрик кваз, девлет авайда кьил хкажайла, яргъай хьиз адаз Ибрагьим ва адан патавни Лазар акуна.

24«Я Ибрагьим буба! – гьарай кваз лагьана ада. – Зун кана чӀух жезва, заз регьим ая. Вуна зи патав Лазар ракъура, ада вичин тупӀун кӀвенкӀв кьежирна зи мецивай гуьцӀрай». 25Амма Ибрагьима лагьана: «Я хва! Вуна рикӀел хкваш хьи, ваз дуьньяда авай кьван хъсанвилер хьана, амма Лазараз анжах писвилер акуна. Гила адаз ина теселли жагъида, ваз – азабар. 26Адалайни гъейри, куьни чи арада ахьтин кӀан квачир дагьар ава хьи, инай куь патаз кӀан хьайибурувай экъечӀиз жедач ва а патайни и патаз къвез жедач». 27«За ваз минетзава, буба, – лагьана девлет авайда, – вуна Лазар зи бубадин кӀвализ ракъура, 28ана захъ вад стха ама. Ада абуруз зурба азаб-азият авай и жегьеннемдикай хабар гурай, гьабур хьайитӀани иниз акъат тавурай». 29«Абурухъ Мусадин ва пайгъамбаррин ктабар ава, – лагьана Ибрагьима, – къуй абуру ана кхьенвайдал амал авурай». 30«Ваъ, Ибрагьим буба! – лагьана девлет авайда. – Абурун кьилив кьейибурукай сад фейитӀа, абур Аллагьдин рекьел къведа». 31«Абур Мусадинни пайгъамбаррин чӀалахъ жезвачтӀа, – лагьана Ибрагьима, – кьейидалай кьулухъ чан хтанвай са вуж ятӀани абурун патав атайла, абур чӀалахъ жедач».

Selectat acum:

ЛукӀа 16: ЛезПК

Evidențiere

Partajează

Copiază