ປັຣນາຍ ປາລີ່ ພາຍາ 1
1
ເກືາ ແຕ ປັຣນາຍ ປາລີ່ ພາຍາ
1ໄນ່ ລາ ມັຮ ປັຣນາຍ ປາລີ່ ພາຍາ ໂຊໂລໂມນ, ເຕືາວ ປັຣເຍືາ ກວາຍ ອິດຊະຣາເອລ, ກອນ ຣາເລົາ ດາວິດ. 2ຕຶ່ງ ປຶ່ງ ໄນ່ ເບີນ ປັຣນາຍ ປາລີ່ ພາຍາ ໂອນ ເຍືາ ດັງ ແຈງ ແຕ ເກືາ ປັຣນາຍ ຣາໄງ່ອ໌ ຣາລັ່ງ ກະ ແຕ ປັຣນາຍ ຕຽຮ ອາຕີ ອຶນຕຣູ່ ລາລື່, ດໍອ໌ ຈ່ອຍ ໂອນ ເຍືາ ດັງ ແຈງ ແຕ ປັຣນາຍ ອຶນຕຣູ່ ກັອຍ. 3ມັຮ ປັຣນາຍ ປາລີ່ ພາຍາ ອາຣຍານ ໂອນ ເຍືາ ດັງ ແຕ ຕະ ເປາະ ໂອນ ຣາໄງ່ອ໌ ຣາລັ່ງ ຕຶ່ງ ແດີຍ ເຍືາ, ກະ ແກີດ ກວາຍ ຕານັ່ອງ ຕາປຶ່ງ, ຕະ ຣານະ ປຍາຍ໌ ອໍ, ກະ ຣານະ ມັນຕັ່ດ ອໍ. 4ປັຣນາຍ ປາລີ່ ພາຍາ ຕະ ໂອນ ກວາຍ ຕາ ເກີ່ຍ ຣຍານ ເຕ່ອ໌ ດັງ, ກະ ຕະ ໂອນ ກວາຍ ນຸ່ມ ດັງ ຕະ ຣານະ ໂອນ ກຣັ່ກ ອໍ, 5ເຕ່ອ໌ ຈ່ອຍ ກວາຍ ຣາໄງ່ອ໌ ຣາລັ່ງ ໂອນ ດັງ ຊາອຶ່ຍ ລາລື່ ແອັນ, ກະ ຊາດອຍ ຣານາ ໂອນ ກວາຍ ກາ ດັງ ຊາອຶ່ຍ, 6ຕະ ໂອນ ໄລ່ ເຕ່ອ໌ ຊາປຸ່ຮ ປັຣນາຍ ຊາກຳ ຣາໄລ່ຮ; ກະ ໂອນ ໄລ່ ດັງ ມັຮ ປັຣນາຍ ແກຣ່ະ ແຕ ກວາຍ ຣາໄງ່ອ໌ ຣາລັ່ງ ອາຕີ.
ປັຣນາຍ ຕຽຮ ອາຕີ ມັຮ ກວາຍ ນຸ່ມ
7ຢຳນັ່ບ ເຢືາງ ເຈົາຣາຊີ ລາ ກັ່ລ ຣາໄງ່ອ໌ ຣາລັ່ງ.
ມາ ມັຮ ກວາຍ ຊາກູລ ພາມາດ ຣາໄງ່ອ໌ ຣາລັ່ງ, ກະ ປາງາຍ ອີ ຣຍານ.
8ກອນ ເອີຍ! ອຶງເຄາະ ໄມ່ ຊາງັດ ມັຮ ປັຣນາຍ ອຶມເປ່ອ໌ ອຶມປໍ່ ປາຕັບ,
ກະ ອຶນໂຈຍ ຕັຮ ມັຮ ປັຣນາຍ ໄລ່ ຕຽຮ.
9ມັຮ ປັຣນາຍ ໄລ່ ອາຕີ ໄມ່ ແກີດ ນ່ະ ກຸນຕຣວາອ໌ ເນົ່າ ອາປື່ງ ຕຶ່ງ ແປຼີ,
ແຕີລາ ນ່ະ ກາຣັຮ ອາກວາອ໌ ຊັຣແຢັຮ ຕຶ່ງ ຕາກອງ ໄມ່.
10ກອນ ເອີຍ! ຄັນ ມັຮ ກວາຍ ໂລ່ຍຮ ປັຣຕຶ່ ໄມ່,
ໄມ່ ອຶນໂຈຍ ຕະ ຕາປູ່ນ ໄລ່.
11ຄັນ ໄລ່ ປາຍ: “ໄມ່ ເປາະ ກະ ຮິ! ໄຮ ໂຕ່ະ ເກຣາະ ຕະ ມັຮ ກວາຍ ມັນຕັ່ດ ມັນດຍາຮ,
ກະ ກາຈີດ ໄລ່ ໂອນ ເອິງ ຣາງຶ່ຮ ໄຮ!
12ໄຮ ກາຈີດ ຕັຮ ໄລ່, ນ່ະ ປີ່ງ ກູມູ່ຍ໌ ຕາລວາມ ກວາຍ ອາມົ່ງ,
ກະ ກູແຕັລ ອາປັອງ ໄລ່ ກາ ບັນ ເຣ່ງ ຕຶ່ງ ຕຣຸ່ງຕຣັ່ງ.
13ໄຮ ອີ ຣາມົຮ ມັຮ ເກຣີ່ງ ເບີນ ເກືາ ຊາອຶ່ຍ,
ເຈີ່ ປູຣ ອາເຈົາ ໂອນ ປັ່ນ ດຸງ ໄຮ.
14ເຢີ່ ແຕີ່ອ໌ ແອີດ ກະ ຮິ!
ເຈີ່ ໄຮ ຣຳແປອ໌ ເກຣີ່ງ ກາ ໄຮ ຕວຍ໌.”
15ກອນ ເອີຍ! ໄມ່ ອຶນໂຈຍ ເປາະ ກະ ໄລ່;
ອຶງເຄາະ ໄມ່ ວຍາຣ ເຢີ່ງ ແຕ ຣານາ ໄລ່ ເປາະ.
16ໄລ່ ກຸນເຕົາ ລາລື່ ອີ ຕະ ຣານະ ຕາ ອໍ.
ໄລ່ ຕາຣວາລ ອີ ກາຈີດ ກວາຍ.
17ຄັນ ແຈມ ເຮີມ ບັອງ ກາ ກວາຍ ຢັ່ງ ມ່ອງ,
ລາ ຕາ ເບີນ ແກີດ ເກືາ ອຶນເຕົ່າ.
18ມາ ມັຮ ກວາຍ ຕາ ອໍ ກັອຍ, ນ່ະ ຕານ ຊາງ ກູວາງ ຈະ ເບີມ.
ເຈີ່ ກາຈີດ ຈະ ເບີມ ຕຶ່ງ ຊາງ ກັອຍ.
19ມູເຈິງ ກັອຍ ເຕ່ ກວາຍ ມັ່ກ ກຸມປູ່ຣ ກູເວືາດ ເກຣີ່ງ ເນົ່າ,
ແດີຍ ອາມົ່ງ ອັນ ແກີດ ປິ່ດ.
ຊຽງ ຣາໄງ່ອ໌ ຣາລັ່ງ ຊາບາວ ອາຕີ ຕຶ່ງ ມັຮ ຣານາ
20ຊາງັດ ກັອຍ! ຊຽງ ຣາໄງ່ອ໌ ຣາລັ່ງ ຊາບາວ ຕຶ່ງ ມັຮ ຣານາ,
ກະ ກາເລີຍ໌ ຕຶ່ງ ມັຮ ຕາລາດ.
21ຊຽງ ກັອຍ ໂດງ ແຕີ່ອ໌ ມັຮ ງັ່ຮ ຕົ່ງ ວຍາງ ເມືອງ,
ປໍ ອຶນຕຸ ກອນແຊມ ດຸ ໂຣ່ມ ຣາໂຊ ມັນຕຸ, ປາຍ:
22“ມັຮ ກວາຍ ຊາກູລ ເອີຍ! ອຶນນັ່ອງ ມາແລ່ະ ດູ່ນ ເຍືາ ອີ ແກີດ ຊາກູລ?
ອຶນນັ່ອງ ມາແລ່ະ ດູ່ນ ເຍືາ ຢໍອ໌ ອີ ພາມາດ ຣາໄງ່ອ໌ ຣາລັ່ງ?
ອຶນນັ່ອງ ມາແລ່ະ ດູ່ນ ເຍືາ ປາງາຍ ອີ ຣຍານ ໂອນ ດັງ?
23ອຶງເຄາະ ເຍືາ ຊາງັດ ແຕີ່ອ໌ ເກົາ ກາໄຕ່ຮ ອາຕີ;
ເກົາ ອີ ຕຽຮ ຣາມຶ່ຮ ອໍ ໂອນ ເຍືາ,
ກະ ອີ ອຶມແປອ໌ ຣາໄງ່ອ໌ ຣາລັ່ງ ໂອນ ເຍືາ.
24ເກົາ ກູອ໌ ເຍືາ, ມາ ເຍືາ ຕາ ເບີນ ຕາແອີຍ;
ເກົາ ກູວອຍ໌ ເຍືາ, ມາ ເຍືາ ຕາ ເບີນ ຣາບູລ ເລີຍ.
25ເຍືາ ຕະ ງິ່ລ ງູງິ່ລ ລາລື່ ແຕ ຊັນຕອຍ໌ ເກົາ ຕຽຮ ອາຕີ,
ກະ ຕາ ແອອ໌ ອີ ໂອນ ເກົາ ຕາໄມຮ.
26ຍ່ອນ ນ່ະກັອຍ, ແຕີ່ອ໌ ເຍືາ ຣາມົຮ ຕຸ່ຮ ກັ່ດ, ລື່ ເກົາ ກາຈັງ ອາເຢ່ ເຍືາ.
ແຕີ່ອ໌ ເຍືາ ອຶງກັອຮ ປັຣຢິ່ຣ, ເກົາ ອີ ກາຈັງ ເຈືາດ ພາມາດ ເຣືາງ ເຍືາ.
27ໄຈ ລາລື່ ເຍືາ ແກີດ ກູຈີດ ປິ່ດ ນ່ະ ກູຢາລ ຣາປູ່ອ໌,
ກະ ອາກັນ ເກຣ່າະ ກຣຍາດ ແຕີ່ອ໌ ປໍ ເຍືາ ນ່ະ ກູຢາລ ອາເວ່ງ;
ລື່ ເຍືາ ເບີນ ຕຸ່ຮ ງໍ່ ກະ ຕຸ່ຮ ກັ່ດ.
28ບັອງ ກັອຍ ແຕິ່ ເຍືາ ກູອ໌ ເກົາ, ມາ ເກົາ ຕາ ເບີນ ຕາແອີຍ;
ເຍືາ ຈໍ່ອ໌ ເກົາ ກູ່ ອຶນຕຸ, ມາ ເຍືາ ຕາ ເບີນ ຣາມົຮ.
29ເຍືາ ຕາ ແອອ໌ ອີ ຣຍານ,
ກະ ເຍືາ ຕາ ແອອ໌ ອີ ຢຳນັ່ບ ເຢືາງ ເຈົາຣາຊີ.
30ເຍືາ ຕາ ແອອ໌ ອີ ຊາງັດ ເລີຍ ຊັນຕອຍ໌ ເກົາ ຕຽຮ ອາຕີ,
ກະ ເຍືາ ຕາ ເບີນ ຣາມິ່ງ ເລີຍ ແຕີ່ອ໌ ເກົາ ຕາໄມຮ ເຍືາ.
31ຍ່ອນ ນ່ະກັອຍ, ລື່ ເຍືາ ເບີນ ຣັ່ບ ເກືາ ຕາປູ່ນ ມັຮ ຣານະ ຕາ ອໍ ເຍືາ ຕະ.
ກະ ຍ່ອນ ແຕ ຊາອຶ່ຍ ເງ່ ຕາ ອໍ ເຍືາ ອາລັ່ອຮ, ເຍືາ ແກີດ ນ່ະ ຈາ ປາໄຊ ປາລາງ ຕະ.
32ມັຮ ກວາຍ ຊາກູລ ກູຈີດ ຍ່ອນ ໄລ່ ຕາ ແອອ໌ ຣາໄງ່ອ໌ ຣາລັ່ງ;
ຣາມຶ່ຮ ກູຈີດ ປິ່ດ ແຕີ່ອ໌ ປໍ ໄລ່ ຍ່ອນ ໄລ່ ຕາ ເບີນ ຣາບູລ ອຶນເຕົ່າ.
33ມາ ກວາຍ ອາແລ່ະ ຕະ ຕາປູ່ນ ເກົາ, ກວາຍ ກັອຍ ແອີດ ກຼີດ ກຼອດ ຈອດ ອໍ.
ອັນ ຕາ ເບີນ ຄຶ່ດ ອຶງກັອຮ ອາກັນ ເກຣ່າະ ກຣຍາດ ອຶນເຕົ່າ ແຕີ່ອ໌ ປໍ ອັນ.”
Selectat acum:
ປັຣນາຍ ປາລີ່ ພາຍາ 1: ກາຕາງ
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2023 (Active) Wycliffe Bible Translators, Inc. All rights reserved.