នាវនតើម 41
41
មឞើយកាដាច់ផារ៝ន
1ត៝ត់គែសឞារនាម់ឞើសកើយនៃ កាដាច់ផារ៝នមឞើយកើតនអា៖ ពាង់ទ៝ក់កេងមែងទាករាលាយនីល។ 2ពាង់ឆៃគែសពើសអឹនទ្រោកមែ លៃៗអ្វែសងាន់ លោសតាៈឞើសទាករាលាយ ហាវឆាជាតានទ្រិច។ 3ជេសរីគែសពើសអឹនទ្រោកមែដ៝ង់ លោសតាៈឞើសទាករាលាយឆូ ទុតរាគៃៗរូមគ្រូមងាន់ ហាវគុកេងនទ្រោកអីលៃៗរី។ 4នទ្រោកមែទុតរាគៃៗរូមគ្រូមនៃ ពាង់ឆាលើយនទ្រោកមែអីលៃៗអ្វែសរីលែៈផ្យៅ។ ជេសរីកាដាច់ផារ៝នកាសរាងាល់ឞិច។ 5ជេសរីពាង់រើយឞិចជឹត ពាង់មឞើយតៃទូតឹជឹត។ ពាង់មឞើយឆៃងក៝ងឞាពើសរាកុម ព្លៃឆាក់រាកុមងាន់ អីតើមពាង់ទូតើមទើម។ 6ជេសរីគែសដ៝ង់ងក៝ងឞាពើសរាកុមជឹត លោសឞើសកើយឞាឆាក់នៃ យើនមាញឆ្យាប់លែៈផ្យៅ យ៝រមាគែសឆ្យាលទោសមពែសឞើសលោសនារឞាន។ 7ឞាញឆ្យាប់នៃ ឆាលើយឞាឆាក់ព្លៃរាកុមលែៈផ្យៅ។ ជេសរីកាដាច់ផារ៝នកាសរាងាល់ឞិច ងក្ល៝ន់ នៃជេងនាវមឞើយទើម។ 8ត៝ត់អាងអោយ កាដាច់ផារ៝នគែសនាវរាវៃហោងាន់តានូយ្សនហ៝ម់ពាង់រី ពាង់ក្វាល់ទឹងលែៈឞូនុយ្សគែសនាវឞ្លាវមឹន នទ្រែលមាឞូនហុមតាឞ្រីអេឆីប រីអ៝ន់វាច់លែៈ ជេសរីពាង់មឞើសងក៝ចនាវមឞើយពាង់នៃមាឞូ យើនមាមោគែសអោសទូហ្វេឞូនុយ្សទើយរាឞ្លាងនាវមឞើយអីនៃ។#ដាន ២:២
9ទោលនៃកោរាញអីញអោតងោរនទ្រាញ់ លាសមាកាដាច់ផារ៝ន៖ “នារអ្យាគ៝ប់លែៈកាសគឹតនោកគ៝ប់តីសនើស។ 10នោកកាដាច់ជីនូយ្សមាឞារហៃហេននើស ដាៈឞូញុបគ៝ប់ នទ្រែលមាកោរាញញអោតនុមពាង់ក្រុងតាត្រោមនទ្រូងកោរាញម៝ត់ញជ្រាង់កាដាច់។ 11លែៈឞារហៃហេនគែសនាវមឞើយតាទូមាង់ទើម យើនមាតានាវមឞើយហេននៃគែសនាវខ្លៃអេងឞាល់។ 12តាត្រោមនទ្រូងនៃគែសទូហ្វេឞូក្លោនទាម់ផូងហេឞ្រើ ពាង់ជេងឞូនុយ្សទឹកមាកោរាញម៝ត់ញជ្រាង់កាដាច់ ហេនងក៝ចនាវមឞើយហេននៃមាពាង់ ជេសរីពាង់ឆើមរាឞ្លាងអ៝ន់មាហេន តឹងនាវហេនមឞើយទូហ្វេទូហ្វេនៃ។ 13ត៝ត់ឞើសកើយនៃជេងទីកើតនាវពាង់លាសមាហេនងាន់ គ៝ប់អ្យាកាដាច់អ៝ន់ជានការតៃកើតឞើសនតើម ជេសរីកោរាញញអោតនុមពាង់កាដាច់ដាៈឞូយោងក៝”។
14ជេសរីកាដាច់ផារ៝នដាៈឞូហាន់ឆ៝ៈយោឆែបនៃរ៝។ ឞូងលោសពាង់ឞើសត្រោមនទ្រូងរី ពាង់ព៝យ្សតេប តើសខ៝អាវ ជេសរីហាន់តឹមម៝ប់មាផារ៝ន។ 15ផារ៝នលាសមាយោឆែប៖ “គ៝ប់គែសនាវមឞើយ តីសមាមោគែសអោសទូហ្វេឞូនុយ្សទើយឆើមរាឞ្លាង។ យើនមាគ៝ប់តាង់មៃទើយឆើមរាឞ្លាង លាសមៃតាង់ឞូងក៝ចមឞើយនៃមាមៃ”។ 16យោឆែបលាសមាផារ៝ននៃ៖ “មោទីគ៝ប់អោសទើយឆើមរាឞ្លាង គែសទូហ្វេកោរាញឞ្រាសទើមទើយ ពាង់មរាមឞើសនាវអ្វែសអ៝ន់មាមៃកាដាច់”។#៤០:៨ 17ជេសរីផារ៝នមឞើសមាយោឆែប៖ “គ៝ប់មឞើយកើតនអា៖ គ៝ប់ទ៝ក់កេងមែងទាករាលាយរី។ 18ទោមាគែសពើសអឹនទ្រោកមែ លៃៗអ្វែសងាន់ លោសឞើសទាករាលាយរី ហាវឆាជាតានទ្រិចអ្យា។ 19ជេសរីគែសពើសអឹនទ្រោកមែជឹត លោសតាៈឞើសទាករាលាយរីដ៝ង់ ទុតរាគៃៗរូមគ្រូមងាន់ ឆៃនតោនទ្រែលមានតីងទើម គ៝ប់មោអោសព្រ៝តម៝ប់ឆៃនទ្រោកទុតអ្យើសកើតនៃតាឞ្រីអេឆីប អ្យា។ 20នទ្រោកមែផូងទុតរាគៃៗរូមគ្រូមនៃ ពាង់ឆាលើយលែៈផ្យៅនទ្រោកអីលៃៗលោសល៝រអីរី។ 21នទ្រោកមែផូងទុតរាគៃនៃ ឞ៝លលាសពាង់ឆានទ្រោកមែផូងលៃលែៈផ្យៅកាដោយដ៝ង់ ហោមអែរាគៃកើតអើមដ៝ង់នទ្រោកមែផូងទុតរាគៃនៃ ជេសរីគ៝ប់កាសព្រុស។ 22ជេសរីគ៝ប់មឞើយតៃទូតឹជឹត ឆៃងក៝ងឞាពើសរាកុម ព្លៃឆាក់រាកុមងាន់ អីតើមពាង់ទូតើមទើម។ 23ជេសរីគែសដ៝ង់ងក៝ងឞាពើសរាកុមជឹត លោសឞើសកើយ តីសមាឞាអីនៃខឹតឞូតោសលែៈផ្យៅ យ៝រមាគែសឆ្យាលទែពោស។ 24ល៝ង់ឞាញឆ្យាប់នៃ ឆាលើយឞាឆាក់រាង្លៃលែៈផ្យៅ។ គ៝ប់លែៈមឞើសងក៝ចដ៝ង់នាវមឞើយគ៝ប់អ្យាមាមពោលឞូនហុម យើនមាមោគែសអោសទូហ្វេឞូនុយ្សទើយឆើមរាឞ្លាងអ៝ន់មាគ៝ប់”។
25 យោឆែបលាសមាកាដាច់ផារ៝ន៖ “នាវមៃមឞើយនៃកាដាច់ គែសនាវខ្លៃង្វាយទើម កោរាញឞ្រាសមឞើសងក៝ចអ៝ន់មាមៃគឹតម៝សនាវពាង់អុចជាន។ 26នតីលនាវខ្លៃនទ្រោកមែពើសអឹលៃៗអីនៃ ជេងពើសនាម់ ជេសរីឞាពើសរាកុមឆាក់រាង្លៃអីនៃ ជេងពើសនាម់ដ៝ង់ លែៈឞារមឞើយអ្យាជេងគែសនាវខ្លៃង្វាយទើម។ 27នតីលនាវខ្លៃនទ្រោកមែលោសឞើសកើយទុតរាគៃងាន់អីនៃ ជេងពើសនាម់ ជេសរីនតីលនាវខ្លៃឞាញឆ្យាប់យ៝រមាឆ្យាលឞានអីនៃ ជេងគែសនាវជីង៝តក្វ៝ង់ជ៝ៈពើសនាម់ដ៝ង់។ 28អើកាដាច់ ទីកើតនាវគ៝ប់លែៈជេសមឞើសមាមៃនើសងាន់ កោរាញឞ្រាសមឞើសងក៝ចអ៝ន់មាមៃគឹតម៝សនាវពាង់អុចជាន។ 29ហោមពើសនាម់ លាមឞ្រីអេឆីប អ្យាគែសព្យាង់ឞាអ៝ក់រាមែសលែរងាន់។ 30ជេសរីពើសនាម់ជឹតនាប់ជឹត គែសនាវជីង៝តក្វ៝ង់ងាន់ ទឹងលែៈផូងប៝នលានតាឞ្រីអេឆីប មរាច្វេលលែៈផ្យៅនាវគែសអ៝ក់រាមែសតាខាន់ពាង់នៃនើស យ៝រលាសនាវជីង៝តក្វ៝ង់អីនៃលើសអ្យើសមាឞ្រីខាន់ពាង់អ៝ន់ហេងលែៈផ្យៅ។ 31ផូងប៝នលានច្វេលលែៈផ្យៅនាវគែសអ៝ក់រាមែសតាឞ្រីខាន់ពាង់នើម យ៝រលាសនាវជីង៝តអីនៃលែៈទុតហោអីរងាន់។ 32ទឹងមៃមឞើយឞារតឹងាន់អ្យា យ៝រលាសលែៈកោរាញឞ្រាសនទ្រាប់ជានងាន់នាវអ្យា ពាង់ជានគើញៗរ៝។
33អាបៃរីនអាទោសកាដាច់៖ មៃជ៝យទូហ្វេឞូនុយ្សគែសនាវមឹនគឹតឞ្លាវ អ៝ន់ពាង់ជានកោរាញម៝ត់អ្វាញ់តាឞ្រីអេឆីប អ្យា។ 34ជេសរីមៃជ៝យឞូនុយ្សអេងដ៝ង់ គៃមារាហ្វាត់នទើទូកោៈតឹមព្រាម់ ទោលឞ្រីទាកគែសឞាអ៝ក់រាមែសតឹមពើសនាម់ជឹតនាប់អ្យា។#៤៧:២៦ 35មៃអ៝ន់ផូងអីនៃរាគូមទឹងលែៈព្យាង់ឞាទោលឞ្រីទាកគែសអ៝ក់រាមែសតឹមពើសនាម់អ្យា តោសព្រាប់តាត្រោមជៃអាប់ប៝ន ជេសរីមៃនើមដាៈឞូម៝ត់រាបៃទឹងលែៈនទើនៃ។ 36ព្យាង់ឞាអីនៃព្រាប់មាទ៝ង់ទោលឞ្រីទាកគែសនាវជីង៝តក្វ៝ង់ពើសនាម់តាឞ្រីអេឆីប គៃមាលើយអោសអ៝ន់ផូងប៝នលានខឹតហ្វារ់ជីង៝ត”។
នាវយោឆែបជានកោរាញក្វ៝ង់តាឞ្រីអេឆីប
37នាវយោឆែបងើយនៃជេងទីមានូយ្សនហ៝ម់កាដាច់ផារ៝នងាន់ នទ្រែលមាទឹងលែៈមពោលកោរាញពាង់ដ៝ង់។ 38ជេសរីផារ៝នលាសមាមពោលកោរាញពាង់៖ “មោហោមគែសឞូនុយ្សអេងរាលាវមាពាង់អ្យា គែសហ្វេងកោរាញឞ្រាសគុតាពាង់”។#នង ២៨:៣; ៣១:៣; នក ១១:២៥-២៦; ២៤:២; នវ ៣៤:៩; ផក ៣:១០ 39ផារ៝នលាសមាយោឆែប៖ “កោរាញឞ្រាសលែៈមឞើសអ៝ន់មាមៃគឹតនាវអ្យា លាសនទ្រីមោហោមគែសអោសឞូនុយ្សអេងមាគែសនាវមឹនគឹតឞ្លាវកើតមៃដ៝ង់។#ការ ៧:១០ 40គ៝ប់អ៝ន់មៃម៝ត់អ្វាញ់តាឞ្រីអេឆីប អ្យា#៤១:៤០៖ «ម៝ត់អ្វាញ់តាឞ្រីអេឆីប អ្យា» មោលាស៖ «ម៝ត់អ្វាញ់តាជៃគ៝ប់»។ នទ្រែលមាទឹងលែៈផូងប៝នលានគ៝ប់ ខាន់ពាង់អ្យាត់ទាទេនាវមៃដាៈ។ ទឹងគ៝ប់ក្វ៝ង់រាលាវមៃ យ៝រលាសគ៝ប់គុតារានើលកាដាច់”។#ការ ៧:១០ 41ផារ៝នលាសតៃមាយោឆែប៖ “អាបៃរីគ៝ប់អ៝ន់មៃទើយម៝ត់អ្វាញ់ទឹងលែៈតាឞ្រីអេឆីប អ្យា”។ 42ជេសរីផារ៝នទ្រីសរាគេនត្រាឞើសតីពាង់នើមរី នទ៝កតាតីយោឆែប ឆ៝ៈអាវទុតអ្វែសឆើមញឆ៝សមាយោឆែបរីដ៝ង់ នទ្រែលមាឆ៝ៈរាឆែមាយ្សវាន់តាត៝ងក៝យោឆែបរីជឹត។#អេថ ៨:២; ដាន ៥:២៩ 43ពាង់អ៝ន់យោឆែបញច៝រាទែសឆែសកាដាច់ ញច៝គ្រ៝យឞើសកើយពាង់នើមរី ជេសរីគែសឞូនតែរលាស៖ “ច៝នកោម៝ក់មឞាសពាង់!” កើតនទ្រីនាវកាដាច់ផារ៝នអ៝ន់យោឆែបទើយម៝ត់អ្វាញ់ទឹងលែៈតាឞ្រីអេឆីប នៃ។ 44ផារ៝នលាសតៃមាយោឆែប៖ “គ៝ប់អ្យាកាដាច់ផារ៝ន ទឹងលែៈឞូនុយ្សលាមឞ្រីអេឆីប អ្យា លាសមោលោសនាវតាៈឞើសមៃ ឞូមោទើយអោសជានទូនតីលនទើ”។ 45កាដាច់ផារ៝នតេៈរាញាមហែអ៝ន់មាយោឆែប «ឆាប់នាត-ផានាស#៤១:៤៥៖ «ឆាប់នាត-ផានាស»គែសនាវខ្លៃលាស«កោរាញឞ្រាសរេសងាន់ នអ៝ប់មាងើយនទ្រែលឞូនុយ្ស»។» ជេសរីពាង់ឆើមអោបទូហ្វេឞូអូររាញាអាសនាត ក៝នផោថីផេរាឞូនុយ្សជានឞ្រាសតាប៝នអោន គៃមានអាប់ដាសយោឆែប។ ទោលនៃយោឆែបហាន់ញឆ៝ងអ្វាញ់តាឞ្រីអេឆីប ។
46 យោឆែបលែៈគែស ៣០ នាម់ នោកពាង់ហាន់តឹមម៝ប់ដាសកាដាច់ផារ៝ន ជេសរីពាង់លោសឞើសកាដាច់ផារ៝ននៃ ហាន់ញឆ៝ងលាមនតុកតាឞ្រីអេឆីប រី។#៣៧:២ 47នោកពើសនាម់នៃ តាឞ្រីអេឆីប គែសព្យាង់ឞាអ៝ក់រាមែសងាន់។ 48យោឆែបហាន់រាគូមព្យាង់ឞាទឹងលែៈព្យាង់ឞាតាឞ្រីអេឆីប រី នោកព្យាង់ឞាគែសអ៝ក់រាមែសតាពើសនាម់នៃ ពាង់តោសព្យាង់ឞាឞើសមីរជុមប៝នរ៝ៈអាប់ប៝ននៃ។ 49យោឆែបរាគូមព្យាង់ឞាទុតអ៝ក់ងាន់ តឹមឞានមាច៝យ្សរ៝ៈទាកវាច់ទាកវារ់ នហ៝មាមោហោមអោសទាង់កើបដ៝ង់។
50នោកនាម់អេហ៝ៈត៝ត់នាវជីង៝តក្វ៝ង់អីនៃ យោឆែប នទ្រែលមាអូរពាង់រាញាអាសនាតលែៈគែសក៝នឞូក្លោឞារហៃ អូរពាង់នៃអីក៝នផោថីផេរាអីឞូនុយ្សជានឞ្រាសតាប៝នអោន។ 51យោឆែបតេៈរាញាមាក៝នឞោកទាកពាង់នៃ «មានាឆេ» យ៝រលាសពាង់លាស៖ “លែៈកោរាញឞ្រាសជានអ៝ន់គ៝ប់ច្វេលលែៈផ្យៅនាវជេរជ៝ត់តាគ៝ប់ នទ្រែលមាច្វេលលែៈផ្យៅឞើសនទុលមពោលគ៝ប់នើមដ៝ង់”។ «មានាឆេ» នតែសតានាវងើយហេឞ្រើ តឹមឞានមានាវ«អ៝ន់ច្វេល»។ 52ពាង់តេៈរាញាមាក៝នត៝ល់ឞារ «អេប្រាអីម» យ៝រលាសពាង់លាស៖ “លែៈកោរាញឞ្រាសអ៝ន់គែសក៝នមាគ៝ប់ នតុកគ៝ប់គែសនាវជេរអ្យា”។ «អេប្រាអីម» នតែសតានាវងើយហេឞ្រើ តឹមឞានមានាវ«អ៝ន់គែសក៝ន»។
53ពើសនាម់នាវគែសអ៝ក់រាមែសតាឞ្រីអេឆីប នៃលែៈលោចជេស 54ជេសរីនតើមគែសនាវជីង៝តក្វ៝ង់ពើសនាម់ កើតនាវយោឆែបលែៈលាសនើសងាន់។ ទឹងលែៈឞ្រីទាកអេងគែសនាវជីង៝តក្វ៝ង់ទាទេ ហោមតាឞ្រីអេឆីប អីរីទើមហោមគែសនទើឆោងឆា។#ការ ៧:១១ 55ត៝ត់ផូងប៝នលានតាឞ្រីអេឆីប នតើមមោគែសនទើឆោងឆា ជេសរីខាន់ពាង់លែវឞាល់ហាន់ទាន់ព្យាង់ឞាតាកាដាច់ផារ៝ន ពាង់លាសមាផូងប៝នលាននៃ៖ “ខាន់មៃហាន់ម៝ប់យោឆែបរីទោ អ្យាត់ម៝សនាវពាង់ដាៈ”។#យហ ២:៥ 56ទោលនៃនាវជីង៝តក្វ៝ង់លែៈលាមឞ្រីអេឆីប ងាន់។ យោឆែបពើកទឹងលែៈជៃឞារ៝ៈប៝នអេងៗរ៝ គៃមាតាច់ឞាអ៝ន់មាផូងប៝នលានអេឆីប យ៝រលាសនាវជីង៝តក្វ៝ង់អីនៃលើមាហោងាន់តាឞ្រីអេឆីប រី។ 57ឞូនុយ្សទឹងលែៈឞ្រីហាន់រាវាត់ឞាយោឆែបតាឞ្រីអេឆីប រីទាទេ យ៝រលាសនាវជីង៝តក្វ៝ង់អីនៃលើមាហោលាមនែសនតូអ្យាងាន់។
Selectat acum:
នាវនតើម 41: cmoK
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© (Active) Wycliffe Bible Translators, Inc. All rights reserved.