Акълова 13

13 къаьм

1Аᵸкъилабли оьжди або нисойо йо̄с,

йаьгь-ламус гаьччо сукӀо кантӀизи огьдана нисо̄ йохаъас.

2Гьинила кӀетӀа каламлиъкьа̄ инсаллил кӀетӀослъи йиᵸхъос,

хиянат-сукӀола йакӀиъ кешлъи йахъца.

3СикӀо цӀуми йо̄ва руьгьна цӀуми бо̄с,

ургъизи ахъечӀе икълашейо пасад ахъца.

4КӀаъаблила йакӀил тели жо йацца, амма гьоьшшона йиᵸхъаъас,

кӀаълъи гаьчча йакӀил йатӀийо жо йиᵸхъос.

5Муъмин-сукӀол оᵸтӀола̄лъи йатӀаъас,

лъаькъейо сукӀо инжитлъилаъна къабигьлъилаъна эᵸкье-го̄с.

6ЙакӀо йаᵸцойо инсан ималли сапарлиъна цӀуми о̄с,

лъаькъейо сукӀо мунагьли лӀийода̄ экилца.

7Гьоᵸс сукӀо жу бечедаб гейлӀо нисона эчеш,

гьинис гьоьшшона йахъаъдана,

бадисо ласо йукъо бечелъи гьинис йахъдана,

гьоьшшона гаьъалӀо нисона эчеш.

8Инсаллис бечелъи гьолцола оьмролахъаш багъоцас магъало гей,

мискин-сукӀол гьолълъос гьинкъи йахъаъас.

9Муъмин-сукӀокьа кьодо нур йечена йахъца,

лъаькъейа сукӀос канлъи йедна йолъос.

10Букъа аьмаллидда̄ла даьъба-йаьже йахъца,

аᵸкълова йовахийо аᵸкъилаб ахъца.

11Бигьа йиᵸхъойо бечелъи гьех йолъос,

гьаьтеэчена йокӀолло бечелъи – телилъца.

12Кул бахъийо жо йиᵸхъаъда йакӀо кӀокӀос,

йакӀкьа гаьгьийо жо йиᵸхъойолъи оьмролаш мокӀлъилаъ йикъелца.

13Насигьат аьᵸдалаъ мейэшлал азаб михъос,

амрова тӀубази йовагьийал кири чахча.

14Аᵸкъилаблис насигьат – маулхӀаятлис мокӀ гей,

хеллила кӀицлиъисна гьолълъо тиса ба̄гъос!

15Аᵸкъло камилаб бахъийодола, къимат кьодда̄кца,

хиянат-сукӀос гьино йилӀа загьматаб йахъца.

16ЦӀодораб сукӀо илмо-лъайлигъой муьгъалӀ эᵸкьеш,

аьбдалли гьинис аьнтлъи гиса йагъос.

17Лъаькъейа чапарли балагьлиъ бейажеш,

божи гаьгьийо вакил унтилал даруцой ахъца.

18Насигьатла йовахаъцала̄кьа кьодо мискинлъина инжитлъина йоᵸкъос,

нисойо йохна эᵸкье-гогьцалас гьуьрмат бо̄с.

19Мурадлиъ оᵸкъолъ йакӀо рази йахъца,

аьбдалла̄ нуькучӀаб жолъилаъ йикъелца жуво̄л кантӀизи бовал муьхобалъийолъи.

20Аᵸкъиллигъой къацӀо эчейал аᵸкъло мокъос,

аьбдаллигъой ваццалъи йо̄вал зарал бахъца.

21Мунагь бо̄вал муьгъалӀ балагьна мокъос,

муъмин-сукӀол шапакъатлил бечелъи йиᵸхъос.

22КӀетӀа сукӀо къовала къовал муьгъатта̄ ирс бечанне̄ш,

мунагьабли сукӀо боцӀи-ризкъи муъмилла̄л гьихлъал бокӀолца.

23Мискиллис муькъо-бох йоцӀийо йахъца,

гьилла-макроли мицалъ йахъийо муькъо-бох залӀиъ йе̄ᵸш.

24ЦӀицӀакьа йакӀо йугъоцас сукӀо – гьинис оьжо атӀаъцас сукӀо ахъца,

оьжо аццала – гьули цӀицӀолилъ агъечӀе эчаннейаъас.

25Муъмилла оᵸха йоваццал бейасца,

апаракӀла̄с оᵸх нукона гьихлъос.

Selectat acum:

Акълова 13: KapPROLUK

Evidențiere

Partajează

Copiază

Dorești să ai evidențierile salvate pe toate dispozitivele? Înscrie-te sau conectează-te

Акълова 13

Versete biblice populare din
Акълова 13

Biblia:

бежкьалас миц

Versiune: Анкълова, Лука - KapPROLUK