Лука 9
9
Глава 9
Иисус мян дӫр хупкуттыӈэлни хэвки Тэгэмэрэдеккон мэтуттэвур хөрэдекэтэн
1Мян дӫрбу Ноӈантакин эмдэтэн, Иисус эририн, нян тарал чэлэвэн ариӈкалбу бэил эмдэдукутэн нёвкэӈрэдэтэн, энэкэлбутэн-дэ бэгдэткэрэдэтэн, эӈигэтэн, дяванмайгатан-та бөрин. 2Иисус ноӈарбутан хөрукэнин, Хэвки Тэгэмэрэдеккон тэлэӈдэтэн, бутэнрилбу-дэ бэгдэттэтэн. 3Тарбач ноӈартакитан гөнин:
– Яв-да хотарамдагавур эмэкэн гад: нимкамив-да, хэлэку-дэ, килебу-дэ, гаилдавум-да ойгавур, мэӈэм-дэ эмэкэн гад. 4Илэ-ккэ дюла игрэдис, хөрэкэн тала биӈэсэн. 5Илэ-ккэ хуну этэр ивкэн, тадук городдукутан хөрми, бодэлдукур-дэ хорчав булэв гивӈэсэн, коедэтэн, тарак ноӈарбутан тогэмкэчин бидин.
6Иисус хупкутыӈэлни хөрритэн, эйдулин билэкэлдули ӈэнникэн, Өрэлдэм Мэтум тэлэӈникэн, бутэнрил энэкэлбутэн бэгдэтникэн.
Ирод хагъиӈчидякан
7Иисус чэлэвэн некчэвэн долдариди, дыгитэн бэгэнтэн Ирод мяӈчирин, ӈи-дэ тарак бисивэн, хан гөнитэн Иоанн арчадин, 8хан Илия эмривэн болганаритан, хөнтэл-эси, ирэк-тэ өмэн осирэп мэтумӈэ арчаван гэрбэттитэн. 9Нян Ирод гөнин:
– Иоанн дыллон хонрив, ӈи-нян Эрэк, Ӈив эррөчим би долдарам?
Ирод Иисусу ичимсин.
Тунӈам тыкичэв бэилбу дялукан уличидек
10Апостолал, мучуридюр, Иисустэки яв-да некчэвур тэлэӈритэн. Таракам Иисус ноӈарбутан Мэннюми бодуканин, тарбач ноӈартан эйдучэндюр город Вифсаид анчиндулан бэккэллэ биситки, ач бэйлэ-дэ энтэрэндулэ төртэки хөрритэн. 11Тарбач тачин хөрчэвутэн эйду бэил халритан, Иисусту бодаснитан. Иисус эйдувэн алимрин, эйдудун Хэвки Тэгэмэрэддывэн тэлэӈрин, бутэнрилбу-дэ эйдувэн бэгдэттин, айрин. 12Эсимэсукэн хисэчин мян дӫр хупкуттыӈэлни Ноӈантакин эмритэн, гөникэн:
– Хөрукэли эмчэлбу бэилбу далила бисилтэки билэкэлтэки, дебдэвур-дэ бакникар тала анӈаттатан, мут энтэрэндулэ төрлэ бисэп.
13Иисус барагрин:
– Ноӈартан дебдэтэн бөлрэ.
Хупкуттыӈэлни мянитан:
– Он тардыван бэю дебукэндиру, мундулэ тунӈан-такан килебэӈун бисни, дӫр-дэ олраӈун, эйдудун истан, униерукун-тэкэн деплэв ай бимчи.
14Тунӈан тыкича бэй тала бисин. Иисус хупкуттыӈэлтэкий гөнин:
– Эйдувэн бисилбу бэилбу төрлэ тунӈанмярталди тэгукэрлэ.
15Хупкуттыӈэлни тачин некритэн. Эйду бэил тачин тэгэлнэкэтэн, 16Иисус тунӈам килебу, дӫрбу-дэ олрав ӈаллай гадыди, нянинтаки ичиснин, Хэвкитки нэӈникэн, Нөнман бачибарин деплэв бөчэлин, тар килебу, олрав-да эйдудун бөричидилрин. Тарав боричай хупкуттыӈэлдий бөрин, тарал-аси бэилду бөттитэн. 17Эйдучэндюр бэил дептитэн, дялуритан-да. Тарбач Иисус Хупкуттыӈэлни унэт эмэпчэв деплэв мян дӫрбу милтэрэв екэв чакритан.
Петр Иисусу Христосу Хэвки Хинмачадин гэрбуттэн
18Өмнэкэн, Иисус энтэрэндулэ билэклэ нэӈэддэкэн, хупкуттыӈэлни-дэ ноӈнюнни бисэкэтэн, Ноӈан ноӈарбутан улгэмрин:
– Бэил Мину Ӈи бидэку гэрбуттэ?
19Ноӈартан барагритан:
– Иоанн Хэвкигри бисидис гөвэттэ, хөнтэл – Илия-мэтумӈэ бисидис гөвэттэ, хан-аси – ирэк-тэ өмэн өсирэп мэтумӈэ арчадин гэрбэттэ.
20– Ху-ккэ Мин Ӈи бисидив гэрбэчис, – Иисус ноӈарбутан улгэмрин.
– Хи Хэвки Хинмачан, Христос бисэнри, – Петр барагрин.
Иисус Христос Мэн көкэдэки, арадяки-да мэтуттэн
21Тарбач Иисус ӈитки-дэ тарав эдэтэн тэлэӈрэ мэтуттин. 22Нян гөнин:
– Бэй Хутэн Оча гору-да энтэкэе хилдин, каганкар, дюлэгэл хиргэмӈэл попал, Итум хупкучимӈэл-дэ ноӈандук итывур часки хукэсэндир, Ӈонман мадир, нян илилатан инэӈнэ Ноӈан ардин.
23Тадук-нян Иисус эйдуткин гөнин:
– Ӈи-ккэ Минду бодасамсан, тарак мэни чэлэдун бөдэн, тарбач бэйтэн мэн киреси индэн, таракам тарак Минду боддан. 24Ӈи мэн ханьми-ткан айдин, тарак тарав бэридин, ӈи-ккэ мэн ханьми Миндули бэридин, тарак тарав ханьми айдин. 25Як аинни чэлэвэн төру мэнди гами, мэни-дэ теми хойми, мэни-дэ тачин көкэвкэми? 26Тарбач ӈи Мину, Мин-дэ төрэчэв хадарилдин, тарав Бэй Хутэн Оча, мэн хэрриди, Амми-да Хэрридун, Хэвки ангелални-дэ хэрридутэн хуталри, эмриди ноӈардитан хадарилдин. 27Хунтэки гөнэм, элэ илаттыл долатан таррөчир бэил бис, ӈи көкэм эдлэвур халра, укал Хэвки Тэгэмэрэдеккон итчир.
Иисус Христос бадан хөнтэлбэнни
28Тарав гөнчэлэн дяпкан инэӈ елтэнэкэн, Иисус Пётэру, Иоамм, Иакову мэнди бодуканин, нян урэкчэндулэ ойчирин нэӈэддэй. 29Ун нэӈэддэкэн, Ноӈан итин бадан хөнтэлбэрин, нян оин нёбаты, гилталри один. 30Дӫр-дэ бэил Ноӈнюнни укчэнритэн, тарак Моисей, Илья-да биситэн. 31Ноӈартан нянин хэрридун хуталрил эмчэл, Иисус Иерусалимтаки хөрэннэвэн дюгулин төрэддитэн. 32Петр, дялни-да хуклэнду ургэмкэпчэл биситэн, нян мялридюр, ноӈартан Иисус хэрридуку хуталриван, дӫр-дэ бэил анчиндулан илаттылбу иттытэн. 33Тарал бэил Иисустук хөрэдилрэкэтэн, Пётр Ноӈантакин гөнин:
– Хупкучимӈэ! Мут элэ бисэкэт ай. Илам элбэку илудакун: өмэм Хинду, гяв – Моисейду, иливутан – Ильяду.
Ноӈан эч хар, яв-да төрэрий. 34Петр төрэрий эдлэн мудакра, тогэчин ичулрин нян ноӈарбутан мэн хинянди дассин; тарбач Иисус хупкуттыӈэлни, тогэчин долан ими, хэӈулритэн. 35Нян тогэчин додукун дылган илрин:
– Эрэк Мин Аяврив Хуту, Мин Хинмачав, Ноӈман долчигралра.
36Тарак дылган бэриптэкэн, Иисус нян-да өмэккэн эмэптин. Хупкуттыӈэлни тарав хипкутывчиритан, нян мэр-дэ итчэвур таралдула инэӈэлдулэ, ӈитки-дэ эчилтэн тэлэӈрэ.
Ариӈкаду хилрив нярудю бэгдэчидек
37Гяла инэӈнэ урэкчэндук ноӈартан эврирэкэтэн, Иисусу хоя бэил арчанитан. 38Бэил илгалаӈчиндукатан додукун өмэн бэй иркалрин:
– Хупкучимӈэ! Хину накарам мин нярудьтэкив ичисэндэс! Ноӈан өмниву хуту! 39Ариӈкаду хилран: нян иркадиллоттан, нян ариӈка ноӈман хэмэрэвкэвэттэн, амӈадукун чоглика нёвкэкэн, тарбач ноӈман хилувканни, эсни-дэ тимсэ, аран-аран тивэттэн. 40Би Хин хупкуттыӈэлбус ариӈкав нёвкэндэтэн гасчирив, нян ноӈартан туркуритэн.
41Иисус-нян, барагми, гөнин:
– Эрэй, бэил, ач тэденэл, кэнелилбэчэл бэил! Оклан-нян Би хуннюн унэт биддим? Оклан-нян Би унэт хуну маӈчиддим? Час эвуски мэн няруди эмули.
42Нян тарак куӈа унэт ӈэнэддэкэн, ариӈка ноӈман төрлэ тыкукэнин, хэмэрукэнин-дэ. Иисус-нян ариӈкав нуруттин, куӈав айчирин, амандун-нян ноӈман алимуканин. 43Чэлэн бичэл бэил Хэвки Эгдендин Эӈидин мяӈчиритан.
Иисус Христос нян-да Мэн көкэдеки, арадяки-да мэтуттэн
Ок-ка чэлэн бичэл бэил Иисус некчэвэн мяӈчиддитан, Ноӈан хупкуттыӈэлтэкий гөнин:
44– Эрэв төрэм мэр коритлавур ивкэлрэ: Бэй Хутэн Оча бэил ӈаллатан бөвдин.
45Тарбач ноӈартан эчилтэн тарав төрэм унур, тарак төрэн унувканни ноӈардутан маӈи бисин, эчилтэн ноӈартан тарав унур, улгэмдэвур-нян Ноӈман яв-да тачин гөнчэвэн, ӈэлритэн.
Ӈи эгдедьмэр бисни
46Нян мэр дөливур эдукэчидилритэн, ӈи-нян ноӈардукатан эгдедьмэр бисни? 47Иисус-нян ноӈартан мулгамутан хами, куӈав гадыди, ноӈман мэн дюлдэлэй илуканин, 48нян ноӈартакитан гөнин:
– Ӈи эрэв куӈав Мин гэрбэлив алимдин, тарак Мину алимран, ӈи-нян Мину алимдин, тарак Хөрукэнчэв Мину алимран. Ӈи-ккэ хундук кучукэдьмэр, тарак эгден бидин.
49Таракам Иоанн Иисустэки гөнин:
– Хупкучимӈэ, бу бэю, Хин гэрбэдис ариӈкалбу нёвкэттив, коеривун, тарбач ноӈман нуруттывун, муннюн этилин гиркаватта тачин эдэн некрэ.
50– Эдилрэ нуруткилрэ: ӈи хуну дэпки эсни бис, тарак хуннюн бисни, – Иисус ноӈантакин гөнин.
Няниндук тог тикри
51Тарбач Иисус төрдук хөрувэдекэн инэӈэӈэн исадилракан, Ноӈан Иерусалимтаки хөрэмэлрин; 52нян мэтумӈэлби Мэн дюлдэлэй хөрукэнин, тарал-нян хөрритэн, Самариянскай билэклэ ӈэнритэн, Ноӈандун эйдугэн кимдавур. 53Тарбач тала Ноӈман эчилтэн алимра, Ноӈан Иерусалимтаки ӈэнэдды бадан бисэкэн. 54Тарав итми, Ноӈан хупкуттыӈэлни Иаков, Иоанн-да, гөнитэн:
– Хунӈи, некэмсэкэс, бу гөндиру, няниндук тог тиктэн, ноӈарбутан-да мадан, Илия некчэгчинни?
55Тарбач Ноӈан, ноӈартакитан ичисниди, ноӈарбутан нуруттин, нян гөнин:
– Ху эсэс хар, иррөчин-да дялунсан. 56Бэй Хутэн Оча бэил ханилбутан манача эсни бис, айчидай эмрин.
Нян хөнтэтки билэктэки хөрритэн.
Иисусту Христосту бодадяк
57Ноӈартан хотли ӈэнэддэкэтэн, ӈи-дэ Ноӈантакин гөнин:
– Хунӈи! Би Хинду боддим, авуски-да Хин ӈэнрэкэс.
58Иисус ноӈантакин гөнин:
– Хуличар кэӈрэлкэн бивэттэ, нянин дэгилни – хипкулкэр, нян Бэй Хутэн Оча дыли илэ-дэ нэдэй эсни хар.
59Гяткин-нян гөнин:
– Минду бодли.
Тарак барагрин:
– Хунӈи! Дюллэ-кэнэ дюткий ӈэндэку мину тыли, мэн амми алдыла нэдэку.
60Тарбач Иисус ноӈантакин гөнин:
– Көкэчэл мэр көкэчэӈэлбур мэркэсэл имаградатан, хи-нян Хэвки Тэгэмэрэдеккон мэтудэй ӈэнни.
61Унэт хөнтэ-нян гөнин:
– Хунӈи! Би Хинду боддим, тарбач дюлэгэч мину дюткий ӈэндэку тыли, мэн дялтакий хөррий болганадаку.
62Нян Иисус гөнин:
– Ӈи-ккэ төру улдэй эрум ӈаллай гами унэт амаски эсэнрэн, тарак Хэвки Тэгэмэрэдеклэн этэн айчивра.
Selectat acum:
Лука 9: eve
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
