Акълова 6

6 къаьм

Гьаьликатабна къаьдарабна сукӀо ата̄ оха

1Йе дие оьжо, мадугьаллидда̄ла гьогцо нилӀал нуцӀойо оккона ми дӯкьа кьодо йохда,

сукӀола сукӀодда̄ла къотӀи богьна ко̄на йилӀакъонна йохда,

2дибола сикӀаъас гӯва йаьжи ми къорлиъ иᵸхъолца,

ми нилӀийа йаьжи илӀакъонна охца.

3Ми мадугьаллила каъ кези ахълъо, гьолълъо къорлиъис, сийо йогьнана эццакал аьмал бова, дие оьжо.

Эᵸкьанна эᵸкьена, инжитаб гьаьлълъилакьа гьолцо мадугьаллидой аьᵸйда̄на эчена, гьардизи ахъ.

4Дудойс малӀо йоцӀа,

милӀал гьаьйда йиᵸйацолал йеᵸйагьа̄къа.

5Билъохъаллихъас мецакал жайралли валатӀо богьцалаъцой,

мигьна̄ йовахцала сукӀохъас ко̄ъос меццакал лӀаха-маче мигьнали бикьецалаъцой,

мизу хъосар ахъал аьмал бова.

6Йа кӀаъаб сукӀо, дулзу аᵸкъло мокъал,

ми гьуᵸцалдой эᵸкье, гьоло муьхо-маьхецалахъана говацӀо.

7Гьолълъос йа гьаьким гаьъа,

йа гьолълъокьа кьодо голло хъаравул гаьъа,

йа хан гаьъа.

8Амма гьолълъо азодо гьинил йуьᵸхъал оьлло жо йо̄с,

муькъо-бох йокӀолцола замаллиъ йуьᵸхъал жона йокӀолца.

9Йа кӀаъаб сукӀо, нитокцалди ми уьча̄хена эчеш?

Нитод ми милӀалъцо лъуьълӀош?

10Даьгьабба̄жана уьча̄хаш,

даьгьабба̄жана гьаьйда йиᵸйацолас,

ко̄дана сидкьа гьоᵸсо гуванна йоькькьаша̄жана утӀна эцас ми.

11Вагьалълъо мехлаъ къачагъцой йоᵸкъас дудой мискинлъи,

лъаькъейо сукӀоцой йоᵸкъос дудой йазихлъина.

12Мекъабла йаьжла̄ш сикӀона йоцӀинна

эᵸкье-го̄с гьаьликатабна къаьдарабна сукӀо.

13Дӯхъа оᵸтӀоласлаъ, гьолцо гьаьй йаькьелца,

хаьба къе̄ баькьелца, зокьла̄д ишара бо̄с.

14Гьолцола йакӀиъ инжитлъи-къабигьлъи гей;

нитоназу кешлъи йовал иᵸгьолдас гьули,

нитоназу аьдамла даьъба-йаьжла̄ъ ме̄ш гьолцо.

15Амма йакӀкьа гаьчӀел хел мокъос гьолцокьа,

гелокьасзу угъос гьули – гьолцол комак михъаъас.

16Гьула БетӀергьаллил йатӀаъцас илъна жо,

гьула̄зу Гьолцол йакӀил йатӀаъцас алӀнасна жо:

17букъа аьмалликьа говацӀо̄лъи,

гьереси нисоцас миц,

багьана-аьйиб гаьчӀел гьеᵸ къе̄ мегьцас ко̄да,

18чикейо къас гаьгьийо йакӀо,

кешлъи йовал чӀанабагъоцас хаьба̄,

19сидилъ гьоᵸсо йеᵸхенна гьереси нисоцас отӀолаги-нуьъ,

гьула̄зу исна̄ъ эᵸдо даьъба-йаьже йогьцас сукӀона.

20Йе дие оьжо, абос амро-насигьат цӀуми бова,

ийос нисо̄на йова.

21Вагьли къацӀцӀо ми нитоназу йакӀкьа йохна йечаннейа,

билъалъна йеᵸхенна йечаннейа.

22Ми на̄ди эᵸкьедана, гьолълъо гьино йегалца дул,

утӀал эᵸкьейаъна гьолълъо ми цӀуми о̄с,

милӀалъсо лъуьълӀона муьгъатта̄на гьоло дӯгъой бикълаше-хъогьна бахъца.

23Вагьло амрона – лампа гей,

насигьатна – нур гей,

аᵸкъло-малъила кантӀизи о̄йолъина – чӀаголъилас гьино гей.

24Чикейа йоᵸтӀолацала аьдамликьасна,

сукӀола миц бихха ахъхъакьасна

цӀуми о̄с ми гьолло.

25Гьолълъола берцинлъилад йакӀо йагъал йеᵸйла̄къа ми,

гьолълъо гьаьй йаькьенналӀона

гьолълъогъой муьгъалӀна эᵸкьа̄къа.

26КӀаьйлӀочала ийодда̄ла аьдамли ми баьба-хокӀалиъис маьгьрум о̄с,

сукӀола ахъхъалӀо нисода, дул хирияб дибо оьмро бугъолца!

27ЦӀо милъинаъ гулда, мухун йекӀечӀе гьихлъосди?

28Гъадрилакьа кьодолакьа̄ эᵸкье-го̄вас хаьба̄ йеᵸйакӀечӀе гьихбалъосди?

29СукӀола ахъхъадой гьицакийона,

гьолълъол ко̄ йеᵸхелло сукӀона

тамбигьлиъис тиса уьᵸхаъаш.

30Нукона гьихлъоваъ гьинис оᵸх йоцӀаллъид жо йуᵸцодана,

гигьлагина вагьла̄ нуькучӀ оваъас.

31Амма гигьликьа иᵸхъона муьгъатта̄,

алӀовахна йуьᵸкъонна йоцӀал нуцӀос гьолцо,

билӀоъ гаьгьийо-гаьччона нилӀал нуцӀос.

32СукӀола ахъхъагъой кӀаьйлӀоцас сукӀо – аᵸкъло гаьччо сукӀо гей.

Гьолцо гьинис оьмро бугъолца.

33Аькьенна икьейолъина, рогьо-ницна насибаб гей гьолцол.

Гьаькъирлъина нитоназу кьодос йеᵸкьаъас гьолцокьас.

34ГьоглӀола бетӀергьаллис шаклъина чикейа симас боцӀийо бахъца,

къисас бокчицала водиъ гьолцол гургьел-рагьмона боваъас.

35Ласо тели окко-месед нилӀдана, гьолцо гьули йохаъас,

лади тели сайгъатла ми йа̄къодана, дӯкьа гьули гургьизи ахъаъас.

Selectat acum:

Акълова 6: KapPROLUK

Evidențiere

Partajează

Copiază

Dorești să ai evidențierile salvate pe toate dispozitivele? Înscrie-te sau conectează-te

Акълова 6

Versete biblice populare din
Акълова 6

Biblia:

бежкьалас миц

Versiune: Анкълова, Лука - KapPROLUK