Ягья 5

Фалужди ягъайди сагъар хъувун

1Адалай кьулухъ Ягьудатда сувар хьана, Иса Ярусалимдиз фена.

2Ярусалимда, Лапагдин варар лугьудай чкада, чувуд чӀалал Бетзата лугьудай гьавиз авай. Адан патав вад кьур гвай. 3-4А кьурарик гзаф кьадар азарди кьунвайбур: буьркьуьбур, кьецӀибур, фалужди ягъайбур къатканвай. 5Ина къанни цӀемуьжуьд йисан къене азар квай са касни авай. 6Исадиз ам ана къатканваз акуна ва гъавурда акьуна хьи, ам фадлай гьа икӀ ава.

– Ваз сагъ жез кӀанзавани? – лагьана Исади адаз.

7– КӀанзава, Агъа, – жаваб гана азарди кьунвайда. – Амма цик юзун акатайла, зун гьавиздиз авуддай са кас захъ авач; зун агатайла, залай вилик гьавиздиз масад эвичӀзава.

8– Къарагъ, – лагьана Исади, – жуван месни къахчуна алад.

9Амни гьасятда кӀвачел ахкьалтна, вичин месни къахчуна, анай хъфена. Им Киш юкъуз хьайи кар я.

10Гьа чӀавуз чувудрин кьиле авайбуру сагъ хъхьайдаз лагьана:

– Къе Киш югъ я, вуна мес хутахун къадагъа я.

11– Зун кӀвачел ахкьалдарайда заз «жуван месни къахчуна алад» лагьанва, – жаваб гана ада.

12– Ваз «Жуван месни къахчуна алад» лагьай Кас вуж я? – хабар кьуна абуру.

13И чӀавуз Иса халкьдик акахьна вилерикай хкатнавай, гьавиляй кӀвачел ахкьалтайдаз вич ни сагъар хъувунватӀа чизвачир. 14А кас Исадиз Аллагьдин КӀвалин гъенел жагъана.

– Аку, – лагьана Исади адаз, – вун сагъ хъхьана. Ви кьилел идалай артух къада-бала техкъведайвал, вуна мад гунагь крар хъийимир.

15А касди, чувудрин кьиле авайбурун патав фена, вич сагъар хъувурди Иса тирди лагьана. 16Чувудри Исади ихьтин кӀвалахар Киш юкъуз ийизва лугьуз, Ам хурук кутаз хьана.

17Исади абуруз лагьана:

– Зи Бубади къедалди гьахьтин крар ийизва. Зани гьакӀ ийизва.

Бубани Хва

18Исади са Киш югъ чӀурна лугьуз ваъ, гьакӀни Ада Аллагь Вичин буба я ва Вич Аллагьдиз барабар я лугьузвайвиляй чувудрин кьиле авайбуруз Ам амайдалайни гзаф рекьиз кӀан хьана. 19И кардин паталай Исади лагьана:

– За квез лап рикӀивай лугьузва: Бубади арадал гъизвай крар такунмаз Хцивай Вичивай затӀни арадал гъиз жедач: Ада вуч ийизватӀа, Хцини гьам ийида. 20Бубадиз Вичин Хва гзаф кӀанда, Ада Вичи вуч ийизватӀа Хциз къалурзава. Бубади Хциз гьабурулайни зурба крар ийидайвал къалурда. Ада а крар авурла, квез керемат-ишара жеда. 21Бубади кьейибурал чан хкизвай саягъда Хцини Вичиз кӀандайбурал чан хкизва. 22-23Бубадиз ийизвай хьтин гьуьрмет Хцизни авун патал, виридан дуван ийидай ихтияр Бубади Хцив вугана. Бубади Вичи садан дуванни ийизвач. Ни Хциз гьуьрмет ийизвачтӀа, Хва ракъурай Бубадизни ада гьуьрмет ийизвач. 24За квез лап рикӀивай лугьузва: Зи Гафунихъ яб акалзавайдаз ва Зун Ракъурайдахъ иман ийизвайдаз эбеди уьмуьр ганва ва адан дуван ийидач. Ам ажалдилай кам яна уьмуьрдиз экъечӀнава.

25За квез лап рикӀивай лугьузва: ахьтин чӀав къведа хьи, кьейибурузни Аллагьдин Хцин ван жеда, ва Адан ван хьайибурал чан хкведа, а чӀавни ингье атана агакьнава. 26Буба уьмуьрдин чешме тирвал, Бубади Хцикайни уьмуьрдин чешме авунва. 27Бубади Адан гъиле дуван ийидай ихтиярни тунва, вучиз лагьайтӀа Ам Инсандин Хва я. 28-29Сура авай вирибуруз Адан ван къведай вахт алукьда. Хъсан крар авурбуруз, чан хтайла, эбеди уьмуьр гьатда. Пис крар авайбурув, чан хтайла, чпин жаза агакьда. Куьн зи и гафарал мягьтел жемир. 30Завай жува-жувалай са затӀни ийиз жедач. За Жуваз лагьайвал дуван ийизва. Зун Заз кӀандайвал ийиз алахъзавач, Зун Ракъурайди рази жедайвал ийизва За. Гьавиляй Зи дуванни гьахъ-михьиди жезва.

Исадикай шагьидвилер

31За Жува Жувакай инсанриз лугьуз хьайитӀа, Зи Гафарихъ са къиметни жедач. 32Закай лугьузвай маса шагьид ава. Ада Закай гьакъикъи шагьидвал ийизвайди Заз чизва. 33Куьне Ягьядин патав инсанар ракъурнай, адани квез Закай авайвал лагьана. 34Амма Зун инсанри шагьидвал авунилай аслу туш. За жуван гафар анжах куьн хилас авун патал лугьузвайди я. 35Ягья экв чукӀуриз кузвай чирагъ тир. Квез кӀанзавай карни са кьадар вахтунда, гьа экуьник акатна, шадвал авун тир. 36Заз жуван гьакъиндай мад са шагьидвал ава. Амни зи крар я. За Зи крар Бубади Зи хиве тунвай кӀвалах кьилиз акъудун патал ийизвайди я. Зи крари Зун Бубади ракъурнавайди тестикьарзава. И шагьидвал Ягьядин шагьидвилелай артух я. 37Гьатта Зун иниз ракъурнавай Зи Бубади Вичи Зи гьакъиндай шагьидвал ийизва. Амма квез гьич садрани я Адан ван хьайиди туш, я Ам Вич акурди туш. 38Куьн Ада Ракъурнавайдан чӀалахъ туш. Гьавиляй Адан Гафни куьне куь рикӀера хуьзвач. 39Аллагьдин Калам кӀелайла, эбеди уьмуьр гьатда лугьуз куьне алахъна Калам чирзава. Амма гьа Пак Каламдини Зи гьакъиндай шагьидвалзава. 40Амма эбеди уьмуьрдив агакьун патал квез Зи патав къвез кӀанзавач. 41Заз инсанрин патай баркалла герек туш. 42Амма квез Аллагь кӀан тийизвайди Заз чида. 43Зун Зи Бубадин ТӀварцӀелай атана, амма куьне Зун кьабулзавач; са масад вичин тӀварцӀелай атайтӀа, куьне гьам кьабулда! 44Куьн са-садан вилик, инсанрин арада куь тӀвар-ван гьатунихъ къекъвезва, амма Сад Аллагьдин вилик тӀвар-ван гьатунихъ куьн къекъвезвач. ГьакӀ хьайила, квелай Захъ иман ийиз алакьдани? 45Зи Бубадин вилик За квек тахсирар кутада лагьана куьне фикирар ийимир. Куьне далу акалнавай Мусади вичи квек тахсир кутада. 46Мусади, лагьайтӀа, Закай виликамаз кхьенай. Куьн Мусадин чӀалахъ хьанайтӀа, Зи чӀалахъни жедай. 47Ада кхьенвайдан чӀалахъ жезвачтӀа, Зи гафарин чӀалахъни куьн гьикӀ жеда?

Selectat acum:

Ягья 5: ЛезПК

Evidențiere

Partajează

Copiază