Апостолхэм ашӀэгъэ Ӏофхэр 8
8
ЯЕНЭРЭШЪХЬ
1Стефан зэраукӀыгъэр Шаул игъоу ылъэгъугъ.
Шаул чылыс зэӀукӀэм щыщхэм къин зэраригъэщэчыщтыгъэр
А мэфэ дэдэм цӀыфхэм чылыс зэӀукӀэм щыщхэу Ерусалим дэсхэм лъэшэу къин арагъэщэчэу аублагъ. Апостолхэм анэмыкӀэу, шӀошъхъуныгъэ зиӀэ пстэури Иудей хэкумрэ Самарие хэкумрэ ащызэбгырыкӀыжьыгъэх. 2Тхьэм шӀолӀыкӀ фызиӀэ лӀыхэм Стефан чӀалъхьажьи, хьэдэгъэшхо фашӀыгъ. 3Ау Шаул чылыс зэӀукӀэм щыщхэр ыгъэкӀодынхэу ауж итыгъ. Зы унэм икӀымэ адрэ унэм ихьэзэ, хъулъфыгъэхэри бзылъфыгъэхэри лӀыгъэкӀэ раригъэщыхэти, хьапсым чӀаригъадзэщтыгъэх.
Филипп къэбарышӀур Самарие хэкум зэрэщигъэӀущтыгъэр
4ЦӀыфхэу зэбгырыкӀыжьыгъагъэхэм къакӀухьэзэ, КъэбарышӀур цӀыфхэм арагъэӀущтыгъ. 5Филипп#8:5 Филипп – апостолхэм ежьхэм адэӀэпыӀэнхэу агъэнэфэгъэ лӀиблым ащыщыгъ. Еплъ 6:5. Самарие хэкум#8:5 Самарие хэкур – Иудей хэкумрэ Галилей хэкумрэ азыфагу дэлъ хэкур ары. Джуртхэмрэ Самарие цӀыфхэмрэ яхабзэхэри ядинхэри зэрэзэфэшъхьафхэм пае, зэпыищтыгъэх. щыщ къалэ горэм къакӀуи, ащ дэс цӀыфмэ Христос ехьылӀэгъэ къэбарышӀур аригъэӀугъ. 6ЦӀыф купышхохэм Филипп къэгущыӀэу зэхахэу, Ӏофышхо гъэшӀэгъонхэу ышӀэщтыгъэхэри залъэгъум, къыӀохэрэм яшъыпкъэу ядэӀущтыгъэх; 7сыда пӀомэ, цӀыфыбэхэм ахэс джынэпцӀэ Ӏаехэр кӀыихэзэ ахэкӀыщтыгъэх, зыӀэпкъ-лъэпкъ узым зэкӀиубытэгъэ цӀыфыбэхэри, лъащэхэри Филипп ыгъэхъужьыщтыгъэх. 8Аущтэу а къалэм ицӀыфхэм гушӀогъошхо яӀэ хъугъэ.
9Ау а къалэм Симон ыцӀэу лӀы горэ дэсыгъ. Зы заулэрэ ушхъухьаным пылъыгъэу, ежь лӀы инэу ашӀуигъэшӀэу, Самарие хэкум ис цӀыфмэ ашӀогъэшӀэгъоныщтыгъ Симон.
10– Мы лӀыр Тхьэм илъэкӀышхоу «ЛъэкӀыныгъэ Инэу» зыфаӀорэр ары, – аӀозэ, цӀыф пстэури, ини цӀыкӀуи, Симон къыӀохэрэм агу етыгъэу ядэӀущтыгъэх. 11БэшӀагъэу иушхъухьанкӀэ ахэмэ инэу агъэшӀагъоти, яшъыпкъэу едэӀущтыгъэх. 12Ау Тхьэм и Тетыгъошхо ехьылӀэгъэ къэбарышӀумрэ Исус Христос ыцӀэ ехьылӀэгъэ къэбарышӀумрэ Филипп аригъэӀухэу, цӀыфхэм шӀошъхъуныгъэ яӀэ хъу зэхъум, хъулъфыгъэхэми бзылъфыгъэхэми Филипп зырагъэумэхъыгъ. 13Ежь Симони ИсускӀэ шӀошъхъуныгъэ иӀэ хъуи, Филипп зыригъэумэхъыгъэу, ыуж итэу кӀощтыгъ. Филипп нэшэнэ гъэшӀэгъонхэу къыгъэлъагъощтыгъэхэри Ӏофышхо гъэшӀэгъонхэу ышӀэщтыгъэхэри Симон зилъэгъухэкӀэ, ыгъэшӀагъощтыгъэх.
14Ерусалим дэс апостолхэм Самарие цӀыфхэм Тхьэм игущыӀэхэр зэрадагъэхэр зызэхахым, Петрэрэ Иуанрэ ахэмэ адэжь агъэкӀуагъэх. 15Петрэрэ Иуанрэ зынэсхэм, Тхьэм ы Псэ ЛъапӀэ шӀошъхъуныгъэ зиӀэхэм агухэм арылъ хъунэу Тхьэм афелъэӀугъэх; 16сыда пӀомэ, Тхьэм ы Псэ ЛъапӀэ ахэмэ ащыщэу зыми къыфехыгъагъэгоп, Зиусхьан Исус ыцӀэкӀэ Филипп ахэр ыумэхъыгъагъэх ныӀэп. 17Джащыгъум Петрэрэ Иуанрэ аӀэхэр ахэмэ атыралъхьэхи, Тхьэм ы Псэ ЛъапӀэ а шӀошъхъуныгъэ зиӀэхэм агухэм арылъ хъугъэ. 18Апостолхэм аӀэхэр затыралъхьэм, а цӀыфхэм Тхьэм ы Псэ ЛъапӀэ агухэм арылъ зэрэхъугъэр Симон зелъэгъум, апостолхэм ахъщэ къафихьи, моущтэу къыӀуагъ:
19– Сэ сӀэхэр цӀыф горэм теслъхьэмэ, Тхьэм ы Псэ ЛъапӀэ ыгу илъ хъуным пае, сэри мы лъэкӀыр къысэшъут.
20– Тхьэм итын ахъщэкӀэ къэпщэфышъун пшӀошӀыгъэшъ, уиахъщи ори шъузэдэрэкӀод, – риӀуагъ Петрэ. 21– Тхьэм дэжькӀэ угу шъыпкъагъэ илъэпышъ, мы Ӏофым ущыщэп, уиӀахьи хэлъэп. 22Арышъ, мы бзэджэшӀагъэм фыкӀэгъожьи, Тхьэм елъэӀу. Мыхъун гухэлъэу уиӀэр Тхьэм къыпфигъэгъункӀи мэхъу; 23сыда пӀомэ, шъугъоныр о угу инэу илъэу, бзэджагъэми узэкӀиубытагъэу сэлъэгъу.
24– КъэшъуӀуагъэхэм ащыщ зи къысэмыхъулӀэнэу Тхьэм шъукъысфелъэӀу, – къыӀожьыгъ Симон.
25Апостолхэр Зиусхьаным шыхьат фэхъухи, игущыӀэхэр къызагъэӀухэ ужым, Самарие хэкум щыщ къоджабэмэ КъэбарышӀур ащагъэӀузэ, Ерусалим агъэзэжьыгъ.
Филиппрэ Ефиопие хэгъэгум щыщ Ӏэшъхьэтетымрэ
26– Тэджи, Ерусалим дэкӀи, Газэ къалэм#8:26 Газэ къалэр – Ерусалим километрэ 85-кӀэ пэчыжьэу, икъыблэ тыгъэ къохьэпӀэ лъэныкъомкӀэ хы Ӏушъом Ӏут. кӀорэ гъогум щэджагъом дэжь техь! – ыӀуи, Зиусхьаным имэлэӀич Филипп къыриӀуагъ. Ар шъоф нэкӀым пхырыкӀырэ гъогугъ. 27Аущтэу Филипп тэджи, гъогум техьагъ. КӀозэ, Ефиопие хэгъэгум щыщ лӀы горэм ӀукӀагъ. Ефиопием ибзылъфыгъэ пачъыхьэу Кандакие фэлажьэрэ Ӏэшъхьэтетхэм а лӀыр ащыщыгъ. Бзылъфыгъэ пачъыхьэм имылъку зэкӀэ ащ ыӀэ илъыгъ. Ар Ерусалим Тхьэм щелъэӀунэу къэкӀогъагъ. 28Ихэгъэгу ыгъэзэжьынэу кум итӀысхьагъэу, пегъымбар Ешайа тхылъэу ытхыгъэм еджэщтыгъ.
29– Кум екӀуалӀи, ащ готэу кӀо! – къыриӀуагъ Тхьэм ы Псэ ЛъапӀэ Филипп.
30Филипп кум екӀуалӀи, а лӀыр пегъымбар Ешайа тхылъэу ытхыгъэм еджэу зызэхехым, къыӀуагъ:
– Узаджэрэм къикӀырэр къыбгурэӀуа?
31– Зыгорэм зэхэсимыгъэшӀыкӀмэ, сыдэущтэу къызгурыӀон слъэкӀына? – къыӀожьыгъ Ӏэшъхьэтетым. ЕтӀанэ ар Филипп елъэӀугъ:
– Кум къитӀысхьи, къызготӀысхь.
32Ӏэшъхьэтетыр Тхьэм игущыӀэ тхыгъэхэу зэджагъэр мы гущыӀэхэр ары#8:32-33 мы гущыӀэхэр ары – еплъ Пегъымбар Ешайа тхылъэу ытхыгъэм 53:7-8.:
«Мэлым фэдэу шӀуабзынэу ащагъ. Зыупхъорэм ыпашъхьэ зи ымыӀоу шъынэр зэрэщытым фэдэу, ежь ыжэ зэтырихыгъэп.
33Ежь агъэпыутыгъ, зэфагъи хэмылъэу хьыкум тырашӀыхьагъ. А лъэхъаным ицӀыфхэм ябзэджагъэ зынэсыгъэр хэта къэзыӀон зылъэкӀырэр? Сыда пӀомэ, ыпсэ мы дунаим щыхахыгъ».
34– Мыр къысэпӀонкӀэ сыолъэӀу, – къыриӀуагъ Ӏэшъхьэтетым Филипп, – пегъымбарым зигугъу ышӀырэр хэта? Ежьыра, нэмыкӀ цӀыф гора?
35Джащыгъум Филипп а гущыӀэ дэдэхэу Тхьэм игущыӀэ тхыгъэхэм арытхэмкӀэ къыубли, Исус ехьылӀэгъэ КъэбарышӀур Ӏэшъхьэтетым фиӀотагъ.
36Гъогум рыкӀохэзэ, псы горэм нэсыгъэх. Ӏэшъхьэтетым къыӀуагъ:
– Мыщ псы щыӀ. Сэ сыуумэхъымэ хъуна?
37– ЗэкӀэ о угукӀэ шӀошъхъуныгъэ уиӀэмэ, усыумэхъ хъущт, – риӀуагъ Филипп.
– Исус Христос Тхьэм зэри КъомкӀэ шӀошъхъуныгъэ сиӀ, – къыӀожьыгъ Ӏэшъхьэтетым.
38ЕтӀанэ Ӏэшъхьэтетым шыкуаом кур къыригъэгъэуцуи, Ӏэшъхьэтетымрэ Филиппрэ псым хахьэхи, Филипп адрэр ыумэхъыгъ. 39Псым къызыхэкӀыжьхэм, Зиусхьаным ы Псэ ЛъапӀэ Филипп нэмыкӀ чӀыпӀэ горэм ошӀэ-дэмышӀэу ыхьыгъ, Ӏэшъхьэтетми Филипп ылъэгъужьыгъэп. ГушӀуагъом хэтэу Ӏэшъхьэтетыр игъогу техьажьыгъ. 40Ау Филипп Азот къалэм#8:40 Азот къалэр – Газэ къалэмрэ Иоппие къалэмрэ языфагу дэтэу, хыӀушъом Ӏут. къыщылъэгъуагъ. Кесарие къалэм#8:40 Кесарие къалэр – Ерусалим километрэ 90-кӀэ пэчыжьэу, итемыр тыгъэ къохьэпӀэ лъэныкъомкӀэ хыӀушъом Ӏутэу, Палестинэ хэгъэгум икъэлэшхуагъ. Рим Ӏэшъхьэтетыр а къалэм дэсыгъ. нэс къыкӀухьэзэ, КъэбарышӀур къэлэ пстэуми ащигъэӀущтыгъ.
Selectat acum:
Апостолхэм ашӀэгъэ Ӏофхэр 8: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
