នាវនតើម 49
49
នាវយាកោបអ៝ន់គែសជេងមាក៝នពាង់ ១២ នុយ្ស
1 យាកោបអីឞូក្វាល់អីឆ្រាអែលដ៝ង់ ពាង់ក្វាល់ទឹងលែៈក៝នពាង់វាច់តារីទាទេ ជេសរីលាស៖ “ទាន់ខាន់មៃហាន់រឹងទាទេ គៃមាគ៝ប់មឞើសងក៝ចអ៝ន់ខាន់មៃគឹតម៝សនាវគែសតានារជឹតនាប់អ្យាតៃ។
2អើផូងក៝នឆៅយាកោប វាច់រឹងហ៝ម់គៃមាអ្យាត់
អ្យាត់ហ៝ម់នាវអីឆ្រាអែលឞឹខាន់មៃនើម។
3អើរូបេន មៃជេងក៝នឞោកទាកគ៝ប់
គ៝ប់ឞាៈមៃល៝រឞូទោលគ៝ប់គែសឆ្វានទុតទាង់
មៃឞូលឺរាលាវឞូ នទ្រែលមាគែសនាវទើយរាលាវឞូដ៝ង់។
4មៃទាង់តឹមឞានមាទាករាឞុស មោអោសទើយអ៝ត់ទើយរាទ៝ង់ តីសមាមៃមោអោសជានឞោក
យ៝រលាសមៃហាវកាលើគ្រែគ៝ប់
មៃឞិចនទ្រែលមាអូរគ៝ប់ ជានអ៝ន់គ្រែគ៝ប់អារ។#៣៥:២២
5 ឆីមោន នទ្រែលមាលេវីជេងអ៝សនោទូនទុលទែស
នូយ្សនហ៝ម់ខាន់ពាង់ហាត់ជាញងាន់ ខាន់ពាង់ងខឹតឞូមាដាវ។#៣៤:២៤-២៦
6គ៝ប់មោអោសអុចគុនទ្រែលខាន់ពាង់
នោកខាន់ពាង់តឹមញច្រាៈនាវជានអ្យើស។
យ៝រលាសនោកខាន់ពាង់ជីនូយ្ស ខាន់ពាង់ងខឹតឞូនើស
ជេសរីខាន់ពាង់ក៝សលើយជ៝ង់ជ៝ននទ្រោកងក្វ៝ង់ទាសខាន់ពាង់នើមអុចទើម។
7គ៝ប់រាករាតាប់លើយនាវជីនូយ្សខាន់ពាង់ យ៝រមាខាន់ពាង់ហាត់ជាញហោអីរ
ជេសរីតានាវជីនូយ្សខាន់ពាង់ជាននទើទុតអ្យើសហោងាន់ ទាសខាន់ពាង់នើមអុច
គ៝ប់មរាញចាសលើយខាន់ពាង់ឞារហៃអីនៃតារាន៝យទែសគ៝ប់
មោអោសអ៝ន់គុនទ្រែលទូនតុកតាឞ្រីអីឆ្រាអែល។#នវ ១៨:១; យោឆ ១៩:១-៩; ២១:១-៤២
8អើយូដា អ៝សនោមៃមរារានេមៃទាទេងាន់
មៃតៃទើយលើសដាសផូងរាលាង់មាមៃ
អ៝សនោមៃតៃពាន់យើកមាមៃទាទេ។#ផក ១:១-២
9អើយូដាក៝នគ៝ប់ មៃជេងតឹមឞានមាក៝នយៅមុរ
ឆឹតហើមឞើសកាប់ឆាមពោមពា(ឆ្យុម)
មៃតឹមឞានមាយៅមុរអីពាន់ញឆាន
មៃតឹមឞានមាយៅមុរអីឞិច មោគែសអោសឞូនុយ្សឞាញ់រាខ្វាក។#នក ២៤:៩; នតម ៥:៥
10ម៝ង់តាក់ជ្រាកាដាច់គែសតាមៃនឹង
រាន៝យទែសមៃតៃមរាជេងកាដាច់មរ៝មរាង់
នហ៝មាត៝ត់ត្រុយ្សពាង់អីគែសនាវទើយក្វ៝ង់នៃ#៤៩:១០៖ «ពាង់អីគែសនាវទើយក្វ៝ង់នៃ» មោលាស៖ «នើមរាញាឆីលោនៃ»។
នអ៝ប់មាទឹងលែៈផូងឞូនុយ្សលាមនតុកអ្យាត់នាវពាង់ទាទេ។#១នរ ៥:២; ២ឆា ៧:១៦; ហេឞ ៧:១៤; នតម ៥:៥
11ពាង់នទ្រ៝ង់ងាន់ នទ្រីទឹងពាង់ក៝ត់ឆែសលៀពាង់នើមតាតើមព្លៃយុងយារប៝ន ឞ៝លលាសតើមព្លៃនៃទុតខ្លៃ
ពាង់មោអោសរាវៃឆែសលៀឆាអីព្លៃអីនហានៃ
ពាង់ពីសអាវពាង់នើមមាទាកនទ្រាញ់ព្លៃយុងយារប៝ន
ពីសឞ៝កពាង់នើមមាទាកព្លៃយុងយារប៝នអីចាង់តឹមឞានមាមហាម។
12ត្រោមមាត់ពាង់ចាង់ងាន់រាលាវមាទាកនទ្រាញ់ព្លៃយុងយារប៝ន
ងលាងឆេកពាង់រាលាវមាទាកត៝សនទ្រោកជឹត។#៤៩:១២៖ មោលាស៖ «ត្រោមមាត់ពាង់ចាង់ងាន់ យ៝រលាសញេតអ៝ក់នទ្រាញ់ព្លៃយុងយារប៝ន ងលាងឆេកពាង់ យ៝រលាសញេតអ៝ក់ទាកត៝សនទ្រោក»។
13 ឆាប់យូលោនតៃគុរ៝ៈមែងទាកវាច់ទាកវារ់
នតុកពាង់ជេងនតុកញឆ្រុងទូកក្វ៝ង់
នហារ់នែសពាង់នហ៝មាត៝ត់តាប៝នឆីដោនរីងាន់។
14 អីឆាខារជេងតឹមឞានមាឆែសលៀទុតទាង់
ពាង់ឞិចតាវាសវាងងគារឞែឞ្យាប់។
15ពាង់មឹនលាសនតុកពាង់គុរាលូនៃជេងនតុកអ្វែស
នទ្រែលមាទើសដ៝ង់
ជេសរីពាង់កុញឆាក់ពាង់នើមអ៝ន់ឞូទ៝ង់រាទែងទ្រាប់នទើ
តឹមឞានមាទឹកឞូងាន់។
16 ដានជេងកោរាញម៝ត់អ្វាញ់មពោលប៝នលានពាង់នើម
កើតមពោលអេងៗតាផូងអីឆ្រាអែលទឹងលែៈដ៝ង់
17ពាង់ជេងតឹមឞានមាឞេសហូងរ៝ៈត្រ៝ង
តឹមឞានមាឞេសកូគុតាមែងត្រ៝ង
ក៝ប់ចោកតាជ៝ង់ជ៝នឆែស
ជេសរីឞូនុយ្សអីគុញច៝តាកាលើរីតុបអានែស”។
18ជេសរីយាកោបមឞើសឆើមលាស៖ “អើឞ្រាសយេហោវា គ៝ប់ហោមក៝ប់នារមៃរាក្លាយ្សគ៝ប់”។ ជេសរីពាង់នហ៝មាលាសមាអ៝សក៝នពាង់ជឹត៖
19“កាតគែសផូងតាហែនហាន់លើសពាង់
យើនមាពាង់ហាន់លើសផូងតាហែនអីនៃតាៈឞើសកើយ។
20 អាឆើរគែសនទើឆោងឆាកាសងាន់
ពាង់តៃអ៝ន់នទើឆោងឆាកាសងាន់មាអ៝ន់កាដាច់ឆា។
21 នាប់តាលីជេងតឹមឞានមាងក្រ៝ង់មែលែៈក្លាយ្ស
ពាង់ឞាៈក៝នអ្វែសៗងាន់។
22 យោឆែបជេងតឹមឞានមាងគីងគែសព្លៃអ៝ក់
ងគីងគែសព្លៃអ៝ក់ហ៝នកេងមែងនហ៝ងទាក
ងគីងពាង់ព្រេសរាលាវមពេរប៝នងាន់។
23ផូងរាលាង់តឹមលើសដាសពាង់
ឞូពាញ់ពាង់មានា
24យើនមាយោឆែបហោមទាង់រាលាវ
ពាង់ហោមទាង់ងាន់ យ៝រមាគែសនាវទើយកោរាញឞ្រាសអីគ៝ប់យើកមឞាស។
កោរាញឞ្រាសទុតគែសនាវទើយងាន់ មោគែសអោសឞូនុយ្សទើយដ៝ង់។
កោរាញឞ្រាសម៝ត់អ្វាញ់ផូងអីឆ្រាអែល តឹមឞានមានើមច្យាប់មពោមពា(ឆ្យុម)ផូង។
កោរាញឞ្រាសទុតន៝ប់មាកើលញជ្រាង់ តឹមឞានមាលុក្លេរមោអោសទើយងគើ។
25កោរាញឞ្រាសអីឞ្រាសគ៝ប់យើកមឞាសមរាកើលមៃ
កោរាញឞ្រាសនើមអីទុតគែសនាវទើយមរាអ៝ន់នាវគែសជេងមាមៃ
ពាង់មរាអ៝ន់គែសទាកមីសមាមៃ
ពាង់មរាអ៝ន់គែសទាកលោសតាៈឞើសទ៝ង់ឆូមាមៃ
នទ្រែលមាអ៝ន់មៃគែសក៝នអ៝ក់ នអ៝ប់មាគែសមពោមពា(ឆ្យុម)អ៝ក់ដ៝ង់។
26នាវគែសជេងគ៝ប់ទាន់កោរាញឞ្រាសអ៝ន់មាមៃអ្យា
ជេងក្វ៝ង់រាលាវមានាវគែសជេងផូងចែគ៝ប់ទាន់ឞើសកោរាញឞ្រាសអ៝ន់មាគ៝ប់
ជេងព្រេសរាលាវមាយោកទុតន៝ប់នហ៝រ៝ជឹត
ទាន់ទឹងលែៈនាវគែសជេងអ្យាអ៝ន់គែសតាមៃ
ទាន់អ៝ន់គែសតាឞោកមៃអីលែៈកោរាញឞ្រាសតឹមងខាសជេសដាសផូងអ៝សនោមៃ។
27 បែនយាមឹនជេងតឹមឞានមាឆ៝ឞ្រីទុតជាញ
អាអោយពាង់ហាន់កាប់ឆាហេកមពោមពា(ឆ្យុម)
ត៝ត់កេងមាង់ពាង់តឹមពាៈមពាពាង់គ្លែងអីនៃ”។
28ទឹងលែៈផូងខាន់ពាង់អីនៃជេងមពោលរាន៝យទែសផូងអីឆ្រាអែល អីនៃជេងនាវឞឹខាន់ពាង់នតិញមាខាន់ពាង់ ពាង់ទាន់កោរាញឞ្រាសអ៝ន់នាវគែសជេងមាខាន់ពាង់ ១២ នុយ្សនៃ ទូហ្វេទូហ្វេពាង់អ៝ន់អេងៗ តឹមទីមាអាប់នើមខាន់ពាង់។
យាកោបខឹត
29ជេសរីយាកោបនតិញមាផូងអ៝សក៝នពាង់៖ “ហោមទូប្ល៝ត់គ៝ប់តៃខឹត គ៝ប់ហាន់តឹមម៝ប់មាផូងចែគ៝ប់នើម។ អ៝ន់ខាន់មៃលែវត៝ប់គ៝ប់កេងមោចផូងចែគ៝ប់តាត្រោមយោកតាមីរអេប្រុនផូងហេត#២៣:១៧-២០ 30ជេងតាមីរមាក់ពេលា តឹមទាច់មាប៝នមាម់រេតាឞ្រីកានាន មីរនៃលែៈចែអាឞ្រាហាម់ ទែរាវាត់តាៈឞើសអេប្រុនផូងហេត គៃមានតុកមោច។#នន ២៣:៣-២០ 31តានតុកនៃឞូត៝ប់ចែអាឞ្រាហាម់ នទ្រែលមាអូឆារាអូរពាង់ ឞូត៝ប់អីឆាក់ នទ្រែលមារេបេកាអូរពាង់ លេអាគ៝ប់ត៝ប់ពាង់តានតុកអីនៃដ៝ង់។#២៥:៩-១០; ៣៥:២៩ 32មីរនទ្រែលមានតូយោកអីនៃលែៈចែអាឞ្រាហាម់ ទែរាវាត់ឞើសផូងហេត”។ 33ជេសយាកោបនតិញមាផូងអ៝សក៝នពាង់លែៈផ្យៅ ជេសរីពាង់យើកជ៝ង់ល៝ង់ឆាក់តាគ្រែពាង់នើមរី នហ៝មារ៝សនហ៝ម់ហាន់តឹមម៝ប់មាផូងចែពាង់នើមរី។#ការ ៧:១៥
Selectat acum:
នាវនតើម 49: cmoK
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© (Active) Wycliffe Bible Translators, Inc. All rights reserved.