Ягья 14

Исади инсанар Аллагьдин патав гъун

1 Исади лагьана:

– Куьне рикӀи рикӀ немир. Аллагьдихъ иман ая, Захъни иман ая. 2Зи Бубадин кӀвалера гзаф утагъар ава. АвачиртӀа, За квез лугьудайни: Зун квез чкаяр гьазуриз физва? 3Фена чкаяр гьазурайла, куьнни Зун авай чкада хьун патал, За хтана куьнни хутахда. 4Зун физвай чкадин рехъ квез чида.

5ТӀумая лагьана:

– Я Агъа! Вун гьиниз физватӀа, чаз чизвач. Чаз рехъ гьикӀ чир хьурай?

6Исади лагьана:

– Рехъни Гьакъикъатни Уьмуьрни – Зун я; Зун арада авачиз Бубадин патав садавайни физ жедач. 7Квез Зун чир хьанайтӀа, квез Зи Бубани чир жедай. Къедлай кьулухъ квез Ам чизва ва квез Ам акунай.

8– Я Агъа! – лагьана ФилипӀа. – Вуна чаз Буба къалура, чаз Ам акун бес жеда.

9– Зун квехъ галаз икьван вахт хьанватӀани, ваз Зун чир хьаначни, ФилипӀ? – лагьана Исади. – Зун акурдаз Бубани акунва; идалай гуьгъуьниз «Вуна Чаз Буба къалура» лугьудай гафар вуч лагьай чӀал я? 10Зун Бубада, Бубани За авайдахъ вун чӀалахъ жезвачни? Квез лугьузвай гафар За Жува Жувакай туькӀуьрна лугьузвайбур туш. Зунни Вич сад хьанвай Буба я Вичин крар ийизвайди. 11Буба За ава, Зун Бубада ава лугьудай зи гафарин чӀалахъ хьухь. Куьн зи гафарин чӀалахъ жезвачтӀа, гьич тахьайтӀа За ийизвай крарихъ хьайитӀани агъугъ.

12За квез лап рикӀивай лугьузва: Зун Зи Бубадин патав хъфизва, гьавиляй Захъ иман ийизвайда За вуч авуртӀа гьам ийида, гьатта За авурдалай артухни ийида. 13Куьне Заз Зи ТӀварцӀелай ая лагьай вуч хьайитӀани За ийида. Гьа икӀ Хци Бубадин баркалла къалурда. 14Зи ТӀвар кьуна куьне вуч тӀалабайтӀа, За гьам кьилиз акъудда.

Пак Руьгь хиве кьун

15Квез Зун кӀан ятӀа, куьне Зи тагькимар кьилиз акъудда. 16За Бубадиз минетда, Адани квез цӀийи Несигьатдар гуда. Ам даим квехъ галаз амукьда. 17А Несигьатдар Гьакъикъатдин Руьгь я. Дуьньядиз Ам акунач ва чидач, гьавиляй дуьньядивай Ам кьабулизни жедач. Квез Ам чизва, вучиз лагьайтӀа Ам квехъ галаз амукьзава ва Ам квек кваз жеда. 18За куьн етимвиле тадач, Зун элкъвена куь патав хкведа. 19Са кьадар вахтундилай Зун дуьньядиз ахквадач, амма квез Зун ахквада, вучиз лагьайтӀа Зал чан ала, квелни чан ала. 20Гьа юкъуз квез чир жеда: Зун Зи Бубада, куьн За, Зунни кве ава. 21Низ Зун кӀанзаватӀа, ада Зи тагькимар кьилиз акъудда. Зун кӀандайди Зи Бубадизни кӀан жеда. Зазни кӀан жеда ва За Жув адаз ачухарда.

22Искарият тушир Ягьуда Адавай хабар кьуна:

– Я Агъа! Вучиз Ваз Вун дуьньядиз ваъ, тек са чаз къалуриз кӀанзава? Бес Вун вири дуьньядин вилик атун лазим тушни?

23– Низ Зун кӀандатӀа, гьада Зи гаф кьилиз акъудда, – жаваб гана Исади. – Зи Бубадизни гьам кӀан жеда; гьа чӀавуз Чун а касдин патав къведа ва адахъ галаз амукьда. 24Зун кӀан тийизвайда За лагьайвал ийизвач. За квез лугьузвай гафар Зибур ваъ, Зун ракъурнавай Зи Бубадинбур я. 25Ибур За квез Зун куь арада амаз лугьузвайди я. 26Зи ТӀварцӀелай Бубади куь патав ракъурдай Несигьатдарди, яни Пак Руьгьди, лагьайтӀа, квез вири чирда ва За квез лагьайбур вири куь рикӀел хкида. 27За квез секинвал тазва, Зи секинвал гузва За квез. И дуьньяди тагудай хьтин саягъда гузва. РикӀик кьамир! КичӀе жемир! 28За лагьайди квез ван хьанани? Зун куь патавай хъфизва, ва мад элкъвена хкведа. Зи Буба Залай артух я, гьавиляй квез Зун кӀандайтӀа, Зун Бубадин патав хъфизва лагьай гафуни куьн шадардай. 29И кар арадал атайла куьне иман авун патал, За квез виликамаз лугьузва. 30Ина квехъ галаз ихтилатар ийидай вахт Захъ амач, и дуьньядал агъавалзавай бег Заз акси яз экъечӀзава. Адаз Зал агъавалдай са ихтиярни авач. 31Амма дуьньядиз Заз Зи Буба кӀанзавайди ва Зи Бубади Зал тапшуругъ авунвай крар ийизвайди чир хьун лазим я. Къарагъ, чун инлай хъфин.

Selectat acum:

Ягья 14: ЛезПК

Evidențiere

Partajează

Copiază