Эклц 4
4
Каин Авел хойр
1Адам Евала бәәнә, тернь саата болна, Каин#4:1 Каин – эн нерн «авх», «олх» гидг еврей келнә үгин бәәдлтә. гидг көвү һарһна. Ева келнә:
– Деед Эзнә дөңгәр би көвүтә болув.
2Хөөннь Ева терүнә дү көвү Авелиг һарһна. Авел хөд хәрүлнә, Каин һазр эд-бод кенә. 3Цаг давна. Каин Деед Эзнд белглҗ һазрин темс авч ирнә. 4Авел болхла сүргиннь түрүңк хөн малас махна тарһнынь авч ирнә. Авел болн терүнә белг Деед Эзнд таасгдна. 5Болв Каиниг бийинь, Каина белгинь Тер таасч уга. Каин ууртан бүтнә, уурлхлань чирәнь цәәҗ одв.
6Тиигхләнь Деед Эзн Каинд келнә:
– Чи яһад уурлҗанач? Чини чирә яһад цәәҗ одв? 7Кемр чи цугинь үннәр кехлә, чини белг таасгдх билә! Болв кемр чи үннәр эс кеҗәхләг, тиигхлә чамаг килнц гетҗәнә: тер чамаг авлхар седҗәнә, чи терүнд нойрхх йостач.
8– Теегт һарий! – гиҗ Каин дү Авелдән келнә.
Тедн теегт һарна. Каин эврәннь дү талан дәврәд Авелиг алчкна. 9Цаг давхла, Деед Эзн Каинас сурна:
– Чини дү Авел яһла?
– Медҗәхшв. Би мини дүүһин маначий? – гиҗ тер хәрү өгнә.
10– Чи юн гидг юм һарһвч? Чини дүүһин цусн һазрас намаг дуудҗана. 11Ода чи харалла харһвч. Һазр деерәс чи туугдҗанач, чини һарар асхрсн Авелин цусиг бийдән ивтрәҗ авхин төлә һазр шуурч. 12Кемр чи һазр деер көдлмш кехлә, тер чини төлә дәкҗ темс өгшго. Һазр деер чи хорһдх бәәрн уга тенәд йовдг күн болхич, – гиҗ Деед Эзн келнә.
13– Эн засгиг нанд даахд берк күнд. 14Эндр Та намаг һазр деерәс көөҗәнәт, би Танас холд бәәхүв: би һазр деер хорһдх бәәрн уга тенәд йовдг күн болхв, тегәд харһсн күн болһн намаг алх, – гиҗ Каин Деед Эзнд келнә.
15Болв Деед Эзн терүнд иигҗ келнә:
– Уга. Кемр кен-негнь Каиниг алхла, энүгәрн дола дәкҗ өшәһән авх.
Харһсн күн болһн Каиниг бичә алтха гиһәд, Деед Эзн терүнд темдг тәвв. 16Каин Деед Эзнәс хольҗад, Эденәс дорд үзг тал бәәсн «Нод»#4:16 Нод – эн үг «һазр кедх», «тенәд йовх» гидг еврей келнә үгин бәәдлтә. гидг һазрт бәәрлв.
17Каин гергтәһән бәәнә. Гергнь саата болад, Ханокиг һарһна. Тер цагт Каин балһс тосхҗаҗ. Балһснд Ханок гидг көвүнәннь нер өгв. 18Ханокас Ирад һарв, Ирадас – Мехияель, Мехияеләс – Метушаел, Метушаеләс Ламек һарв. 19Ламек хойр гергтә болна: негнь Ада гидг нертә, хойрдгчнь – Цилла. 20Ада Явалаг һарһв: тер сег дор бәәһәд, мал өскдг улсин эцк болв. 21Терүнә дү Ювал нертә: тер ятх цокдг болн көгҗмин бүшкүр татдг цуг улсин эцк болв. 22Цилла бас көвүтә билә – нернь Тувалкаин. Тер күрләр болн төмрәр зүсн-зүүл цуг зер-зев кедг бәәҗ. Тувалкаина дү күүкнь Наама бәәҗ.
23Ламек эврәннь гергдтән келнә:
– Ада Цилла хойр, намаг соңстн, Ламекин гергд, мини үгмүдиг оньглтн. Намаг шавтасн, намаг цоксн баахн күүг би алув. 24Кемр Каиниг алсн күн 7 дәкҗ өшәһән авсн болхла, Ламекиг алх күн 77 дәкҗ өшәһән авх.
25Адам Евала бәәнә. Еваһас көвүн һарна. Терүндән Шет#4:25 Шет – эн нерн еврей келәр «белглв» гисн чинртә чигн болх. гидг нер өгнә.
– Бурхн нанд Авелин ормд талдан үр өгв, юңгад гихлә Авелиг Каин алла, – гиҗ гергнь келнә.
26Шет бас көвүтә билә, терүнәннь нерн Энош. Тер цагт әмтн Деед Эзнә нер экләд дууддг болв.
Selectat acum:
Эклц 4: ХКО_ӘБ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 2002-2023