ЛукӀа 12

Исади кьве чин хьунухь айибун

(МатӀай 10:26-33)

1Агъзурралди инсанар кӀватӀ хьана, сада сад чуькьуьзвай арада Исади сифтедай Вичин тилмизриз лугьуз хьана:

– Фарисейрин маядикай, яни абурал кьве чин хьуникай мукъаят хьухь! 2Ашкара тежедай гьич са затӀни ва малум тежедай чинебан гьич са карни авайди туш. 3Гьаниз килигна буьркьвеба вуч куьне лагьанатӀа, гьадан ван эквеба жеда ва кӀвале куьне япал вуч лагьанатӀа, гьадакай кӀвалин чӀередилай хабар акъатда.

4За квез, Зи дустариз, лугьузва: инсан яна рекьизвайбурукай кичӀе жемир, кьинилай гъейри абурулай маса кар алакьдач. 5Амма нихъай кичӀе хьана кӀандатӀа, За квез лугьуда: кьена жегьеннемдиз ракъурдай къуват авай анжах Садакай кичӀе хьухь. Эхь, лугьузва За квез, гьа Гьадакай кичӀе хьухь.

6Вад нуькӀрен къимет кьве къара пул тушни? НуькӀерикай садни Аллагьдин рикӀелай фенвач. 7Куь кьилелни гьикьван чӀарар алатӀа гьисабнава; гьа икӀ, квез кичӀе жемир: куьн нуькӀерилайни гзаф артух я.

8Лугьузва За квез: инсанрин вилик Зун ни ихтибардалди кьабулзаватӀа, гьам Аллагьдин малаикрин вилик Инсандин Хцини гьакӀ кьабулзава. 9Инсанрин вилик ни Закай кьил къакъудайтӀа, Аллагьдин малаикрин вилик Инсандин Хцини адакай кьил къакъудда.

10Инсандин Хцикай чӀуру гаф лагьайтӀа, лагьайдалайни гъил къахчуда; амма Пак Руьгьдикай ни аси гафар авуртӀа, адалай гъил къахчудач.

11Куьн синагугриз, гьакимрин ва гуж гвайбурун патав гъайила, абуруз гьикӀ ва вуч жаваб гудатӀа лугьуз къайгъудик жемир. 12Гьа чӀавуз куьне вуч лагьана кӀандатӀа, гьам квез Пак Руьгьди лугьуда.

Девлет авай ахмакь

13Халкьдин арадай сада Исадиз лагьана:

– Муаллим! Зи стхадиз лагь хьи, ада захъ галаз ирс пай авурай.

14– Эй инсан, – лагьана Исади, – куь мал-мулк паюн, куь гьахъ-дуван авун Зи хиве тунвайди вуж я?

15– Килиг, – хълагьна Исади халкьдиз, – пулунихъ-девлетдихъ къаних жемир, инсандин уьмуьр адан мал-девлетдилай аслу жедач.

16Исади абуруз са кьиса ахъайна:

– Девлет авай са инсандин никӀи хъсан бегьер гъана. 17Адани вичи вичикди веревирдер авуна: «Вучда? Зи чилерин майваяр кӀватӀна хуьдай чка захъ авач». 18«Ингье за вучдатӀа аку, – фикирна ада, – жуван гьамбарханаяр чукӀурна, гьабурулайни гегьенш чкаяр эцигда. Ана за жуван техил ва жувахъ авай-авачир вири хуьда. 19Жува жувазни лугьуда: Вуна ваз гзаф йисара менфят къачудай зурба няметар кӀватӀна: ял ягъа, неъ, хъухъ, кеф чӀугу». 20Амма Аллагьди адаз лагьана: «Эй ахмакь! Къе йифиз ви чан къачуда; вуна кӀватӀнавай кьванди нел гьалтда?» 21Аллагь патал ваъ, вич патал девлет кӀватӀдайдан кьилел гьа ихьтин крар къведа.

Къайгъуйрикай

(МатӀай 6:19-21, 25-34)

22Исади Вичин тилмизриз лагьана:

– ИкӀ хьайила За квез лугьузва: вуч недатӀа лугьуз жуван чан патал ва вуч алукӀдатӀа лугьуз жуван беден патал къайгъуйрик жемир. 23Чан недайдалай артух я, беденни – пекерилай. 24КӀвагъриз килиг: абуру я цазвач, я гуьзвач; абурухъ я цадай, я бегьер хуьдай чкаяр авач, амма Аллагьди абуруз тӀуьн гузва. Квезни Аллагьди гуда! Куьн къушарилай артух тушни мегер? 25Кат-галтуг авуналди квевай нивай жуван уьмуьр са сятдин хьайитӀани артухариз жеда? 26Гьа икӀ, квелай и гъвечӀи кар хьайитӀани алакьдачтӀа, амайбурун къайгъу чӀугун куьз герек я? 27Бубуяр гьикӀ экъечӀзаватӀа килиг: абуру я зегьмет чӀугвазвач, я са затӀ хразвач. Амма За квез лугьузва хьи, гьихьтин иер пекер алай Сулейман пачагьни и цуькверикай садав гекъигиз хьун мумкин туш. 28Къе никӀяй экъечӀзавай ва пака къулаз вегьидай векьни Аллагьди акӀ чӀагурзаватӀа#12:28 ЧӀагурун – иер авун., Ада а векь квелай артух чӀагурзавани, эй иманда зайифбур! 29Гьа икӀ, куьн вуч неда, я тахьайтӀа вуч хъвада лугьуз, кат-галтугмир, я къайгъудикни жемир, 30тӀуьнихъ-хъунихъ и дуьньяда галтугзавайбур мажусияр я. Куь Бубадиз ибур квез герек тирди чизва. 31Гьавиляй куьне квез Аллагьдин Пачагьлугъ жагъура, амайди Ада квез кӀукӀни алаз гуда. 32КичӀе жемир, гъвечӀи кӀеретӀ! Вучиз лагьайтӀа квез Вичин Пачагьлугъ гун куь Бубадиз кӀанзава.

33Жуван мулкар маса це ва садакьаяр пая. Гьадалди куьне квез цаварал куьгьне тежедай пулунин кисеяр ва куьтягь тежедай хазинаяр гьазурда. Анра ам я чуьнуьхдай угъри, я недай гъуьчӀ жедач. 34Куь девлет гьина аватӀа, куь рикӀни гьана жеда.

Вафа гвай лукӀарикай кьиса

(МатӀай 24:43-51; Мрк. 13:33-37)

35Куьн, юкьвара чӀулар туна, куькӀуьрнавай чирагъар гваз гьазур хьухь. 36Куьн мехъерикай хтана кӀанзавай чпин агъадал вил алай инсанриз ухшар хьухь, ам хтана рак гатанмазни адаз гьасятда рак ахъайдайвал. 37Чпин агъа кӀвализ хтайла, адаз уях яз жагъай лукӀар бахтавар я. За квез рикӀивай лугьузва: агъади, вичин пекер дегишарна, абуруз суфрадихъ эверда ва абуруз къуллугъда. 38ЛукӀарин иесидиз, кьуланфериз хтайлани, экв жедайла хтайлани абур уях яз жагъайтӀа, а лукӀар бахтавар я. 39Квез чидани, кӀвалин иесидиз угъри къведай чӀав чир хьанайтӀа, вичин кӀвал атӀуз тадачир. 40Куьнни гьазур яз хьухь: гьич квез хабарни авачиз Инсандин Хва хтана акъатда.

41Гьа чӀавуз Петруди Исадиз лагьана:

– Я Агъа! И кьиса Вуна чаз лугьузвайди яни, я тахьайтӀа амайбурузни?

42 Реббидини лагьана:

– Лугьун хьи, агъади вичин кӀвалихъ гелкъвезвайбурун кьилел, абуруз вахтунда фу-яд гун патал, са кас эцигна. А кас вафа гвайди ва кьил авайди хьайитӀа, ада вуч ийида? 43Агъа кӀвализ хтайла, ам вичин хиве авай крарал машгъул яз жеда. Ахьтин кас бахтавар я. 44За квез рикӀивай лугьузва хьи, адан агъади вичин вири мал-мулкунин кьиле а кас акъвазарда. 45А касди вичи вичик «Зи агъа мукьвара ахкъатдач» лагьана, кӀвале вач-хъшаяр тир итимарни папар гатаз, кьадардилай артух нез, хъваз, хъивегьиз хьайитӀа, 46а касдин агъади, гьич виливни техуьзвай са юкъуз, гьич фикирдизни гъиз тежедай чӀавуз хтана, адаз векъи жаза гуда ва гьадазни, иман гвачирбуруз хьиз, гьа икӀ ийида.

47Вичин агъадиз вуч кӀанзаватӀа чизвай, амма гьазур тахьана, а кар тавур кас гзаф гатанни ийида. 48Вичин агъадин мурад тийижиз, саймазвилелди са чӀуру кар авур лукӀ тӀимил гатада. Гьар низ гзаф ганватӀа, гьадавай гзаф кӀанни жеда; нив гзаф ихтибар вуганватӀа, гьадавай гзаф тӀалабни ийида.

Иса себеб яз чаравилер хьун

(МатӀай 10:34-35)

49Зун чилел цӀай куькӀуьриз атанвайди я, ам куькӀвенайтӀа Заз гзаф кӀандай! 50Амма Заз жедай чӀехи азабрин югъ вилик кума, а югъ атана алукьдалди Зи рикӀел залан пар жеда. 51Квез Зун и дуьньядиз ислягьвал гваз атанвайди хьиз авани? Ваъ, Зун инсанар чара ийиз атанвайди я! 52Гила кӀвале вад кас аваз хьайитӀа, абур кьве пай жеда: пуд кьведаз акси жеда, кьведни – пудаз. 53Буба хциз акси жеда, хвани – бубадиз; диде рушаз акси жеда, рушни – дидедиз; къари вичин сусаз акси жеда, свасни – вичин къаридиз.

Ийидай кар гежел вегьимир

(МатӀай 5:25-26; 16:2-3)

54Халкьдизни Исади лагьана:

– Рагъ экъечӀзавай патай къвезвай циф акурла, куьне «Марф къвада» лугьуда. Дуьз я. 55Кьибле патай гар акъатайла, куьне «Гзаф чими жеда» лугьуда. Дуьз я. 56Эй, кьве чин алайбур! Чилизни цавуз килигна гьихьтин гьава жедатӀа, квевай чириз жезва, бес гила гьихьтин вахт атанватӀа квевай кьатӀуз жезвачни?

57Бес вучиз квевай куьн патал гьахъ-михьивал вуч ятӀа чириз жезвач? 58Вахъ галаз гьуьжетарзавайди галаз вун дувандиз фидайла, жезмай кьван адахъ галаз рекье туьхкӀуькӀ. АкӀ тахьайтӀа, ада вун дуванбегдин патав тухуда, дуванбегдини вун къазаматдардин гъиле твада, къазаматдардини вун къазаматханадиз вегьида. 59За ваз лугьузва: вал алай бурж эхиримжи чет кепекдал къведалди вахгун тавунмаз вун къазаматдай акъатдач.

Selectat acum:

ЛукӀа 12: ЛезПК

Evidențiere

Partajează

Copiază