Ягья 21:15-17

Исадини тилмизри фу тӀуьна куьтягьайла, Исади Симун-Петрудиз лагьана: – Ягьядин Хва Симун, ваз Зун амай вирибурулайни гзаф кӀандани? – Эхь, Ребби! – жаваб гана Петруди. – Заз Вун кӀандайди Ваз чизва. – Зи кӀелер хуьх, – лагьана Исади. Кьвед лагьай гъилера Исади мад лагьана: – Ягьядин хва Симун, ваз Зун кӀандани? – Эхь, Ребби! – жаваб гана Петруди. – Заз Вун кӀандайди Ваз чизва. – Зи хипер хуьх, – лагьана Исади. Исади пуд лагьай гъилера лагьана: – Ягьядин хва Симун, ваз Зун кӀандани? Ада пуд лагьай гъилера «Ваз Зун кӀандани?» лагьана хабар кьазва лугьуз, Петрудин кефияр хана. – Я Ребби! – лагьана ада. – Ваз вири чизва. Заз Вун кӀандайди Ваз чизва. – Зи хипер хуьх, – лагьана Исади.