Markɛ̀n 11

Zhezü bru Zherüzalɛmɛ̀n anmàn

(Nyɛ́n nyan Matie 21:1-11; Lükɛ̀n 19:28-40; mán Zhan 12:12-19 wrú lɔ mɛ̀n)

1Ɛnvra léyi yɔ vá Zherüzalɛmɛ̀n bru yri, Bɛtfazhe mán Betani anmàn tɛ̀sɛ̀n, yɔ cɔ́ ɛẅì-shi-tɛ̀ kɛ̀tɛ̀ tɔ̀n léyi dú ɛnkpò cɛ tɔ̀n wú nɔn; ɛẅì-shi-tɛ̀ ndɔ lɔ ye bi nɛ̀n Olivie. Zhezü wá n'ɛsɛ̀nkɛn-bɔ̀ anwrɔn anhyrɛ̀ ɔkɔ̀hɔ̀n kɛ hɛ́ yɔ ezì. 2Nɛ dɔ́ yɔ le: “Nyɛ́n hɔ́n anmàn léyi dú nyɛ̀n ezì nɔn. Ɛnvra léyi nyɛ lɛ cɔ́ nanvrɛn lɔ nɔn, frimú cɛ tɔ̀n, ɔwrɔn zriɛmɛ́n kɛ vá yɛ́ nɛ̀n ɛwúɛ, yɛ mɔɛ́n nɛ̀n. Nyɛ́n srú nɛ̀n ô nyɛ́n bɩ́ nɛ̀n nyɛ́n vá ɛnu lɔ. 3Kɩ ke dú kɛ ɔwrɔn tɔ̀n ke yrɛ nyɛ̀n le: ‘Cɛci kruhú kɛ nyɛ hán eci ndɔ lɔa?’ nyɛ́n dɔ́ nɛ̀n le: ‘Ɛẅɛnwrɔn ke ji ɛnɔ̀n lɔ, kɩ zɛtɛ̀ lɔ ye le vru ye bɩ́ nɛ̀n yɛ vá ɛnu lɔ.’ ”

4Zhezü kɔ̀hɔ̀n-wá-bɔ̀ anhyrɛ̀ lɔ nhɔ̀n kɩ cɔ́ frimú-ẅì lɔ ɛntrɛ, andrɛ́nmɔɛn mɛ̀n, yɔ mɔɛ́n nɛ̀n, ɔwɔn tɔ̀n gbàtà mùan; ɔkɔ̀hɔ̀n-wá-bɔ̀ anhyrɛ̀ lɔ srú frimú lɔ. 5Anwrɔn hɔ̀n léyi dú nanvrɛn lɔ nɔn ndɔ hɔ̀n ke yrɛ yɔ le: “Eci tán nyɛ hán? Cɛci kruhú kɛ nye srú frimú-ẅì ndɔ lɔa?” 6Ɔkɔ̀hɔ̀n-wá-bɔ̀ anhyrɛ̀ lɔ dɔ́ yɔ ankà léyi Zhezü dɔ́ wá yɔ nɔn, kɩ anwrɔn hɔ̀n lɔ teze yɔ yɔ hɔ̀n. 7Yɔ bɩ́ frimú-ẅì lɔ yɔ vá sɩ́ Zhezü; n'ɛsɛ̀nkɛn-bɔ̀ bɩ́ y'ɛceci-she lɔ ku ɔnɔ̀n ẅì lɔ ɛwú, kɩ Zhezü ci ɛwú yɛ́. 8Anwrɔn bobrebe bɩ́ y'ɛceci-she cüe ɛnlevriɛ, kɩ anwrɔn ndɔ hɔ̀n voyan antɛ̀-da ankɛ̀tɛmɛ̀n cüe ɛnlevriɛ. 9Anwrɔn hɔ̀n léyi dú Zhezü ezì kɛ nán esù mán yɔ hɔ̀n léyi dú nɛ̀n ɛmɛẅi nɔn ke di bobo kɛ dɔ̀ le: “Eci-zrɔ kè dú Ɔwɔ tɛ́n! Ɔwɔ shifù ke dú ɔwrɔn léyi kɛ vá ɛẅɛnwrɔn bɩ́mɛ̀n nɔn tɛn! 10Ɔwɔ kè fú Anhobɩ́ Nɛ̀ncüì-dúyri léyi kɛ và nɔn ɛnshi; Anhobɩ́ Nɛ̀ncüì-dúyri léyi dú bo zi Davidɛ̀n tɛn nɔn! Eci-zrɔ kè dú Ɔwɔ tɛ́n anhobɩ́ anmàn!” 11Zhezü bru Zherüzalɛmɛ̀n kɩ hɔ́n Ɔwɔ-cice-wɔn lɔ mɛ̀n. Ɛnvra léyi nɛ̀n nyan ɛci hɔ̀n lɔ fɛn léyi gbrɛnkɛn nɛ̀n ɔmùan nɔn, nɛ́n mán n'ɛsɛ̀nkɛn-bɔ̀ ɛvà-anhyrɛ̀ hɔ̀n lɔ mɛhi yɔ hɔ́n Betani anmàn, ɔmuhi ɛnvra mán bru ɛmɛ̀n nɔn.

Zhezü dá ɛẅì-shi-tɛ̀ tɔ̀n léyi ye bi fìgie nɔn ɛẅìɛ

(Nyɛ́n nyan Matie 21:18-19 wrú lɔ mɛ̀n)

12Ɛnvra léyi ɛcɛ̀n cüe, hɩ Zhezü mán n'ɛsɛ̀nkɛn-bɔ̀ kɛ lɛ cɔhɔ́ Betani anmàn nɔn, Zhezü ɔmùanwù kɛ ẅɛ̀n. 13Zhezü kán esùshe mɛ̀n ɛẅì-shi-tɛ̀ tɔ̀n léyi ye bi fìgie nɔn, ɛẅi bobrebe dú nɛ̀n ɛwú. Kɩ Zhezü hɔ́n nyan, ke dú kɛ nɛ lɛ cɔ́ ɛẅì n'ɛwú, tɛ́n ɛnvra léyi nɛ̀n cɔ́ ɛtɛ̀ lɔ ɛtɛ̀sɛ̀n nɔn ɛẅi sà kɩ dú nɛ̀n ɛwú, ɔmuhi ke sɩ̀ dù antɛ̀-ẅì shi vra nɔn. 14Zɛtɛn Zhezü dɔ́ ɛtɛ̀ lɔ le: “Ke sɩ́ ji le ɔwrɔnẅì zriɛmɛ́n kè vru kè zî v'ɛẅì lɔ mrìmrì!” Kɩ n'ɛsɛ̀nkɛn-bɔ̀ yá ankà léyi nɛ́n dɔ̀ nɔn.

Zhezü dú Ɔwɔ-cice-wɔn mɛ̀n

(Nyɛ́n nyan Matie 21:12-17; Lükɛ̀n 19:45-48; mán Zhan 2:13-22 wrú lɔ mɛ̀n)

15Zhezü mán n'ɛsɛ̀nkɛn-bɔ̀ cɔ́ Zherüzalɛmɛ̀n anmàn. Zhezü bru Ɔwɔ-cice-wɔn lɔ mɛ̀n kɩ bukru kɛ wrɔ́ ɛci-hɛ́-bɔ̀ mán ɛci-wɔ-bɔ̀ léyi dú nanvrɛn nɔn; nɛ́n tàká ɔkùa-crɔn-bɔ̀ tɛbrɛ̀ mán brɛndre-hɛ́-bɔ̀ kpata nɛ̀n cüe; 16kɩ nɛ̀n sɩ̀ teze ɔwrɔn zriɛmɛ́n kè bɩ ɛci kɛ̀ vɔ̀n Ɔwɔ-cice-wɔn lɔ mɛ̀n. 17Zɛtɛn nɛ̀n yé yɔ ankà kɩ nɛ̀n dɔ́ yɔ le: “Ɛwrú Prɔnprɔn hɔ̀n kɛ dɔ̀ le: ‘M'ɔwɔn lɔ ye le bi nɛ̀n fɛcüè hɔ̀n lɔ fɛn wɔ-sɛ́n-wɔn.’ Tɛ́n nyɛ tɛ́n, nyɛ́n bɩ́ nɛ̀n, nyɛ́n srɔ ɛci-yerɛ-bɔ̀ kpò nànmàn!” 18Ɔwɔ-cice-bɔ̀ cüìcüì mán ɛnyànmàn-gbànvri-ankà-yé-bɔ̀ yá ankà lɔ kɩ yɔ ji ɛyri ô yɔ di Zhezü owúemɛ̀n; annànwɔrɛ mɛ̀n lɔ yɔ ẅɛn n'esù, ɔmuhi fɛcüè lɔ fɛn kɛ yá n'ankà-yé lɔ nɔn. 19Ɛnvra léyi ɔwɔɛmɛ̀n ncɔ̀ nɔn, Zhezü mán n'ɛsɛ̀nkɛn-bɔ̀ cɔhɔ́ Zherüzalɛmɛ̀n anmàn.

Zhezü mán ɛẅì-shi-tɛ̀ léyi nɛ̀n dá ɛẅìɛ nɔn

(Nyɛ́n nyan Matie 21:20-22 wrú lɔ mɛ̀n)

20Ɛcɛ̀n cüe, ɔsɔ̀wrɔ̀ fùtàn, ɛnvra léyi Zhezü mán n'ɛsɛ̀nkɛn-bɔ̀ ci ɛnlevri mùan kɛ hɔ̀n nɔn, yɔ kán ɛtɛ̀ léyi Zhezü dá ɛẅìɛ nɔn, ɛẅi wrú nɛ̀n ɛwú hàn kɩ cɔ́ annyràn. 21Ɛtɛ̀ ẅìɛ-dà ankà lɔ wi bru Piɛrɛ̀n kɩ nɛ dɔ́ Zhezü le: “Ankà-yé-wrɔn, crɛ̀nyan ɛẅì-shi-tɛ̀ léyi ɛ̀ dá ɛẅìɛ nɔn ɛẅi wrú nɛ̀n ɛwú.” 22Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Mɛ dɔ́ nyɛ̀n annànwɔrɛ mɛ̀n le: Nyɛ́n ẅɛn ankàẅì-bùtan Ɔwɔ mɛ̀n! 23Ke dú kɛ ɔwrɔn tɔ̀n kɛ dɔ́ ɛnkpò cɛ ndɔ lɔ le: ‘Cɔhɔ́ ɛnu lɔ hɔ̀n bru ecüe mɛ̀n’, kɩ ke dú kɛ nɛ̀n sɩ̀ wá ɛnbɔrɛ anhyrɛ̀, tɛ́n ne bútan ankàẅì, eci lɔ kɛ lɛ hán kɛ lɛ tán nɛ̀n. 24Hɩ le kruhú de, mɛ dɔ́ nyɛ̀n le: Ɛnvra léyi nyɛ sán Ɔwɔ eci nɔn, hɩ nyɛ ẅɛn ankàẅì-bùtan nɔn, ke ji le nyɛ́n nyrì le, nyɛ́n cɔ́ eci lɔa kɩ yɛ lɛ tán nyɛ̀n eci lɔ. 25Kɩ ɛnvra léyi nyɛ nyɔn ɛwú nyɛ sɛ́n Ɔwɔ, ke dú kɛ ke bru nyɛ̀n le ɔwrɔn tɔ̀n mɛhi nyɛ́n ẅɛn ankà, ke ji le nyɛ́n bɩ́ ɛgbàn nyɛ́n ce nɛ̀n, ô nyɛ́n Zi Ɔwɔ léyi dú anhobɩ́ nɔn mán kè bɩ́ ny'ɛgbàn hɔ̀n lɔ kè ce nyɛ̀n. [26Tɛ́n ke dú kɛ nyɛ́n sɩ̀ bɩ ɛgbàn nyɛ́n cè nyɛ́n nyran hɔ̀n hô, nyɛ́n Zi Ɔwɔ léyi dú anhobɩ́ nɔn mán ke sɩ̀ bɩ́ ny'ɛgbàn hɔ̀n lɔ ke ce nyɛ̀n.]”

Tɛyri de Zhezü kɔrɛ̀levri lɔ ndù kɛ và nɛ́n?

(Nyɛ́n nyan Matie 21:23-27; mán Lükɛ̀n 20:1-8 wrú lɔ mɛ̀n)

27Zhezü mán n'ɛsɛ̀nkɛn-bɔ̀ mɛhi vru hɔ́n Zherüzalɛmɛ̀n anmàn. Ɛnvra léyi Zhezü dú Ɔwɔ-cice-wɔn lɔ mɛ̀n kɛ nán esù cì nɔn, Ɔwɔ-cice-bɔ̀ cüìcüì hɔ̀n, ɛnyànmàn-gbànvri-ankà-yé-bɔ̀ mán Ɔwɔ-bɔ̀ cüìcüì hɔ̀n hɔ́n nɛ̀n ɛtɛ̀sɛ̀n. 28Yɔ yrɛ Zhezü le: “Ɛkɔrɛ̀levri tán de, ɛ ẅɛ̀n ɛ hán ɛci ndɔ hɔ̀n lɔ nɛ́n? Antɔnwrɔn de tán mɛ́n ɛkɔrɛ̀levri ô ɛ̀ hán ɛci hɔ̀n lɔ nɛ́n?” 29Zhezü mrɛ́n yɔ ɔmùan le: “Me le yrɛ nyɛ̀n ankà zri; ke dú kɛ nyɛ tán mɛ̀n ɛmɛẅi ankà hô, mɛ lɛ dɔ́ nyɛ̀n ɛkɔrɛ̀levri léyi mɛ́n ẅɛ̀n hɩ mɛ hán ɛci hɔ̀n lɔ nɔn. 30Antɔn de wá Zhan ɔkɔ̀hɔ̀n kɛ̀ wá anwrɔn ɛnshi ɛnkru, Ɔwɔ kale anwrɔnẅìɛ? Nyɛ́n dɔ́ mɛ̀n.” 31Tɛ́n yɔ wrɔ́n ecüì y'angranmɛ̀n kɩ yɔ dɔ̀ le: “Ke dú kɛ bɔ́ mrɛ́n ɔmùan le: ‘Ɔwɔ de wá nɛ̀n ɔkɔ̀hɔ̀n’, ne le yrɛ bɔ̀ le: ‘Ecitan kruhú kɛ nyɛ́n sɩ́ bú, Zhan ankà nyɛ́n tán ankàẅìɛ?’ 32Tɛ́n ke dú kɛ bɔ́ dɔ̀ le: ‘Anwrɔnẅì de wá Zhan ɔkɔ̀hɔ̀n nɔn...’ ” (Yɔ sú fɛcüè, ɔmuhi yɔ lɔ fɛn yɔ bú Zhan yɔ hán ɔwɔ-mùanwú-ankà-dɔ́-wrɔn annànwɔrɛ.) 33Zɛtɛn yɔ mrɛ́n Zhezü ɔmùan le: “Bɔ́ sɩ̀ nyriɛn.” Zhezü mán mrɛ́n ɔmùan kɛ dɔ́ yɔ le: “Kɛ zrɔ, mɛ̀n mán mɛ́n sɩ̀ dɔ́ nyɛ̀n ɛkɔrɛ̀levri léyi mɛ́n ẅɛ̀n hɩ mɛ hán ɛci ndɔ hɔ̀n lɔ nɔn.”

Selectat acum:

Markɛ̀n 11: ƐAA03

Evidențiere

Partajează

Copiază