Ягья 18
18
Иса маса гун ва кьун
(МатӀай 26:47-57; Мрк. 14:43-50, 53-54; ЛукӀа 22:47-54)
1И гафар лагьана куьтягь хьайила, Иса Вичин тилмизарни галаз Кедрун вацӀалай элячӀна багъ авай патаз фена. 2А чка Исадиз хаинвал авур Ягьудазни чизвай, вучиз лагьайтӀа Иса мукьвал-мукьвал Вичин тилмизарни галаз аниз къведай. 3Римдин аскерар ва гьакӀни чӀехи хахамрини фарисейри ракъурнавай нуькерар Ягьуд галаз багъдиз атана. Абурув виридав яракьар, чирагъар ва шемгьалар гвай. 4Вичин кьилел къведай вири крар виликамаз чизвай Исади, абурун вилик экъечӀна, лагьана:
– Куьн нихъ къекъвезва?
5– Назаретви Исадихъ, – жаваб гана абуру.
– Ам Зун я, – лагьана Исади.
Абурухъ галаз Иса маса гудай Ягьудни акъвазнавай. 6Ада «Ам Зун я» лагьайла, абур садлагьана кьулухъ хьана, ахпа ярх хьана.
7– Куьн нихъ къекъвезва? – мад хабар кьуна Исади.
– Назаретви Исадихъ, – лагьана абуру.
8– За квез лугьузва: Ам Зун я, – жаваб гана Исади. – Куьн Захъ къекъвезватӀа, амайбурув хъфиз тур.
9Ада икӀ Вичи садра лагьай ихьтин гафар кьилиз акъатун патал лагьайди тир: «Вуна Заз гайибурукай За садни квадарнач».
10Тур гвай Симун-Петруди тур акъудна, кьилин хахамдин лукӀ яна адан эрчӀи яб галудна; лукӀран тӀвар Малх тир. 11Амма Исади Петрудиз лагьана:
– Тур къакъара хтур! Бубади Зав вуганвай гъам-пияла хъун тавуна жедани?
12Гьа чӀавуз аскерри, абурун чӀехида ва чувудрин кьиле авайбуру ракъурнавай гъилибанри Иса кьуна кутӀунна. 13Сифте Ам абуру Гьайнасан патав тухвана; ам Каяфан яран буба тир. Каяф а йисуз кьилин хахам тир. 14Халкь патал сад кьейитӀа хъсан жеда лугьуз, чувудриз меслят къалурай Каяф гьам тир.
Петруди Исадикай кьил къакъудун
15Симун-Петру ва маса тилмиз Исадин гуьгъуьна аваз фена. А тилмиз кьилин хахамдиз чизвай ва гьавиляй ам Исадихъ галаз кьилин хахамдин гьаятдиз гьахьна. 16Петру къецелай варарихъ галамукьна. Са герендилай кьилин хахамдиз таниш тилмиз экъечӀна, варар хуьзвай къаравушдихъ галаз рахана, Петруни галаз гьаятдиз гьахьна. 17Инал варар ахъаяй гьа къаравушди Петрудиз лагьана:
– Вунни а Касдин тилмизрикай тушни?
Петруди «Ваъ» лагьана.
18Мекьи тир, лукӀарини нуькерри цӀай хъувуна, цӀун патав акъвазна чпиз чим акъудзавай. Абурун арада, вичиз чим акъудиз, Петруни акъвазнавай.
Кьилин хахамдин силис
19Кьилин хахамди Исадивай Адан тилмизрикай ва Ада абуруз гайи чирвилерикай хабарар кьуна. 20Исади жаваб гана:
– Зун вири дуьньядихъ галаз датӀана ачухдиз раханай. Чинеба лагьай гафар Захъ хьайиди туш. Вири чувудар кӀватӀ хьанвай Аллагьдин КӀвалени синагугра За Жуван чирвилер гузвай. 21Вуна Завай вучиз силис кьазва? За лагьайдакай Заз яб гайибурувай хабар яхъ. За вуч лугьузвайтӀа, гьабуруз чида.
22Исади и гафар лагьайла, Адан патав гвай нуькеррикай сада Адан хъвехъ кутуна яна, Адаз лагьана:
– Кьилин хахамдиз гьакӀ жаваб гудани?
23Исади жаваб гана:
– За чӀуру вуч лагьанатӀа, вуна Заз лагь: За дуьз жаваб ганатӀа, вуна зун вучиз язава?
24КутӀуннавай Иса Гьайнаса кьилин хахам Каяфан патав ракъурна.
Петруди Исадикай мад кьил къакъудун
(МатӀай 26:71-75; Мрк. 14:69-72; ЛукӀа 22:58-62)
25Симун-Петру цӀун патав вичиз чими ийиз акъвазнавай. Инал адаз абуру лагьана:
– Вунни Гьадан тилмизрикай тушни?
Ада кьил къакъудна ва «ваъ» лагьана.
26Кьилин хахамдин лукӀарикай сада, Петруди туруналди яб галудайдан мукьвада, лагьана:
– Заз вун Гьадахъ галаз багъда акур хьиз я.
27Петруди мад Исадикай кьил къакъудна, гьа и арада кӀекре гьарайна.
Иса ПилатӀан вилик
(МатӀай 27:1-2, 11-14; Мрк. 15:1-5; ЛукӀа 23:1-5)
28Экуьн яралай Иса Каяфан патавай Римдин сердердин дараматдиз тухвана. Чувудар Песагь суварин суфрадихъ ацукьиз гьазур хьанвай, гьавиляй абуруз, чеб чиркин тахьурай лугьуз, утагъдиз гьахьиз кӀанзавачир.
29ГьакӀ хьайила ПилатӀ вич абурун вилик экъечӀна лагьана:
– И Касдик куьне вуч тахсир кутазва?
30– И Касди са чӀуру кар авунвачиртӀа, чна Ам ви патав гъидачир, – жаваб гана абуру.
31– Ам хутахна Адан дуван куьне куь Къанундалди ая, – лагьана ПилатӀа.
– Чаз са касни кьиникьиз акъуддай ихтияр авач, – лагьана чувудрин кьиле авайбуру.
32Исади Вич гьихьтин ажалдик рекьидатӀа виликамаз лагьайвал, гьам кьилиз акъатдайвал хьана. 33Гьа чӀавуз ПилатӀа мад дараматдиз гьахьна, эверна Исадивай хабар кьуна:
– Вун Чувудрин Пачагь яни?
34– Им жува кьатӀанани, я тахьайтӀа ваз масадбуру лагьанани? – жаваб гана Исади.
35– Зун чувуд яни кьван? – жаваб гана ПилатӀа. – Ви халкьди ва чӀехи хахамри Вун гъана зи гъиле тунва. Вуна вуч авунва?
36– Зи Пачагьлугъ и дуьньяда авач, – жаваб гана Исади. – Зи Пачагьлугъ и дуьньяда авайтӀа, Зи къуллугъдал алайбуру, Зун чувудрин гъиле тун тавун патал, женг чӀугвадай. Амма гила Зи Пачагьлугъ и дуьньядикай туш.
37– АкӀ хьайила Вун Пачагь я ман? – лагьана ПилатӀа.
– Вуна жува Зун Пачагь я лугьузва, – жаваб гана Исади. – Зун дидедиз хьунни, и дуьньядиз ракъурунни гьакъикъатдикай хабар гун патал я. Гьар вуж гьакъикъатдин пата аватӀа, гьада Зи гафуниз яб гузва.
38– Гьакъикъат вуч затӀ я? – хабар кьуна ПилатӀа.
ИкӀ суал гана, ам чувудрин патав хъфена, лагьана:
– Заз адак са тахсирни кваз аквазвач.
Иса кьиникьин къарар
(МатӀай 27:15-30; Мрк. 15:6-19; ЛукӀа 23:13-25)
39Амма квехъ Песагь суварин юкъуз къазаматдай са кас ахъаюн тӀалабдай адет ава. Квез кӀандатӀа, Чувудрин Пачагь ахъайдани?
40Адаз жаваб яз вирида гьарайна:
– Ам ваъ, Бараб ахъая.
Бараб, лагьайтӀа, къачагъ тир.
Selectat acum:
Ягья 18: ЛезПК
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2010-2024
