Маттэ 6
6
ЯХЭНЭРЭШЪХЬ
Сэдакъэм ехьылӀагъ
1– Шъо шӀу зышъушӀэкӀэ, цӀыфхэм тагъэшӀэгъощт шъуӀоу, ахэмэ алъэгъоу зэрэшъумышӀэнхэм шъуфэсакъ. Армырмэ, шъуя Тэ лъапӀэу уашъом щыӀэм ӀахьышӀу къышъуфигъэшъошэщтэп.
2– Арышъ, сэдакъэ зыптыкӀэ, цӀыфхэм къэбар ямыгъашӀ, синэгогухэм ачӀэсхэу, урамхэми атетхэу нэпитӀу зиӀэ цӀыфхэм адрэхэм къэбар зэрарагъашӀэрэм фэдэу, ежьхэм зыщагъэтхъунхэм пае. Шъыпкъэр шъосэӀо, аущтэу зышӀэхэрэм яӀахь агъотыгъах. 3Ау о сэдакъэ зыптыкӀэ, пӀэ джабгъу Ӏофэу ышӀырэр пӀэ сэмэгу ымышӀэу орэхъу, 4сэдакъэу о птыгъэр шъэфэу къэнэным пае. Ащыгъум уя Тэ лъапӀэу цӀыфхэм шъэфэу ашӀэрэр зылъэгъурэм уиӀахьышӀу къыуитыщт.
Тхьэм уелъэӀуным ехьылӀагъ
(Лука 11:2-4)
5– Тхьэм шъуелъэӀу хъумэ, нэпитӀу зиӀэ цӀыфхэм зэрашӀырэм фэдэу шъумышӀы. ЦӀыфхэм зарагъэлъэгъуным пае, Тхьэм елъэӀухэзэ, синэгогухэми урам къуапэхэми къащыуцунхэр якӀас. Шъыпкъэр шъосэӀо, ахэмэ яӀахь агъотыгъах. 6Ау о Тхьэм уелъэӀу зыхъукӀэ, уиунэ ихьажьи, пчъэр къыфэшӀи, уя Тэ лъапӀэу цӀыфхэм амылъэгъурэм елъэӀу. Ащыгъум уя Тэ лъапӀэу цӀыфхэм шъэфэу ашӀэрэр зылъэгъурэм уиӀахьышӀу къыуитыщт. 7Тхьэм шъузелъэӀукӀэ, бащэ шъумыӀо, хымэ лъэпкъхэм зэрашӀырэм фэдэу; сыда пӀомэ, ахэмэ гущыӀабэ къаӀомэ, ятхьэлъэӀухэм Тхьэр къядэӀунэу мэгугъэх. 8Арышъ, ахэмэ зэрашӀырэм фэдэу шъумышӀы; сыда пӀомэ, шъо шъуелъэӀуным ыпэкӀэ шъуищыкӀагъэр шъуя Тэ лъапӀэм ешӀэшъ ары.
9– Моущтэу Тхьэм шъуелъэӀу: «О тя Тэ лъапӀэу уашъом щыӀэр! ПцӀэ цӀыфхэм агъэлъапӀэ орэхъу.
10Уи Тетыгъошхо къэрэкӀу. Узыфаер уашъом зэрэщыхъурэм фэдэу, чӀылъэми щэрэхъу.
11Хьалыгъоу тищыкӀагъэр непэ къытэт.
12Мыхъунэу тшӀагъэхэр къытфэгъэгъу, тэ мыхъун къытэзышӀагъэхэм зэрафэдгъэгъурэм фэдэу.
13Шэйтаным псэкӀод тигъэшӀэнэу фит умышӀы, ащи тыщыухъум. МыкӀодыжьын тетыгъошхори, лъэкӀышхори, щытхъушхори о уиех. Амин».
14– ЦӀыфмэ мыхъунэу ашӀагъэхэр зафэжъугъэгъухэкӀэ, шъуя Тэ лъапӀэу уашъом щыӀэм шъори мыхъунэу шъушӀагъэхэр къышъуфигъэгъущтых, – къыпигъэхъожьыгъ Исус. 15– Ау цӀыфмэ мыхъунэу ашӀагъэхэр шъо зафэшъумыгъэгъухэкӀэ, шъуя Тэ лъапӀи шъо мыхъунэу шъушӀагъэхэр къышъуфигъэгъущтхэп.
НэкӀым ехьылӀагъ
16– Ащ фэдэу шъунэкӀы зыхъукӀэ, нэпитӀу зиӀэ цӀыфхэм афэдэу зышъумыгъэнэшхъэй; сыда пӀомэ, зэранэкӀырэр цӀыфмэ арагъэлъэгъуным пае, ахэмэ анахэ зэхагъахьэ. Шъыпкъэр шъосэӀо, ахэмэ яӀахь агъотыгъах. 17,18Ау о унэкӀы зыхъукӀэ, цӀыфхэм ащ гу лъамытэу, уя Тэ лъапӀэу цӀыфхэм амылъэгъурэм изакъоу зэрэунэкӀырэм гу лъитэным пае, дэгъэ лъапӀэ пшъхьэ щыф, унэгуи тхьакӀы. Ащыгъум уя Тэ лъапӀэу цӀыфхэм шъэфэу ашӀэрэр зылъэгъурэм уиӀахьышӀу къыуитыщт.
Уашъом мылъкушхо щышъуугъой
(Лука 12:33-34)
19– ЧӀылъэм мылъкушхо щышъумыугъой, сыда пӀомэ, хъунэмрэ улъыинымрэ чӀылъэм щыӀэр щагъэкӀоды, тыгъуакӀохэм чӀылъэми унэхэр щатӀэкӀых, щэтыгъух. 20Ау уашъом мылъкушхо щышъуугъой. Хъунэми улъыиными ащ дэжьым щагъэкӀодырэп, тыгъуакӀохэми щатӀэкӀырэп, щатыгъурэп. 21Сыда пӀомэ, о уимылъкушхо зыдэщыӀэм угуи щыӀэщт.
Пкъым иостыгъэр
(Лука 11:33-36)
22– Пкъым иостыгъэ – нэр ары. Арышъ, о унэ псаумэ, зэкӀэ о ппкъы нэфынэщт. 23Ау о унэ дэимэ, зэкӀэ о ппкъы шӀункӀыщт. Арышъ, о пхэлъ нэфынэр шӀункӀымэ, а шӀункӀыр сыдэу шӀункӀышху!
Тхьэмрэ ахъщэмрэ
(Лука 16:13)
24– Зы цӀыфыр тхьэмэтитӀум афэлэжьэн ылъэкӀыщтэп, е зыр ыуджэгъунышъ, адрэр шӀу ылъэгъущт, е зым шъыпкъэу фыщытынышъ, адрэр зэрипэсыщтэп. Шъо Тхьэми ахъщэми шъуафэлэжьэн шъулъэкӀыщтэп.
ГумэкӀыным ехьылӀагъ
(Лука 12:22-34)
25– Арышъ, шъосэӀо, «Сыда тшхыщтыр, сыда тызэшъощтыр?» шъуӀоу, шъуищыӀэныгъэ пае шъумыгумэкӀ. «Сыда тщыгъыщтыр?» шъуӀоу, шъупкъы паий шъумыгумэкӀ. Гъомылэм нахьи щыӀэныгъэр нахь лъапӀэба, щыгъыным нахьи пкъыр нахь лъапӀэба? 26Ошъогум щыбыбырэ бзыухэм шъуяплъ. Ахэмэ чылапхъи апхъырэп, лэжьыгъи ахыжьырэп, конхэм аратэкъожьырэп, ауми шъуя Тэ лъапӀэу уашъом щыӀэм ахэр егъашхэх. Шъо ахэмэ анахьи бэкӀэ шъуанахь лъапӀэба? 27ГумэкӀэу хэта шъуащыщэу зищыӀэныгъэ сыхьат закъокӀэ зезгъэукӀыхьан зылъэкӀыщтыр?
28– Щыгъыным пае сыда шъузкӀэгумэкӀырэр? Губгъо къэгъагъэхэм якъэкӀыкӀэ шъуеплъ. Ахэр лажьэхэрэп, ци аджырэп, 29ау сэ шъосэӀо, ежь пачъыхьэ Сэлмэн сыд фэдизэу дахэу кӀэракӀэщтыгъэми, ахэмэ ащыщэу зыгорэм фэдэу фэпэгъагъэп. 30А уцэу губгъом непэ итэу, неущ хьакум радзэжьыщтыр Тхьэм аущтэу зигъэкӀэракӀэкӀэ, ащ нахьи бэкӀэ нахьыбэу шъо шъуигъэкӀэрэкӀэнба, шъо шӀошъхъуныгъэ зимакӀэхэр? 31Арышъ, «Сыда тшхыщтыр?», е «Сыда тызэшъощтыр?», е «Сыда тщыгъыщтыр?» шъуӀоу шъумыгумэкӀ. 32Сыда пӀомэ, а Ӏоф пстэури ары дунаим тет лъэпкъхэр зылъыхъухэрэр. А зэпстэури шъо зэрэшъуищыкӀагъэр шъуя Тэ лъапӀэу уашъом щыӀэм ешӀэ. 33Ау ыпэ рапшӀэу Тхьэм и Тетыгъошхо иӀофхэмрэ Тхьэм ишъыпкъагъэрэ ауж шъуит, етӀанэ а Ӏоф пстэури къышъуӀэкӀэхьащт. 34Арышъ, неущырэ мафэм шъуфэмыгумэкӀ. Неущырэ мафэр ежь ышъхьэ фэгумэкӀыжьыщт, сыда пӀомэ, зыфэгумэкӀыжьын икъун Ӏоф сыдрэ мафи иӀэшъ ары.
Selectat acum:
Маттэ 6: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
