Маттэ 8
8
ЯЕНЭРЭШЪХЬ
Исус шъоджэ уз Ӏае зиӀэ лӀы горэ зэригъэхъужьыгъэр
(Марк 1:40-45; Лука 5:12-16)
1Исус Ӏуашъхьэм къызехыжьым, цӀыф купышхуабэхэр ыуж ихьагъ. 2Ащ дэжьым шъоджэ уз Ӏае зиӀэ лӀы горэ Исус къыбгъодахьи, лъэгонджэмышъхьэкӀэ ыпашъхьэ къитӀысхьи, къыӀуагъ:
– О тхьэматэ, уфаемэ, сыбгъэхъужьын плъэкӀыщт.
3Исус ыӀэ ыщэий, тырилъхьи#8:3 тырилъхьи – шъоджэ уз Ӏае зиӀэм узыр пыпхынкӀэ щынэгъуагъэ, пӀэ теплъхьанэу хъущтыгъэп., къыӀуагъ:
– Ары, сыфай, псаоу къэхъужь! Ардэдэм шъоджэ узыр а лӀым хэкӀыжьи, ыкӀышъо къабзэ хъужьыгъэ. 4Ащ дэжьым Исус а лӀым риӀуагъ:
– Фэсакъ, мыр зыми емыӀуат, ау дин пащэм дэжь кӀуи, зегъэлъэгъу. ЕтӀанэ пегъымбар Мусэ иунашъо тетэу къурмэн шӀы. Ар узэрэхъужьыгъэмкӀэ цӀыфхэм апашъхьэ шыхьат хъущт.
Исус дзэ пащэм иунэӀут зэригъэхъужьыгъэр
(Лука 7:1-10; Иуан 4:43-54)
5ЕтӀанэ Исус къалэу Капернаум#8:5 къалэу Капернаум – Галилей псыхъураем итемыр тыгъэ къохьэпӀэ Ӏушъо Ӏут. дэхьагъ. Зыдахьэм, дзэ пащэ горэ къыбгъодахьи, къелъэӀугъ:
6– О тхьэматэ, сиунэӀут ыӀэпкъ-лъэпкъ узым зэкӀиубытагъэу, гугъушхом ыхьэу, унэм илъ.
7– Сэ сыкъэкӀонышъ, ар згъэхъужьыщт, – Исус риӀуагъ.
8– О тхьэматэ, о сиунэ укъихьаныр сифэшъуашэп, – къыӀожьыгъ дзэ пащэм, – ау зы гущыӀэ закъо къаӀуи, унашъо шӀи, сиунэӀут хъужьыщт. 9Сыда пӀомэ, сэри зыгорэм унашъо къысфешӀы, сыфэӀорышӀэ, сиунашъо къедэӀунхэу дзэлӀхэри сиӀ. Зыгорэм «КӀо» есӀомэ, кӀощт. Адрэми «КъакӀо» есӀомэ, къэкӀощт. СиунэӀути «Мыр шӀэ» есӀомэ, ащи ышӀэщт.
10Исус ар зызэхехым, ыгъэшӀагъуи, игъусэхэм ариӀуагъ:
– Шъыпкъэр шъосэӀо, мыщ фэдэ шӀошъхъуныгъэ зиӀэ цӀыф закъо Израиль хэгъэгум изгъотагъэп. 11Ау сэ шъосэӀо, тыгъэ къокӀыпӀэмкӀи тыгъэ къохьапӀэмкӀи цӀыфыбэхэр къикӀынхэшъ, Ибрахьимэ, Исхьакъ, Якъубэ ягъусэхэу Тхьэу уашъом щыӀэм и Тетыгъошхо гухэхъо Ӏанэ чӀыпӀэхэр щаубытыщт. 12Ау мы пачъыхьагъум ицӀыфхэр шӀункӀым икуупӀэ хадзэщтых. Ащ куохьаурэ цэ зэрэгъэшхырэ щыхъущт.
13ЕтӀанэ Исус дзэ пащэм риӀуагъ:
– КӀо, о пшӀошъ зэрэхъугъэм фэдэу къыбдэхъущт. А сыхьат дэдэм дзэ пащэм иунэӀут хъужьыгъэ.
Исус цӀыфыбэхэр зэригъэхъужьыгъэр
(Марк 1:29-34; Лука 4:38-41)
14ЕтӀанэ Исус Петрэ иунэ зехьэм, Петрэ ишӀугуащэ плъыр-стыркӀэ сымаджэу, пӀэм хэлъэу ылъэгъугъ. 15Исус ащ ыӀапэ нэсыгъ, плъыр-стырри хэкӀыжьыгъ. ШӀугуащэр къэтэджыжьи, Исус къыхьакӀэу ыублагъ.
16Пчыхьэ зэхъум, джынапцӀэ зыхэс цӀыфыбэхэр Исус дэжь къащагъэх. Исус джынапцӀэхэр зы гущыӀэкӀэ цӀыфмэ ахифыхи, сымэджэ пстэури ыгъэхъужьыгъ. 17Аущтэу зыкӀэхъугъэр пегъымбар Ешайа мы гущыӀэхэу къыӀуагъэхэр#8:17 пегъымбар Ешайа мы гущыӀэхэу къыӀуагъэхэр – еплъ Пегъымбар Ешайа тхылъэу ытхыгъэм 53:4. къэшъыпкъэжьынхэр ары: «Тэ тигъойщэягъэхэр ттырихи, тиузхэр ежь зытырилъхьажьыгъ».
Исус игъогу рыкӀоным къин щэчыгъоу хэлъыр
(Лука 9:57-62)
18ЦӀыф купышхуабэхэу къеуцокӀыгъэхэр Исус зелъэгъум, игъогу рыкӀохэрэм ариӀуагъ:
– НекӀо, псыхъураем иадрабгъу тызэпырыжъугъэкӀ.
19Джащыгъум Тэурат егъэджэкӀо пащэ горэ Исус къыбгъодахьи, къыриӀуагъ:
– Дин гъэсакӀу, тыдэ укӀоми, уауж сыкъырыкӀощт.
20– Баджэхэм исынхэу бы яӀ, ошъогу бзыухэми набгъо яӀ, ау ЦӀыф Лъэпкъым ы Къо ышъхьэ зэрихьылӀэжьын чӀыпӀэ иӀэп, – риӀожьыгъ Исус.
21ЕтӀанэ игъогу рыкӀохэрэм ащыщэу нэмыкӀ горэм Исус къыриӀуагъ:
– Тхьэматэ, ыпэ рапшӀэу сыкӀонышъ, сятэ чӀэслъхьажьынэу фит сыкъэшӀ.
22– ЛӀагъэхэм ежьхэм ялӀагъэхэм яхьадэхэр чӀарэлъхьажь, ау о сауж къырыкӀу, – риӀожьыгъ Исус.
Исус жьыбгъэ щынэгъошхор зэригъэуцугъэр
(Марк 4:35-41; Лука 8:22-25)
23Исус къуашъо горэм зетӀысхьэм, игъогу рыкӀохэри ыуж итхэу къуашъом итӀысхьагъэх. 24ОшӀэ-дэмышӀэу жьыбгъэ щынэгъошхо псыхъураем къыщыхъуи, псыорхэр къуашъом къиохэ хъугъэ. Ау Исус чъыещтыгъэ. 25Джащыгъум ахэр Исус къыбгъодахьэхи, къагъэущи, аӀуагъ:
– Зиусхьан, тымыкӀодэу тыкъэгъэнэжь, тэкӀоды.
26– Сыда шъузкӀэщынэрэр, шӀошъхъуныгъэр зимакӀэхэр? – ариӀуагъ Исус ахэмэ. ЕтӀанэ къэтэджи, жьыбгъэшхоми псыми ягыигъ, кӀым-сым дэди хъугъэ.
27– Хэта мыр, жьыбгъэшхори псыри зыгъэдаӀорэр? – аӀуагъ цӀыфхэм агъэшӀагъоу.
Исус джынапцӀэхэр зыхэсхэ нэбгыритӀу зэригъэхъужьыгъэр
(Марк 5:1-20; Лука 8:26-39)
28ЕтӀанэ псыхъураем иадрабгъу ит хэкоу Гергесэ#8:28 Гергесэ – Гадар ятӀонэрэ цӀэу къалэми хэкуми яӀагъ. къалэм епхыгъэм Исус зынэсым, джынапцӀэхэр зыхэсхэ нэбгыритӀу къэунэхэм къачӀэкӀхи, къыпэгъокӀыгъэх. А гъогум зы цӀыфи бламыгъэкӀэу, лӀы ебгагъэх.
29– Тхьэм ы Къу, сыда о уиӀофэу къытхэлъыр? Игъо къэмысэу къин тэбгъэщэчынэу укъэкӀуагъа? – аӀозэ, къэкууагъэх.
30Ау ахэмэ апэчыжьэу къо Ӏэхъогъушхо щыхъущтыгъ. 31Джащыгъум джынапцӀэхэр Исус къелъэӀугъэх:
– Мы лӀыхэм тызахэпфыкӀэ, мо къо Ӏэхъогъум тыгъакӀуи, къохэм апкъыхэм тахэгъахь.
32– ШъукӀу! – ариӀуагъ Исус ахэмэ. Аущтэу зеӀом, джынапцӀэхэр лӀыхэм ахэкӀыжьхи, къохэм апкъыхэм ахэхьагъэх. Къохэм апкъыхэм захахьэхэм, Ӏэхъогъур зэкӀэ Ӏошъхьэ нэпкъым ечъэхи, псыхъураем хэлъади, псым хэкӀодагъ. 33Къуахъохэр хэхьажьхи, къалэм чъэжьыгъэх, хъугъэ-шӀэгъэ пстэури, джынапцӀэхэр зыхэсыгъэ лӀитӀум къащышӀыгъэри щаӀотагъ. 34Джащыгъум зэрэкъалэу дэкӀыгъ Исус пэгъокӀынхэу, ар залъэгъум, яхэку ыбгынэнэу елъэӀугъэх.
Selectat acum:
Маттэ 8: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
