Noo Mian 14
14
CAB. XIV.
1Ec y tra shen, cheayl Herod yn Tetrarch jeh Goo Yeesey,
2As doort e rish e harvaantyn, Shoh Ean Bashtey; te er nirree veih ny merriu, as er‐yn‐oyr shen ta mirillyn er nyn obbraghey liorish.
3¶ Son va Herod er ghoal Ean, as er chiangley, as er hilgey e ayns pryssoon, kyndagh rish Herodias, ben e vraar Philip.
4Son va Ean er ghra rish, Cha vel eh lowit dhyt, ee y ve ayd son ben.
5As tra ballish ve’r choyrt e gy baase, ve ayns aggle roish y pobble, er‐y‐fa dy row ad dy ghoal e son phadeyr.
6Agh er y laa v’er ny realley corrym rish y laa ruggyr Herod, ghonse inneen Herodias ayns yn eanish oc as ghow Herod laane boggey jee.
7As yioal e lesh loo, dy jinnagh e jee red erbee dy shirragh ee.
8As doort ish, myr va e moir er chur roie, Cur dou ayns shoh kione Ean Bashtey er claare.
9As huit y Ree ayns trimshey: ny yei er coontey yn loo, as y vooinjer v’ec gien marish, hug e sarey, eh dy ve er ny choyrt jee.
10As hug e fys, yn kione dy ve’r ny ghoal jeh Ean ayns y phryssoon.
11As va’n kione er ny choyrt er claare as livreit dys y ven aeg, as hug ish lieie eh gys e moir.
12As haink y vooinjer va sheer geyrt er, as hrog ad y corp, as doanluck ad eh, as hie ad as dinsh ad da Yeesey.
13¶ Tra cheayl Yeesey jeh, jimmee e veih shen ayns long gys ynnyd‐faasagh er lieh, as tra cheayl y pobble jeh, deiyr ad er rish nyn gosh ass ny ard-valjyn.
14As hie Yeesey magh, as honnick e chaglym moar dy leih, as ve er ny veyghey lesh chymmey orroo, as laanee e adsyn va ching.
15As tra va’n fastyr ayn, haink huggey adsyn va sheer geyrt er, gra, She boal faasagh shoh, as ta’n tra nish er gholl shiaghey; lig y raad da’n cheshaght, dy vod ad goll rowe gys ny baljyn beggey, as beaghey y chionnaghey daue hene.
16Agh doort Yeesey roo, Cha lias daue goll rowe, cur‐jee shiuish bee daue.
17As doort ad rish, Cha vel ain ayns shoh agh queg bwilleenyn as daa eeast.
18Doort eshyn, Cur‐jee lieu ad ayns shoh hyms.
19As hug e sarey da’n pobble dy hoie sheese er y faiyr, as ghow e ny queg bwilleenyn as y daa eeast, as yeagh e seose gys niau, as vannee e, as vrish e as hug e ny bwilleenyn dauesyn va sheer marish, as hug adsyn ad da’n pobble.
20As ren ad ooilley gee, as va’d er nyn nianoo magh: as hrog ad jeh’n fooillagh daag ad, laane daa vasket jeig.
21As var adsyn v’er nee queg thousane dooinney, cheu‐mooie jeh mraane as cloan.
22¶ As chelleeragh hug Yeesey er y vooinjer va sheer geyrt er, luingys y ghoal, as ad dy gholl roish gys y cheu elley, choud as ve cur y pobble ersooyl.
23As tra ve er chur yn pobble ersooyl, hie [e] hene er lieh seose er slieau, dy ghoal padjer: as tra va’n fastyr er jeet, ve ayns shen ny lomarcan.
24Agh va’n long nish ayns main ny marrey eiyrit noon as noal lesh ny tonnyn: son va’n gheay nyn oi oc.
25As ayns y chiarroo ghoostey jeh’n uy, haink Yeesey huc, shooyl er y cheayn.
26As tra honnick adsyn va sheer marish e shooyl er y cheayn, va’d seaghnit, gra, She scaan t’ayn, as va’d ayns aggle, as deie ad.
27Agh chelleeragh loar Yeesey roo, gra, Bee-jee dy yien mie, she mish t’ayn, ny gow‐jee aggle.
28As dreggyr Peddyr e, gra, Hiarn, My she oo t’ayn, oardee doos cheet hood er yn ushtey.
29As doort e, Tar. As tra va Peddyr er jeet neose ass y long, hooyl e er yn ushtey, dy heet gys Yeesey.
30Agh tra dennee e dy row yn gheay lajer, ghow e aggle, as myr ve er‐gerrey dy ve baiht, dyllee e, gra, Hiarn, saue mee.
31As ayns y tullogh heen Yeesey magh e laue, as haar e e, as doort e rish, O ghooinney faase-chredjuagh, cre’n fa v’ow ayns imnea?
32As tra va’d er gholl seose ayns y long, ghow yn gheay fea.
33Eishtagh haink adsyn v’ayns y long, as hug ad ooashley da, gra, Ayns firrinys she mac Yee oo.
34As tra va’d er gholl harrish, haink ad gys cheer Gennesaret.
35As tra hoig yn vooinjer va vaghey ayns shen, quoi ve, hug ad fys magh gys ooilley’n cheer my‐geart, as hug ad lieu huggey ooilley adsyn va doghanit.
36As ghuee ad er, ad ny lomarcan dy vennalt rish oirr e gharmad: as chooilleen as venn rish, va’d er nyn leihys.
Selectat acum:
Noo Mian 14: NMian
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
historic text maintained in digital form by the British and Foreign Bible Society (Sheshaght y Vible)
